1-2. Maudigu musinke vana kuligwanekera nago vakareli vaJehova wovanzi ntani ngapi omu aga va kundama?

GAZADARA ko koyihonena eyi yitatu: Munazinyetu gomugara gomudinkantu kuna ka mu kwateka uvera ou ngau mu ninkisa a dire kukara nononkondo. Munazinyetu gomugara gokupitakana ponomvhura 50, vana mu hagekesa yirugana, nye nampili ngomu ana kukondja a papare ko yimwe, age kapi ana kuyigwana. Munazinyetu gomukadi gomukurupe kapi ana kuvhura kurugana unene mosirugana saJehova ngwendi nare.

² Nsene nove kuna kuligwanekera nomaudigu ogo, ove nampo kuna kulizuvha ngwendi kwato mulyo. Maudigu ogo kuvhura ga ku ninkise o dire kukara noruhafo ntani o lizuvhe udona nokukuninkisa o dire kukara nelikwatakano kumwe novakweni.

3. Ngapi omu Satana novantu ava ga pukisa ava tara eparu lyovantu?

³ Monkedi omu vantu ava tara eparu mouzuni ou, kulikida omu ga yi harera Satana. Kutunda kwanare, Satana kutekura vantu ngwendi awo kwato mulyo. Age kwa tanterere Eva a dire kulimburukwa kwaKarunga nampili ngomu ga yi divire asi ayo nga yi reta nomfa. Satana kwa pukisa hena nongesefa, maupolitika ntani nomaukarelikarunga gomouzuni ou. Eyi yiyo vanangesefa, novanapolitika ntani novampitisili womaukarelikarunga ava tarere eparu lyovantu asi kwato mulyo nokuvatekura momudona.

4. Yisinke natu ka zogera mosirongwa esi?

⁴ Jehova ana hara tu lizuvhe asi ose mulyo ntani age  kutuvatera apa atu ligwanekere nomaudigu aga aga tu ninkisa tu lizuvhe ngwendi kwato mulyo. (Epis. 136:23; Rom. 12:3) Sirongwa esi tasi ka zogera omu Jehova a tu vatere momaukaro aga gana kukwama ko: (1) Nsene ose kuna kuvera, (2) nsene kapi tuna kugwana yimaliwa yokugwanena po ntani (3) nsene ukurupe kuna kutuninkisa tu lizuvhe asi kapi tatu vhuru kuruganena Jehova unene. Nye pomuhowo tu zeni tu ka tare eyi ayi likida asi ose mulyo kwaJehova.

5. Yisinke ayi likida asi vantu mulyo kwaJehova?

⁵ Nampili ngomu twa tunda kombundu zevhu, ose mulyo unene. (Gen. 2:7) Gazadara ko konokonda dimwe edi adi likida asi ose mulyo kwaJehova. Age kwa sita vantu nevhuliko lyokuvhura kuhonena yikara yendi. (Gen. 1:27) Eyi kulikida asi ose mulyo unene kupitakana yininke nayinye eyi ga sita pevhu ntani age kwa yi tura nayinye konhi zepangero lyovantu.—Epis. 8:4-8.

6. Nokonda musinke hena dimwe adi likida asi vantu wokudira kusikilira mo mulyo kwaJehova?

⁶ Nampili konyima zapa ga zonene Adamu, Jehova simpe kwa twikira kutara vantu asi awo mulyo. Mokumona asi ose mulyo unene kwendi, eyi kwa mu ninkisire a tume Munwendi Jesus ogu ga hara yipo a ya tu zowore kononzo detu. (1 Joh. 4:9, 10) Morwa Jehova ga gava sizoweseso, age nga ka vhumbura vantu navenye ava va fa morwa nzo ezi va pinga kwaAdamu “va kare vawa ndi vadona.” (Yirug. 24:15) Nonkango dendi kulikida asi ose mulyo kwendi yikare asi ose kuna kuvera ndi ruhepo ndi twa kurupa.—Yirug. 10:34, 35.

7. Yisinke hena ayi likida asi ose mulyo kwaJehova?

⁷ Twa kara hena nonokonda dimwe edi adi likida asi ose mulyo kwaJehova. Age kwa tu kokera kwendi ntani age ga mwene omu twa tambwire mbudi zongwa. (Joh. 6:44) Apa twa tamekere kumuhedera pepi, nage kwa tu hederere pepi. (Jak. 4:8) Jehova kuruganesa hena siruwo sendi yipo a tu ronge, eyi kulikida asi ose mulyo kwendi. Age ga diva asi ose vantu musinke ntani neyi natu vhura kusikisa mo. Age kutupukurura morwa ga tu hara. (Yis. 3:11, 12) Maumbangi ogo kulikida asi ose mulyo kwaJehova!

8. Ngapi omu nonkango demEpisarome 18:27-29, adi kundama monkedi omu atu tara maudigu getu?

⁸ Vantu vamwe ngava tara hompa Ndafita ngwendi kwato mulyo, nye age ga yi divire asi Jehova ga mu hara ntani nga mu vatere. Eyi kwa vaterere Ndafita a lididimikire maudigu nomutaro gomuwa. (2 Sam. 16:5-7) Nsene tuna guwu ndi kuna kuligwanekera nomaudigu, Jehova kuvhura kutuvatera tu kare nomutaro gomuwa kuhamena maudigu getu nokutuvatera tu ga lididimikire. (Resa Episarome 18:27-29.) Nsene Jehova kuna kutuvatera, kwato eyi ngayi vhura kutukondera mokumukarera noruhafo. (Rom. 8:31) Tu zeni tu ka kona-kone maukaro gatatu aga aga tu ninkisa tu lizuvhe ngwendi asi ose kwato mulyo.

9. Ngapi omu uvera au tu kundama?

⁹ Uvera kuvhura kukundama malizuvho getu nokutuninkisa tu lizuvhe ngwendi ose kwato mulyo kovakwetu. Kuvhura tu life nomuga apa vakwetu ava dimburura ukaro wetu ndi nsene kapi tuna kuvhura kurugana yuma morwa kuna kuvera. Nampili vakwetu va dire kudiva ukaro wetu, poyiruwo yimwe kuvhura tu lizuvhe udona morwa kapi tuna kuvhura kurugana eyi ngatu rugana nare. Poyiruwo oyo, Jehova kuvhura kutuvatera. Monkedi musinke?

10. Kuliza noYisewe 12:25, yisinke nayi tu vatera nsene kuna kuvera?

 ¹⁰ Nsene kuna kuvera, “nonkango donongwa” kuvhura kutuvatera. (Resa Yisewe 12:25.) Jehova kwa tu tantera yininke yoyinzi yoyiwa moBibeli, eyi nayi tu vatera tu lizuvhe asi ose mulyo kwendi nampili kuna kuvera. (Epis. 31:19; 41:3) Nsene tu resa Nonkango daKarunga nokuruguruka kudiresa, age nga tu vatera tu lididimikire malizuvho gomadona aga atu kara nago nsene kuna kuvera.

11. Ngapi omu Jehova ga vaterere munazinyetu gumwe gomugara?

¹¹ Gazadara ko kosihonena saJorge. Apa ga kere mudinkantu, age kwa mu kwatekere uvera ou wa didire unene. Eyi kwa mu ninkisire a lizuvhe asi age kwato mulyo. Age kwa tanta asi: “Apa na tamekere kuvera, ame kapi na gazarere asi yimo ngani lizuvha ngesi ntani kapi nayindindilire omu vantu ngava tara nge morwa uvera wange. Apa uvera wange wa didire, ame kwa gazarere omu eparu lyange nga li litjindja. Ame kwa guvire sili unene, yipo na likwamberere kwaJehova a vatere nge.” Ngapi omu Jehova ga mu vaterere? Age kwa tanta asi: “Mokumona asi ayo ngayi digopere nge kukwata egano yininke, ame kwa korangedere nge ni rese novelise dononsesu moMapisarome, edi adi likida omu Jehova a pakere mbili vakareli vendi. Ame ngani ruguruka kuresa novelise odo nkenye ezuva ntani ado kwa korangedere nge nokupa nge ehuguvaro. Konyima zosiruwo, vantu kwa tente asi ame kwa tamekere kuzoragana. Ntani asi nkareso zange zokuzoragana kwava korangedere sili. Ame na ya dimbwilire asi Jehova ga limburura makanderero gange! Age kwa vatera nge ni rundurure monkedi omu ngani ligazara nyamwange. Ame kwa tamekere kudemenena kweyi da tanta Nonkango dendi kuhamena  omu Jehova a tara nge nampili ngomu a ni vere.”

12. Nsene kuna kuvera, yisinke no rugana yipo Jehova a ku vatere?

¹² Nsene kuna kuvera, diworoka asi Jehova ga diva eyi ono kupita. Likwambera kwendi a kuvatere o kare nomutaro gomuwa kuhamena maudigu goge. Makura ruganesa Bibeli o gwane nonkango donongwa edi nadi kuhengagwida. Demenena konovelise edi adi likida omu Jehova ga hara vakareli vendi. Nsene o yi rugana, ove ngo limonena omu Jehova a likida eharo kwanavenye ava ava mu karere noulimburukwi.—Epis. 84:11.

13. Ngapi omu a lizuvhu nturagumbo nsene ana zumbanesa yirugana?

¹³ Nkenye nturagumbo kwa hara kupakera mbili epata lyendi. Ngapi nsene munazinyetu a zumbanesa yirugana ga hana kuzona yuma? Nampo ta hetekere ko kupapara nayopeke nye kapi ana kuyigwana. Ayo kuvhura yi mu ninkise a lizuvhe ngwendi age kwato mulyo. Uwa musinke na gwanena mo nsene a demenena komatumbwidiro gaJehova?

14. Morwasinke Jehova a sikisire mo matumbwidiro gendi?

¹⁴ Jehova kusikisa mo matumbwidiro gendi nkenye apa. (Jos. 21:45; 23:14) Age ga kara nonokonda deyi a yi ruganene. Zokuhova, age kuyirugana yipo a dire kunyateka edina lyendi. Jehova kwa tumbwidira asi age nga pakera mbili vakareli vendi wovalimburukwi, ntani age ga tokomena kusikisa mo etumbwidiro olyo. (Epis. 31:1-3) Ntani mokumona asi ose kwa hamena kepata lyendi, Jehova ga yi diva asi nsene a dira kutupakera mbili, ayo ngayi tu guvisa. Age kwa tumbwidira asi nga tu pa yihepwa  yetu yopanyama neyi yopampepo ntani kwato eyi ngayi mu kondera mokuyisikisa mo!—Mat. 6:30-33; 24:45.

15. (a) Udigu musinke va ligwanekerere nawo Vakriste womosiruwo sovapositoli? (b) Ehuguvaro musinke atu gwana mEpisarome 37:18, 19?

¹⁵ Nsene tu diworoka nokonda deyi Jehova a sikisire mo matumbwidiro gendi, ose ngatu kara nehuguvaro asi age nga tu vatera nampili yi tu karere udigu kugwana yimaliwa yokugwanena po. Gazadara ko kosihonena soVakriste womosiruwo sovapositoli. Apa Vakriste womoJerusarema va ligwanekerere nomahepeko, “vapuli navenye kwa lihanene . . .  vapositoli velike va hupire mo.” (Yirug. 8:1) Gazara tupu omu ya va kundamene. Awo kwa ligwanekerere nomaudigu. Vakriste owo nampo kwa zumbanesere mambo gawo nonongesefa dawo. Nampili ngoso, Jehova kapi ga va sigililire ntani awo kwa twikilire kukara noruhafo. (Yirug. 8:4; Heb. 13:5, 6; Jak. 1:2, 3) Jehova kwa pakerere mbili Vakriste owo wovalimburukwi ntani nga twikira kutupakera nose mbili.—Resa Episarome 37:18, 19.

16. Ukaro musinke nau tu ninkisa tu lizuvhe ngwendi Jehova kapi ana kuhafera eyi tuna kumuruganena?

¹⁶ Nsene tuna kurupa, kuvhura tu tameke kulizuvha ngwendi kapi tuna kuruganena Jehova unene. Hompa Ndafita nage yimo ga lizuvhire ngoso apa ga kurupire. (Epis.71:9) Ngapi omu Jehova natu vatera?

17. Yisinke natu lirongera ko kweyi ya horokerere munazinyetu gedina Jheri?

¹⁷ Tu tareni sihonena sa munazinyetu gomukadi gedina Jheri. Age kwa mu zigidire va ka mu deure kumwe novakwawo yipo ngava pakere mbili Sinyanga soUhompa, nye pomuhowo age kapi ga here kuza ko.  Age kwa tente asi: “Ame na kurupa, mugara gwange ga dogoroka, ntani kwato eyi na diva kuhamena kupakera mbili Sinyanga. Ame kwato mulyo.” Age kwa kanderere kwaJehova masiku komeho li kare edeuro olyo. Apa ga ka sikire koSinyanga ezuva lyokukwama ko, age simpe kwa kere nomasinganyeko nsene asi ana wapere kukara pedeuro olyo. Apa lya tamekere elikwamo, munazinyetu gumwe ogu ga geve siuyungwa kwa tente asi yomulyo po kuna kara eharo lyokuhara kukuronga Jehova. Jheri kwa tente asi: “Tani litantere asi ‘name na kara neharo lyangoso.’ Yipo na tamekere kulira morwa na dimbwilire asi Jehova ana limburura ekanderero lyange. Age kwa likidire nge asi name na kara noyininke yomulyo eyi nani vhura kugava ntani age ana hara kudeura nge!” Jheri kwa tanta hena asi: “Apa na zire koSinyanga, ame kwa kere nowoma ntani kwa guvire. Nye konyima zedeuro olyo, ame kwa gwene ekorangedo ntani kwa lizuvhire asi name mulyo!”

18. Ngapi omu Bibeli za yi likida asi Jehova kuhafera eyi atu mu ruganene nampili tu kurupe?

¹⁸ Nampili tu kurupe, ose twa kara nehuguvaro asi Jehova simpe ana hara kuturuganesa. (Epis. 92:12-15) Jesus kwa tente asi nampili eyi tuna kurugana yi moneke ngwendi kwato mulyo kwetu, Jehova kuhafera nayinye eyi atu mu ruganene. (Ruk. 21:2-4) Yipo nye, demenena kweyi ono kuvhura kusikisa mo. Pasihonena, kuvhura o uyunge kuhamena Jehova, nokukanderera po vapuli vakweni ntani nokukorangeda wopeke va twikire kukarera Jehova noulimburukwi. Jehova kukutara asi ove murugani kumwe nendi morwa ulimburukwi woge nye kapisi morwa eyi ono kusikisa mo.—1 Kol. 3:5-9.

19. Ehuguvaro musinke atu gwana moVaroma 8:38, 39?

¹⁹ Ose tuna hafa kweyi atu karere Jehova ogu a tara ava ava mu karere asi mulyo. Age kwa tu sita tu mu karere, ano apa atu mu karere, ayo kuturetera ruhafo. (Ehor. 4:11) Nampili vantu womouzuni va tu tare asi ose kwato mulyo, Jehova kututara asi ose mulyo kwendi. (Heb. 11:16, 38) Nsene tuna guwu morwa kuvera, ndi morwa kapi tuna kara noyimaliwa yokugwanena po ndi ukurupe, ya wapa kudiworoka asi kwato eyi ngayi tu gusa mo meharo lyaKarunga.—Resa Varoma 8:38, 39.