1-2. Ko e heigoa e tau tuaga ne fehagai e tokologa he tau tagata ha Iehova ki ai, ti ko e puhala fe ne lauia ai a lautolu?

MANAMANATU ke he tolu e tuaga nei: Ko e matakainaga taane fuata ne moua he gagao kelea lahi. Ko e matakainaga taane ne molea e 50 e tau he moui kua oti mo e gahua, ti nakai moua e ia e taha gahua pete he eketaha a ia. Ko e matakainaga fifine motua kua fakamooli ne tote fakahaga e mena kua maeke ke taute he fekafekauaga ha Iehova.

² Ka fehagai a koe mo e taha mena pihia ne tupu, liga logona hifo a koe kua nakai tuai aoga a koe. Maeke e tau tuaga pihia ke fofō haau a fiafia, moumou e lilifu fakatagata, mo e fakatauhele e fakafetuiaga mo e falu tagata.

3. Ko e heigoa e onoonoaga ha Satani mo lautolu ne fifitaki a ia hagaao ke he moui he tagata?

³ Fakakite he lalolagi nei e onoonoaga ha Satani ke he moui he tagata. Taute fakateaga tumau e Satani e tau tagata ke tuga kua nakai aoga a lautolu. Mahani vale a ia he foaki ki a Eva e puhala ke he tokanoaaga, pete he iloa katoa e ia ko e fakahala he nakai omaoma ke he Atua ko e mate. Pule tumau a Satani ke he tau tuaga fakatupe, fakapolitika, mo e fakalotu he lalolagi nei. Ti nakai ofo kua tokologa e tagata pisinisi, politika, mo e tau takitaki lotu ne fakakite e nakai fakalilifu ke he moui mo e lilifu he tagata.

4. Ko e heigoa ka fakatutala a tautolu he vala tala nei?

⁴ Ka e manako a Iehova ke logona hifo e tautolu e mitaki  hagaao ki a tautolu ni, ti lalago e ia a tautolu ka fehagai mo e tau tuaga ka logona hifo e tautolu e nakai aoga. (Sala. 136:23; Roma 12:3) To fakatutala e vala tala nei ke he puhala kua lagomatai e Iehova a tautolu he tau tuaga nai: (1) Ka matematekelea a tautolu he gagao, (2) ka lauia a tautolu he tau tuaga uka fakatupe, mo e (3) ka taute he vahā fuakau a tautolu ke tuga kua nakai tuai aoga e fekafekauaga ha tautolu ki a Iehova. Ka e fakamua, kitekite la ke he kakano ka mauokafua a tautolu kua uho a tautolu takitokotaha ki a Iehova.

5. Ko e heigoa ne fakakite ki a koe kua uho e tau tagata ki a Iehova?

⁵ Pete he tufuga a tautolu mai he efuefu he kelekele, kua mua atu e uho ha tautolu ke he efuefu. (Kene. 2:7) Manamanatu ke he falu kakano ati iloa e tautolu kua aoga a tautolu ki a Iehova. Tufuga e ia e tau tagata aki e lotomatala ke muitua e tau mahani haana. (Kene. 1:27) He taute pihia, fakatokoluga e ia a tautolu ke he tau tufugatia oti ne toe he kotofa a tautolu ke leveki e lalolagi mo e tau manu.​—Sala. 8:4-8.

6. Ko e heigoa falu fakamooliaga ne moua e tautolu kua uho ki a Iehova e tau tagata nakai mitaki katoatoa?

⁶ He mole e agahala ha Atamu, kua uho agaia ki a Iehova e tau tagata. Kua uho lahi a tautolu ki a ia ti foaki ai haana a Tama fuataha ko Iesu ke eke mo lukutoto ma e tau agahala ha tautolu. (1 Ioa. 4:9, 10) He fakagahua e aoga he lukutoto, to fakaliu tu mai e Iehova a lautolu kua mamate ha ko e agahala ha Atamu, “ko lautolu ne tututonu katoa mo lautolu ne hepehepe.” (Gahua 24:15) Fakakite he Kupu haana kua uho a tautolu ki a ia pete e tuaga he ha tautolu a malolō tino, tuaga fakatupe, po ke tau tau he moui.​—Gahua 10:34, 35.

7. Ko e heigoa falu kakano kua talitonu e tau fekafekau he Atua kua uho a lautolu ki a Iehova?

⁷ Moua e tautolu e falu kakano he talitonu kua uho a tautolu ki a Iehova. Futiaki e ia a tautolu ki a ia ti mailoga e puhala kua talia e tautolu e tala mitaki. (Ioane 6:44) He kamata a tautolu ke fakatata ki a Iehova, kua fakatata lahi a ia ki a tautolu. (Iako. 4:8) Fakaaoga foki e Iehova e magaaho mo e malolō ke fakaako a tautolu he fakakite kua uho a tautolu ki a ia. Iloa e ia a tautolu takitokotaha mogonei mo e puhala ka holo ki mua a tautolu. Akonaki foki e ia a tautolu ha kua fakaalofa a ia ki a tautolu. (Fakatai 3:11, 12) Ko e fakamooliaga malolō kua uho a tautolu ki a Iehova!

8. Maeke fēfē e tau kupu ia Salamo 18:27-29 ke lauia e onoonoaga ha tautolu ke he tau paleko ha tautolu?

⁸ Falu ne onoono fakateaga ke he Patuiki ko Tavita, ka e iloa e ia kua ofania mo e lalago e Iehova a ia. Lagomatai he manatu ia a Tavita ke fakauka mo e hako e onoonoaga ke he tuaga haana. (2 Samu. 16:5-7) Ka logona hifo e tautolu e fakaatukehe po ke fehagai mo e tau paleko, to lagomatai e Iehova a tautolu ke kitia e tau mena he taha puhala foki mo e to lagomatai e ia a tautolu ke kautū mai he tau mena vihi. (Totou Salamo 18:27-29.) Ka moua e tautolu e lalagoaga ha Iehova, to nakai fai mena ke taofi a tautolu mai he fekafekau fiafia ki a Ia. (Roma 8:31) Kitekite la tautolu mogonei ke he tolu e tuaga pauaki ia ka lata mooli ke manatu kua fakaalofa mo e uho a tautolu ki a Iehova.

9. Maeke fēfē e gagao ke lauia e onoonoaga ha tautolu ki a tautolu ni?

⁹ Fakatupetupe lahi a tautolu ka gagao, ti taute a tautolu ke logona hifo kua nakai tuai aoga a tautolu ke he ha tagata. Liga fuafuakelea a tautolu ka mailoga he tau tagata kua  nakai malolō a tautolu po ke ka lata a tautolu ke falanaki ke he falu ma e lagomatai. Pete foki ka nakai mailoga he falu kua gagao a tautolu, liga taufetului a tautolu ke he tau logonaaga fuafuakelea ha kua nakai lahi e mena ka taute e tautolu. He tau magaaho matematekelea pihia, fakamalagaki hake e Iehova a tautolu. Puhala fe?

10. He Tau Fakatai 12:25, ko e heigoa ka lagomatai a tautolu ka gagao?

¹⁰ Ka gagao a tautolu, “ko e kupu mitaki” ka fakamalagaki hake a tautolu. (Totou Tau Fakatai 12:25.) He Tohi Tapu, kua fakamau e Iehova e tau kupu mitaki ke fakamanatu mai kua aoga a tautolu ki a ia pete he gagao a tautolu. (Sala. 31:19; 41:3) Ka totou ti liu totou foki e tautolu e tau kupu omoomoi ia, to lagomatai e Iehova ke fehagai mo e tau logonaaga kelea he gagao ha tautolu.

11. Moua fēfē he taha matakainaga e lagomatai ha Iehova?

¹¹ Manamanatu ke he mena ne tupu ki a Jorge. He fuata a Jorge, ne lauia a ia he gagao hagahaga kelea lahi mo e mafiti e kelea ti logona hifo e ia e nakai aoga. “Nakai amanaki au ke logona hifo pihia po ke fuafuakelea ha ko e gagao haaku ti onoono mai e tau tagata,” he ui e Jorge. “He kelea fakahaga e tuaga haaku, manamanatu au ke he puhala ka hiki e moui haaku. Fakaatukehe lahi au ti olelalo ki a Iehova ma e lagomatai.” Lalago fēfē e Iehova a ia? “He nakai maeke au ke manamanatu fakahako, ne atihake au ke totou e tau vala kūkū he Salamo kua fakakite e fakaalofa ha Iehova ke he tau fekafekau Haana. Totou ti liu totou e au e tau kupu Tohi Tapu gahoa ia he tau aho takitaha, ti moua ai e au e mafanatia mo e mauokafua. Nakai leva ti kamata e tau tagata ke kitia kua mamali lahi au. Talahau foki e lautolu ko e aga mitaki haaku kua atihake  a lautolu. Mailoga e au kua tali e Iehova e tau liogi haaku! Lagomatai e ia au ke hiki e puhala ne onoono hifo au ki a au. Kamata au ke hagaaki ke he mena ne talahau he Kupu haana hagaao ke he puhala kua onoono a ia ki a au pete e gagao haaku.”

12. Ka fehagai mo e gagao, moua fēfē e koe e lalagoaga ha Iehova?

¹² Ka fehagai a koe mo e gagao, kia mauokafua kua iloa e Iehova e tuaga haau. Olelalo ki a ia ma e lagomatai ke maeke a koe ke feaki e onoonoaga mitaki ke he tuaga haau. Ti fakaaoga e Tohi Tapu ke liu manatu e tau kupu mitaki ha Iehova ne fakamau ma haau. Hagaaki ke he tau kupu tohi ne fakakite e aoga lahi he tau fekafekau ha Iehova ki a ia. He taute pihia, to kitia e koe kua mitaki a Iehova ki a lautolu oti kua fekafekau fakamooli ki a ia.​—Sala. 84:11.

13. Fēfē e logonaaga he ulu he magafaoa ka nakai gahua tupe a ia?

¹³ Manako oti e tau ulu he tau magafaoa ke leveki e magafaoa ha lautolu. Ka e kua ka nakai ko e hehē he matakainaga ti oti a ia mo e gahua tupe. Ne eketaha a ia ke kumi e taha gahua ka e uka lahi. He fehagai mo e tau tuaga ia, liga logona hifo e ia e nakai aoga haana. Lagomatai fēfē a ia he hagaaki ke he tau maveheaga ha Iehova?

14. Ko e heigoa e tau kakano ne fakamooli e Iehova e tau maveheaga haana?

¹⁴ Fakamooli tumau e Iehova e tau maveheaga haana. (Iosua 21:45; 23:14) Loga e kakano ati taute pihia e ia. Fakamua, kua lauia e higoa haana. Mavehe e Iehova to leveki e ia e tau fekafekau fakamooli haana, ti logona hifo e lata ke fakamooli e maveheaga ia. (Sala. 31:1-3) Lafi ki ai, iloa e Iehova to matematekelea lahi a tautolu ka nakai leveki e ia a lautolu he  magafaoa haana. Mavehe e ia ke leveki fakatino mo e fakaagaaga a tautolu, ti nakai fai mena ke taofi a Ia he fakamooli e maveheaga ia!​—Mata. 6:30-33; 24:45.

15. (a) Ko e heigoa e paleko ne fehagai e tau Kerisiano he senetenari fakamua? (e) Ko e heigoa e mauokafua ne foaki he Salamo 37:18, 19?

¹⁵ Ka manatu e tautolu e kakano ne fakamooli tumau e Iehova e tau maveheaga haana, to iloa e tautolu e puhala ke fehagai mo e tau paleko fakatupe. Manamanatu ke he fakataiaga he tau Kerisiano he senetenari fakamua. Magaaho ne tupu e favaleaga ke he fakapotopotoaga i Ierusalema, “kua mavehevehe foki a lautolu oti . . . kua toe e tau aposetolo hoko lautolu.” (Gahua 8:1) Manamanatu ke he kakano he mena ia. Ko e tuaga uka fakatupe! Liga galo he tau Kerisiano e tau kaina mo e tau pisinisi ha lautolu. Ka e nakai tiaki e Iehova a lautolu; ti nakai galo foki e fiafia ha lautolu. (Gahua 8:4; Hepe. 13:5, 6; Iako. 1:2, 3) Lalago e Iehova e tau Kerisiano fakamooli ia, to lalago foki e ia a tautolu.​—Totou Salamo 37:18, 19.

16. Ko e heigoa e tuaga ka manamanatu a tautolu kua aoga nakai ki a Iehova e tapuakiaga ha tautolu?

¹⁶ He fuakau fakahaga a tautolu, liga kamata a tautolu ke logona hifo kua tote e fekafekauaga ha tautolu ki a Iehova. Liga tupetupe e Patuiki ko Tavita he tau logonaaga pihia he fuakau a ia. (Sala. 71:9) Lagomatai fēfē e Iehova a tautolu?

17. Ko e heigoa kua fakaako e tautolu mai he mena ne tupu ke he matakainaga fifine ko Jheri?

¹⁷ Manamanatu ke he mena ne tupu ke he matakainaga fifine ko Jheri. Uiina a ia ke he fono ke fakaako ke leveki e Fale he Kautu, ka e nakai manako a ia ke fano. Pehē a ia: “Fuakau au ti ko e takape, nakai fai lotomatala au ke  fakaaoga e Iehova. Nakai aoga au ha mena.” He pō to fakahoko e fono ke fakaako, ne liligi e ia e loto haana ki a Iehova he liogi. He hau a ia ke he Fale he Kautu he aho hake, fakauaua agaia a ia kua lata nakai a ia ke fina atu. He fakaholoaga, taha he tau tagata fakaako ne fakamaama ko e lotomatala ne mua e aoga ko e makai ha tautolu ke fakaako e Iehova. Talahau e Jheri: “Manatu au, ‘Pihia e lotomatala haaku!’ Kamata au ke tagi he mailoga e au kua tali e Iehova e liogi haaku. Fakamafana mai a Ia ki a au kua fai mena aoga au ke foaki ti makai a Ia ke fakaako au!” He liu ono ki tua, pehē a Jheri: “Fina atu au ke he fono ia mo e hopoate, loto lolelole, mo e fakaatukehe. Ka e hū mai au ki fafo mo e logonaaga mauokafua, atihake, mo e aoga!”

18. Fakakite fēfē he Tohi Tapu kua matutaki a Iehova ke tokiofa e tapuakiaga ha tautolu he fuakau fakahaga a tautolu?

¹⁸ He fuakau fakahaga a tautolu, kia mauokafua kua fai gahua agaia a Iehova ke taute e tautolu. (Sala. 92:12-15) Fakaako e Iesu a tautolu pete ni he nakai lahi e lotomatala po ke tuga kua tote e gahua ha tautolu, tokiofa e Iehova e tau mena oti kua maeke a tautolu ke taute he fekafekauaga haana. (Luka 21:2-4) Kia hagaaki ke he mena kua maeke a koe ke taute. Ma e fakatai, maeke a koe ke tutala hagaao ki a Iehova, liogi ma e tau matakainaga haau, mo e fakamafana e falu ke tumau e mahani fakamooli. Onoono a Iehova ki a koe ko e ekegahua haana ha kua makai a koe ke omaoma ki a ia, ka e nakai ha ko e tau mena ne taute e koe.​—1 Kori. 3:5-9.

19. Ko e heigoa e fakamafana ne foaki mai ki a tautolu he Roma 8:38, 39?

¹⁹ Fakaaue a tautolu ke tapuaki ki a Iehova ko e Atua kua tokiofa mooli a lautolu ne fekafekau ki a ia! Tufuga e ia a tautolu ke taute e finagalo haana, ti ko e tapuakiaga mooli kua lafi ke he fiafia he tau momoui ha tautolu. (Fakakite. 4:11) Pete kua onoono e lalolagi ki a tautolu kua nakai aoga, nakai mā a Iehova ia tautolu. (Hepe. 11:16, 38) Ka pehia e logonaaga ha tautolu he gagao, tuaga uka fakatupe, po ke fuakau, kia manatu kua nakai fai mena ke vevehe a tautolu mai he fakaalofa he ha tautolu a Matua he lagi.​—Totou Roma 8:38, 39.