1-2. Ke mathata afe ao bahlanka ba bantši ba Jehofa ba lego ka gare ga ona, gona mathata ao a ka dira gore ba ikwe bjang?

NAGANA ka mehlala ye e meraro. Wa mathomo, ngwanabo rena yo e lego mofsa o boditšwe ke ngaka gore o na le bolwetši bjo bošoro bjo bo tlago go mmolaya. Wa bobedi, ngwanabo rena yo a nago le mengwaga ya ka godimo ga e 50 o feletšwe ke mošomo, gomme le ge a leka ka thata gore a hwetše o mongwe, ga go nko yeo e tšwago lemina. Wa boraro, kgaetšedi yo a ratago Jehofa kudu ga a sa kgona go mo hlankela go swana le mathomong ka baka la botšofadi.

² Ge e ba o lebeletšane le bjo bongwe bja mathata ao re boletšego ka ona ka mo godimo, mohlomongwe o ikwa o se sa na mohola. Mathata ao a ka dira gore o se ipshine ka bophelo e bile o ikwe o se sa nyaka go phela le batho.

3. Sathane le batho bao ba mo ekišago ba lebelela bjang bophelo?

³ Batho ba lefase le ba ekiša Sathane. Sathane o swara batho bjalo ka ge eka ga ba bohlokwa. Ka ge Sathane a na le pelo e mpe, o ile a botša Efa gore o be a tla ba le tokologo ge a ka se kwe Modimo. O ile a no mmotša seo le ge a be a tseba gore Efa o tlo hwa. Le gona Sathane o laola dikgwebo, dipolotiki le bodumedi bja maaka. Ka gona ga go makatše ge beng ba dikgwebo, boradipolotiki le baetapele ba bodumedi ba se na taba le bophelo gotee le gore batho ba bangwe ba ikwa bjang.

4. Re tlo bolela ka eng sehlogong se?

⁴ Go fapana le Sathane, Jehofa o nyaka gore re ikwe re na le mohola, e bile o a re thuša ge re le ka gare ga maemo ao a ka  dirago gore re ikwe re se bohlokwa. (Ps. 136:23; Baroma 12:3) Sehlogong se, re tlo kwa gore Jehofa o re thuša bjang: (1) Ge re babja, (2) ge re hloka mošomo le (3) ge re tšofetše gomme re palelwa ke go hlankela Jehofa kamoo re ka ratago ka gona. Eupša pele re bolela ka maemo a, a re kweng gore ke ka baka la eng re ka kgodišega gore yo mongwe le yo mongwe wa rena o bohlokwa kudu go Jehofa.

5. Ke’ng seo se go kgodišago gore re bohlokwa kudu go Jehofa?

⁵ Le ge re bopilwe ka lerole, re bohlokwa go Jehofa. (Gen. 2:7) Re tseba bjang gore re bohlokwa go Jehofa? Jehofa o re bopile ka tsela ya gore re kgone go ekiša dika tša gagwe. (Gen. 1:27) Tsela yeo a re bopilego ka yona e dira gore re phale dilo ka moka tšeo a di bopilego mo lefaseng. E bile o re neile mošomo wa go hlokomela lefase le diphoofolo.—Ps. 8:4-8.

6. Ke’ng se sengwe gape seo se re kgodišago gore re bohlokwa go Jehofa?

⁶ Jehofa o ile a no tšwela pele a lebelela batho ba le bohlokwa, gaešita le ka morago ga gore Adama a dire sebe. Re kgodišegile gore o re bona re le bohlokwa kudu ka gobane o ile a romela Morwa wa gagwe yo a mo ratago mo lefaseng gore a tle a hwele dibe tša rena. (1 Joh. 4:9, 10) Ka ge Jesu a hwetše dibe tša rena, seo se tlo dira gore Jehofa a tle a tsoše batho bao ba hwilego ka baka la sebe sa Adama, e lego batho bao “ba lokilego gotee le ba sa lokago.” (Dit. 24:15) Lentšu la Modimo e lego Beibele, le bontšha gore re bohlokwa kudu go yena go sa šetšwe gore re a babja, re a diila goba re tšofetše.—Dit. 10:34, 35.

7. Ke dilo dife tše dingwe gape tšeo di re kgodišago gore re bohlokwa go Jehofa?

⁷ Go na le dilo tše dingwe gape tšeo di re kgodišago gore re bohlokwa go Jehofa. Se sengwe sa tšona ke gore o re gogetše go yena, gomme o be a bona gore re rata go kwa molaetša wa ditaba tše dibotse. (Joh. 6:44) E bile ge re dutše re batamela Modimo ka go ba bagwera ba gagwe, le yena o a re batamela. (Jak. 4:8) Le gona, Jehofa o re bontšha gore re bohlokwa go yena ka go fetša nako e ntši a re ruta ka yena. Go oketša moo, o a tseba gore re batho ba mohuta mang le gore re ka dira eng gore re kaonefatše seo re lego sona ka gare. Le gona ka ge a re rata, o a re laya. (Die. 3:11, 12) Ruri bjo ke bohlatse bjo bo kgodišago kudu bja gore re bohlokwa go Jehofa!

8. Psalme 18:27-29 e ka re thuša bjang gore re bone dilo gabotse le ge re na le mathata?

⁸ Batho ba bangwe ba be ba bona Kgoši Dafida a se na mohola, eupša yena o be a tseba gore Jehofa o a mo rata e bile o a mo thekga. Seo se ile sa thuša Dafida gore a kgotlelele mathata a gagwe a thabile. (2 Sam. 16:5-7) Le rena ge re gateletšegile goba re na le mathata, Jehofa a ka re thuša gore re bone dilo gabotse le ge go rotogela. (Bala Psalme 18:27-29.) Ge e ba Jehofa a re thekga, ga go na selo seo se ka re paledišago go mo hlankela re thabile. (Baroma 8:31) Ga bjale anke re boleleng ka maemo a mararo ao ge re le ka gare ga ona re ka kgonago go bona gore Jehofa o a re rata, le gore re bohlokwa kudu go yena.

9. Ge re babja re ka ikwa bjang?

⁹ Ge re babja re ka ikwa re imetšwe kudu moo re ka bonago eka re ka se thuše motho ka selo. Re ka lešwa dihlong ke go lemoga gore batho ba bangwe ba a bona gore re a babja, le gore ka mehla re hloka thušo ya bona. Le ge batho ba bangwe ba sa bone gore re a babja, re ka nyamišwa ke gore ga re sa kgona go itirela dilo tšeo re bego re kgona go di dira. Ge re le ka gare ga mathata ao a swanago le a, Jehofa o a re kgothatša. O re kgothatša bjang?

10. Go ya ka Diema 12:25, ke’ng seo se ka re kgothatšago ge re babja?

 ¹⁰ “Lentšu le lebotse” le ka re kgothatša ge re babja. (Bala Diema 12:25.) Ka Beibeleng, Jehofa o ngwadile mantšu a mabotse ao a re gopotšago gore re bohlokwa go yena le ge re babja. (Ps. 31:19; 41:3) Ge re ka bala Lentšu la Modimo gantšintši, Jehofa a ka re thuša go kgotlelela dilo tšeo re tshwenyegago ka tšona ge re babja.

11. Jehofa o ile a thuša bjang ngwanabo rena yo mongwe yo a bego a babja?

¹¹ Nagana ka mohlala wa Jorge. Ge Jorge e be e sa le yo mofsa, o ile a swarwa ke bolwetši bjo bošoro bja go keka ka lebelo, gomme bolwetši bjoo bja mo dira gore a ikwe a se na mohola. Jorge o re: “Ke be ke sa ipshine ka selo e bile ke lewa ke dihlong ka gobane bolwetši bja ka bo be bo mpiletša mahlo a batho. Ge ke dutše ke babja le go feta, ke ile ka thoma go tshwenywa ke gore bophelo bja ka bo tlo fetoga. Ke be ke nyamile kudu, ka gona ke ile ka llela Jehofa gore a nthuše.” Jehofa o ile a thuša Jorge bjang? Jorge o re: “Ka ge ke be ke se sa kgona go tšea nako e telele ke bala, ke ile ka kgothaletšwa gore ke bale ditemana tše sego kae ka pukung ya Dipsalme tšeo di bontšhago kamoo Jehofa a hlokomelago bahlanka ba gagwe. Ke ile ka bala ditemana tšeo gantšintši gomme tša nkhomotša kudu. Ge nako e dutše e eya, ke ile ka thoma go dula ke thabile, gomme batho ba bangwe ba ile ba lemoga seo. E bile ba bangwe ba be ba mpotša gore ke ba kgothatša kudu ka ge ke dula ke thabile. Ka gona ke ile ka bona gore Jehofa o arabile dithapelo tša ka. Jehofa o ile a nthuša gore ke fetoše tsela yeo ke bego ke itebelela ka yona. Le gona ke ile ka thoma go dula ke naganne ka ditemana tšeo di bontšhago gore Jehofa o ntebelela ke le bohlokwa le ge ke babja.”

12. O ka dira’ng gore Jehofa a go thekge ge o babja?

 ¹² Ge e ba o babja, kgodišega gore Jehofa o a tseba gore o ikwa bjang. Mo kgopele gore a go thuše gore o se ke wa tshwenyega kudu ka bolwetši bja gago. Ke moka bala Beibele gore o ikgopotše mantšu a mabotse goba a kgothatšago ao Jehofa a go ngwaletšego ona ka gare ga yona. Bala kutšwanyana ditemana tšeo di bontšhago gore Jehofa o lebelela bahlanka ba gagwe ba le bohlokwa kudu. Ge o dutše o bala ditemana tšeo, o tla bona gore Jehofa o rata batho bao ba mo hlankelago ka dipelo tša bona ka moka.—Ps. 84:11.

13. Hlogo ya lapa e ka ikwa bjang ge e ka felelwa ke mošomo?

¹³ Hlogo e nngwe le e nngwe ya lapa e nyaka go hlokomela lapa la yona gabotse. Eupša a re re ngwanabo rena o felelwa ke mošomo le ge go se na phošo yeo a e dirilego. O leka ka thata gore a hwetše mošomo o mongwe, eupša ga go nko yeo e tšwago lemina. Seo se ka dira gore a nyame kudu, gomme a ikwe a se na mohola. A ka thušwa bjang ke go nagana ka dilo tšeo Jehofa a re tshepišitšego tšona?

14. Ke ka baka la’ng Jehofa a dula a phetha seo a se tshepišitšego bahlanka ba gagwe?

¹⁴ Jehofa o dula a phetha seo a re tshepišitšego sona. (Josh. 21:45; 23:14) O na le mabaka a mantši a gore a dire seo. Lebaka la mathomo ke gore ge a ka se phethe seo a se tshepišitšego, o tla kwerwa. Jehofa o tshepišitše bahlanka ba gagwe gore o tla ba hlokomela, ka gona o ikwa a gapeletšega go dira seo a ba tshepišitšego sona. (Ps. 31:1-3) Go oketša moo, Jehofa o a tseba gore ge a ka se direle bahlanka ba gagwe dilo tšeo a ba tshepišitšego tšona, ba tlo nyama. O re tshepiša gore o tla re nea dilo tšeo re di hlokago gore re tšwele  pele re phela le gore re be bagwera ba gagwe. E bile ga go na seo se ka mo thibelago gore a dire dilo tšeo a re tshepišitšego tšona.—Mat. 6:30-33; 24:45.

15. (a) Bakriste bao ba phetšego mehleng ya Paulo ba ile ba ba ka gare ga mathata afe? (b) Psalme 37:18, 19, e dira gore re kgodišege ka eng?

¹⁵ Ge re ka gopola gore ke ka baka la eng Jehofa a dula a phetha seo a re tshepišitšego sona, gona re tla kgodišega gore le ge re feletšwe ke mošomo o tla re hlokomela. Nagana ka mohlala wa Bakriste bao ba phetšego mehleng ya Paulo. Ka morago ga gore phuthego ya kua Jerusalema e tlaišwe o šoro, ‘bohle ba ile ba gašanywa’ gomme gwa šala baapostola feela. (Dit. 8:1) Maemo a be a le bjang kua Jerusalema ka nako yeo? Go be go le thata kudu. Bakriste ba bantši ba ile ba loba dintlo le dikgwebo tša bona. Eupša Jehofa ga se a ka a ba lahla, e bile ba ile ba dula ba thabile. (Dit. 8:4; Baheb. 13:5, 6; Jak. 1:2, 3) Jehofa o ile a dula a thekga Bakriste bao, gomme le rena o tla re thekga.—Bala Psalme 37:18, 19.

16. Ke’ng seo se ka dirago gore re ikwe eka ga re nee Jehofa sohle seo re ka se kgonago?

¹⁶ Ge re thoma go tšofala, re ka ikwa eka ga re sa kgona go nea Jehofa sohle seo re ka se kgonago. Kgoši Dafida le yena a ka ba a ile a ikwa ka tsela e swanago ge a be a thoma go tšofala. (Ps. 71:9) Jehofa a ka re thuša bjang ge re ikwa ka tsela yeo?

17. Re ka ithuta’ng mohlaleng wa kgaetšedi Jheri?

¹⁷ A re ithuteng se sengwe mohlaleng wa kgaetšedi Jheri. O ile a laletšwa go ba gona ge phuthego ya gabo e tlo rutwa go hlokomela Holo ya Mmušo, eupša o be a sa nyake go ya. O ile a re: “Ke tšofetše, ke mohlologadi e bile ga go na selo seo nka thušago ka sona. Ga ke na mohola.” Eupša bošegong bja pele ga ge ba ka ya go rutwa go hlokomela Holo ya Mmušo,  o ile a ntšhetša Jehofa sa mafahleng. Letšatšing le le latelago ge a fihla Holong ya Mmušo, o be a sa dutše a ipotšiša ge e ba a swanetše go ba moo. Ge ba dutše ba rutwa, ngwanabo rena yo mongwe o ile a bolela gore selo se bohlokwa ke go dumelela Jehofa a re ruta. Jheri o re: “Ke ile ka ipotša gore, ‘nka kgona go dumelela Jehofa a nthuta!’ Ge ke be ke bona gore Jehofa o be a araba dithapelo tša ka, ke ile ka thoma go lla. Jehofa o be a mpontšha gore ke na le mohola, e bile o be a ikemišeditše go nthuta.” Ga bjale kgaetšedi Jheri o re: “Ke nnete gore ge ke be ke fihla Holong ya Mmušo ke be ke tšhogile, ke ikwa ke gateletšegile e bile ke nyamile. Eupša ge ke etšwa moo ke ile ka ikwa ke thabile, ke kgothatšegile e bile ke na le mohola.”

18. Beibele e bontšha bjang gore Jehofa o tšeela godimo seo re mo direlago sona le ge re tšofetše?

¹⁸ Le ge re tšofetše, re ka kgodišega gore Jehofa o bona go sa na le dilo tšeo re ka mo direlago tšona. (Ps. 92:12-15) Jesu o re rutile gore le ge re ka bona eka dilo tšeo re di direlago Jehofa ga di re selo, Jehofa yena o tšeela godimo selo se sengwe le se sengwe seo re mo direlago sona. (Luka 21:2-4) Ka gona, wena dira seo o ka se kgonago. Ka mohlala, o ka ruta ba bangwe ka Jehofa, wa rapelela bana beno le dikgaetšedi le go kgothatša ba bangwe gore ba dule ba botegela Jehofa. E bile Jehofa o go tšea o le mošomigotee le yena e sego ka baka la dilo tšeo o kgonago go di dira, eupša ka gobane o ikemišeditše go mo kwa.—1 Bakor. 3:5-9.

19. Lengwalo la Baroma 8:38, 39, le dira gore re kgodišege ka eng?

¹⁹ Ruri go a thabiša go hlankela Jehofa Modimo yo a re bonago re le bohlokwa kudu! Modimo o re bopetše gore re mo hlankele, e bile go mo hlankela go dira gore re ipshine ka bophelo. (Kut. 4:11) Le ge batho ba lefase ba ka bona re se na mohola, eupša Jehofa yena o ikgantšha ka rena. (Baheb. 11:16, 38) Ka gona, ge e ba re ikwa re nyamile ka baka la ge re babja, re hloka mošomo goba re tšofetše, anke re duleng re gopola gore ga go na selo seo se ka re aroganyago le lerato la Tatago rena wa legodimong.—Bala Baroma 8:38, 39.