1-2. Kukalanyi kwamonañawu antu jaYehova, nawa yumanyi yinateli kufumamu?

SHINSHIKENU haniyi yakutalilahu yisatu: Manakwetu wakansi anamuleji kudi ndotolu nawu wakata chikatu chafwana. Manakwetu wadikita wudi nayaaka kubadika ha 50 mudimu wunamani, hela chakwila neseki kukeñakeña wukwawu nawuwani wanyi. Muhela washinshika nawa wakula dehi nakukañanya kuzata kwesekeja nachamuzatilileñayi Yehova.

² Neyi kukala kutunashimuni dikumukweti, munateli kutoñojoka nenu kwila ayizatisha nehi. Kukala kwamuchidiwu kunateli kuyineñesha, kudimona neyi mudi amukunkulwayi nawa kunateli kuyileñela mubuleña kudikunda nawantu amakwawu.

3. Satana niantu amwimbujolaña amonaña ñahi wumi wawantu?

³ Kanu kaayi kamwekeshaña chamonañayi Satana wumi. Mpinji yejima, Satana wamonaña antu nindi amukunkulwayi. Wamulejeli Eva nindi wukwikala wasubuka neyi yabula kumwovwahila Nzambi hela chakwila welukili nindi neyi yabula kumwovwahila Nzambi wukufwa. Satana diyi walombolaña mujakulanda nakulandulula, nsañu jamatuña nachiyuulu nikwitiya kwakutwamba kwamukanu kaayi. Dichi twahayamaña wanyi kwiluka netu akwakulanda nakulandulula, akwamatuña nachiyuulu niakulumpi jansakililu niwena alemesha wanyi wumi wawantu nichatiyañawu.

4. Yumanyi yitukuhanjekahu muchinu chibaaba?

⁴ Kwambukaku naSatana, Yehova wakeñaña nindi twiluki netu twalema nawa watukwashaña neyi tudi mukukala  kwatuleñelaña kutoñojoka netu tudi amukunkulwayi. (Mas. 136:23; Rom. 12:3) Achinu chibaaba chikushimuna Yehova chatukwashañayi muniku kukala kunalondelihu: (1) Neyi tunakati, (2) neyi mali anakutukalila nawa (3) neyi wushinakaji wunakutuleñela kutoñojoka netu Yehova kwila yatuzatisha cheñi nehi. Chatachi, tuhanjekenu muloña waweni wutwatela kukuhwelela netu twalema kudi Yehova.

5. Yumanyi yinaleteshi mukuhweleli nenu antu alema kudi Yehova?

⁵ Hela chakwila atuleñeli kufuma kulunkuñu, twalema nankashi kudi Nzambi. (Kutach. 2:7) Shinshikenu yuma yimu yaleteshaña twiluki netu twalema kudi Yehova. Waleñeli antu nawuswa wakwimbujola yilwilu yindi. (Kutach. 1:27) Dichi, watwinka chifulu cheneni kubadika yileñaleña yejima yitwamonaña nawa watwinka wuswa wakwakamena iseki nianyama.—Mas. 8:4-8.

6. Chumanyi chikwawu chaletesha twiluki netu Yehova walemesha antu abula kuwanina?

⁶ Nihanyima yakwila Adama navulumuni dehi, Yehova watwalekelihu kulemesha antu. Watulemesha chakwila wahanini Mwanindi wakeñayi, Yesu kwikala ifutu danyiloña hanshidi jetu. (1 Yow. 4:9, 10) Muloña wefutu danyiloña, Yehova wakasañula antu ejima afwa dehi namuloña wanshidi yaAdama, antu “aloña niabula kuloña.” (Yil. 24:15) Izu Dindi damwekeshaña nawu twalema kudi yena hichidi namuloña wayikatu, wuzweñi hela wushinakajiku.—Yil. 10:34, 35.

7. Yumanyi yaleteshaña ambuña aNzambi kukuhwelela nawu Yehova wayilemesha?

⁷ Kudi cheñi yuma yikwawu yaleteshaña tukuhweleli netu Yehova watulemesha. Watukoka kwakwihi nayena nawa weluka chitwetejeli nsañu yayiwahi. (Yow. 6:44) Chitwatachikili kuswina kwakwihi naYehova, niyena waswinini kwakwihi nanetu. (Yak. 4:8) Yehova wazatishaña cheñi mpinji niñovu yindi hakutudizisha nakumwekesha nindi twalema kudi yena. Weluka chitwekala nawa weluka chitunateli kwikala. Dichi watufumbaña muloña watukeña. (Yish. 3:11, 12) Chumichi chamwekeshaña chikupu nawu Yehova watulemesha.

8. Mazu ekala haMasamu 18:27-29, atukwashaña ñahi nakukala kutwamonaña?

⁸ Hela chakwila antu amakwawu amumweneña Mwanta Davidi nawu wamukunkulwayi, yena welukili nindi Yehova wamukeñeli nawa wamukwashileña. Chineli welukili nindi Yehova wamukeña, chamukwashili kuumika kukala kwindi. (2 Sam. 16:5-7) Neyi tunaneñi hela tudi nakukala, Yehova nateli kutukwasha kumona yuma munjila yambukaku nawa nateli kutukwasha kushinda kukala kwejima. (Tañenu Masamu 18:27-29.) Neyi twikala nawukwashu waYehova, kwosi chuma chinateli kutukañesha kumukalakela namuzañaluku. (Rom. 8:31) Tuhanjekenu hakukala kusatu kutwatela kwanukila netu Yehova watukeña nawa watulemesha.

9. Yikatu yinateli kutuleñela kutoñojoka netudi?

⁹ Yikatu yinateli kutuneñesha nikutuleñela kutoñojoka netu tudi amukunkulwayi kudi akwetu. Tunateli kuneña neyi antu eluka nawu tunakuzata wanyi Kwesekeja nachitwazatileña hela neyi tunakushindamena hadi akwetu. Hela chakwila amakwawu aneluki wanyi nawu twakata, tunateli kutiya kutama muloña hitunakutwesha kuzata kwesekeja  nachitwazatileñaku. Haniyi mpinji yakala, Yehova watukoleshaña. Munjilanyi?

10. Kwesekeja na Yishimu 12:25, chumanyi chinateli kutukwasha neyi tunakati?

¹⁰ Neyi twakata “izu dadiwahi,” dinateli kutukolesha. (Tañenu Yishimu 12:25.) Mwizu dindi Bayibolu, Yehova watuleja yuma yayiwahi yatwanukishaña nawu twalema kudi yena hela chakwila twakata. (Mas. 31:19; 41:3) Neyi tutaña Izu daNzambi donenawu kapampa kakavulu, Yehova wukutukwasha kushinda chineñi chenzaña namuloña wayikatu.

11. Manakwetu wumu amukwashili ñahi kudi Yehova?

¹¹ Talenu kukala kwamweniyi Jorge. Hadiñayi kansi, wakatili chikatu chadiña nakuswejelaku chakwila wadimweneña nindi wamukunkulwayi. Wahosheli nindi, “Nakuhweleleli wanyi nami nikamona kukala kwamuchidiwu hela kutiya nsonyi yinatiyileña muloña wawantu adiña nakuntala. Chikatu chami chichaswejeleliku, natachikili kutoñojoka chadi kwikala chihandilu chami. Naneñeli nankashi nawa namulembeleleli Yehova nami yankwashi.” Yehova wamukwashili ñahi? Wahosheli nindi, “Muloña waniku kukala, natachikili kutaña hohu mavasi antesha mumukanda waMasamu amwekesheleña chakamenañayi Yehova ambuña indi. Ifuku nifuku natañileña muniji nsona, nawa jadiña nakunkundeja. Chimwahitili mpinji, antu amakwawu atachikili kumona nawu nidi namuzañalu. Ahosheli nikuhosha nawu muzañalu wami wayikolesheli. Nelukili nami Yehova wakwili kulomba kwami. Wankwashili kuhimpa chinadimweneña. Natachikili kusha maana hachahosha Izu dindi kutalisha hachañilukayi hela chakwila nakata.”

12. Neyi mwakata, chumanyi chimwatela kwila hakwila nawu Yehova yayikwashi?

 ¹² Neyi munakuhita muyikatu, mwatela kwiluka nenu Yehova neluki yuma yimunakuhitamu. Lembenu kudi yena yayikwashi kutoñojoka munjila yayiwahi hakukala kumukweti. Kuhiñahu zatishenu Bayibolu kulonda muwani mazu akukundeja ayisonekelayi Yehova. Shenu muchima hamavasi amwekeshaña nawu Yehova walemesha ambuña indi. Chimukwilaña mwenimu, mukumona nenu Yehova wamuwahi kudi antu amukalakelaña nakashinshi.—Mas. 84:11.

13. Mutu wachisaka nateli kutiya ñahi neyi mudimu wunamani?

¹³ Nyitu yayisaka yejima yakeñaña kukeñela yisaka yawu yuma yakeñekaña muchihandilu. Twili netu manakwetu mudimu wunamani henohu naluwañeshi wanyi. Neseki kukeña mudimu wacheñi, ilaña nawuwani wanyi. Chineli chuma chamuchidiwu chinamumwekeni, nateli kudimona nindi wamukunkulwayi. Kusha maana hayikaninu yaYehova kunateli kumukwasha ñahi?

14. Muloñadi Yehova chahembelañayi yikaninu yindi?

¹⁴ Yehova wahembaña yikaninu yindi mpinji yejima. (Yosh. 21:45; 23:14) Kudi yuma yayivulu yaleteshaña yeleña mwenimu. Chatachi chidi chakwila nawu, ijina dindi niyilwilu yindi yinateli kutama. Yehova wakana nindi wukuhembaña ambuña indi ashinshika nawa wafwilaña kushikija chikaninu chindi. (Mas. 31:1-3) Kubombelahu, Yehova weluka nindi tunateli kuneña neyi yabula kwakamena antu amuchisaka chindi. Watukana kutwinka yuma yejima yitwakeñaña yakumujimba niyakuspiritu nawa kwosi  chuma chinateli kumukañesha kushikija ichi chikaninuku.—Mat. 6:30-33; 24:45.

15. (a) Kukalanyi kwamweniwu akwaKristu akusambila? (b) Masamu 37:18, 19 yatukwashaña kukuhwelela netudi?

¹⁵ Neyi twanukaña chuma chaleteshaña Yehova yahembeña yikaninu yindi, tukwiluka netu wukutukwasha neyi tunakankili munsañu jamali. Talenu chakutalilahu chawakwaKristu akusambila. Chelili atachiki kukabisha chipompelu chadiña muYerusalema, “antu ejima [apalañeni] . . . kufumishaku hohu apostolu.” (Yil. 8:1) Fwikijenu chichadiña. Adiña nakukala kwamali. AkwaKristu ajimbesheli maheta nimatala awu. Hela chochu, Yehova wayishiyili wanyi nawa atwalekelihu kwikala namuzañalu. (Yil. 8:4; Heb. 13:5, 6; Yak. 1:2, 3) Yehova wadiña nakuyakamena ana akwaKristu ashinshika ninetu wukutwakamenaña.—Tañenu Masamu 37:18, 19.

16. Chumanyi chinateli kuletesha kujinoka neyi chakwila Yehova walemesha kudifukula kwetu hela nehi?

¹⁶ Chitwatachika kushinakaja, tunateli kutachika kutoñojoka netu kwosi jitunakumuzatila Yehova. Hadaha Mwanta Davidi niyena dichatoñojokeleñayi hampinji yashinakajiliyi. (Mas. 71:9) Yehova nateli kutukwasha ñahi?

17. Yumanyi yitunateli kudizila kudi muhela Jheri?

¹⁷ Talenu chuma chamumwekeneni muhela Jheri. Amutambikili kuya kushikola yajakuwahisha yadiña Hetala daWanta, ilaña wakeñeleña wanyi kuya. Wahosheli nindi: “Nashinakaji dehi, nidi ntuluwa nawa kwosi chuma chineluka haniwu mudimu. Nidi wamukunkulwayi tuhu kwami.” Nawufuku wakwila  henohu ifuku dakubulakana kanda, walombeli kudi Yehova. Chayiliyi hefuku dalondelelihu Hetala daWanta, watwalekelihu kujinoka neyi chakwila watela kuwanikaku. Chatachikili progilamu, nhoshi wumu wakonkomweneni nindi chuma chalema hikudihana kudi Yehova kulonda yatudizishi. Jheri wanukaña nindi: “Natoñojokeli nami nadiña nadihana. Natachikili kudila chinelukili nami Yehova wadiña nakwakula kulomba kwami. Wadiña nakunleja nindi nadiña nachuma chalema chakuhana nawa nindi wafwilileña kundizisha.” Neyi Jheri yanuka, wahoshaña nindi: “Hinayileña nakubulakana nadiña nawoma, nawa natoñojokeleña nami nikutwesha wanyi. Ilaña chitwafumineñaku, natachikili kutoñojoka nami komana nikutwesha cheñi nami nalema kudi Nzambi.”

18. Bayibolu yamwekeshaña ñahi nawu Yehova walemesha nyidimu yitwamukalakelaña muwushinakaji?

¹⁸ Chitunakushinakaja, twatela kwiluka netu kudi mudimu wunakukeñayi Yehova nindi tuzateña. (Mas. 92:12-15) Yesu watulejeli nindi Yehova walemesha nyidimu yejima yitwamuzatilaña hela chakwila yamwekenaña neyi yalema wanyi. (Luka 21:2-4) Dichi zatenu hanakumini ñovu jenu. Chakutalilahu, munateli kuhosha hadi Yehova, kulombelaku amanakwenu nikukolesha amakwawu kulonda atwalekihu kwikala ashinshika. Yehova wayimonaña nindi mudi akwakukalakala hamu nindi muloña wakumwovwahila, bayi hamuloña wanyidimu yimwakalakalañaku.—1 Kor. 3:5-9.

19. Aroma 8:38, 39 yinakutukwasha kukuhweleladi?

¹⁹ Twatiyaña kuwaha kumukalakela Yehova, Nzambi walemesha antu amukalakelaña. Watuleñeli nindi twileña nkeñelu yindi nawa chumichi chatutiyishaña kuwaha muchihandilu chetu. (Chim. 4:11) Hela chakwila mukaayi anateli kutumona neyi tudi amukunkulwayi, Yehova watulemesha. (Heb. 11:16, 38) Neyi twaneñaña muloña wayikatu, kubula mali hela wushinakaji, twanukeña netu kwosi chuma chinateli kutwambula kukukeña kwaTata yetu wamwiwuluku. —Tañenu Aroma 8:38, 39.