Yako kaha kuvihande

Yenu kumitwe yavihande

CHIHANDE CHAKULINANGULA 3

Yehova Kalunga Kenu Amimona Kupwa Muvavalemu

Yehova Kalunga Kenu Amimona Kupwa Muvavalemu

“Atwanukile omu vatwinyishile.”—SAMU 136:23.

MWASO 33 Mbila Chiteli Chove Hali Yehova

VYUMA NATUSHIMUTWILA *

1-2. Ukalu muka vali nakumona vatu jaYehova vavavulu, kaha vyuma muka vinahase kufumamo?

ACHISHINGANYEKENU havyakutalilaho vino vitatu: Ndumbwetu wamukweze vanamuwane namusongo waunene. Ndumbwetu walunga wamyaka yakuzomboka 50 nawa vanamufumisa hamilimo, kaha neseka kutonda milimo yeka oloze kayiwanyineko. Kaha nawa ndumbwetu wapwevo wakashinakaji keshi cheka nakuzachila Yehova ngana muze azachilenga kuukwezeko.

2 Kachi nge muli nakumona ukalu tunavuluka, kaha munahase kwivwa nge kamwatelemo cheka kumizachisako. Ukalu kana unahase kumihombesa nakumilingisa mulivwe kupwa muvamokomoko, nakuhona kutwama kanawa navakwenu.

3. Uno Satana navatu vaze eji kutwaminyinanga mukaye vamona ngachilihi kuyoya chavatu?

3 Vatu mukaye vamona kuyoya chavatu nganomu achimona Satana. Kufuma vene kushikulu, Satana kamona vatu kupwa vavalemuko. Ongele Eve ngwenyi mwapwa wakulihehwa, okunyi atachikijile vene ngwenyi kulikanga kuli Kalunga cheji kunehanga kufwa. Satana ikiye eji kutwaminyinanga vaka-mapolitiki, namauka akusekasana, nakwitava chamakuli. Echi chikiko cheji kulingisanga vaka-kusekasana vamwe navaka-mapolitiki navatwamina vamukwitava vahone kuzakama vatu.

4. Vyuma muka natushimutwila muchihande chino?

4 Yehova kasaka tulivwe kupwa tuvamokomokoko, ngocho eji kutukafwanga tuhone kuhomba nge tuli muukalu. (Samu 136:23; Loma 12:3) Chino chihande nachisolola omwo Yehova eji kutukafwanga muukalu wakufwana nge misongo, uhutu, chipwe kushinganyeka ngwetu katwatelemo kutuzachisa mwomwo yaushinakajiko. Tuvangilenu kushimutwila havyuma vyatela kutulingisa tufwelele ngwetu Yehova atumona kupwa tuvavalemu.

YEHOVA ATUMONA KUPWA TUVAVALEMU

5. Mwatachikiza ngachilihi ngwenu Yehova amona vatu kupwa vavalemu?

5 Numba tuhu Yehova atutenga nalukungu, oloze atumona kupwa tuvavalemu chikuma. (Kupu. 2:7) Twatachikiza ngachilihi ngwetu Yehova atumona kupwa tuvavalemu? Mwomwo atutenga nauhashi wakuhasa kumulondezeza. (Kupu. 1:27) Hakuwana nge atutenga mujila kaneyi, shikaho atulingisa kupwa tuvavalemu kuhambakana vyuma vyakutenga vyosena vyahano hamavu, kaha nawa atuhana wata wakulama mavu natunyama.—Samu 8:4-8.

6. Chuma muka chikwavo chatulingisa tutachikize ngwetu Yehova amona vatu kupwa vavalemu?

6 Numba tuhu Alama alingile shili, oloze Yehova atwalileho lika kuzanga vatu. Echi chikiko chamulingishile atume Mwanenyi Yesu kwiza nakuhana wana wandando yakusokola. (Yowa. 1, 4:9, 10) Eyi ndando yakusokola yikiko nayikalingisa Yehova akasangule “vaka-kwoloka navaka-kuhenga” vaze veji kufwanga mwomwo yashili aneha Alama. (Vili. 24:15) Mbimbiliya yasolola hatoma ngwayo, twapwa tuvavalemu chikuma kuli Yehova chamokomoko namisongo tunahase kuviza chipwe uhutu chipwe ushinakaji.—Vili. 10:34, 35.

7. Vyuma muka vikwavo vyalingisa vangamba jaKalunga vejive ngwavo Yehova avamona kupwa vavalemu?

7 Twatachikiza nawa ngwetu Yehova atumona kupwa tuvavalemu, mwomwo atupandamishile kuli ikiye hakumona omu twakwile kumujimbu wamwaza. (Yowa. 6:44) Kahomu twaputukile kupandama kuli ikiye, naikiye apandamine kuli etu. (Yako. 4:8) Kaha nawa Yehova eji kuzachisanga lwola lwenyi nangolo jenyi hakutunangula, kulumbununa nge atumona kupwa tuvavalemu. Atachikiza kanawa omwo twapwa nomwo tunahase kupwa kachi nge mwatunangula. Kaha nawa eji kutuzangamisanga mwomwo atuzanga chikuma. (Vishi. 3:11, 12) Chikupu vene, Yehova atumona kupwa tuvavalemu chikuma.

8. Uno mazu ahali Samu 18:27-29 nawatukafwa ngachilihi nge tuli muukalu?

8 Vatu vamwe vamwenenga Mwangana Ndavichi kupwa wamokomoko, oloze Yehova amumwene kupwa wamulemu nakumukafwa. Ndavichi omike muukalu amwenenga mwomwo atachikijile ngwenyi apwile wamulemu. (Samwe. 2, 16:5-7) Kachi nge tunahombo chipwe nge tuli nakumona ukalu, Yehova mwatukafwa tumike muukalu kana. (Tangenu Samu 18:27-29.) Kachi nge Yehova ali nakutukafwa, kaha natutwalaho kumuzachila nakuwahilila. (Loma 8:31) Tushimutwilenu jino havyuma vitatu vize vinahase kutulingisa tushinganyeke ngwetu pamo Yehova katumona kupwa tuvavalemuko.

NGE MULI NAKULIPIKA NAMISONGO

Kutanganga mazu aYehova nachitukafwa tuhonenga kuhomba kachi nge tuli nakulipika namisongo (Talenu palangalafu 9-12)

9. Uno misongo yinahase kutulingisa tushinganyeke ika?

9 Misongo yinahase kutuhombesa nakutulingisa tushinganyeke ngwetu katweshi cheka tuvavalemuko. Tunahase kwivwa sonyi mwomwo yakuhona kulizachila milimo yimwe etu vavene. Numba vene nge vakwetu kavejivile ngwavo twavizako, oloze tunahase kwivwa kupihya mwomwo katweshi cheka ngana muze twapwileko. Nahalwola lwakufwana ngana, Yehova eji kutukafwanga. Uno eji kutukafwanga ngachilihi?

10. Kweseka nachisoneka chaVishimo 12:25, chuma muka nachitukafwa nge tuli nakuviza?

10 Kachi nge tunaviji, “mazu amwaza” akiko anahase kutukolezeza. (Tangenu Vishimo 12:25.) Mbimbiliya yatwama namazu amwaza aze nawatulingisa twanuke ngwetu Yehova atumona kupwa tuvavalemu numba tuhu tuli nakuviza. (Samu 31:19; 41:3) Shikaho, nge natutanganga Mbimbiliya, kaha Yehova mwatukafwa tuhone kuhomba numba vene nge tunaviji.

11. Ndumbwetu umwe vamukafwile ngachilihi kuli Yehova?

11 Omu Jorge apwile kanyike, apwilenga namusongo uze wapwile nakutohwa mulumbushi, nakumuhombesa. Ambile ngwenyi: “Musongo kana wejile mukukasumuna, kaha nawa wangulingishile ngwivwenga sonyi. Kahomu waputukile kungutekeleka, ngwevwile kwijiva namuvifuwa keke, ngocho ngwalombele kuli Yehova.” Jino Yehova amukafwile ngachilihi? Ambile ngwenyi: “Hakuwana nge changukaluhwililenga kwanuka vyuma, vandumbwami vangukolezezele ngutangenga mazu amandende amandende mumukanda waJisamu aze asolola nge Yehova eji kuzakamanga vangamba jenyi. Ngwatangilenga mazu kana hakumbi hakumbi, kaha angukolezezele chikuma. Kutwala muze, vatu vaputukile kungumona ngunawahilila. Vangulwezelenga ngwavo kumika chami chavakolezezele mwamunene. Ngwamwene jino ngwami chikupu vene Yehova nakumbulula kulomba chami, mwomwo angukafwile nguhone kutwalaho kuhomba. Mbimbiliya yangukafwile ngumone ngwami Yehova angumona kupwa nguwamulemu chamokomoko namisongo yami.”

12. Yehova mwamikafwa ngachilihi nge muli nakulipika namisongo?

12 Kachi nge muli nakulipika namisongo, kaha fwelelenu ngwenu Yehova atachikiza ukalu muli nakumona. Shikaho, mulombenu amikafwe muhone kuhomba. Kaha nawa tangenunga Mbimbiliya mwomwo mwatwama mazu aYehova amwaza. Shishikenu chikuma hajivesi jize jasolola nge Yehova amona vatu jenyi kupwa vavalemu. Nge namulinga ngocho, kaha namumona ngwenu Yehova apwa wamwaza.—Samu 84:11.

NGE MULI NAKULIPIKA NAUHUTU

Kwanukanga ngwetu Yehova atushika ngwenyi mwatuzakamanga, nachitukafwa tuhone kuhomba nge chili nakutukaluhwila kuwana milimo (Talenu palangalafu 13-15)

13. Uno mutwe watanga nahase kwivwa ngachilihi nge vanamufumisa hamilimo?

13 Mitwe yajitanga yosena yazanga kutondela vaka-tanga yavo mwakuyoyela. Achishinganyekenu ndumbwetu vanamufumisa hamilimo, kaha neseka kutondatonda yeka oloze kuyiwana chauchi. Ukalu kana unahase kulingisa ndumbwetu alivwe kupwa wamokomoko. Uno kushinganyeka havyuma atushika Yehova nachikafwa ngachilihi ndumbwetu uze ali muukalu kana?

14. Vyuma muka vyeji kulingisanga Yehova atesemo jishiko jenyi?

14 Yehova eji kutesangamo jishiko jenyi. (Yoshu. 21:45; 23:14) Mwomwo ika? Chatete, nge keshi kutesamo jishiko jenyiko, kaha chinahase kulingisa lijina lyenyi valisaule. Mazu enyi atulweza ngwawo mwazakamanga vangamba jenyi vakushishika, ngocho afwila kutesamo lushiko kana. (Samu 31:1-3) Kaha nawa atachikiza ngwenyi nge keshi kutuzakamako, kaha nachitulingisa tuhombe. Atufwelelesa ngwenyi mwatuzakamanga kumujimba nakushipilitu, ngocho kakweshi chuma nachimuhonesa kutesamo lushiko kanako.—Mateu 6:30-33; 24:45.

15. (a) Ukalu muka vamwene vaka-Kulishitu vamulikulukaji lyamyaka lyakulivanga? (b) Chisoneka chaSamu 37:18, 19 chatufwelelesa ika?

15 Nge natwanukanga ovyo vyeji kulingisanga Yehova atesemo jishiko jenyi, kaha katweshi kuhomba nge tuli nakulipika naukalu wauhutuko. Achishinganyekenu chakutalilaho chavaka-Kulishitu vamulikulukaji lyamyaka lyakulivanga. Omu chikungulwilo chamuYelusalema vapwile nakuchiyanjisa, ‘vosena valimwangile, kufumisako kaha vaposetolo.’ (Vili. 8:1) Echi chalingishile ava vaka-Kulishitu vapwenga muuhutu, mwomwo pamo vasezele membo avo nakusekasana chavo. Chipwe ngocho, Yehova kavasezeleko. (Vili. 8:4; Hepe. 13:5, 6; Yako. 1:2, 3) Avakafwile, shikaho nayetu mwatukafwa.—Tangenu Samu 37:18, 19.

NGE MULI NAKULIPIKA NAUSHINAKAJI

Kushinganyeka havyuma tunahase kulinga chamokomoko naushinakaji, nachitukafwa tumone ngwetu Yehova amona milimo tweji kumuzachilanga nakashishi kupwa yayilemu (Talenu palangalafu 16-18)

16. Ukalu muka unahase kutulingisa tushinganyeke ngwetu pamo Yehova keshi nakumona milimo tuli nakumuzachila kupwa yayilemuko?

16 Nge mutu naputuka kushinakajiwa, pamo nahase kulivwa nge keshi kuhasa cheka kuzachila Yehova ngana muze alingilenga kunyimako. Pamo omu mukiko evwile naMwangana Ndavichi. (Samu 71:9) Jino Yehova mwatukafwa ngachilihi?

17. Vyuma muka natulinangula kumujimbu wandumbwetu Jheri?

17 Achishinganyekenu chakutalilaho chandumbwetu wapwevo Jheri. Omu vamusanyikile kushikola yakulinangula vyakuwahisa vihela vyakulemesela Yehova yize yapwililile muZuvo yaWangana, ikiye kasakile kuyako. Ambile ngwenyi: “Ami ngunashinakajiwa lyehi, kaha nawa ngutuliwe. Kakweshi mulimo numba umwe ngwatachikizako. Shikaho kangwatelemo kunguzachisako.” Kuheta haufuku wakukokela kulikumbi lyakuliwana kana, alombele namuchima wosena kuli Yehova. Omu akahetele kuZuvo yaWangana, apwile nakulivwa lika kupwa wamokomoko. Oloze ndumbwetu umwe hali vaze vapwile nakuvanangula ambile ngwenyi, chuma chachilemu shina kupwa namuchima wakulisuula kwitavila Yehova atunangule. Jheri ambile ngwenyi: “Ngwashinganyekele ngwami, ‘nayami nguli namuchima kana.’ Ngwaputukile kulila mwomwo ngwamwene ngwami Yehova nakumbulula kulomba chami. Angufwelelesele ngumone ngwami angusanyikile nakungunangula mwomwo angumwene kupwa nguwamulemu.” Ambile nawa ngwenyi: “Omu twaputukile kulinangula ngwevwile woma, kaha nawa ngwamwene ngwami kangweshi kuvihasako. Oloze hakukumisa ngwalivwile kupwa nguwamulemu chikuma, kaha nawa kangwahombele cheka nakwivwa womako.”

18. Mbimbiliya yasolola ngachilihi nge Yehova amona milimo tweji kumuzachilanga kupwa yayilemu, chamokomoko naushinakaji?

18 Omu tuli nakuya nakushinakajiwa, twatela kwanukanga ngwetu Yehova mwatwalaho lika kutuzachisa. (Samu 92:12-15) Yesu anangwile ngwenyi, Yehova eji kumonanga kala milimo natumuzachila kupwa yayilemu, numba yipwa yayindende. (Luka 21:2-4) Shikaho, zatenu noho hakumina ngolo jenu. Chakutalilaho, munahase kwambulula vyaYehova, chipwe kulombelako vandumbwenu, chipwe kuvavendejeka vatwaleho kupwa vakushishika. Yehova amimona kupwa muvakwavo mumwazachila, keshi nge mwomwo yavyuma mweji kutesangamoko, oloze mwomwo yakwononoka chenu.—Koli. 1, 3:5-9.

19. Chisoneka chaWavaka-Loma 8:38, 39 chatufwelelesa vyuma muka?

19 Twapwa vakuwahilila chikuma kulemesa Yehova, Kalunga uze amona milimo tweji kumuzachilanga kupwa yayilemu. Atutengele tulingenga mwaya muchima wenyi, kaha nawa kupwa mukulemesa chamuchano, cheji kutulingisanga tupwenga vakuwahilila. (Kuso. 4:11) Numba tuhu vatu mukaye navatumona kupwa tuvamokomoko, oloze Yehova atumona kupwa tuvavalemu. (Hepe. 11:16, 38) Kachi nge tunahombo mwomwo yamisongo, chipwe uhutu, chipwe ushinakaji, twatela kwanuka ngwetu kakweshi chuma nachihasa kutuhandununa kuli Setu wamwiluko.—Tangenu Wavaka-Loma 8:38, 39.

^ par. 5 Kutala mwamonaho lyehi ukalu uze wamilingishile mushinganyeke ngwenu mwapwa muvamokomoko tahi? Chino chihande nachimikafwa mutachikize ngwenu Yehova amimona kupwa muvavalemu chikuma. Nachishimutwila nawa vyuma navimikafwa muhone kulimonanga kupwa muvamokomoko numba tuhu muli nakumona ukalu.

MWASO 30 Tata, Kalunga Kami, Sepa Lyami