1, 2. Jmé kjoa xi faʼatojin kʼa je ndsʼee, kʼoa jósatío kon nga kʼoama.

SI̱KATÍOLA kʼaa choa̱ jme kjoa xi bitjatojiaan. Tobʼelañá, je chjinexki kʼoatsole jngo ndsʼee xi sʼa xti nga táo chʼin tjínle kʼoa nga tobijbi kjoaʼajen nganʼiole. Jngo ndsʼee xi jetsʼato 50 nóle bichonsjee xále, kʼoa ninga bajngixá alikui tisokóxánile. Jngo tichjaa xi jejchínga kʼoasʼin síkjaʼaitsjen nga tsín titse síxále Jeobá.

² Tsakui kjoa jebi tibitjatojiaan, tsakui nichxin kʼoasʼin si̱kjaʼaitsjeen nga tsín tijme chjíniná. Kui xosikaoná nga tsín titsjoa sa̱tíoni tokoán, nga tsín tichjí jchatokonñá yaoná kʼoa nga tsín tinda kuiyoñá kao xi ngikʼa.

3. Jósʼin bekon kjoabijnachon je Na̱i kao xi ya tsjoánganʼiole.

³ Jmeni xi chon sonʼnde kui bakó josʼin bekon Na̱i je kjoabijnachon. Alikui chjí bekonná. Alikui kao kjoandale kʼoakitsonile Eva nga ndái kʼoéjna tsa tsín kʼoaʼénle Niná, nga̱ be nga kjoabiya kuichomani. Jé kjinentsja jmeni xi chon sonʼnde. Tobʼelañá, je kjoanyiná, kjoa política kao religión. Kuinga tsín tokʼoamaniná nga kʼoati tsín bechjí kjoabijnachon je chjota xi negosioyʼai tjínle, chjota político kao xi nyatítjonle religión.

4. Jmé xi chótʼayajiaan i̱ kjoaʼmiya jebi.

⁴ Je Jeobá kui xi mele nga nda katasatío tokoán kʼoa tsjoánganʼioná kʼianga kjoa bitjatojiaan kʼoa nga kʼoasʼin nikjaʼaitsjeen  nga tsín jme chjíná (Sal. 136:23; Rom. 12:3). I̱ kjoaʼmiya jebi, kui jchaa josʼin basenkaoná Jeobá kʼianga kui kjoa jebi bitjatojiaan: kʼianga chʼin tjínná, nga ñʼai maná tao̱n kʼoa nga kʼoasʼin nikjaʼaitsjeen nga tsín tikoa̱n josʼin si̱xánilee Jeobá nga jemajchíngaa. Tonga kuila títjon chótʼayajiaan ánni nga koa̱n kʼoakʼoéñá tokoán nga chjí bekonná ngatsʼiaa je Niná.

5. Jmé xi bakó nga chjí bekonná je Jeobá.

⁵ Ningalani to niʼnde kisindaniná je Jeobá, nʼio chjí bekonná (Gén. 2:7). Kataʼyala kʼaa choa̱ ánni kʼoabixónsíñá nga chjí bekonná je Niná. Tobʼelañá, kʼoasʼin kisindaná nga koa̱n chjénngilee jokjoan (Gén. 1:27). Alikui mangósoán xi chjotaa kao jmesani xi kisinda je Niná, nga̱ ñá tsakánená nga si̱kuindaa je Sonʼnde kao cho̱ (Sal. 8:4-8).

6. Jósasʼin bakóná je Jeobá nga chjí bekonná.

⁶ Tojo chjí tsabekon Jeobá je chjota ninga kʼia nga jetsakajngijée je Adán. Chjí bekonná je Niná nga̱ kisikasén je ʼNdíle nga kʼienntjainá xi totʼatsʼe je jéená (1 Juan 4:9, 10). Nga jetsakʼéchjíntjainá Jesús, je Niná sikjaʼáyale xi jekʼien, sikjaʼáyale xi kixi kʼoa xi tsín kixi (Hech. 24:15). Je Biblia kʼoatso nga chjí bekonná Niná kʼoa nga tsínkui fini tsa chʼin tjínná, tsa ñʼai chonná tao̱n kʼoa tsa jejchíngaa (Hech. 10:34, 35).

7. Ñá xi choʼndale Niná maa, jósasʼin ʼyaa nga bechjíná Niná.

⁷ Ñá xi choʼndale Niná maa nkjínsa koya ʼyaa josʼin bechjíná Jeobá. Jé xi kʼoasʼin koanmele nga tsaʼyaa xi tʼatsʼe kʼoa tsabee jokinʼia nga kinoʼyá je Énle (Juan 6:44). Kʼianga kinichriantʼalee je Jeobá, kʼoati kisichriantʼaná je (Sant. 4:8). Xi ijngosani, síkʼayaná nichxin nga bakóyaná. Be jokjoaan ndʼaibi kʼoa be jmeni xi koa̱nná sʼiaan. Kʼoa nga batekjáyaná kʼoasʼin bakóni nga tsjoakená (Prov. 3:11, 12). Jebi kui bakóná nga chjí bekonná je Niná.

8. Jósʼin basenkaoná jmeni xi tso Salmo 18:27-29 kʼianga kjoa bitjatojiaan.

⁸ Je rey David koanjinle nga tsjoake je Jeobá kʼoa tsabee josʼin tsakasenkao. Kʼoa kui xi tsakasenkao nga tsín kisikʼajenle kon kʼianga tjínkʼa chjota xi kʼoakitsole nga tsín jme chjíle (2 Sam. 16:5-7). Kʼianga nʼio nikʼajenlee tokoán kʼoa nga kjoa bitjatojiaan, je Jeobá basenkaoná nga nda nikjaʼaitsjeen kʼoa nga chókjoajinná tojme kjoani (tʼexkiai Salmo 18:27-29). * Tsa je Niná koasenkaoná, alikui jme xi kʼoechjoaná nga tsjoa sa̱tío tokoán nga si̱xálee (Rom. 8:31). Kʼianga kjoa bitjatojiaan kʼiaa nga ngisa machjén nga si̱kjaʼaitsjenjiaan nga bechjíná je Jeobá kʼoa nga tsjoakená. Janla choa̱ kataʼyaa.

9. Jósatío tokoán kʼianga chʼin bʼetʼaná.

⁹ Kʼianga chʼin bʼetʼaná alikui tinda sʼeni tokoán kʼoa sakʼoajin kʼoasʼin si̱kjaʼaitsjeen nga tsín tijme xi koa̱nniná sʼiaan. Tsakui nichxin koa̱nsoaná kʼianga skoe̱ná je chjota nga tsín tikʼoakji bichóni nganʼioná joni ngasʼa kʼoa tsakuije̱ nga nganʼio machjénná. Ninga tsín ʼya xi be tsa chʼin tjínná, tsakui nichxin soa maná nga tsín tima kʼoanʼiañá jmeni xi kinʼia ngasʼa. Je Jeobá sínʼiojinná kʼianga kui kjoa bitjatojiaan. Jósʼin sínʼiojinná.

10. Tojo tso Proverbios 12:25, jmé xi koasenkaoná nga chʼin bʼetʼaná.

¹⁰ Kʼianga chʼin bʼetʼaná, “je én xi nda tso  kui xi tsjoa bʼé” tokoán (tʼexkiai Proverbios 12:25). * Je Jeobá tsakʼétʼaa ya Biblia je én xi nda tso xi síkjaʼaitsjenjinná nga chjí bekonná ninga chʼin tjínná (Sal. 31:19; 41:3). Tsa nkjín kʼa kʼoéxkiaa je én jebi, koasenkaoná je Niná nga nda sʼe̱ tokoán kʼianga chʼin bʼetʼaná.

11. Jósʼin tsabeni jngo ndsʼee nga tsakasenkao je Jeobá.

¹¹ Kataʼyala jokoan je Julio. * Kʼianga sʼa xti nʼio táo chʼin kiskatʼale xi sasa kisikʼajenni nganʼiole, kʼoa kʼoasʼin kisikjaʼaitsjen nga tsín jme chjíle. Itso: “Alikui kui kiskoyale tsa kʼoasʼe̱ tokoan nga kui chʼin kiskatʼana kʼoa soa mana nga toʼan kotsenna chjota. Nga sa táo sa táo koan, kui kisikjaʼaitsjen nga tsín tikʼoasʼin koatejnaña josʼin tijna ngasʼa. Nʼio kisikʼajenle tokoan, kuinga je Jeobá kisijénile nganʼio”. Jósʼin kitsjoanganʼiole Niná je ndsʼee jebi. Itsosa: “Ñʼai koanna nga tsakʼejinkoan jmeni xi tsakʼexkia, kuinga kʼoatsakʼinnina nga tochoa choa kʼoexkia je libro xi tsʼe Salmos jñani kui tínchja̱ni nga mandosinle Jeobá je choʼndale. Nkjín kʼa tsakʼexkia nga nyaon nyaon. Tsakasenkaona nga nda kisʼe tokoan. Nga jeki nichxin, je xi ngikʼa tsabee nga ngisa tsjoa kisʼena. Saʼnda kʼoakitsona nga tsakinyakao nga tsjoa tjín tokoan. Tsaʼbeña nga kinrʼoé Jeobá je kjoabʼetsʼoana. Tsakasenkaona nga ndasʼin kisikjaʼaitsjen ijngokʼaña. Kui kisikjaʼaitsjen jmeni xi tso je Biblia josʼin bekonna je Jeobá ninga chʼin tjínna”.

12. Jmé xi koa̱n sʼiaan nga koasenkaoná je Jeobá kʼianga chʼin tjínná.

¹² Je Jeobá be josʼe tokoán kʼianga chʼin  tjínná. Si̱jélee nganʼio nga katabasenkaoná nga nda si̱kjaʼaitsjeen. Chótʼayá je Biblia, nga̱ yaa faʼaitʼa je én xi nda tso, kʼoa kui xá tsakʼétʼaxo̱nni Niná nga ñá kuinyakaoná. Kui ngisa kʼoéxkiaa jñani bakóya nga nʼio bechjí Niná je choʼndale. Tsa kʼoasʼiaan, jchañá nga je Jeobá bakóle kjoanda chjota xi je síxále kʼoa xi kixi fitʼale (Sal. 84:11).

13. Jósʼe̱ kon jngo ndsʼee tsa tsín tiso̱koxánile.

¹³ Ngatsʼi je xi jko̱ sʼin tjío ya yaniʼya bajngiʼa je familiale. Tonga jósʼe̱ kon jngo ndsʼee tsa kuichonsje jñani síxá kʼoa tsa tsín tijña so̱koxánile ninga koasjai. Tsakui nichxin kʼoasʼin sikjaʼaitsjen nga tsín tijme chjínile. Jósʼin koasenkao nga kui sikjaʼaitsjenjin jmeni xi tso Jeobá.

14. Ánni nga sítjosonni Jeobá jmeni xi tso.

¹⁴ Je Jeobá sítjoson ngantsjai jmeni xi tso (Jos. 21:45; 23:14). Nkjín koya anni nga sítjosonni. Xi títjon, kui xi mele nga nda katabʼaxki̱ je jaʼaínle. Je Jeobá kʼoatso nga sikuinda je choʼndale xi kixi fitʼale, kʼoa alikui jao tjínná nga sitjoson jmeni xi tso (Sal. 31:1-3). Xi ijngosani, be nga tsín nda sa̱tío tokoán tsa tsín tsjoáná jmeni xi machjénná, nga̱ familiale maa. Kʼoatso nga tsjoáná jmeni xi kuiyochonñá kʼoa xi kuinyakaoná nga tosi tonda si̱xálee, kʼoa alikui jme xi kʼoechjoale nga kʼoasʼin (Mat. 6:30-33; 24:45).

15. 1) Jmé kjoa xi jaʼatojin je chjotale Cristo xi tsakatio nga siglo 1. 2) Jósʼin basenkaoná jmeni xi tso Salmo 37:18, 19.

¹⁵ Kʼianga ʼyaa nga sítjoson Jeobá jmeni xi tso, alikui jao sʼe tokoán nga je koasenkaoná ninga kʼia nga ñʼai maná je tao̱n. Si̱kjaʼaitsjenjinla tʼatsʼe chjotale Cristo xi tsakatio nga siglo 1. Kʼianga chjota kitjenngike je jtín xi kisʼejna Jerusalén xin ʼnde kikatio je  chjotale Cristo, “tojésa pastro xi tsín tsa kitsaoba” (Hech. 8:1). Nga kʼoakoan, ñʼaijin koanle tao̱n. Tsakui nichxin kisicha je niʼyale, xále kao negosiole. Ninga kʼoalani, je Jeobá alikui kitsjionkon kʼoa kui xi tsakinyakao nga tosi tonda tsjoa kisatio kon (Hech. 8:4; Heb. 13:5, 6; Sant. 1:2, 3). Je Niná kisikuinda je chjotale Cristo xi kixi kitʼale, kʼoatisʼin síkuindaná ñá ndʼaibi (tʼexkiai Salmo 37:18, 19). *

16. Jméni xosikaoná nga to jao sʼe̱ni tokoán tsa chjí be Jeobá jokji nixálee.

¹⁶ Kʼianga jemajchíngaa tsakui nichxin kʼoasʼin si̱kjaʼaitsjeen nga tsín tikoa̱n tse si̱xánilee je Jeobá. Tsakui nichxin kʼoati kui jebi xi nʼio kisikjáojin je rey David kʼianga jekoanjchínga (Sal. 71:9). Jósʼin basenkaoná je Jeobá kʼianga jemajchíngaa.

17. Jmé xi bakóyaná jokoan jngo tichjaa xi Joanna ʼmi.

¹⁷ Kataʼyala jokoan je tichjaa xi Joanna ʼmi. Kʼoatsakʼinle nga katafi nga sa̱kóyale josʼin makuinda je Ndʼia jña chotʼayá. Tonga tsín koanmele ki. I kitso: “Jekoanjchínga, chjoónkʼanña kʼoa alikui josʼin tsjoanganʼioa jme xá xi koa̱n. Alikui jme xi mana sʼian”. Tonga jngo nitje̱n tongini nga kjesa fitsʼiajin josʼin sa̱kóyale je xi kuicho ya Ndʼia jña chotʼayá, tsakʼétsʼoale Jeobá nga tsakʼéyanajmíle jotjín kon. Nga koannyaonni, nga jekicho ya Ndʼia jña chotʼayá, tojo kʼoasʼin kisikjaʼaitsjen nga tsín josʼin tsjoánganʼio. Nga jetíʼmiyale josʼin koa̱nxá, jngo ndsʼee xi kinchja̱ya kʼoakitso nga je xi ngisa chjíle xi koa̱n kʼoailee Jeobá kuinga tiyondaa  nga je katatsoyaná. Je Joanna itsosa: “I kixian, tijnandaña an. Ñaki kinroajen ndáxkoan kʼianga tsaʼbe nga kinrʼoéna Jeobá nga tsakʼetsʼoale. Koanjinna nga nʼio chjíle jme xi koa̱n tsjoale Jeobá, kʼoa nga tíjnanda je nga kuitsoyana”. Nga síkjaʼaitsjen jokisʼe kon je Joanna, itso: “Nga kichoa ya Ndʼia jña chotʼayá, titsokjonña kʼoa ba tjínna. Tonga nga jejetʼa nga tsakʼinyanajin, nda kisʼe tokoan kʼoa kʼoasʼin kisikjaʼaitsjen nga chjí be Jeobá jmeni xi sʼian”.

18. Jósʼin bakóyaná je Biblia nga chjí be Jeobá josʼin nixálee ninga jekoanjchíngaa.

¹⁸ Ninga jekjimajchíngaa, tojo koaan si̱xálee je Jeobá (Sal. 92:12-15). Je Jesús kʼoakitso nga bechjí Jeobá jokji nixálee, ninga kʼoasʼin nikjaʼaitsjeen nga tochoasa nixálee (Luc. 21:2-4). Kui si̱kjaʼaitsjeen jmeni xi koa̱nná sʼiaan nga si̱xálee Jeobá. Tobʼelañá, koaan kuinókjoañá xi tʼatsʼe Jeobá, koaan kʼoétsʼoantjé je ndsʼee kʼoa koaan si̱nʼioá kon nga kixi katafitʼale Niná. Je Jeobá kʼoasʼin bekonná nga je nixákoaa, kuinga kʼoasʼin bekonniná nga tiyondaa nga nitjosonlee ali tsakuijin jokji nixálee (1 Cor. 3:5-9).

19. Jósʼin tsjoánganʼioná jmeni xi tso Romanos 8:38, 39.

¹⁹ Nʼio bʼé kjoanda nga je Jeobá nixálee, nga̱ bechjí kjoaixi jmeni xi nʼia. Kui xá kisindaniná nga kʼoasʼiaan josʼin mele, kʼoa tsjoa satío tokoán nga je nixálee (Apoc. 4:11). Tsakui nichxin tjínkʼa chjota xi kʼoakuitsoná nga tsín jme chjíná, tonga je Jeobá alikui masoale xi tʼatsaan (Heb. 11:16, 38). Kʼianga ba sʼe tokoán nga chʼin bʼetʼaná, tsa ñʼai koa̱nná tao̱n kʼoa tsakuije̱ nga jekoanjchíngaa, si̱kjaʼaitsjeen nga tsín jme xi kʼoechjoa nga koakoná kjoatsjoacha je Nʼainá xi tíjna ngʼajmi (tʼexkiai Romanos 8:38, 39). *