1-2. Kansi atumiki a Yehova okumana na mavuto otyani? Ko mavuto amene aŵa angaŵakhuze tyani?

GANIZILANI vocitika ivi: Mkwasu wacilumbwana amupeza na matenda yofookesha muŵili na maganizo. Mkwasu wa vyaka vopitilila pa 50 amucosa nchito. Kalongosi wacikulile okwanisha lini kucita vinyinji monga ni mweenzocitila kale.

² Ngati mukumana na vinthu monga ni vatomolewa palulu, payakine mungazione kuti nimwe osafunika. Vinthu voteti vingakulondeni cimwemwe nokupangishani kumvwa kuti nimwe osafunika. Payakine vingakhuze soti ushamwali wanu na ayakine.

3. Kansi Satana na ŵanthu ali kumbali yake ouona tyani moyo?

³ Calo cino cuonesha mwamene Satana oonela moyo wa ŵanthu. Satana wankhala ocita vinthu voonesha kuti ŵanthu ni osafunika. Mwankhanza euzhya Eva kuti ankhale na ufulu ngati wapondokela Mulungu, nangu kuti enzoziŵa kuti zofumapo zake ni imfwa. Satana wankhala olamulila amalonda, andale na avipembezo m’calo cino. N’zosadabwisha kuti amalonda, andale na asogoleli avipembezo anyinji olemekeza lini miyoyo ya ŵanthu, koma soti osamala lini mwakumvwila ayakine.

4. Tilaŵizhyane cinji m’nkhani ino?

⁴ Ciyakine, Yehova ofuna kuti tikosangalala, ndipo oticilikiza tikakumana na mavuto amene angaticitishe kuzimvwa kuti nise osafunika. (Sal. 136:23; Aro. 12:3) M’nkhani  ino, tilaŵizhyane mwamene Yehova angatiyavyile pa zocitika izi: (1) Ngati tulwala, (2) ngati tukumana na vuto ya zacuma, na (3) ngati tukumvwa kuti tucita lini zinyinji potumikila Yehova cifukwa ca ukulukazi. Coyamba, tiphunzile cifukwa cake tingankhale na cidalilo cakuti aliyense wa seo ni ofunika kwa Yehova.

5. N’cinji cuonesha kuti ŵanthu ni ofunika ngako m’menso mwa Yehova?

⁵ Nangu kuti tepangiwa kufumila ku lito, nise ŵanthu ofunika ngako. (Gen. 2:7) Ganizilani visanzo vamene vuonesha kuti nise ofunika ngako. Etilenga m’njila yakuti tikokwanisha kuonesha minkhalidwe yake. (Gen. 1:27) Izi zuonesha kuti nise apadela ngako kupambana vinthu vonse vooneka vecilenga. Kuyangizhyila apo, etipasa ufulu wolamulila vinthu vonse pacalo kuyangizhyilapo vinyama.​—Sal. 8:4-8

6. N’cifukwa ciyakine cotyani cuonesha kuti Yehova okonda ŵanthu aliye ungwilo?

⁶ Nangu pavuli pakuti Adamu wacimwa, Yehova epitilizhya kuona ŵanthu kuti ni ofunika. Eonesha izi mwa kutwala mwana wake wokondeka yeka kuti azatifwile monga dipo. (1 Yoh. 4:9, 10) Poseŵenzesha mphamvu ya dipo, Yehova akaukishe ŵanthu onse amene ecifwa cifukwa ca ucimo wa Adamu, “olungama na osalungama.” (Mac. 24:15) Mau ŵake oonesha kuti nise ofunika ngako olo kuti tuvutika na kufooka kwa thanzi, vuto ya zacuma na ukulukazi.​—Mac. 10:34, 35.

7. Ni vifukwa viyakine votyani vamene atumiki a Mulungu ali navo vokhulupilila kuti Yehova oŵakonda?

⁷ Tili na vifukwa viyakine vokhulupilila kuti Yehova otikonda. Etikokela ku gulu yake petelondela uthenga uweme. (Yoh. 6:44) Tikayamba kuvwendela pafupi na Yove, naye avwendele pafupi na seo. (Yak. 4:8) Yehova oseŵenzesha nthawi ikulu ngako kutiphunzisa, izi zuonesha kuti nise ofunika ngako m’menso mwake. Oziŵa kuti nise ŵanthu otyani, koma soti mtundu wa ŵanthu ŵatufunika kunkhala. Ndipo otilangiza cifukwa cakuti otikonda. (Miy. 3:11, 12) Kansi tili na umboni wotyani uonesha kuti Yehova otikonda?

8. Kansi mau opezeka pa Salimo 18:27-29 angakhuze tyani mwatuonela mavuto ŵasu?

⁸ Ŵanthu ayakine enzoona kuti Mfumu Davide enze wosafunika, koma yove enzoziŵa kuti Yehova omukonda na kuti enzomucilikiza. Cifukwa coziŵa mfundo yamene iyi, zemuyavya kuti apilile. (2 Sam. 16:5-7) Ngati tili na cisoni olo takumana na mavuto, Yehova angatiyavye kuona vinthu m’njila yoyenelela, ndipo angatiyavye kupilila mavuto alionse. (Ŵelengani Salimo 18:27-29.) Na thandizo ya Yehova, paliye cingatikangishe kumutumikila na cimwemwe. (Aro. 8:31) Tiyeni tilaŵizhyane njila zitatu zamene zuonesha kuti Yehova otikonda notisamalila.

9. Kansi matenda angatikhuze tyani?

⁹ Matenda angatikhuze ngako ndipo angatipangishe kumvwa kuti nise osafunika. Tingakhuzike ngati taona kuti ŵanthu ozindikila kuti tukangiwa kucita vinthu viyakine, ndipo tufunikila thandizo yao. Nangu kuti ayakine oziŵa lini matenda yatili nayo, tingavutike mphela cifukwa cokangiwa kucita vinthu viyakine. Panthawi yoteti Yehova angatiyavye. Motyani?

10. Mau ali pa Miyambo 12:25, angatiyavye tyani ngati tulwala?

¹⁰ Ngati tulwala, “mau aweme” angatilimbikishe. (Ŵelengani Miyambo 12:25.) M’Baibo, Yehova otiuzhya vinthu viweme  vamene vingatikumbushe kuti nise ŵanthu ofunika ngati tulwala. (Sal. 31:19; 41:3) Ngati tuŵelenga mau a Yehova mowelezhyawelezhya, Yehova angatiyavye kuti tikwanishe kusilizhya maganizo aipa na nkhaŵa zamene zuwela cifukwa ca matenda.

11. Kansi mkwasu muyakine eyavyiwa tyani na Yehova?

¹¹ Ganizilani cisanzo ca mkwasu Jorge. Peenze mlumbwana, etola matenda yamene yenzokulilakulila, ndipo yecitisha kuti akoziona kuti ni wosafunika. Jorge elaŵila kuti: “Nenzoziŵa lini kuti matenda aŵa akonicitisha kumvwa nsoni. Matenda peyefwika povuta, neganizila mwamene umoyo wangu unkhalile. Nekhumudwa ngako ndipo nesenga Yehova kuti aniyavye.” Kansi Yehova emuyavya? Yove elaŵila kuti, nenzoŵelenga mavesi atontho m’buku ya Masalimo, yamene yoonesha kuti Yehova osamalila atumiki ŵake. Nenzoŵelenga malemba amene aŵa mowelezhyawelezhya siku iliyonse, ndipo nepezamo citonthozo. M’kuluta kwa nthawi, ŵanthu ayakine eyamba kuona kuti nenze wosangalala. Ndipo efwika polaŵila kuti nkhalidwe yangu yenzoŵalimbikisha. Neziŵa kuti Yehova eyankha mapemphelo ŵangu. Eniyavya kucinja mwenenzozionela. Neyamba kuganizila zayulaŵila Baibo pankhani yokhuza mwakunionela Yehova olo kuti nulwala.”

12. Ngati muvutika na matenda, mungacitenji kuti Yehova akuyavyeni?

¹² Ngati muvutika na matenda, nkhalani na cidalilo cakuti Yehova oziŵa zamupitamo. Musengeni kuti akuyavyeni kuyaona moyenelela mavuto yamukumana nayo. Pavuli pake pezani mau olimbikisha m’Baibo. Ikani maganizo ŵanu pa mavesi amene oonesha kuti Yehova oona atumiki ŵake kuti ni ofunika  ngako. Mukacita teti, muone kuti Yehova ni muweme kuli onse omutumikila mokhulupilika.​—Sal. 84:11.

13. Kansi kusila kwa nchito kungakhuze tyani mutu wa banja?

¹³ Mutu wa banja ofunika kusakilila banja yake vofunikila. Koma tyani ngati mkwasu nchito yasila mosayembekezeleka? Oyesayesa kuti apeze nchito koma yupezeka lini. Kukumana na mavuto oteti kungacitishe kuti azimvwe kuti okangiwa kusamalila banja. Kansi angadalile tyani lonjezo ya Yehova yakuti amuyavye pa vuto yaali nayo?

14. Yehova okwanilisha malonjezo ŵake, pa vifukwa votyani?

¹⁴ Yehova nthawi zonse okwanilisha malonjezo ŵake. (Yos. 21:45; 23:14) Ocita zamene izi pa vifukwa vosiyanasiyana. Coyamba, ni cifukwa ca kukhuziwa kwa zina na mbili yake. Yehova elonjeza kuti akosamalila atumiki ŵake ndipo oona kuti ni udindo wake kucita zamene izi. (Sal. 31:1-3) Kuyangizhyila apo, Yehova oziŵa kuti zingankhale zokhumudwisha ngati angaleke kusamalila a m’banja yake. Elonjeza kuti atisamalile mwauzimu na mwamuŵili, ndipo paliye cingamukangishe kucita tetyo!​—Mat. 6:30-33; 24:45.

15. (a) Kansi Akhristu a m’vyaka 100 voyambilila ekumana na mavuto otyani? (b) Kansi Salimo 37:18, 19 yutipasa cidalilo cotyani?

¹⁵ Tikakumbukila cifukwa cake Yehova okwanilisha malonjezo ŵake, tingapilile mavuto a zacuma na cidalilo. Ganizilani cisanzo ca Akhristu a m’vyaka 100 voyambilila. Peceyamba cinzunzo mumpingo ku Yerusalemu, “Onse emwazhyikana kuutukila  m’vigawo vosiyanasiyana kusiyapo tyala atumwi.” (Mac. 8:1) Ganizilani vofumapo vake. Akhristu ekumana na vuto ya zacuma, esiya vinthu vinyinji monga mang’anda na mabizinesi. Yehova aliyoŵasiye, koma soti epitilizhya kunkhala acimwemwe. (Mac. 8:4; Aheb. 13:5, 6; Yak. 1:2, 3) Yehova eyavya Akhristu amene aŵa okhulupilika, ndipo nase atiyavye.​—Ŵelengani Salimo 37:18, 19.

16. Kansi ni vinthu votyani vamene vingatipangishe kukaikila ngati Yehova oyamikila kulambila kwasu?

¹⁶ Patukulukazhya, tingayambe kumvwa kuti tucita lini zinyinji potumikila Yehova. Mfumu Davide naye emvwapo cimozimozi panthawi iyakine peenze mkulukazi. (Sal. 71:9) Kansi Yehova angatiyavye tyani?

17. Kansi tingaphunzile cinji pa cisanzo ca kalongosi Jheri?

¹⁷ Ganizilani cisanzo ca kalongosi Jheri. Eitiwa kuti akaphunzile nchito yokonza malo olambilila, yamene yenzocitikila pa Ng’anda ya Ufumu, koma aliyefune kuya. Elaŵila kuti: “N’ne mkulukazi koma soti mwanakazi wamasiye, niliye luso iliyonse yamene ingafunike m’gulu ya Yehova. N’ne wosafunika. Usiku wakuti mailo akayambe maphunzilo, epemphela kwa Yehova. Pecifwika pa Ng’anda ya Ufumu m’mawa mwake, enze akaluzikaikila ngati ofunika mphela kuloŵa mkilasi. Peyeyamba pulogilamu, mlangizi egogomezela kuti luso yofunika ni kunkhala na mtima wozitwala kuti muphunzisiwe na Yehova. Kalongosi wasu ekumbukila zeenzoganiza kale kuti aliye luso iliyonse! Eyamba kulila poganizila kuti Yehova wayankha pemphelo yake, ndipo enkhala wosimikizhya kuti enze na luso yamene ni yofunika ngako, koma soti  eziŵa kuti Yehova ni wokonzeka kumuphunzisa. Lomba kalongosi wasu akalolesha kuvuli olaŵila kuti, penenzokuya mkilasi nenze na nkhaŵa kuti ningakwanishe lini, koma pavuli posilizhya maphunzilo, elimbikishiwa noona kuti enze wofunika.”

18. Kansi Baibo yuonesha tyani kuti Yehova oyamikila utumiki wasu olo kuti takulukazhya?

¹⁸ Patukulukazhya, tingaŵe osimikizhya kuti pali nchito ziyakine zatingacite m’gulu ya Yehova. (Sal. 92:12-15) Yesu elaŵila kuti nangu kuti tili na thanzi yotyani, olo kuti zatucita n’zitontho, Yehova oyamikila zilizonse zatingacite muutumiki wake. (Luka 21:2-4) Tetyo mukoganizila vinthu vamungakwanishe kucita. Mungatomole vinthu vokhuza Yehova, kupemphelela akwasu noŵalimbikisha kuti ankhale okhulupilika. Yehova okuonani kuti nimwe anchito ayake osati cifukwa ca kukula kwa vinthu vamungakwanishe kucita, koma cifukwa cakuzipeleka kwanu.​—1 Akor. 3:5-9

19. Kansi lemba ya Aroma 8:38, 39 yutilimbikisha tyani?

¹⁹ N’cinthu colimbikisha kutumikila Yehova, wamene okonda ngako atumiki ŵake! Etilenga kuti tikomulambila, ndipo kucita zamene izi kutiyavya kunkhala okhutila pa umoyo. (Chiv. 4:11) Nangu kuti ŵanthu m’calo angatione kuti nise lini ofunika, Yehova otiona kuti nise ofunika ndipo otikonda. (Aheb. 11:16, 38) Ngati tuvutika cifukwa ca matenda, nkhani zacuma olo ukulukazi, tufunika kukumbukila kuti paliye ciliconse camene cingatilekanishe na cikondi ca Ausuwasu akululu.​—Ŵelengani Aroma 8:38, 39.