MWAHA WOOSOMIYA 3
Weeva uhaana ifayita uhoolo wa Yehova, Nlukwaa!
“Uyo honuupuwela mmasakhani wihu.”—ISAA. 136:23.
NCIPO 33 Lança Sobre Deus o Teu Fardo
NINHALA WIITTHUCANI? *
1-2. Marikarikoni anaakhumelelela atthu anonswalela Yehova, ni ayo aneecoona cani?
WUUPUWELE ala matakihero mararwaala: munna mmirawo naahimyeriya ni meetiku wiira haana ireetta yuulupale. Munna mmoca o myaakha cookhalaka 50 naakumihiya nteko ni, hataa eekurumicaka waavya nteko nkhwaawe, uyo khankhitiri uphwanya. Arokorihu owuuluvala unaavira watepaka waarika uvara miteko ca Yehova khampa caavaraaya khalayi.
2 Wakhala wiira anawuukhumelela masankiho toko ayo, pooti ukhala wiira weeva uneecoona uhikhalana ifayita. Nlattu wo masakha toko ayo, weeva pooti wuurika ukhala ootteeliya, wiicoona ratta ni pooti wuurika waatanaca naatthu akhwaawe.
3. Sotwani ni atthu anaahoolelaawe anwehera cani ukumi wa apinaatamu?
3 Atthu o ntuninyani anwehera ukumi waapinaatamu toko Sotwani cinweheraawe. Ukhuma nenne no khalayi, Sotwani nawaawacera pusya apinaatamu, khampa atthu oohikhalana ifayita. Woohimwiira nanka uthunku, Sotwani ahomwiirela Hawa wiira aanaahala utaphuwa akhottaka umwiiwelela Nluku, hataa acuwelaka wiira Hawa aanaahala ukhwa aahimwiiweleleke Nluku. Ukhuma nenne no khalayi, Sotwani phinhoolela ikhurupu ca ananakoso, anasiyaasa ni ittiini co ntuninyani. Phimaana, hiiva khaninkhala ootikhinihiya nawoonaka ananakoso oolupale, anasiyaasa ni ahooleli ottiini yapankaka citthu khampa Sotwani, yahihisimaka ukumi ni yahiwoonelaka uthunku atthu.
4. Isiyani inhaleehu woopela mwaha nhina ula mwahoola?
4 Masi Yehova kahi phiryaawe commo. Uyo mpheela wiira atthu anonswalela yiiwehere saana. Ni canikhumelelaka citthu cinniiriha wuupuwela wiira khanirina ifayita, uyo naanikavihera. (Isaa. 136:23; Aroo. 12:3) Ula mwahoola, unaahala uthoonyera mananna Yehova cinnikaviheraawe canikhumelelaka citthu tthaaru: (1) nawerennyaka, (2) wanithwaaka nrusukhu ni (3) neecoonaka uhikhalana ifayita uhoolo wa Yehova nlattu wo wuuluvala. Nihinaaya woopela mwaha nnyo citthunnyo, nttwee noone nlattuni ninlamuliyeehu ukupali wiira otheene cihu nihaana ifayita uhoolo wa Yehova.
YEHOVA NAANOONA UKHALA ATTHU OFAYITA
5. Isiyani inthoonyera wiira apinaatamu ahaana ifayita uhoolo wa Yehova?
5 Hataa ukhalaka wiira Yehova numpale nintthupi notthaya, hiiva nihaana ifayita cinene uhoolo wawe uvikana ntthupi notthaya. (Upha. 2:7) Nincuwela cani iyo? Yehova howumpa apinaatamu ni mananna ayo cinkhitiryaaya uthoonyera makhalelo uyova arinaawe. (Upha. 1:27) Upanka wawe commo, Yehova honittitthimiha cinene uvikana citthu cikiina cotheene cumpalyaawe watuninyani, ni mpaka honivaha iparakha yoowacera itthaya ni inama.—Isaa. 8:4-8.
6. Isiyani-tho inthoonyera wiira apinaatamu oopahuwa ahaana ifayita uhoolo wa Yehova?
6 Hataa ukati Atamu waavanryaawe itampi, Yehova nanlelo khahiile uwoona apinaatamu ukhalana ifayita. Hiiva nihaana ifayita cinene uhoolo wa Yehova mpaka uyo haamini unvaha Mwanawe, Yesu, wiira anoopole mmatampini wihu. (1 Jo. 4:9, 10) Avarelaka nteko woopoliya wihu, Yehova naahala uwunweleliha ale akhwaale nlattu wotampi ya Atamu, “atthu oweettela isariya naayo ooheettela.” (Mite. 24:15) Nuulumo na Nluku ninthoonyera wiira hiiva nihaana ifayita uhoolo wa Yehova, hataa niwerennyaka, hataa wanithwaaka nsurukhu awula nikhalaka owuuluvala.—Mite. 10:34, 35.
7. Makhuluvelihoni makhwaawe anthoonyera wiira hiiva nihaana ifayita uhoolo wa Yehova?
7 Ahaavo makhuluveliho makhwaawe anthoonyera wiira nihaana ifayita uhoolo wa Yehova. Uyo honiwaana wanlokoni nawe ni howeheeha ratta mananna caakhulenleehu ukati weewaleehu ihapari comaana. (Joau 6:44) Ukati waavireehu nitepaka umphiyeera Yehova, uyo ciicammo aanaaniphiyeera. (Tiya. 4:8) Wiira athoonyere mananna cinnoonaawe ukhalana ifayita uhoolo wawe, Yehova naaleva ukatyaawe ni ikuru cawe wiira aniitthucihe. Uyo naacuwela mananna meettelweehu ciryaaya nna va ni naacuwela mananna cinhaleehu ukhitiri utepa uthoonyera meettelo omaana. Uyo naanilaka kontha naanifenta. (Miru. 3:11, 12) Khweeliini, hiiva nihaana ifayita cinene uhoolo wa Yehova!
8. Manannani Isaalimu 18:27-29 cinnikaviheraaya yanikhumelelaka marikariko?
8 Atthu akhwaawe yaamoona mwene Davidi ukhala nlopwana ootakhala nrima. Masi uyo aanaacuwela wiira Yehova aananfenta ni aanankavihera. Ukupaleeha iyo wahomwiiriha Davidi uwacera ratta itthu yankhumelenle. (2 Sam. 16:5-7) Inanna imoca, nakhalaka ni masukhuli awula yanikhumelelaka marikariko, Yehova pooti unikavihera uwehera ratta citthu cinnikhumelela ni pooti unikavihera waanana khula marikariko anhala unikhumelela muukumini wihu. (Usome Isaalimu 18:27-29.) * Hiiva nakaviheriyaka ni Yehova, khiivo nanka itthu inhala unihiiha unswalela unitteelaka nrima. (Aroo. 8:31) Vano, nttwee noopele mwaha marikariko mararu oohala hiiva wuupuwela wiira Yehova naanifenta ni naanoona ukhalana ifayita.
NAWERENNYAKA
Usoma moolumo o mbiiblyani pooti unikavihera waanana masukhuli ankhalaneehu nlattu woowerennya (Uwehe iparaagarafu 9-12)
9. Manannani iretta cinrukunusaaya mananna cineewehereehu?
9 Iretta pooti unikhaliha ni masukhuli menci. Iretta pooti unipankiha wuupuwela wiira khaavo ntthu nnoona ukhalana ifayita. Pooti woona ihaaya atthu akhwaawe yaniwehaka wiira cihaavo citthu cihinkhitiriihu upanka, awula atthunaka unaanuula muru napheelaka wiira akhwiihu anikavihere. Ni hataa ukhalaka wiira khaavo ncuwela iretteehu, atthunaka ninaakhala ooriipiya nrima nlattu woohikhitiri upanka citthu caapankeseehu khalayi. Hataa nikhalanaka ayo marikarikwaayo, Yehova naanilipiha. Manannani?
10. Toko cinthoonyeraaya Miruku 12:25, isiyani innikavihera nawerennyaka?
10 Nawerennyaka, “nuulumo nomaana” pooti unitteeliha nrima. (Usome Miruku 12:25.) * Hataa phimaana Yehova hothoonyera unamaana, wahenlyaawe mbiiblyani moolumo omaana annuupusera wiira hiiva nihaana ifayita uhoolo wawe, hataa niwerennyaka. (Isaa. 31:19; 41:3) Nasomaka ni naturuwelaka usoma ayo moolumwaayo, Yehova naahala unikavihera waanana masukhuli ankhalaneehu nlattu woowerennya.
11. Manannani munna mmoca coonalyaawe wiira hokaviheriya ni Yehova?
11 Woone itthu yankhumelenle Jorge. Ukati waaryaawe mmirawo, yahonkela ireetta yowaakuva wuunuwa. Iyo iretteeyo yahompankiha Jorge wuupuwela wiira khaarina ifayita. Uyo neera: “Mi akaakhitiri waanana masukhuli yaarinaaka nlattu wo iyo iretteeyo, ni hataa ciicammo ihaaya caakhalanaaka nlattu atthu wookoona kinari ale manannaale. Ukati ireettaaka waaviraaya itepacaka, kaanawuupuwela mananna makhalelwaaka caahalaaya urukunuwa. Kahokhala pusya ni kahonlepela Yehova wiira akikavihere.” Yehova ankavihenre cani Jorge? Uyo naattonka-tho: “Waanaakirika wiiweeha ratta itthu yaasomaaka. Phimaana, kahosovenrihiya usoma paahi iveerusu vakaani co Isaalimu cinthoonyera mananna Yehova cinaawaceraawe atthu anonswalela. Mi kaanaaturuwela usoma nnyo iveerusu vakaaninnyo, ni khacaareere ukimaaliha ni ukilipiha. Wahoolo, atthu yahancera woona wiira kaanaathya cinene. Mpaka yahokiirela wiira ayo yaanaalipihiya yakoonaka miiva kitteeliyaka. Commo phoonalyaaka wiira Yehova aanawaakhula mavekelwaaka! Uyo hokikavihera urukunusa mananna miiva ceeweheraka. Kahancera wuupuwela itthu Ibiiblya inhimyaaya nhina mananna Nluku cinkiweheraawe hataa kiwerennyaka.”
12. Wawerennyaka, isiyani weeva inlamuliyaa upanka wiira ukaviheriye ni Yehova?
12 Wakhala wiira unaawerennya, ukupali wiira Yehova naacuwela itthu inwiira. Unlepele wiira ookavihere uwehera ratta itthu inookhumelela. Vano, usome mbiiblyani moolumo omaana Yehova wantikhenlyaawe. Uweheehe iveerusu cinthoonyera wiira Yehova naamoona ukhalana ifayita khula ntthu nonswalela. Weeva unaahala woona wiira Yehova nawaathoonyera unamaana atthu ookhuluvelya otheene anonswalela.—Isaa. 84:11.
WANITHWAAKA NSURUKHU
Wuupuwela wiira Yehova hokhuluveliha uniwacera, unaahala unikavihera naahikhitiriki uphwanya nteko (Uwehe iparaagarafu 13-15)
13. Nhooleli itthoko neecoona cani akumihiyaka nteko?
13 Ahooleli itthoko otheene anaapheela waalihera amucyaaya. Masi wuupuwele wiira munna mmoca, hokumihiya nteko hataa ukhalaka wiira khapankale itthu yootakhala. Uyo nawiikurumica cinene utotha nteko nkiina, masi khamphwanya. Iyo itthwiiyo pooti umwiiriha munna wiicoona uhikhalana ifayita. Masi wuupuwela citthu Yehova cinnikhuluvelihaawe pooti unkavihera cinene. Manannani?
14. Kontha isiyani Yehova khula ukati naapanka itthu inkhuluvelihaawe?
14 Khula ukati, Yehova naapanka citthu cotheene cinkhuluvelihaawe. (Jos. 21:45; 23:14) Ni uyo nopanka commo nlattu wo citthu cinci. Yoopacera, kontha ncina nawe awula imaannyaawe inaakela nhina. Yehova hokhuluveliha waawacera atthu ookhuluvelya anonswalela, ni uyo neecoona ukhanyererihiya upanka iyo inatiriiyo. (Isaa. 31:1-3) Uhiya iyo, Yehova naacuwela wiira aahiniwacereke, hiiva naanaahala ukhala ooriipiya nrima ni naanaahala wiicoona uthepiya, kontha nikhanle amucyaawe. Nluku hokhuluveliha wiira naahala univaha citthu cimpheeleehu co mwiirutthuni ni coominepani, ni khiivo inhala unhiiha upanka itthu ikhuluvelihalyaawe!—Mat. 6:30-33; 24:45.
15. a) Masakhani yaakhumelenle makristau oseekulu yoopacera? b) Isaalimu 37:18, 19 innikhuluveliha isiyani?
15 Wuupuwela wiira Yehova khula ukati naapanka itthu inkhuluvelihaawe, unaanikavihera ukupali wiira uyo naaniwacera hataa unithwaaka nsurukhu. Wuupuwele ntakihero no makristau oseekulu yoopacera. Ukati wancenryaaya ulupatthiya cinene makristau o Yerusalemu, “otheene, waahiya maapostolu, yahomwarusiya.” (Mite. 8:1) Umwarusiya waya waawiihenre masakhani? Uthwaa wo nsurukhu! Atthunaka yahohiya inupa awula miteko caya. Waahookhalaru commo, Yehova khaahiyale veekha; ni ayo ciicammo khayaakhanle ooriipiya nrima. (Mite. 8:4; Mabere. 13:5, 6; Tiya. 1:2, 3) Yehova ahaakavihera ayo makristau ookhuluvelyaayo, ni uyo ciicammo naahala unikavihera.—Usome Isaalimu 37:18, 19. *
NAHUVAHUVACAKA NLATTU WO WUULUVALA
Wiikurumica upanka inkhitiriihu, hataa nuuluvalaka, unaanikavihera ukupali wiira Yehova naanoona hiiva ukhala atthu ofayita, ni nawoona ukhala wofayita nteko unonvareleehu (Uwehe iparaagarafu 16-18)
16. Isiyani yaahala unipankiha wuupuwela wiira uswali wihu khurina ifayita cinene uhoolo wa Yehova?
16 Nuuluvalaka, atthunaka ninoopuwela wiira khanirina itthu yuulupale yoohala unvaha Yehova. Iyo ciicammo atthunaka phi itthu yankhaliha ni masukhuli mwene Davidi ukati wooluvanlyaawe. (Isaa. 71:9) Manannani Yehova cinhalaawe unikavihera?
17. Isiyani inniitthucihaaya itthu yaakhumelenle arokorihu Jheri?
17 Moone itthu yaakhumelenle arokorihu aneehaniya Jheri. Ayo yaholattuliya urwaa unkutthaanoni Usalau yo Umwene, waahalaaya ulakiheriya mayamunna mananna oorehereryaca mapuro anvariya miteko ca Yehova. Masi arokorihu Jheri khayaatthunale urwaa. Ayo yaheera: “Kihooluvala, kinankhweli ni akincuwela upanka nanka itthu inhalaawe uvarela nteko Yehova. Akirina ifayita.” Uhiyu mmoca, nihinaphiya nihuku naahala upankiya uyo nkutthaanooyo, arokorihu yaholompa yanhimyeraka Yehova citthu cotheene caawiira wanrimani waya. Waaseele, uphiya waya usalau, yaaneekoha khampa khweeliini waanaaphwanela ukhala nne nipuronne. Ukati waapankiyaaya nkutthaano, munna mmoca aataphulela, ahooluma wiira itthu yuulupale incuweleehu upanka ukhanle utthuna wiitthucihiya ni Yehova. Arokorihu anawuupuwela: “Mi kahiiciirela: ‘Iyo mi kinaacuwela upanka!’ Vano kahancera wunla, kontha kahocuwela wiira Yehova ahaakhula nivekelo naka. Yehova aanaakikhuluveliha wiira ihaavo itthu yofayita yaarinaaka yoohala unvaha ni uyo aanaapheela ukiitthuciha!” Yoopuwelaka nno nihukunno, arokorihu aneera: “Kaarwaale unkutthaanoni kinari ooriipiya nrima, nimasukhuli ni kiicoonaka uhikhalana ifayita. Masi kaaturuwale unkutthaanoni kinari saana, oolipihiya ni kiicoonaka ukhalana ifayita!”
18. Ibiiblya inthoonyera cani wiira nteko unonvareleehu Yehova uhaana ifayita hataa nuuluvalaka?
18 Hataa nuuluvalaka, Yehova nanlelo naanoona ukhalana ifayita wiira nivare ntekwaawe. (Isaa. 92:12-15) Atthunaka nyuuva nnoopuwela wiira nteko unonvareleenyu Yehova ukhanle vakaani. Masi Yesu honiitthuciha wiira Yehova naawoona ukhala cofayita citthu cotheene cinompankeleehu. (Luka 21:2-4) Phimaana, mwiikurumice upanka inkhitiriinyu, toko waahimyera akhwiinyu myaha ca Yehova, waalompela akhwiinyu ni waasovenriha mayamunna wiira ahihiye unswalela Yehova. Khunakhala wiira Yehova nhala uwoonani ukhalana ifayita nlattu wonvarela nteko mwinci, masi uyo nhala uwoonani ukhalana ifayita nlattu nyuuva wootthuna umwiiwelela.—1 Akor. 3:5-9.
19. Arooma 8:38, 39 innikhuluveliha isiyani?
19 Unaareera cinene unswalela Yehova, Nluku oowoona ukhalana ifayita atthu otheene anonswalela! Yehova honumpa wiira nipanke impheelaawe, ni uswali weekhweeli phinniphwanyiha utteeliya muukumini wihu. (Apoka. 4:11) Hataa atthu o ntuninyani yanoonaka uhikhalana ifayita, Yehova kahi phinniweheraawe commo. (Mabere. 11:16, 38) Hataa nihuvahuvacaka nlattu woretta, unithwaa nsurukhu awula wuuluvala, hiiva pooti ukupali wiira khiivo nanka itthu inhala ukhitiri waahiiha Apaapeehu o wiirimu unifenta hiivano!—Usome Arooma 8:38, 39. *
^ par. 5 Weeva unawaanana masakha anwiiriha wuupuwela wiira khunafayita? Ula mwahoola unaahala wuukavihera wuupuwela wiira weeva uhaana ifayita cinene uhoolo wa Yehova. Ciicammo unaahala uthoonyera manannani weeva cinhalaa ukhitiri wiicoona ratta yookhumelelaka masankiho muukumini waa.
^ par. 8 Isaalimu 18:27 Kontha weeva unaawoopola atthu owiiyeviha, masi unawaayeviha atthu owiicoona. 28 Kontha thi weeva umparihela nthukwaaka, oo Yehova, Nlukwaaka nokimwaleela mpiphini waka. 29 Ninkavihero naa, miiva pooti waanana nkupitti waanamwinnya; niikuru ca Nluku, pooti uwela isiri yoorekama.
^ par. 10 Miruku 12:25 Masukhuli ananwereeha nrima pinaatamu, masi nuulumo nomaana ninaatteeliha nrima.
^ par. 15 Isaalimu 37:18 Yehova naacuwela citthu cinaakhumelela atthu eemaani, ni itthuvo ihiyeriyaaya khinhala umala. 19 Ayo khanhala wuulihaciya muru ukati wohasara; ukati wotala, anaahala ukhalana iyoolya yinci.
^ par. 19 Arooma 8:38 Kontha kinaakupali wiira nanka ukhwa, nanka ukumi, nanka malayikha, nanka makuvernu, nanka citthu cirivo, nanka citthu cinhala uwa, nanka ikuru, 39 nanka irekamelo, nanka yiiserero, ni khiivo nanka itthu ikhwaawe yumpiye inhala ukhitiri unimwalaniha nnifentoni na Nluku, niri iriyari wa Yesu Kristu, Apwiiyeehu.
NCIPO 30 Meu Deus, Meu Amigo e Pai
