1-2. Ngojapi mugariro jiri kusongana no vashandiri va Jehovha zve vanojizwa kudini?

VONANYI muezaniso mutatu iji: Imwe hama iri mujaha yavhunjwa ndi medhiko wayo kuti ino ndhendha icikarapiki. Imwe hama yaano makore anopindirija makumashanu, yakaruza basa. Asi pikija no kuvangisira koyaiita, aizivi kuwana basa rimweni. Imwe hambzaji yaamusharuka, aicakwanisi kuita zvese zvoyaikwanisa kuita pa kushandira kwayo Jehovha.

² Kudari imwimwi muri pa mugariro jakafanana no japerari kunangwa, kangaije mungajizwa kuti amusisiri. Zvineso izvi, zvingatiita kuti titame mudakaro, titame kujida no kuiita kuti titame kushamwarijana no vandhu vamweni.

3. Sathana no vandhu vo nyika ino, vanovona kudini upenyu?

³ Nyika iyi, inokhombija mavonero anoita Sathana upenyu hwo vandhu. Kuvhira kare, Sathana anotaja vandhu inga avasisiri. Acikarangariri zvo vamweni, wakavhunja Evha kuti waizosujunuka kudari akatama kuzwira Mwari, pikija ecizviziva kuti Evha waizofa. Cimwenizve, Sathana ndiyena ari kuvonerera zvorutengesehwano, zvomatongehwe o nyika pomwe no ciara. Ngo iyo ndava, atikahamari ngo kuvona vandhu vano khampani, vanovonerera zvomatongehwe o nyika pomwe no vatungamiriri vo zviyara vaiite inga ndiyena, vecikhombija kutama kureremeja upenyu.

4. Tinozovonenyi pa musoro uno?

⁴ Asi, Jehovha wakasiyana. Iyena anoda kuti vashandiri vake vajide zve pavanonga pa mugariro unonesa unovaita kuti vajivone inga avasisiri, iyena anovabesa. (Nduyo 136:23, Shanduro yeNyika Itsva; VaRoma 12:3) Musoro uwu, unozovonesa  kuti Jehovha anozotibeseresa kudini pa njira ndhatu iji: (1) Patinohwaja, (2) patinokonehwa mare zve (3) mupira wedu paunotiita kuti tirangarire kuti aticasisiri kuna Jehovha. Asi, ticito tavona zvondhozvo, ngatende tivone kuti tingavisa kudini no cokwadi co kuti umwe na umwe wedu anosisira maningi kuna Jehovha.

5. Cicinyi cinovonesa kuti vandhu vanosisira maningi kuna Jehovha?

⁵ Pikija takaitwa ngo dongo, kuna Jehovha tinosisira maningi kupinda dongo. (Genesi 2:7) Tinozvizivisa kudini? Jehovha wakasika vandhu ngo njira yokuti vakwanisevo kutatija mugariro jake. (Genesi 1:27) Ngo njira iyi, iyena wakatiita kuti tive vanosisira maningi kupinda zvisikwa zvese zvo pasi. Wakatipa basa ro kungwarira nyika no zvinyama.—Nduyo 8:5-9.

6. Ngorapi thangwe rimweni rinovonesa kuti Jehovha anoreremeja vandhu vacikazivi kukwana?

⁶ Adhamu paakashaisha, Jehovha wakaenderera mberi ecikhombija kuti vandhu vanosisira. Tinosisira maningi kuna Jehovha zvokuti wakatipa mwana wake, Jesu, kuti atisujunure ku ushaishi. (1 Johani 4:9, 10) Ecishandisa muripo, Jehovha acazomusa “vanasi no vacikanasi,” vakafaya ngo ndava yo cishaishi ca Adhamu. (Maitiro o Vapostori 24:15) Soko ra Mwari rinovonesa kuti azvinenyi kuti tiri kuhwaja kana takavanga, tino mare kana tiri varombo, tiri vana kana vasharuka, tese tinosisira kuna Jehovha.—Maitiro o Vapostori 10:34, 35.

7. Ngoapi mathangwe amweni anovonesa kuti tinosisira kuna Jehovha?

⁷ Tinazve mathangwe amweni anovonesa kuti tinosisira kuna Jehovha. Iyena wakwatikwevera kwaari ngo kuti wakavona kuti takadakarira masoko akanaka. (Johani 6:44) Patakhwedera kuna Jehovha, iyena wakatikhwedereravo. (Jakobo 4:8) Kuti avonese kuti tinosisira, Jehovha arikushandisa nguva no simba rake kuti atipangire. Iyena anoziva zvatiri no zvaticava. Anotipangira ngokuti anotida. (Mazwi Akangwara 3:11, 12) Zvakajeka kuti tinosisira maningi kuna Jehovha!

8. Magama atinowana pana Nduyo 18:28-30, anotibeseresa kudini patinosongana no zvineso?

⁸ Vandhu vamweni vaivona Dhavhidhi inga mundhu acikasisiri. Asi iyena waizviziva kuti Jehovha waimuda no kumubesa. Kuziva izvi, kwakabesera Dhavhidhi kuti ahwisane no mugariro ondhoo. (2 Samueli 16:5-7) Mu njira yakafanana, patinojizwa takasuruvara kana patinosongana no zvineso, Jehovha angatibesera kuvona zviro zvondhozvo ngo manera akasiyana kana kutonyisa cineso catiri kusongana naco. (Verenganyi Nduyo 18:28-30.) Patinobesehwa ndi Jehovha, apana cingatiita kuti titame kumushandira no takadakara. (VaRoma 8:31) Wari, ngatende tivone mugariro mutatu jatinosongana najo, tinodikana kuceukija kuti Jehovha anotida zve anotivona kuva vandhu vanosisira.

9. Kuhwaja kungaita kuti mundhu azwe kudini?

⁹ Kuhwaja kungaita kuti mundhu ave wakasuruvara. Ikona kungatiita kuti tijizwe inga atisisiri kuno ari wese. Tingatonyowejeka vandhu pavanovona kuti aticakwanisi kuita zvimweni kana patinokumbira kuti vamweni vatibesere. Pikija apana mundhu anozviziva kuti tiri kuhwaja, tinosuruvara patinotama kukwanisa kuita zviya zvotaiita kare. Mugariro uwu, unorembesa maningi, asi Jehovha anotivangisa. Kuitisa kudini?

10. Mukuzwirana na Mazwi Akangwara 12:25, zvicinyi zvingatibesera patinonga tecihwaja?

¹⁰ Patinonga tecihwaja “izwi rakanaka” rinovangisa maningi. (Verenganyi Mazwi  Akangwara 12:25.) Ngo iyo ndava, Jehovha no kunaka kwake mwoyo, wakadira mu Bhaibheri, magama anoticeukija kuti tinosisira maningi, pikija patinonga tecihwaja. (Nduyo 31:20; 41:4) Kudari tikaverenga kana kutophinda kuverenga magama aya, anowanikari mu Bhaibheri, Jehovha anozotibesera kuti tihwisane no mazwiro acingabesi anoviiswa ngo kuhwaja.

11. Jehovha wakabeseresa kudini hama Jorge

¹¹ Vonanyi basi zvakaitika na hama Jorge. Povainga mujaha, ivona vakava no ndhendha inonesa maningi. Izvo zvakaita kuti hama Jorge vajivone inga kuti avacasisiri. Ivona vakati: “Inini andicainga ndakanasiririka kuti ndinyise mazwiro acikabesi akaviiswa ngo ndhendha iyi, ngokuti vandhu vaindisota maningi ngo mugariro wainga waita muviri wangu. Ndhendha yangu poyainga yecinyanya, ndaindorangarira macinjire aizoita upenyu hwangu. Ndakasuruvara maningi zve ndakadeketerera Jehovha kuti andibesere.” Waro, Jehovha wakabeseresa kudini hama Jorge? Ivona vakaenderera veciti: “Inini andicaikwanisa kugajana. Ngokudaro, hama jakandivangisa kuti ndiverenge vhesi nganani jo bhuku ra Nduyo, jinovonesa kuti Jehovha anoneseka maningi ngo vashandiri vake. Ndaipeja njiku yese ndeciverenga vhesi jondhojo. Zvondhozvo zvakandiita kuti ndijizwe nane zve jakandiembezera maningi. Pa kufamba ko nguva, vandhu vakakwanisa kuvona kuti ndainga ndotanga kuseka no vamweni. Vamweni vakatonanga kuti vakavangiswa maningi ngo mavonero angu aushoni. Pondhopo, ndakazwisisa kuti Jehovha, wainga wadavira mukumbiro jangu! Iyena wakandibesera kuti ndicinje manera andaijivona. Ndakatanga kubatisisa zvinonangwa mu Bhaibheri ngo pamusoro po mavonero anondiita Mwari, pikija no ndhendha yangu.”

12. Pamunonga mecihwaja, zvicinyi zvamunodikana kuita kuti mubesehwe ndi Jehovha?

 ¹² Kudari muri kuhwaja, ivanyi no cokwadi co kuti Jehovha anozviziva zvamuri kuhwisana nazvo. Deketeranyi kuti iyena amubesere kuva no mavonero aushoni pa mugariro wenyu. Perapo, verenganyi magama aushoni akadihwa mu Bhaibheri, kuitira imwimwi. Batikananyi maningi pa vhesi jiya jinovonesa mavonero anoita Jehovha vashandiri vake. Munozokwanisa kuvona kuti Jehovha wakanaka no vaya vanomushandira vakagondeka.—Nduyo 84:11.

13. Musoro wo mbhuri paanoruza basa, angajizwa kudini?

¹³ Musoro wese wo mbhuri anoda kusapota zvinodiwa zvo mbhuri yake. Asi, rangariranyi kuti hama yaruza basa pikija aizivi kuita cakashata. Iyona iri kuvangisira maningi kuti iwane basa rimweni, asi airipi kuriwana. Mugariro uwu, ungaita kuti hama yedu ijizwe inga icikasisiri. Asi kuceukija zvigondiso zva Jehovha, kungabesera maningi. Kuitisa kudini?

14. Ngenyi Jehovha anokwanirisa zvese zvaanogodesa?

¹⁴ Jehovha nguva jese anokwanirisa zvigondiso zvake. (Joxwa 21:45; 23:14) Anozviita ngo mathangwe akasiyana-siyana. Rokutanga ngo rokuti zina rake riri kupsipiswa. Jehovha wakagondesa kuti waizokorondha vashandiri vake. Ngokudaro, iyena anoda kukwanirisa cigondiso ici. (Nduyo 31:2-4) Kusiyapo zvondhozvo, Jehovha anozviziva kuti, akatama kutikorondha itusu tiri wari divi ro mbhuri yake, taizosuruvara maningi. Iyena wakagondesa kuti waizotipa zvese zvatinoda kuunyama no ku divi ro umwari. Apana ciri cese cingamuphingaija kuti atame kuzvikwanirisa!—Mateu 6:30-33; 24:45.

15. (a) Makristu o mu zana ro kutanga ro makore akasongana no cineso capi? (b) Nduyo 37:18, 19, anotiita kuti tithembenyi?

 ¹⁵ Kuceukija kuti Jehovha anokwanirisa zvigondiso zvake, kunotibesera kuti timuthembe patinotama mare. Vonanyi muezaniso wo Makristu o mu zana ro kutanga ro makore. MaKristu o Jerusarema paakatanga kuteverehwa, “vese vakaparajana . . . vosara vapostori basi.” (Maitiro o Vapostori 8:1) Zvese izvi zvakabarenyi? Zvakaita kuti vandhu vanesehwe maningi kuwana mare. Zvingaita kuti Makristu aya, akaruza nyumba jao no mabasa. Pikija zvakadaro, Jehovha aazivi kuvasiya. Ivona avazivivo kuperehwa ngo mudakaro. (Maitiro o Vapostori 8:4; Vaheberi 13:5, 6; Jakobo 1:2, 3) Jehovha wakabesera Makristu akagondeka o mu zana ro kutanga zve anozotibesavo.—Verenganyi Nduyo 37:18, 19.

16. Zvicinyi zvingatiita kuti tirangarire kuti kushandira kwedu Jehovha akucasisiri?

¹⁶ Patinonga taavasharuka, kangaije tinovona kuti aticakwanisi kuita zvizinji kuna Jehovha. Zvingaitavo kuti Mambo Dhavhidhi wainga no mavonero ondhoo paainga waamusharuka. (Nduyo 71:9) Jehovha angatibeseresa kudini?

17. Tinojijenyi ngo zvakaitika na hambzaji Jheri?

¹⁷ Vonanyi muezaniso wo imwe hambzaji inodanwa Jheri. Iyona yainga yakokwa kuti iende koovona musongano wo bauhwa ro kunasirira-nasirira, waizoitwa pa Nyumba yo Umambo. asi iyona aicaida kwenda. Hambzaji Jheri vakati: “Ndaamusharuka, ndiri noni zve apana candinokwanisa kuita pa mberi pa Jehovha. Andisisiri.” Usiku umwe musongano uwu, ucito waitwa, hambzaji Jheri vakaita mukumbiro kuna Jehovha. Mangwana fumi, povakaguma pa Nyumba yo Umambo, ivona vaindokana-kana dangani vaidikana kwenda  kondhoyo. Musongano uwu powainga weciitwa, muiti umweni wo hurukuru, wakananga kuti cikwaniriso cinosisira maningi ngo co kuva no cido co kuda kujipira kuti tijijiswe ndi Jehovha. Hambzaji Jheri, vanoceuja kudari: “Ndakagara ndorangarira kudari: ‘Inini ndinaco cikwaniriso ici.’ Pondhopo ndakatanga kucema, ngokuti ndakazwisisa kuti Jehovha wainga wadavira mukumbiro wangu. Iyena wainga ecindigondisa kuti, inini ndino ciro cinosisira maningi candingapa Jehovha zve iyena anoda kundijijisa!” Povanosota sure, voceukija njiku yo musongano wiya, hambzaji Jheri vakati: “Ndakaguma ku musongano ndecithimwa-thimwa, ndakasuruvara zve ndicikasisiri. Asi ndakavha kondhoyo, ndecijithemba, ndakavangiswa zve no ndiri mundhu anosisira.”

18. Bhaibheri rinovonesa kudini kuti basa ratinoitira Jehovha rinosisira pikija taavasharuka?

¹⁸ Pikija taavasharuka, Jehovha anoenderera mberi ecitishandisa. (Nduyo 92:12-15) Kangaije mungarangarira kuti amuripi kuita zvizinji pa kushandira Jehovha. Asi, Jesu wakajijisa kuti zvese zvatinoita mu basa ra Jehovha, zvinosisira maningi. (Luka 21:2-4) Ngokudaro, batikananyi ngo zviro zvamunokwanisa kuita. Inga muezaniso, mungabhuya no vamweni ngo pamusoro pa Jehovha, kuitira mukumbiro vamweni no kuvangisa vamweni kuti vaenderere mberi vakagondeka. Zvinoita kuti Jehovha amuvonenyi kuva mubeseri wake, asipi ngo zvamunokwanisa kuita asi anomuvona kudaro ngo ndava yo cido cenyu co kuda kumushandira.—1 VaKorinto 3:5-9.

19. Cigondiso capi catinowana pana VaRoma 8:38, 39?

¹⁹ Zvinodakajisa kunamata Jehovha, Mwari wokuti anovona vashandiri vake vese kuva vanosisira! Jehovha wakatisika kuti tiite kuda kwake. Kunamata ko cokwadi, kunoita kuti upenyu hwedu uve unodakajisa. (Apokalipsi 4:11) Pikija vandhu vo nyika vecitivona inga atisisiri, Jehovha aanyoejeki ndusu. (Vaheberi 11:16, 38) Azvinenyi kuti tiri kuhwaja, atina mare kana taavasharuka, tingava no cokwadi cokuti akuna ciro cingatiparajanisa ku rudo una Baba wedu vo kudenga.—Verengenyi VaRoma 8:38, 39.