1-2. Khuyini abantu bakaZimu abaqalana nayo begodu kubathinta njani lokho?

AKHUCABANGE ngananzi iimbonelo ezintathu. Umfowethu osesemutjha uphethwe kugula okumqeda amandla kancanikancani. Umfowethu oseminyakeni yama-50 osebenza budisi uphelelwa msebenzi, kuthi kusesenjalo usolo ayawufuna kodwana akawutholi. Udade osele akhulile akasakghoni ukusebenzela uJehova ngendlela ebekakghona ngayo ngaphambilini.

² Nakungenzeka ukuthi uqalene nobujamo esele sikhulume ngabo ungazizwa ungakaqakatheki. Ubujamobu bungakwenza ungasathaba, bukwenze ungasazihloniphi begodu kuthinte nendlela osebenzelana ngayo nabanye abantu.

3. USathana nabantu abangaphasi kwakhe bakuqala njani ukuphila kwabantu?

³ Iphaseli litjengisa indlela uSathana azizwa ngayo ngokuphila kwabantu. USathana bekasolo aphatha abantu njengabangakaqakatheki. Watjela u-Eva bona nakangalaleli uJehova uzokuba nekululeko khisibe wazi kuhle bona isiphetho salokho kukufa. USathana nguye obekasolo aphethe zeentengiselwano, zepolotiki nezamasondo zephaseli. Yeke akusirari ukuthi abosomarhwebo, abosopolotiki nabarholi bamasondo abakuhloniphi ukuphila nesithunzi abantu abanaso.

4. Sizokucoca ngani esihlokwenesi?

⁴ UJehova uhlukile kunoSathana, ufuna sazi bona siqakathekile  begodu uyasisekela nasiqalene nobujamo obubudisi. (Rhu. 136:23; Rom. 12:3) Esihlokwenesi sizokubona iindlela uJehova asisiza ngazo bona siqalane nobujamo obulandelako: (1) Nasigulako, (2) Nasiqalana nokubogaboga kwezomnotho, (3) Ukuluphala nakusenza sizizwe singakaqakatheki begodu singasakghoni ukwenzela uJehova ebesikghona ukukwenza ngaphambilini. Kokuthoma, akhesibone ukuthi kubayini singaqiniseka ngokuthi siqakathekile kuJehova.

5. Khuyini ekwenza uqiniseke ukuthi abantu baqakathekile kuJehova?

⁵ Iye khona nanyana senziwe ngethuli, kodwana siqakathekile kuJehova. (Gen. 2:7) Akhesiqale amanye amabanga asenza siqakatheke kuJehova. UJehova wabumba abantu ngomfanekiswakhe. (Gen. 1:27) Ngokwenza njalo, wasiphakamisa kiyo yoke indalwakhe, wasenza saba ngaphezu kweenlwana.—Rhu. 8:4-8.

6. Ngibuphi ubufakazi obutjengisa bona uJehova uyabathanda abantu nanyana banesono?

⁶ Ngitjho nangemva kobana u-Adamu onile, uJehova waragela phambili aqala abantu njengabaqakathekileko. Usithanda kangangobana wanikela ngeNdodanakhe ayithandako uJesu bona abe mhlatjelo wesihlengo sezono zethu. (1 Jwa. 4:9, 10) Uzokusebenzisa isihlengo, avuse boke abahlongakeleko ngebanga lesono saka-Adamu, uzokuvusa ‘abalungileko nabangakalungi.’ (IzE. 24:15) IliZwi lakhe litjengisa bona siqakathekile kuye, kungakhathaliseki bona siqalene nemiraro yezepilo, yezeemali namkha sesiluphele.—IzE. 10:34, 35.

7. Ngiwaphi amabanga angeziweko enza iinceku zakaJehova zikholwe ukuthi uyazithanda?

⁷ Kunabanye godu abonobangela abenza sikholwe bona uJehova uyasithanda. Ngebanga lokobana sisabele kuhle nasizwa iindaba ezimnandi, uJehova usidosele kuye. (Jwa. 6:44) Sathi nasithoma ukutjhidela kuJehova, naye watjhidela kithi. (Jak. 4:8) UJehova usebenzise isikhathi namandlakhe asifundisa bona siqakathekile kuye. Wazi bona sibabantu abanjani nje, begodu uyazi ukuthi singakghona ukuthuthuka simthabise. UJehova uyasikhalima ngombana asithanda. (IzA. 3:11, 12) Lokho kuveza bona uJehova usithanda kangangani!

8. Amezwi asemtlolweni weRhubo 18:28-30, angayithinta njani indlela esiqala ngayo neentjhijilo?

⁸ Kunabantu ebebaqalela phasi iKosi uDavida, kodwana yona beyazi ukuthi uJehova uyayithanda nokobana uyayisekela. Ngebanga lokobana uDavida bekazi ukuthi uJehova uyamthanda, wakghona ukukghodlhelela ubujamobo. (2 Sam. 16:5-7) Nasizizwa siphasi ngebanga leentjhijilo esiqalana nazo, uJehova angasisiza siqale izinto ngenye indlela begodu asisize siphumelele emrarweni esiqalene nayo. (Funda iRhubo 18:28-30.) UJehova nakasisekelako, ayikho into engasikhandela bona simlotjhe sithabile. (Rom. 8:31) Okwanje akhesicoce ngeengcenye ezintathu lapho kufuze sikhumbule khona bona uJehova uyasithanda nokuthi siqakathekile kuye.

9. Ukugula kungasenza siziqale njani?

⁹ Ukugula kungasenza sidane begodu sizizwe singakaqakatheki. Singaphathwa ziinhloni abantu nabalemuka bona asikghoni ukwenza izinto ezithileko begodu kufuze sisizwe babanye. UJehova uzosipha amandla ebujamwenobo. Uzokwenza njani lokho?

10. Ngokuya ngokomtlolo wezAga 12:25, khuyini engasisiza nasigulako?

¹⁰ Nasigulako, “ilizwi elakhako” lingasenza  siziwe ngcono. (Funda izAga 12:25.) UJehova ufake amezwi akakho eBhayibhelini asiqinisekisa ukuthi unendaba nathi naphezu kokugula. (Rhu. 31:20; 41:3) Nasifunda ilizwi lakhe begodu nasilifundisisako lizosisiza sikghone ukuqalana nokudana ngendlela ephumelelako.

11. Omunye umfowethu walifumana njani isizo lakaJehova?

¹¹ Akhucabange ngesibonelo sakaJorge. Njengomuntu omutjha waphathwa kugula okumbi okwarhagala ngesikhatjhana begodu kwamenza wazizwa angakaqakatheki. UJorge uthi, “Bengingakayilungeli imiphumela eyabangelwa kugula kwami ngombana bengihlaziseka ngendlela abantu abangiqala ngayo, njengombana ukugula kwami kurhagala ngacabanga ngendlela ukuphila kwami ebekuzokutjhuguluka ngayo. Bengidanile yeke ngabawa bona uJehova angisize.” UJehova wamsiza njani? “Ngebanga lokuthi bengingakghoni ukudzimelela kilokho engikufundako, ngakhuthazeka bona ngifunde amavesi amafitjhani encwadini yamaRhubo atjengisa indlela uJehova athanda ngayo iinceku zakhe. Bengiyifundisisa qobe lilanga imitlolo leyo, beyingiqinisa begodu ingiduduza. Ngemva kwesikhathi abantu balemuka ukuthi sengihlala ngithabile. Bebathi indlela engiqala ngayo izinto iyabakhuthaza. Ngalemuka ukuthi uJehova uyiphendulile imithandazwami. Ungisize ngatjhugulula indlela ebengizizwa ngayo. Ngathoma ukudzimelela kilokho okutjhiwo liliZwi lakhe ngendlela angiqala ngayo nangaphezu kokugula kwami.”

12. Nangabe uyagula, khuyini ongayenza bona ufumane isizo lakaJehova?

¹² Nangabe uyagula qiniseka ngokuthi uJehova uyakwazi oqalene nakho. Mbawe akusize  bona uqale izinto ngendlela aziqala ngayo. Fumana imiTlolo eduduzako uJehova akubekele yona eliZwini lakhe. Dzimelela emavesini akhuluma ngokuthi uJehova uzithanda kangangani iinceku zakhe. Nawenza njalo, uzokubona ukuthi uJehova muhle ebantwini abamlotjha ngokuthembeka.—Rhu. 84:11.

13. Ukuphelelwa msebenzi kungenza ihloko yomndeni izizwe njani?

¹³ Enye nenye ihloko yomndeni ifuna ukutlhogomela umndenayo. Akhesithi umfowethu ulahlekelwa msebenzi. Ngitjho nanyana angakenzi litho elimbi. Ulinga ngamandla ukufumana omunye umsebenzi kodwana akawutholi. Ngebanga lokuthi uqalene nobujamobu angazizwa angakaqakatheki. Alo ukudzimelela eenthembisweni zakaJehova kungamsiza njani?

14. Ngimaphi amabanga enza uJehova azalise iinthembiso zakhe?

¹⁴ UJehova uhlala azizalisa iinthembiso zakhe. (Jotj. 21:45; 23:14) Wenza lokho ngamabanga ambalwa. Lokuthoma kukuthi ibizo lakhe liyathinteka. UJehova uthembise bona uzozinakekela iinceku zakhe ezithembekileko begodu uzizwa abophekile bona azalise isithembisweso. (Rhu. 31:1-3) Ukungezelela kilokho, uJehova uyazi ukuthi sizokudana nangabe akakghoni ukutlhogomela umndenakhe. Uthembise ukusinikela koke esikutlhogako begodu akunalitho elingamkhandela bona azalise isithembisweso.—Mat. 6:30-33; 24:45.

15. (a) Ngibuphi ubudisi amaKrestu weenkhathi zabapostoli aqalana nabo? (b) UmTlolo wamaRhubo 37:18, 19 usiqinisekisa ngani?

¹⁵ Nasikhumbula ukuthi kubayini uJehova  azalisa iinthembiso zakhe, singaqiniseka ngokuthi uzosisiza nasiqalene nobudisi bezeemali. Cabanga ngesibonelo samaKrestu wangesikhathi sabapostoli. Lokha nakuthoma ukuhlunguphazwa kwamaKrestu weJerusalema boke barhatjheka ‘ngaphandle kwabapostoli.’ (IzE. 8:1) Cabanga ngokuthi bekuzokutjho ukuthini lokho. Bekuzokutjho ubudisi kwezomnotho. Kungenzeka ukuthi amaKrestu alahlekelwa makhaya namarhwebo. Nanyana kunjalo, uJehova akhenge awalahle begodu nawo akhenge aphelelwe lithabo. (IzE. 8:4; Heb. 13:5, 6; Jak. 1:2, 3) UJehova wawatlhogomela amaKrestu athembekileko la begodu nathi uzositlhogomela.—Funda iRhubo 37:18, 19.

16. Khuyini engasenza sicabange ukuthi ukulotjha kwethu uJehova akwamukeleki?

¹⁶ Nasiluphalako singazizwa ngasuthi sekukuncani esikwenzela uJehova. IKosi uDavida kungenzeka yazizwa ngendlela efanako nayiluphalako. (Rhu. 71:9) UJehova angasisiza njani?

17. Sifundani esibonelweni sakadadwethu uJheri?

¹⁷ Akhucabange ngesibonelo sakadadwethu uJheri. Wamenywa bona eze ebandulweni lokutlhogomela iWolo lomBuso, kodwana bekangafuni ukuya. Wathi, “Ngiluphele, ngimhlolokazi begodu anginalo nelincani ikghono uJehova ngalisebenzisa. Angikakaqakatheki.” Ebusukwini bangaphambi kwebandulo wathandaza kuJehova wamtjela ngendlela azizwa ngayo. Ngelanga elilandelako nakafika eWolweni lomBuso wazibuza ukuthi kufanele abe lapho na. Phakathi nehlelo esinye isikhulumi sagandelela iphuzu lokuthi, ikghono lethu eliqakathekileko sifiso sokufundiswa nguJehova. UJheri uthi:  “Bengicabanga ukuthi ‘nginalo ikghonwelo.’ Ngathi nangilemuka ukuthi uJehova uphendula umthandazwami ngathoma ukulila. Wangiqinisekisa ngokuthi nginalo ikghono begodu bekazimisele ukungifundisa.” UJheri uthi: “Ngaya ebandulwenelo ngithukiwe, nginganamandla begodu ngidanile. Kodwana nangiphuma lapho ngazizwa nginamandla, ngivuselelekile begodu ngazizwa ngiqakathekile.”

18. IBhayibheli litjengisa njani ukuthi uJehova uyakuthabela esimenzela khona nanyana sesiluphele?

¹⁸ Ngitjho nanyana sesiluphele singaqiniseka ngokuthi uJehova usesenomsebenzi ekufuze siwenze. (Rhu. 92:12-15) UJesu wasifundisa ukuthi kungakhathaliseki ukuthi sinamakghono amancani kangangani namkha amandlethu mancani kangangani, uJehova uthabela nanyana yini esimenzela yona. (Luk. 21:2-4) Yeke dzimelela kilokho okghona ukukwenza. Ngokwesibonelo, izinto ongazenza, khuluma ngoJehova, thandazela abafowenu begodu ukhuthaze abanye bona bahlale bathembekile. UJehova ukuqala njengesisebenzi esikunye naye ingasi ngebanga lezinto ozifezako kodwana ngesifiso sokumhlonipha.—1 Kor. 3:5-9.

19. UmTlolo wekwebeRoma 8:38, 39 usinikela siphi isiqinisekiso?

¹⁹ Sikuthabela kwamambala ukulotjha uJehova uZimu othanda iinceku zakhe. Wasibumba bona senze intandwakhe begodu ukumlotjha ngeqiniso kwenza sithabe epilweni. (IsAm. 4:11) Ngitjho nanyana iphasi lingasiqala njengabantu abangakaqakatheki uJehova akanamahloni ngathi. (Heb. 11:16, 38) Nasizizwa sidanile ngebanga lokugula, ubudisi bezomnotho namkha ukuluphala asihlale sikhumbula ukuthi akunalitho elingasihlukanisa nethando lakaBabethu wezulwini.—Funda kwebeRoma 8:38, 39.