1-2. Bukalu muka bubali na kuliwana nabwo banu ba Yehova, co bunasa kubalingisa balizibe bati?

 TUSIMUTWIYENI ha banu batatu. Ndolome wa mwanike ali na kubinja mushongo wakama manene. Ndolome uje akapanga na nzili uje natubakana myaka 50, banamutundisa cipangi okuni kalingile mulonga, co lalo neseka mwoshe mwanasela kutonda cipangi ceka, oloni kaciwanene. Ndokazi wa kakulukazi kesi na nzili ya kupangela Yehova ngwe mwakele na kupangela kunima.

² Nga muli na bukalu ngwe bwa banu batunendeka, co mwasa kuzeya. Obu bukalu bwasa kumilingisa mujeneke kubwahelela, mulizibe kupwa ba ngoco na kumyonowesa kulikwatasana na bakweni.

3. Satana na baje bali na kumutembwinina bali na kumona bati buyoye bwa banu?

³ Banu ba muno mu kaye bali na kumona buyoye ngwe mwabumwena Satana. Kushwa kusañulu, Satana kesi na kumwesa ngwendi banu bapwa ba seho. Wakwisile Eva ngwendi apwa wa kupatuka nga kononoka Njambi, okuni wazibukile ngwendi Eva nga alinga ngoco atsa. Satana ikeye ali na kwendesa mingoso, bupolitiki na malombelo a muno mu kaye. Mukemwo tuli na kumona baka-mingoso, baka-bupolitiki na bantwama ba bulombelo bali na kutembwinina cifwa ca Satana ca kujeneka kumona banu kupwa ba seho na kubasingimika.

4. Bika bitusimutwiya muno mu cilongesa?

 ⁴ Yehova ikeye washaka ngwendi tulizibe ngwetu netu tu banu, mukemwo ali na kutukwasa nga kuli byuma bije bitulingisa tulizibe ngwetu tuba ngoco. (Myaso 136:23; Loma 12:3) Muno mu cilongesa tusimutwiya mwatukwaselamo Yehova mu byuma bino: (1) Nga tubinja manene, (2) nga kuli na kutukaluwila kuwana bimbongo, co (3) nga tuliziba ngwetu kutwasa kupangela Yehova mwafwa ya bukulukazi. Oloni tucisimutwiyeni tahi byuma bitulingisa tutabe ngwetu tu ba seho kuli Yehova.

5. Bika bitwendekela ngwetu banu bapwa ba seho kuli Yehova?

⁵ Batumunga ha likungu, oloni tuba seho. (Kusha 2:7) Tusimutwiyeni byuma bitwendekela ngwetu tuba seho kuli Yehova. Watangele banu na cashu ca kutembwinina bifwa byendi. (Kusha 1:27) Oku kumwesa ngwabo watusingimikile kutubakana byoshe byanatanga hano hasi, co watwanene nzili ya kunyunga kaye na tusitu.—Myaso 8:4-8.

6. Bika lalo bitwendekela ngwetu Yehova wamona banu ba kujeneka kulumbunuka kupwa ba seho?

⁶ Yehova natwalelelaho kumona banu kupwa ba seho nameme Adama walingile bubi. Watumona kupwa ba seho manene mukemwo watwanene Munendi Yesu kupwa ndando ya kutupatula ku bubi bwetu. (1 Yowa 4:9, 10) Omwo ya ndando ya kupatula, Yehova akasangula baje banatsi mwafwa ya bubi bwa Adama. Akasangula banu “bababwa na aba bababi.” (Vili 24:15) Mbimbiliya imwesa ngwayo tuba seho kuli Njambi nameme tubinja, kutwesi na bimbongo nambe tunakulubala.—Vili 10:34, 35.

7. Bangamba ba Njambi bali na bukaleho muka buje bumwesa ngwabo Yehova wabamona kupwa ba seho?

⁷ Kuli byuma bikwabo nawa bitwendekela ngwetu Yehova watumona ngwendi tuba seho. Natunene kuli ikeye, co azibuka mutunatambwilile muzimbu waubwa. (Yowa 6:44) Mutwashwenyene kuyehi nendi, nendi lalo washwenyene kuyehi netu. (Yako 4:8) Kutundaho lalo Yehova ali na kutulongesa, oku kumwesa ngwabo tuba seho kuli ikeye. Azibuka hatuli na kulinga bwino naha ha tunapande kupangela. Co ali na kutunangula mwafwa watuzema. (Visi 3:11, 12) Obu bukaleho bumwesa ngwabwo Yehova watumona kupwa ba seho.

8. Majwi ali ku Myaso 18:27-29, atukwasa bati tujeneke kulishoshomwena ha bukalu bwetu?

⁸ Banu bamo bamwene ngwabo Mwene Ndabiti wapwile wa ngoco, oloni ikeye wazibukile ngwendi Yehova wamuzemene na kumukwasa. Ngeci wakolesele mwakele mu bukalu. (2 Samwe 16:5-7) Nga tunazeye nambe tuli mu bukalu Yehova asa kutukwasa tujeneke kulishoshomwena ha bukalu bwetu. Co lalo atukwasa tuhyane bukalu bwoshe bwoshe. (Tandeni Myaso 18:27-29.) Nga Yehova atukwasa, co na cimo cahi casa kutwonowesa kumupangela. (Loma 8:31) Tusimutwiyeni ha byuma bitatu bije bimwesa ngwabyo Yehova watuzema, co lalo watumona ngwendi tuba seho.

9. Kubinja kwasa kutulingisa tulizibe bati?

⁹ Kubinja kwasa kutuzeyesa na kutulingisa tulizibe ngwetu keti tuba seho ku banu. Tukalizibi kuzeya nga tubinja, mwafwa twakulahela lika bakwetu ngwetu bakutukwase. Nameme bakwetu kubazibuka ngwabo tuli na kubinja, anga twasa kuzeya mwafwa kutwesi na nzili ya kupanga bipangi bitunakele  na kupanga. Yehova atukwasa, nga tuli mu bukalu bwa cifwa eci. Asa kutukwasa bati?

10. Kwesekesa na Visimo 12:25, bika bitukwasa nga tubinja?

¹⁰ Nga tubinja, “majwi a ngozi” asa kututakamesa. (Tandeni Visimo 12:25.) Mu Mbimbiliya muli majwi amabwa a Yehova aje atukwasa tuzibuke ngwetu tuba seho kuli ikeye nameme tubinja. (Myaso 31:19; 41:3) Nga tutanda Mbimbiliya simbu yoshe, Yehova atukwasa tujeneke kwaka manene mbunge ku bukalu bwetu.

11. Ndolome umo walimwenenene bati mwamukwaselele Yehova?

¹¹ Tusimutwiyeni hali Jorge. Te acili mukwenje, wakele na mushongo waubi manene uje wamulingisile alizibe ngwendi wangoco. Jorge wendekele ngwendi: “Njazibile manene shwamwa, mwafwa mushongo unjabinjile walingisile banu banjitale manene. Mushongo wange muwamene manene, njasinganyekele ngwange kunjikanguka. Njazeyele manene, co njalombele Yehova anjikwase.” Yehova wamukwasele bati? Jorge ngwendi: “Kwanjikaluwilile kutanda byuma byabingi, mukemwo banjilekele ngwabo njitande-tande mavesi amandondo a mukanda wa Myaso aje amwesa omwo Yehova wakela bangamba bendi mbunge. Njakele na kwilukila-ilukila kutanda aje mavesi ha litangwa na litangwa, co anjizembelekele na kunjitakamesa. Mu kwita kwa simbu, banu bamwene ngwabo njinapu wa kubwahelela. Bendekele ngwabo kubwahelela kwange kwabatakamesele. Njanangukile ngwange Yehova nakumbulula malombelo ange. Wanjikwasele njijeneke kulishoshomwena ha bukalu bwange. Co njashangumukile kwaka manene mbunge ku byuma biyendeka Mbimbiliya bije bimwesa  ngwabyo Njambi wanjaka mbunge nameme njili na kubinja.”

12. Nga muli na kubinja, bika bimunapande kulinga mangana Yehova amikwase?

¹² Nga muli na kubinja zibukeni ngweni Yehova azibuka bukalu bweni. Mulombeni mangana amikwase mujeneke kwaka manene mbunge ku bukalu bweni. Co tandeni Mbimbiliya mangana muwane majwi amabwa a Yehova aje asa kumizembeleka. Akeni manene mbunge ku mavesi aje amwesa ngwawo Yehova wamona bangamba bendi kupwa ba seho. Nga mulinga ngoco, co mulimwena ngweni Yehova wapwa wamubwa ku bangamba bendi baje bamupangela mu kulongwa.—Myaso 84:11.

13. Mutwe wa naanga asa kuliziba bati nga banamutundisa cipangi?

¹³ Mutwe wa naanga akapanga na nzili mangana awane byuma bya kulelesa naanga yendi. Oloni twendekeni ngwetu ndolome banamutundisa cipangi nameme kalingile mulonga. Neseka mwoshe mwanasela kutonda cipangi ceka oloni nonowa kuciwana. Nasa kuliziba ngwendi napu wangoco, mwafwa kawanene cipangi. Kwaka mbunge ku bikulaheso bya Yehova kwasa kumukwasa bati?

14. Byuma muka bili na kulingisa Yehova ashulisilile bikulaheso byendi?

¹⁴ Yehova ali na kushulisilila bikulaheso byendi simbu yoshe. (Yosh 21:45; 23:14) Kuli byuma byabingi bili na kumulingisa abishulisilile. Ca kulibanga, kashakele ngwendi banu bashaule lizina lyendi. Yehova nakulahesa ngwendi anyungilila bangamba bendi ba kulongwa, co nalikumiiya kulinga ngoco. (Myaso 31:1-3) Co lalo azibuka ngwendi tuzeya nga  katunyungilila. Mukemwo natukulahesa ngwendi atukwasa ku mubila na ku sipilitu, co nacimo cahi casa kumwonowesa kushulisilila cikulaheso cendi.—Mateo 6:30-33; 24:45.

15. (a) Bukalu muka bubaliwanene nabwo baka-Kilistu ba kulibanga? (b) Mukanda wa Myaso 37:18, 19, utukwasa tukulahele bika?

¹⁵ Nga tuzibuka ngwetu Yehova ashulisilila bikulaheso byendi, co tukulahela ngwetu atukwasa nameme kutwesi na kuwana bimbongo. Tucisimutwiyeni hali baka-Kilistu ba kulibanga. Mubayandesele baka-Kilistu ba mu Yelusalema, ‘boshe balishandokele, kubanga tupositolo lika.’ (Vili 8:1) Bakele mu bukalu bwakama. Kwabakaluwilile kuwana bimbongo. Baje baka-Kilistu hamo basezele binjubo byabo na mingoso yabo. Oloni Yehova kabebalele, co batwaleleleho kupwa ba kubwahelela. (Vili 8:4; Heve 13:5, 6; Yako 1:2, 3) Yehova wakwasele baje baka-Kilistu, co netu atukwasa.—Tandeni Myaso 37:18, 19.

16. Bika byasa kutulingisa tulizibe ngwetu kutwasa kupangela Yehova?

¹⁶ Omwo tuli na kukulubala, twasa kushangumuka kuliziba ngwetu kutwasa kupangela Yehova. Mwene Ndabiti hamo nendi walizibilile ngoco omwo wakele na kukulubala. (Myaso 71:9) Yehova asa kutukwasa bati?

17. Bika tulilongesa kuli ndokazi Jheri?

¹⁷ Tusimutwiyeni hali ndokazi Jheri. Bamulanyele akakobele sikola ibalingilile ku Njubo ya Bumwene mangana akalilongese mwakubwahesela mitungo ya kulemesela Yehova. Oloni kashakele kuyako. Wendekele ngwendi: “Njinakolo, njifwile, co nebi binjikalinga byahi, mwafwa byahi binjizibuka. Kunjesi na seho.” Butsiki bwa kwinduka litangwa lyapandele kuya na kulilongesa, walombelele kuli Yehova. Lya mukwabo, mwaketele ku Njubo  ya Bumwene anga walizibile ngwendi kasa kukala mu sikola. Mubakele mu sikola, umo wa balongesi wendekele ngwendi cuma ca seho manene cinapu kulyana mangana Yehova atulongese, keti kuzibuka cipangi embwe. Jheri wendekele ngwendi: “Njamwene ngwange njili na sipilitu ya kulyana. Njashangumukile kulila munjamwene ngwange Yehova ali na kukumbulula malombelo ange. Wanjikwasele njimone ngwange kuli byuma bya seho binjasa kumupangela, co ikeye anjilongesa. Munjaile kuje ku sikola njazibile lyoba, njazeyele, co njalizibile ngwe njiwangoco. Oloni munjatundileko njalizibile ngwange njili na nzili, njinasimpi, co njamwene ngwange kuli byuma binjasa kupanga.”

18. Mbimbiliya imwesa bati ngwayo Yehova watumona kupwa ba seho nameme tuli na kukulubala?

¹⁸ Omwo tuli na kukulubala tukulaheleni ngwetu Yehova anga asa kutwana bipangi. (Myaso 92:12-15) Yesu watulongesele ngwendi Yehova watumona ngwendi tuba seho nameme bitulinga bisholoka ngwe kubyesi na seho. (Luka 21:2-4) Ngeci, akeni mbunge ku byuma bimwasa kulinga. Cakumwenako, mwasa kuleka banu bya Yehova, kulombelela bandolome beni na kubashongangeya mangana bapwe ba kulongwa. Kupanga bipangi byabingi keti kukekwo kulingilisa Yehova amimone ngwendi muli na kupangela hamo nendi, oloni kwononoka kweni kukekwo kwazema Yehova.—1 Koli 3:5-9.

19. Mukanda wa Loma 8:38, 39, utukwasa tukulahele bika?

¹⁹ Twabezika manene kulemesa Yehova Njambi, uje wamona baje bamupangela kupwa ba seho. Watutangele mangana tulinge cizango cendi, co kumulemesa mu busunga kutulingisa tubwahelele. (Kujo 4:11) Banu muno mu kaye banasa kutumona ngwabo tubangoco, oloni Yehova atumona ngwendi tuba seho. (Heve 11:16, 38) Nga tubinja, nambe kutwesi na bimbongo nambe tunakulubala, twanukeni ngwetu nacimo cahi casa kututundisa ku cizemo ca Tate yetu wa mwilu.—Tandeni Loma 8:38, 39.