1-2. Ni myatsi yahi eyo abandu ba Yehova bangyi bakalabamo, kandi emyatsi eyo yangabatulako yiti?

TERILENGEKANIA oko myatsi isatu eno: Omunganga amabwira mughala wetu mulwana ati ali n’obukoni obukendisyaleka omubiri wiwe inyoloberera kutsibu. Mughala wetu mughuma oyuwite emyaka eyilabire oko 50, oyukakola kutsibu amahiwa oko kasi kiwe. Amayikasa kutsibu erisondya eyindi kasi, aliwe syatabanayo. Mwali wetu mughuma mutaleghula oyukekeluhire syakiwite obutoki bw’erikola ngoko abya akakola kera omo mubírí wa Yehova.

² Wamabya iwunemulaba omo mwatsi mughuma w’oko myatsi eyikalire ng’eyi, wanganayowa nga siwukiri w’omughaso n’ahake. Emyatsi eyiri ng’eyi yanganaleka iwaherya obutseme bwaghu, iwabya n’amalengekania awatuwene okw’iwuwene-wene, n’obwira bwaghu haghuma n’abandi ibwatsanda.

3. Sitani n’abakakwama amalengekania wiwe bawite amalengekania wahi oko ngebe y’abandu?

³ Ekihugho kino kikakanganaya amalengekania wa Sitani oko ngebe y’abandu. Mughulu wosi Sitani akakolera abandu nga si b’omughaso. Butsira bulighe, mwabwira Eva ati akendibya n’obwiranda amatendihulikirira oMungu n’omo anabya inyanasi ngoko eritendiowa oMungu kikendimutwala oko luholo. Erilua kera, Sitani anemusondola emyatsi y’ekomerese, emyatsi y’epolitike, n’emyatsi y’ebisomo eby’ekihugho kino. Neryo sikiriswekaya erilangira ngoko abakakola ekomerese, abakakola epolitike, n’abakulu b’ebisimo sibatsomene engebe y’abandu kandi sibatsomene ngoko abandu bakayowa.

4. Tukendikania okuki omo mwatsi ono?

 ⁴ Yehova iye, anzire itwaminya ngoko tuli b’obughuli, kandi akatuwatikaya omughulu tukalaba omo myatsi eyangaleka itwayowa nga situkiri b’omughaso. (Esyo. 136:23; Rom. 12:3) Omwatsi ono akendikangania ngoko Yehova akatuwatikaya omo myatsi eyikwamire eno: (1) Omughulu tukaghalibawa n’obukoni, (2) Omughulu kikalire eribana Esyofranga, (3) Omughulu erikekeluha likaleka itwayowa nga sitwangasyakola ekindu kyosi-kyosi eky’omughaso omo mubírí wa Yehova. Eky’erimbere, tulebaye ekyangaleka itw’ikirirya ngoko obuli mughuma w’okw’itwe ni w’obughuli embere sya Yehova.

5. Ekikaleka iw’ikirirya ngoko abandu ni b’obughuli embere sya Yehova niki?

⁵ N’omo twabumbawa omo lututu lw’ekitaka, tuli b’obughuli bunene kulenga eritsundo ly’olututu. (Enz. 2:7) Tulebaye emyatsi milebe eyikaleka itwaminya ngoko tuli b’obughuli embere sya Yehova. Mwabumba abandu n’obutoki bw’erigha emibere yiwe. (Enz. 1:27) Omwikola atya, mwatuhira endata oko bihangikwa byosi ebiri oko kihugho, Mwatuha akasi k’eritabala ekihugho n’esyonyama.​—Esyo. 8:4-8.

6. Ni yindi myatsi yahi eyikaleka itwaminya ngoko Yehova akalangira abandu abatahikahikene mo b’obughuli?

⁶ Nibya n’enyuma sy’Adamu erikola erilolo, Yehova mwataleka erilangira abandu mo b’obughuli. Akatulangira mo b’obughuli bunene kyo kyaleka inyaha Mughala wiwe mwanzwa, Yesu, ng’endihi eyikabohola (embanulo) busana n’amalolo wetu. (1 Yoa. 4:9, 10) Omwikolesya endihi eyikabohola, Yehova akendisyalubukya abosi ababirihola busana n’erilolo lya Adamu, ‘abatunganene n’abatatunganene.’ (Emib. 24:15) Ekinywa Kiwe kikakanganaya ngoko tuli b’obughuli okw’iye n’omo twangabya itulwere, ituli bera, kutse itukekeluhire.​—Emib. 10:34, 35.

7. Abaghombe b’oMungu bawite eyindi myatsi yahi eyikaleka ibikirirya ngoko ni b’obughuli embere sya Yehova?

⁷ Hane eyindi myatsi eyikaleka itw’ikirirya ngoko Yehova akatulangira mo b’obughuli. Mwatuleta okw’iye kandi mwalangira ngoko mutwaligha erimukolera. (Yoa. 6:44) Twabere twatsuka eriyitunda hakuhi na Yehova, naye mwayitunda hakuhi netu. (Yak. 4:8) Kandi Yehova akakolesaya endambi n’akaghala eritukangirirya, ekyo kikakanganaya ngoko tuli b’obughuli embere siwe. Anasi nga tuli bandu ba muhanda wahi lino, kandi ngoko twanganasuba oko mibere. Kandi akatukunga kundi atwanzire. (Emi. 3:11, 12) Ebyo kwenene bikakanganaya ngoko tuli b’obughuli embere sya Yehova!

8. Ebinywa ebiri omo Esyonyimbo 18:27-29 byangaleka itwabya n’amalengekania wahi oko maligho wetu?

⁸ Abandu balebe mubalangira Omwami Dawidi nga si w’omughaso, aliwe iye mwaminya ngoko Yehova abya amwanzire kandi mwamuwatikya. Eriminya ekyo, mukyawatikya Dawidi eriyiyinia oko mwatsi owo abya akalabamo. (2 Sam. 16:5-7) Omughulu tukabunika mutima kutse tukalaba omo maligho, Yehova anganatuwatikya erilangira emyatsi omo yindi nzira n’erituwatikya erikinda obuli mwatsi owakatuhanga-hangaya. (Soma Esyonyimbo 18:27-29.) Omughulu tukawatikibawa na Yehova, sihali kindu ekyangatukakirya erimukolera n’obutseme. (Rom. 8:31) Tulebaye emibere isatu eyo litolere itwibukamo kutsibu-tsibu ngoko Yehova atwanzire kandi ngoko tuli b’obughuli embere siwe.

9. Obukoni bwanganaleka itwayowa tuti?

⁹ Obukoni bwanganaleka itwayowa muhanda, neryo itwalengekania nga situkiri b’omughaso oko bandu bosi. Itwanganayowa muhanda omughulu abandu bakalangira ngoko sitwangasyatoka emyatsi milebe kutse omughulu litolere itwayiketera obuwatikya bw’abandi. N’omo  abandi sibasi  ngoko tulwere, twanganayikwira esisoni kundi situkiwite akaghala k’erikola ebyo twabya tukakola kera. Omo ndambi eyikalire ng’eyo, Yehova akatuwatikaya. Akakola atya ati?

10. Erikwamana n’Emisyo 12:25 ekyangatuwatikya omughulu tulwere niki?

¹⁰ Omughulu tulwere, “ekinywa kibuya” kyanganatusubya mutima. (Soma Emisyo 12:25.) Omo Biblia, Yehova mwahiramo ebinywa ebyuwene ebikatwibukaya ngoko tuli b’obughuli embere siwe n’omo twangabya itulwere. (Esyo. 31:19; 41:3) Twamayitsinga erisoma n’erisoma ebinywa ebisondolibwe n’ekirimu kiwe, Yehova inyakendituwatikya erilwa n’amalengekania awatuwene busana n’obukoni bwetu.

11. Mughala wetu mughuma mwabana obuwatikya bwa Yehova bw’ati?

¹¹ Tulebaye ekyo mughala wetu Jorge alolako. Inyakine mulere, Jorge mwabana obukoni obwaleka inyaloberera kandi mubwalola embere luba-luba n’erileka inyayowa nga syakiri w’omughaso. Jorge akabugha ati: “Sinabya niyiteghekenie ngoko obukoni bwaghe bukendileka inayowa muhanda kandi ngoko bwangalekire abandu ibabya bakanisamalira-samalira. Kundi nabya ininemutoha, munayibulya engebe yaghe nga yikalolaya hayi. Munayowa muhanda kutsibu, neryo munalirira Yehova yo kutsibu niti angwatikaye.” Yehova mwamuwatikya ati? “Kundi nabya ngaluha luba omo bwenge, mubanihana ambu nibye ng’asoma emilondo mike misa omo Esyonyimbo eyikakanganaya ngoko Yehova atsomene abaghombe biwe. Munasoma n’erisoma emilondo mike eyo obuli kiro, emilondo eyo muyanisubya mutima omonda. Abandi bandu mubatsuka erilangira ngoko nabiribya n’obusu obukakanganaya obutseme. Mubabugha bati obutseme bwaghe bukabahimba. Munalangira ngoko Yehova mwasubirya oko misabe yaghe! Mwaniwatikya eribindula amalengekania agho nabya nagho okw’ingye. Munatsuka erilengekania  oko ebyo eKinywa kiwe kikabugha, ebilebirye ngoko akanyilangira n’omo nyilwere.”

12. Wamabya iwukaghalibawa n’obukoni bulebe, wangakolaki utoke eribana obuwatikya bwa Yehova?

¹² Wamabya iwukaghalibawa n’obukoni bulebe, uminye ndeke ngoko Yehova anasi ebyo ukalabamo. Umusabe kutsibu akuwatikaye utoke eribya n’amalengekania awuwene oko bukoni bwaghu. Neryo, usondaye omo Biblia ebinywa ebikasubaya mutima ebyo Yehova abirihiramo busana naghu. Ulengekanaye buli oko masako awakakanganaya ngoko Yehova akalangira abaghombe biwe mo b’obughuli. Wamakola utya, iwukendilangira ngoko Yehova ni mubuya oko baghombe biwe bataleghula.​—Esyo. 84:11.

13. Omutwe w’obunyumba anganayowa ati amaherya akasi kiwe?

¹³ Obuli mutwe w’obunyumba anzire eriha ab’omo nyumba yiwe ebyo balaghireko. Aliwe, omundu anganaherya akasi kiwe isyalitakola ekibi kyosi-kyosi. Inyayighusa eyi n’eyi akasonda akandi kasi, aliwe inyabulako. Ekyo kyamahikira omundu, anganayowa nga syakiri w’omughaso. Erihira amalengekania wiwe oko miyisa eyo Yehova abirilagha, kyangamuwatikya kiti?

14. Busana naki Yehova akaberereraya ebyo abirilagha?

¹⁴ Mughulu wosi, Yehova akabereraya ebyo abirilagha. (Yos. 21:45; 23:14) Hali emyatsi mingyi eyikaleka inyakola atya. Eky’erimbere, erina liwe, kutse olukengerwa lwiwe. Yehova abirilagha ati akendisyawatikya abaghombe biwe bataleghula, kandi akayowa inyawite omwinda w’eriberererya ekinywa ekyo. (Esyo. 31:1-3) Eritomeka okw’ekyo, Yehova anasi ngoko twanganayowa muhanda n’eribunika mutima amatendiwatikya ab’omo kihanda kiwe. Akalagha ati akendituha ebyo tulaghireko kinya-mubiri na bunya-kirimu,  kandi sihali ekyangamukakirya okwiberererya ebyo abirilagha!​—Mat. 6:30-33; 24:45.

15. (a) Ni mwatsi wahi owakalire ow’ahikira aBakristo b’erimbere? (b) Erisako ly’Esyonyimbo 37:18, 19 likatuwatikaya erikirirya mwatsi wahi?

¹⁵ Twamibuka ekikaleka Yehova inyaberererya ebyo akalagha, twanganayiketera ngoko akendituwatikya omughulu kikalire okw’itwe eribana Esyofranga. Tulebaye eky’elireberyako ky’aBakristo b’erimbere. Omughulu eriendererya linene lyahika oko ndeko yosi omo Yerusalema, ‘abandu bosi, butsira abakwenda, mubapanzikana.’ (Emib. 8:1) Terilengekania ekyo nga kyangalekire ihabyaki. ABakristo mubaherya amanyumba n’Esyokomerese syabo esyo babya banzire kundu. Aliwe, Yehova mwatabalekerania; kandi mubataherya obutseme bwabo. (Emib. 8:4; Ebr. 13:5, 6; Yak. 1:2, 3) Yehova mwawatikya aBakristo bataleghula abo, netu kutya akendituwatikya.​—Soma Esyonyimbo 37:18, 19.

16. Omundu anganatsuka erilengekania ati alinga eriramya liwe si ly’obughuli embere sya Yehova mughulu wahi?

¹⁶ Omughulu omundu akakekeluha, anganatsuka erilengekania ati ebyo akaha Yehova ni bike kutsibu. Alinga Omwami Dawidi mwabya n’amalengekania ng’ayo omughulu akekeluha. (Esyo. 71:9) Yehova angatuwatikya ati?

17. Ekyo mwali wetu oyukahulawamo Jheri alabamo kyangatw’ighisyaki?

¹⁷ Tulebaye ekyo mwali wetu oyukahulawamo Jheri alabamo. Mwakokibwa eriyabegheribwa erisugha Ebisenge by’oBwami oko Kisenge kyabo, aliwe mwatanza eriyayo. Akabugha ati: “Nabirikekeluha, nyiri mukwirwa, kandi sinyasi erikola ekindu kyosi-kyosi ekyangawatikya oko mubírí w’erisugha Ebisenge by’oBwami. Sinyiri w’omughaso.” Omo kiro embere ky’ekiro ky’omukania, mwabwira Yehova ebyosi ebiri oko mutima wiwe omo musabe. Omughulu  ahika oko Kisenge ky’oBwami ekiro ekyakwama, mwanataswayibulya kwenene nga kinalwe kitolere inyahika. Eprograme yikalaba, omughuma w’oko babuyi mwahira omuwato oko kindu ky’omughaso munene kulenga n’obutoki bwetu, ni bughambu, erianza erikangiriribwa na Yehova. Jheri ak’ibuka ati: “Omo malengekania munayibwira nyiti, ‘nyanzire erikangiriribwa na Yehova!’ Munatsuka eritoghongya emisonia kundi munalangira ngoko Yehova anemusubirya oko musabe waghe. Abya akanyisubya mutima omonda ngoko ninawite ekindu ky’obughuli ky’erihitya kandi ngoko abya anzire erinyikangirirya!” Kandi Jheri ak’ibuka ati: “Mun’ingira omo muhindano oyo iniluhire omo bwenge, inibunikire mutima, kandi iniyilangiremo mundu bule. Aliwe munalwamo n’amalengekania awuwene, inabirisubibwa mutima, kandi inabiriyilangiramo w’omughaso!”

18. EBiblia yikakanganaya yiti ngoko Yehova syalileka erilangira eriramya lyetu mo ly’obughuli omughulu tukakekeluha?

¹⁸ N’omo tunemukekeluha, tuminye kwenene ngoko Yehova akinawite omubírí owo twangakola. (Esyo. 92:12-15) Yesu mwatukangirirya ati, n’omo twangalengekania tuti ebyo twangatoka erikola omo mubírí wa Yehova si by’omughaso okw’itwe, embere siwe ni by’obughuli bunene. (Luka 21:2-4) Busana n’ekyo, lengekanaya buli okw’ekyo wangatoka erikola. Eky’erileberyako, wanganakanirya abandi oko Yehova, wangasabira abaghala n’abali betu, n’erihimba abandi batoke erisighala bataleghula. Yehova akakulangiramo mukoli haghuma naye, si busana n’ebyo ukakola, aliwe ni busana n’omutima waghu w’erimw’owa.​—1 Kor. 3:5-9.

19. Erisako ly’Abanya Roma 8:38, 39 likatuwatikaya erikiriryaki?

¹⁹ Tutsemire kutsibu eribya baramya ba Yehova, oMungu oyukalangira abaghombe biwe mo b’obughuli! Mwatubumba tutoke erikola erisonda liwe, kandi eriramya ly’ekwenene lyo likatuletera obutseme omo ngebe yetu. (Erib. 4:11) N’omo ekihugho kyangatulangira nga situli b’omughaso, Yehova iye syalitulangira atya. (Ebr. 11:16, 38) Omughulu tukayowa itubunikire mutima busana n’obukoni, eribula esyofranga, kutse busana n’erikekeluha, tw’ibuke ngoko sihali kindu kyosi-kyosi ekyangatulusya oko lwanzo lwa Thatha wetu w’elubula.​—Soma Abanya Roma 8:38, 39.