1-2. Ar ki sitiasion boukou serviter Zeova pe fer fas, ek ki lefe sa kapav ena lor zot?

REFLESI lor sa trwa sitiasion-la: Enn zenn frer inn gagn enn maladi bien grav ek so leta pou kontign anpire. Enn frer ki abitie travay dir ek ki ena plis ki 50 an inn perdi so travay. Malgre tou so bann zefor, li pa pe reisi gagn enn lot travay. Enn ser fidel ki aze nepli kapav servi Zeova otan ki li ti pe fer avan.

² Si to pe pas par enn sitiasion ki inpe parey kouma bann sitiasion ki’nn mansione avan, kitfwa to panse ki to nepli ena valer. Bann sitiasion koumsa kapav fer twa perdi to lazwa, perdi konfians an tomem, ek afekte to relasion avek lezot.

3. Kouma eski Satan ek bann dimounn ki anba so linflians konsider lavi?

³ Sa lemond-la ena mem fason panse ki Satan lor lavi. Satan finn touletan tret bann imin kouma bann nanye ditou. San okenn pitie, Satan ti fer Ev krwar ki li ti pou gagn liberte si li ti dezobeir Bondie, alor ki li ti bien kone ki Ev ti pou mor si li ti fer sa. Satan finn touletan kontrol bann sistem komersial, politik, ek relizie sa lemond-la. Alor, sa pa etonn nou ki bann biznesmenn, bann politisien, ek bann sef relizie sa lemond-la pena okenn respe pou lavi ek santiman bann dimounn.

4. Ki nou pou examine dan sa lartik-la?

⁴ Parkont, Zeova anvi ki nou santi nou bien ek Li ed nou pou fer fas ar bann sitiasion ki kapav donn nou linpresion  ki nou pena valer. (Ps. 136:23, NW; Rom. 12:3) Dan sa lartik-la, nou pou examine kouma Zeova ed nou dan sa bann sitiasion-la: (1) Kan nou malad, (2) kan nou gagn bann problem finans, ek (3) kan nou ena santiman ki nou nepli itil dan servis Zeova akoz lavieyes. Me pou koumanse, anou gete kifer nou kapav sir ki sakenn parmi nou ena valer pou Zeova.

5. Ki kitsoz montre twa ki bann imin ena valer pou Zeova?

⁵ Mem si nou finn kree ar lapousier, nou ena boukou plis valer ki enn pwanie later. (Zen. 2:7) Anou get sertin rezon kifer nou ena valer pou Zeova. Zeova inn kree bann dimounn avek kapasite pou imit so bann kalite. (Zen. 1:27) Kan Li’nn fer sa, Li’nn fer nou pli siperyer ki bann lezot kitsoz ki Li’nn kree lor later. Li’nn osi donn nou responsabilite pou okip later ek bann zanimo.​—Ps. 8:4-8.

6. Ki lezot rezon ankor montre ki bann imin inparfe ena valer pou Zeova?

⁶ Mem apre ki Adan ti fer pese, bann imin ti ankor ena valer pou Zeova. Nou ena telman valer pou Li ki Li’nn mem donn so Garson ki Li bien kontan, Zezi, kouma enn ranson pou nou bann pese. (1 Zan 4:9, 10) Gras-a laranson, Zeova pou resisit bann dimounn ki’nn mor akoz pese Adan, “bann move kouma bann bon” toulede. (Zist. 24:15) Dan so Parol, Labib, Zeova montre nou ki nou ena valer pou Li, mem si nou malad, mizer, ouswa vie.​—Zist. 10:34, 35.

7. Ki lezot rezon montre ki nou ena valer pou Zeova?

⁷ Ena lezot rezon ankor ki montre ki nou ena valer pou Zeova. Li’nn atir nou ver Li ek Li’nn trouve kouma nou’nn reazir kan nou’nn tann bonn nouvel. (Zan 6:44, NW) Plis nou’nn apros nou ar Zeova, plis Li’nn apros Li ar nou. (Zak 4:8) Anplis, Zeova pran letan ek fer zefor pou ansegn nou, ek sa montre nou ki nou ena valer pou Li. Li kone ki kalite dimounn nou ete asterla ek ki kalite dimounn nou kapav vini. Li osi disiplinn nou parski Li kontan nou. (Prov. 3:11, 12) Tousala se bann prev ki nou ena valer pou Zeova!

8. Kouma Psom 18:27-29 kapav inflians fason ki nou konsider nou bann difikilte?

⁸ Sertin dimounn ti konsider Lerwa David kouma enn nanye ditou. Me David ti kone ki Zeova ti kontan Li ek soutenir Li. Sa ti ed li pou andir so sitiasion ek pou ena enn bon latitid. (2 Sam. 16:5-7) Kan nou santi nou dekouraze ouswa kan nou ena bann difikilte, Zeova kapav ed nou pou trouv bann kitsoz dan enn fason pozitif ek Li kapav ed nou pou sirmont ninport ki difikilte. (Lir Psom 18:27-29, NW. *) Kan Zeova soutenir nou, pena nanye ki kapav anpes nou servi Li avek lazwa. (Rom. 8:31) Asterla, anou get trwa sitiasion presi kot nou vremem bizin rapel ki Zeova kontan nou ek ki nou ena valer pou Li.

9. Kouma maladi kapav ena enn lefe lor nou bann santiman?

⁹ Nou maladi kapav zwe lor nou lemosion ek fer nou krwar ki nou nepli itil pou personn. Nou kapav santi nou anbarase kan lezot trouve ki nou ena bann limit ouswa kan nou bizin fie lor lezot pou  ed nou. Mem si lezot pa kone ki nou malad, kitfwa nou ena bann santiman negatif parski nou nepli kapav fer bann kitsoz ki nou ti pe fer avan. Dan bann moman difisil koumsa, Zeova ankouraz nou. Kouma?

10. Dapre Proverb 12:25, ki kitsoz kapav ed nou kan nou malad?

¹⁰ Kan nou malad, “enn bon parol” kapav fer nou dibien. (Lir Proverb 12:25. *) Dan Labib, Zeova inn fer ekrir boukou “bon parol” ki rapel nou ki mem si nou malad, nou ena valer pou Li. (Ps. 31:19; 41:3) Si nou lir ek mem re-lir sa bann parol inspire la, Zeova pou ed nou sirmont bann santiman negatif ki nou ena akoz nou maladi.

11. Kouma enn frer ti gagn led Zeova?

¹¹ Anou get lexanp Jorge. Kan li ti zenn, Jorge ti tom malad ek so leta ti kontign anpire. Akoz sa, Jorge ti santi li initil. Li dir: “Akoz mo maladi, mo ti ena bann santiman negatif. Mo pa ti prepar mwa pou sa bann santiman-la. Parfwa mo ti gagn onte parski mo leta ti pe atir latansion lezot lor mwa. Amezir ki mo lasante ti pe kontign anpire, mo ti pe reflesi kouma sa ti pou sanz mo lavi. Mo ti abat net, ek mo ti sipliy Zeova pou ed mwa.” Kouma eski Zeova inn ed Jorge? Jorge explike: “Mo ti gagn difikilte pou konsantre. Mo ti kapav lir zis de-trwa verse dan Psom ki montre ki Zeova pran swin so bann serviter. Mo ti re-lir sa bann verse-la toulezour, ek sa ti rekonfort mwa. Avek letan, lezot ti remarke ki mo ti riye pli souvan. Zot ti mem dir ki mo latitid pozitif ti ankouraz zot. Mo ti rann mwa kont ki Zeova ti reponn mo bann lapriyer!  Li ti ed mwa pou ena enn lot lopinion lor momem. Mo ti koumans fixe mo latansion lor bann verse Labib ki montre kouma Zeova trouv mwa, mem si mo malad.”

12. Kan to pe fer fas ar enn maladi, kouma to kapav gagn led Zeova?

¹² Si to pe fer fas ar enn maladi, to kapav sir ki Zeova konn to sitiasion. Sipliy Li pou ed twa ena enn latitid pozitif lor to sitiasion. Apre sa, servi Labib pou trouv bann “bon parol” ki Zeova inn fer ekrir pou twa. Reflesi sirtou lor bann pasaz ki montre ki kantite Zeova so bann serviter ena valer pou Li. Kan to fer sa, to pou trouve ki Zeova bon anver tou dimounn ki servi Li avek fidelite.​—Ps. 84:11.

13. Kan enn sef fami perdi so travay, ki li kapav resanti?

¹³ Li normal ki enn sef fami anvi donn so fami seki zot bizin pou viv. Me fer koumadir enn frer perdi so travay, mem si li pa’nn fer nanye demal. Li fer boukou zefor pou gagn enn lot travay, me li pa gagne. Dan enn sitiasion koumsa, li kapav santi li initil. Kouma sa kapav ed li kan li res konsantre lor bann promes Zeova?

14. Kifer Zeova tini so bann promes?

¹⁴ Zeova touletan tini so bann promes. (Zozwe 21:45; 23:14) Ek Li fer sa pou plizir rezon. Enn rezon se parski sa ena enn lefe lor so nom, setadir lor so repitasion. Zeova inn promet ki Li pou pran swin so bann serviter fidel, ek Li fer Li enn devwar pou tini so promes. (Ps. 31:1-3, NW) Anplis, Zeova kone ki nou pou abat net si Li pa pran swin bann dimounn ki form parti so fami. Li promet pou donn  nou seki nou bizin lor plan materyel ek spiritiel, ek pena nanye ki kapav anpes Li tini sa promes-la!​—Mat. 6:30-33; 24:45.

15. (a) Ki difikilte bann Kretien dan premie siek ti gagne? (b) Kouma Psom 37:18, 19 rekonfort nou?

¹⁵ Kan nou rapel kifer Zeova tini so bann promes, nou kapav sir ki Li pou ed nou kan nou ena bann problem finans. Anou get lexanp bann Kretien dan premie siek. Kan ti ena enn gran persekision kont bann Kretien dan Zerizalem, zot tou ti disperse “apart bann zapot.” (Zist. 8:1, NW) Mazine ki kantite problem finans sa bann Kretien-la ti gagne akoz sa sitiasion-la! Sertin Kretien kitfwa ti perdi zot travay ek zot lakaz. Me Zeova pa ti abandonn zot, ek zot pa ti perdi zot lazwa. (Zist. 8:4; Ebre 13:5, 6; Zak 1:2, 3) Zeova ti soutenir sa bann Kretien fidel la, ek Li pou soutenir nou osi.​—Lir Psom 37:18, 19, NW. *

16. Ki kitsoz kapav fer nou panse ki nou servis nepli ena valer pou Zeova?

¹⁶ Plis nou vinn vie, plis nou santi ki nou nepli kapav fer boukou pou Zeova. Lerwa David kitfwa ti ena sa santiman-la amezir ki li ti pe vinn vie. (Ps. 71:9) Kouma eski Zeova kapav ed nou?

17. Ki nou kapav aprann ar lexanp enn ser ki apel Jheri?

¹⁷ Anou get lexanp enn ser ki apel Jheri. Li ti gagn linvitasion pou asiste enn renion formasion lor mintenans Lasal kot fer renion, me li pa ti anvi ale. Li ti dir: “Mo vie, mo enn vev, ek mo pena  okenn konpetans ki Zeova kapav servi. Mo santi mwa initil.” Lavey sa formasion-la, li ti devid so leker ar Zeova dan lapriyer. Landemin, kan li ti ariv Lasal, li ti ankor pe demann limem si li ti bizin vini. Pandan sa formasion-la, enn frer ki ti fer diskour ti met laksan lor konpetans pli inportan ki bann Kretien bizin ena, setadir dezir pou les Zeova ansegn zot. Jheri dir: “Mo ti dir ar momem, ‘Mo ena sa konpetans-la!’ Kan mo ti konpran ki Zeova ti pe reponn mo lapriyer, mo ti koumans plore. Zeova ti pe rasir mwa ki mo kapav donn Li enn kitsoz ki ena valer ek ki Li ti anvi ansegn mwa!” Jheri dir: “Mo ti al sa renion-la strese, dekouraze, ek abat net. Me kan mo’nn sorti laba, mo ti ena konfians an momem, mo ti ankouraze, ek mo ti santi ki mo ena valer pou Zeova!”

18. Kouma Labib montre ki nou servis pou Zeova ena valer pou Li mem kan nou vinn vie?

¹⁸ Si to enn kikenn ki aze, to kapav sir ki Zeova ankor ena travay pou twa. (Ps. 92:12-15) Parfwa, nou kapav panse ki bann kitsoz ki nou fer dan servis Zeova zot bien tigit. Me Zezi inn ansegn nou ki sa bann kitsoz-la ena valer pou Zeova. (Lik 21:2-4) Alor, konsantre twa lor seki to kapav fer. Par exanp, to kapav koz lor Zeova avek lezot, priye pou to bann frer ek ser, ek ankouraz zot pou res fidel. Zeova trouv twa kouma so konpagnon travay parski to anvi obeir Li, pa akoz seki to kapav fer.​—1 Kor. 3: 5-9.

19. Dapre Romin 8:38, 39, ki kitsoz nou kapav sir?

¹⁹ Nou vremem rekonesan ki nou ena enn Bondie kouma Zeova ki vremem kontan bann ki servi Li! Li’nn kree nou pou fer so volonte, ek se zis kan nou ador Li ki nou lavi vremem ena enn sans. (Rev. 4:11) Mem si nou pena valer pou sa lemond-la, nou ena boukou valer pou Zeova. (Ebre 11:16, 38) Kan nou santi nou dekouraze akoz maladi, bann problem finans, ouswa akoz nou pe vinn vie, fode pa nou bliye ki nanye pa kapav separ nou ar lamour ki Bondie ena pou nou.​—Lir Romin 8:38, 39.