1-2. Ino ngamapensho nshi bantu bakwe Yehova baanji ngobeendaamo, alimwi ino inga abapa kucita buyani?

AMUYEEYE pashakubonenaako shotatwe ishi: Mukwesu wacanike bamucana abulwashi bumana nkusu. Mukwesu ucite myaaka iindilila 50 bamukusha ncito, alimwi weelesha cankusu kwaamba ayi acane ncito imwi, sombi waalilwa. Nankashi wacinene ushomeka atokwaalilwa kusebensela Yehova kweelana ambwaakalinga kusebensa kale kale.

² Na amwebo mulicite mapensho mbuli aaya ngotwaambawo, mpashi inga mwatalika kulibona anga tamucitewo ncito. Mapensho amushobo uyu inga amupa kutaba alusangalalo, inga amupa kutalika kulibona anga taaku mbomubete, alimwi inga alengesha ayi cibe ciyumu kunyumfwana abamwi.

3. Ino Satana abantu mbwaatanjilila balabubona buyani buumi bwa muntu?

³ Bantu bamucishi cino balabona buumi bwa muntu bweenka mbuli Satana mbwaabubona. Satana alabona ayi bantu tabacitewo mpindu. Mukashanga wakalwiita Efa ayi alaakuba alwaanguluko na akake kunyumfwila Lesa. Satana wakalinga kucishi ayi na Efa akake kunyumfwila Lesa alaakufwa. Satana ngototanjilila bweende bwa makwebo, mapolitiki, abeshibupailishi boonse bali mubweende buno. Aboobo inga tatukankamani abeshimakwebo, beshimapolitiki, abamatanjilili babupailishi ncobacitila shintu shitondesha ayi tababoni bantu kuba bayandika.

4. Ino mutwi uyu utootucafwa kushiba nshi?

⁴ Yehova lakwe alisuni kwaamba ayi tunoobona ayi tulayandika, alimwi alatucafwa na twacana mapensho eenga atupa  kulinyumfwa anga tatucitewo ncito. (Kulu. 136:23; Loma. 12:3) Mutwi uyu utootucafwa kushiba Yehova mbwaatucafwa na: (1) Twaciswa, (2) shintu shayuma ceebo cakubula maali, alimwi na (3) kukula kwatalika kutupa kulinyumfwa anga Yehova inga taatusebenseshi. Ano cakutaanguna amuleke tubandike sheenga shatupa kushoma kwaamba ayi soonse tulayandika kuli Yehova.

5. Ino nciinshi cimupa kushoma kwaamba ayi Yehova alabona ayi bantu balayandika?

⁵ Nabi kwaamba ayi Yehova wakatupanga kuswa kubulongo, tulayandika abuumbi kwiinda lusuko. (Mata. 2:7) Amuyeeye pashintu shimwi sheenga shatupa kushoma kwaamba ayi ncakwiila Yehova alatubona ayi tulayandika. Wakatulenga ankusu shakucikonsha kukonkela mibo yakwe. (Mata. 1:27) Ishi shakapa kwaamba ayi bantu babe bapusene abuumbi ashilengwa shimwi shoonse pacishi, alimwi wakapa muntu incito yakulama cishi ashinyama.​—Kulu. 8:4-8.

6. Ino nciinshi cimwi citupa kushoma kwaamba ayi Yehova alabona ayi bantu batasalalite balayandika?

⁶ Nabi Adamu ndyaakabisha, Yehova wakatolelela kutondesha ayi muntu alayandika. Alatubona ayi tulayandika abuumbi nceceeco ncaakatumina Mwanaakwe ngwaasuni abuumbi, Yesu, kwaamba ayi atulubule kuswa kushibiibi shesu. (1 Joni 4:9, 10) Kwaamba ayi bantu bakafwa ceebo ca kubisha kwakwe Adamu abalo bakafubileemo mucilubula cakwe Yesu, Yehova alaakubabusha. Alaakubusha “baluleme abataluleme.” (Milimo 24:15) Maswi akwe Lesa alatulwiita ayi Yehova alatolelela kutubona ayi tulayandika nabi ndyetwaciswa, na kuba alipenshi lya maali, nabi kucembela.​—Milimo 10:34, 35.

7. Ino nshiinshi shimwi shipa basebenshi bakwe Yehova kushoma kwaamba ayi alababona ayi balayandika?

⁷ Kuli ashimwi shitupa kushoma kwaamba ayi Yehova alatubona ayi tulayandika. Wakatupa coolwe cakuba beshicibusa bakwe akubona mbotwakakondwa kutambula makani abotu. (Joni 6:44) Ndyetwakatalika kusena pafwiifwi anguwe, alakwe wakasena pafwiifwi andiswe. (Jemu. 4:8) Kwiilikaawo, Yehova alasebensesha ciindi ankusu shakwe kutwiisha, kutondesha kwaamba ayi alatubona ayi tulayandika kuli nguwe. Alitushi kabotu mbotubete alimwi alicishi ambweenga twaba na watwiisha. Alimwi alatululika mukwiinga alitusuni. (Tus. 3:11, 12) Ishi shoonse shilatondesha ayi ncakwiila Yehova alatubona ayi tulayandika!

8. Ino Kulumbaisha 18:27-29 inga yatupa kunoobona buyani mapensho ngotwiindaamo?

⁸ Nabi kwaamba ayi bamwi bakalinga kubona anga Mwaami Defedi taakalinga kucite ncito, Defedi mwiine wakalinga kucishi ayi Yehova alimusuni alimwi wakalinga kumucafwa. Kushiba cancine ici kwakacafwa Defedi kutolelela kuliyumya akubona shintu munshila ibete kabotu. (2 Samwe. 16:5-7) Na twalisukama nabi na ndyetuli mumapensho, Yehova inga watucafwa kunoobona shintu munshila ibete kabotu akucikonsha kukoma mapensho. (Amubelenge Kulumbaisha 18:27-29.) Na Yehova ali kulubasu lwesu, taakuwo ceenga capa kwaamba ayi twaalilwe kumusebensela calusangalalo. (Loma. 8:31) Atubandike pamapensho otatwe ngweenga twacaana ndyetweelete kwiibaluka kwaamba ayi Yehova alitusuni alimwi alatubona ayi tulayandika.

9. Ino kuciswa inga kwatupa kunoolibona buyani?

⁹ Kuciswa inga kwatupa kuba abuumba abuumbi akutalika kunoolibona anga tatucitewo ncito. Mpashi inga twanyumfwa nsoni ceebo cakubona mbotutokwaalilwa kulicitila shintu sobeene. Alimwi nabi kwaamba ayi bamwi tabacishiwo ayi tuli balwashi, inga twalinyumfwa cibiibi abuumbi ceebo cakwaalilwa kucita nshetwakalinga kucikonsha kucita katutana  kuciswa. Na ubu mbotutoolinyumfwa, Yehova inga watuyuminisha. Munshila nshi?

10. Kweelana a Tusimpi 12:25, ino nciinshi ceenga catucafwa na twaciswa?

¹⁰ Na twaciswa, “maswi abotu” inga atuyuminisha. (Amubelenge Tusimpi 12:25.) Mu Baibo, Yehova alatulwiita maswi abotu eenga atwiibalusha kwaamba ayi alatubona ayi tulayandika nabi ndyetwaciswa. (Kulu. 31:19; 41:3) Na katubelenga maswi aya cakwiindulukaamo, Yehova inga watucafwa kutalisukama abuumbi ceebo cakuciswa kwesu.

11. Ino Yehova wakamucafwa buyani mukwesu Jorge?

¹¹ Atubandike shakeendaamo mukwesu Jorge. Mukwesu uyu wakaciswa bulwashi ubo bwakakomena abuumbi paciindi ciniinibo, akumupa kulinyumfwa anga taacitewo ncito. Wakaamba ayi: “Nshindakalinga kwiingashitewo ayi inga ndaciswa, aboobo ndakalinga kulinyumfwa cibiibi abuumbi mukwiinga bantu baanji bakalinga kunangilisha abuumbi ceebo ca bulwashi mbondakalinga kuciswa. Bulwashi ndyebwakaya panembo ndakatalika kuyeeya pabuumi bwangu mbweshi bukaciinje. Ndakalisukama abuumbi akusenga Yehova kwaamba ayi ancaafwe.” Ano sa Yehova wakamucafwa mukwesu uyu? Wakatolelela akwaamba ayi: “Mukwiinga ndakalinga kwaalilwa kubelenga shiinji, ndakalinga kubelengabo mavesi amwi kuswa mulilembo lya Kulumbaisha ayo atondesha kwaamba ayi Yehova alalama basebenshi bakwe. Ndakalinga kubelenga mavesi aya cakwiindulukaamo alimwi akalinga kunjuminisha. Mukuya kwaciindi bantu bakabona ayi ndatalika kuboneka kuba usangalete. Bakalinga kundwiita ayi citoobayuminisha abuumbi ubu mbondatalika kuboneka usangalete. Ndakashoma kwaamba ayi Yehova wakakumbula mipailo yangu! Wakancafwa kucileka kulibona ayi nshiciteewo ncito. Ndakatalika kubikila maano abuumbi ku Maswi akwe Lesa mbwatondesha ayi ndayandika  kuli nguwe nabi kwaamba ayi ndakalinga mulwashi.”

12. Ino inga mwacita buyani kwaamba ayi Yehova amucaafwe na muli balwashi?

¹² Na muli balwashi, amushome cakutatoonsha ayi Yehova alishi mbomutoolinyumfwa. Amumusenge kwaamba ayi amucaafwe kunoolibona ayi mulayandika. Lyalo amulangoole maswi abotu Yehova ngwaakamubikila mu Baibo ayo eenga amuyuminisha. Amubikile maano abuumbi kumbasu shamu Baibo shitondesha Yehova mbwaabona basebenshi bakwe ayi balayandika. Kucita boobo kulaakumucafwa kubona Yehova mbwaatondesha nkumbu kubaabo boonse bamusebensela cakushomeka.​—Kulu. 84:11.

13. Ino mutwi wa mukwashi inga walinyumfwa buyani na wakushikwa ncito?

¹³ Mutwi wa mukwashi uli woonse alisuni kulangweta mukwashi wakwe shiyandika. Ano cimwi ciindi mukwesu inga bamukusha ncito nabi kwaamba ayi taakuwo cibiibi ncaacita. Inga weelesha kucita nsheenga wacikonsha kwaamba ayi acane incito imwi, sombi akwiicanaobo. Bukaalo ubu inga bwamupa kulinyumfwa anga taacitewo ncito. Ino kubikila maano kushishomesho shakwe Yehova inga kwamucafwa buyani?

14. Ino nceebonshi Yehova ncaakumanishila shishomesho shakwe?

¹⁴ Yehova lyoonse alakumanisha shishomesho shakwe. (Joshu. 21:45; 23:14) Kuli shiinji shipa kwaamba ayi acite boobo. Cakutaanguna ncakwaamba ayi kukumanisha nshaashomesha kulapa kwaamba ayi liina lyakwe lilemekwe. Yehova wakashomesha ayi alaakunoolama basebenshi bakwe bashomeka, aboobo alisuni abuumbi kukumanisha cishomesho ico. (Kulu. 31:1-3) Kwiilikaawo, Yehova alicishi kwaamba ayi mukwiinga tuli lubasu lwa mukwashi wakwe,  inga twalinyumfwa cibiibi abuumbi na waalilwa kutubikilako maano. Wakatushomesha ayi alaakunootupa shiyandika lwakumushimu a lwakumubili, taakuwo cintu nabi comwi ceshi cikape kwaamba ayi aalilwe kukumanisha nshaakashomesha!​—Mate. 6:30-33; 24:45.

15. (a) Ino ndipenshi nshi Beneklistu bamuciindi ca batumwi ndyebakacana? (b) Ino Kulumbaisha 37:18, 19 ilatucafwa kushoma nshi?

¹⁵ Kwiibaluka Yehova ncaakumanishila shishomesho shakwe kulaakutucafwa kushoma kwaamba ayi alaakutucafwa na buumi bwesu bwayuma ceebo cakubula maali. Amuyeeye mbocakalinga ku Beneklistu bamuciindi ca batumwi. Kupenshekwa kunene ndyekwakatalika ku Jelusalemu, ‘boonse bakapalangana kukushakobo batumwi.’ (Milimo 8:1) Amuyeeyebo mapensho ngobakacana ndyebakapalangana! Cilyeelete kwaamba ayi bakashiya maandaabo alimwi amakwebo ngobakalinga kucite na incito nshobakalinga kusebensa, alimwi ici cilyeelete cakapa buumi kuyuma uko nkobakaya mukwiinga tabakalinga kucitewo maali. Nacibi boobo, Yehova taakwe kubalekelesha alimwi bakatolelela kuba alusangalalo. (Milimo 8:4; Ebu. 13:5, 6; Jemu. 1:2, 3) Yehova wakabacafwa Beneklistu bashomeka, aboobo aswebo alaakutucafwa.​—Amubelenge Kulumbaisha 37:18, 19.

16. Ino nciinshi ceenga catupa kutalika kubona anga taakuwo nceenga twaciita muncito yakwe Yehova?

¹⁶ Ndyetutooya bucembela, inga twatalika kubona anga taakuwo nsheenga twaciita muncito yakwe Yehova. Mpashi Mwaami Defedi alakwe mbwaakalinga kulinyumfwa ndyaakatalika kucembela. (Kulu. 71:9) Ino Yehova inga watucafwa buyani?

17. Ino nshiinshi nsheenga tweeya kuswa kushakacitikila nankashi Jheri?

¹⁷ Amuyeeye cakubonenaako cakwe nankashi Jheri. Bakamwiita kwaamba ayi akacanikeeko  kukubungana kwa baabo mbobakalinga kwiisha bwakulama misena motubunganina, sombi taakalinga kusuni kuyaako. Wakaamba ayi: “Ndacembela, ndimukalubinje, alimwi taakuwo alushibo ndooncite Yehova ndweenga wasebensesha. Nshiciteewo ncito.” Mashiku bushiku bwa kubungana uku kabutana kushika, nankashi uyu wakapaila kuli Yehova kuswa panshi lya moyo. Ndyaakashika pa Ŋanda ya Bwaami bushiku bwakaboolawo, wakalisukama mukwiinga wakalinga kubona ayi taakuwo nceenga wacitawo. Kubungana uku ndyekwakatalika, mukwesu womwi pabaabo bakalinga kwiisha, wakayuminisha pamakani akwaamba ayi cintu ciyandika abuumbi teshi lushibo ndotucite sombi kulyaaba kwaamba ayi twiishikwe a Yehova. Nankashi Jheri wakaamba ayi: “Ndakatalika kuyeeya ayi, ‘Ndisuni kwiishikwa a Yehova!’ Lyalo ndakatalika kulila ndyendakabona ayi Yehova wakumbula mupailo wangu. Yehova wakalinga kunjuminisha ayi kuli ncito iyandika njeenga ndamusebensela alimwi wakalinga kusuni kunjiisha!” Wakatolelela akwaamba ayi: “Nabi kwaamba ayi ndakalinga kulisukamite ndyendakalinga kuya kukubungana uku, ndakaswaako alusangalalo abuumbi mukwiinga ndakayuminishikwa akushiba kwaamba ayi ndayandika!”

18. Ino Baibo ilaamba nshi shitondesha ayi Yehova alatolelela kubona ayi kulambila kwesu kulayandika nabi twacembela?

¹⁸ Nabi ndyetutooya bucembela, inga twashoma cakutatoonsha kwaamba ayi kuli nsheenga twaciita muncito yakwe Yehova. (Kulu. 92:12-15) Yesu wakatwiisha ayi, nabi kwaamba ayi nshetutoocita muncito yakwe Yehova shiboneke anga nshiniini, Yehova alabona ayi kulyaaba kwesu kuli koonse nkotucita mulibunga lyakwe kulayandika. (Luka 21:2-4) Aboobo amubikile maano kusheesho nsheenga mwacikonsha kucita. Kucakubonenaako, inga mwalwiitako bamwi pali Yehova, kupaililako bamakwesu abenankashi, alimwi akuyuminisha bamwi kwaamba ayi batolelele kushomeka. Yehova alamubona mbuli musebenshinyina, kuteshi ceebo ca kufula kwa ncito nsheenga mwasebensa, sombi ceebo ca mbomulyaaba akumunyumfwila.​—1 Koli. 3:5-9.

19. Ino lilembo lya Bene Loma 8:38, 39 lilatucafwa kushoma nshi?

¹⁹ Tulakondwa abuumbi kusebensela Yehova, mukwiinga ngu Lesa ubona kuyandika kwa baabo bamusebensela! Wakatulenga kwaamba ayi tunoocita kuyanda kwakwe, alimwi kulambila kwancine nkokutupa kuba alusangalalo. (Ciyu. 4:11) Nabi kwaamba ayi bantu bamucishi batubone anga tatucitewo ncito, Yehova alatubona ayi tulayandika. (Ebu. 11:16, 38) Na twalisukama ceebo cakwaamba ayi twaciswa, buumi kuyuma ceebo cakubula maali, na kucembela, atwiibaluke kwaamba ayi taakuwo ceenga catupansaanya kulusuno lwakwe Ishiwesu wakwiculu.​—Amubelenge Bene Loma 8:38, 39.