1-2. Ovitateka patyi vamwe vena, iya oñgeni otyo tyipondola okuvekalesa?

SOKA konongeleka ombu ononthatu: (1) Omukuendye upopilwa nondotolo okuti una ouvela omuvi. (2) Omukuatate una omanima alamba 50, upolwa movilinga. Pahe wovola ovilinga ovikuavo, mahi otyo ahavasi. (3) Omphange wakulupa, ketyivili vali okuundapela Siovaa ngetyi ahanda.

² Inkha una tyimwe povitateka ovio, hamwe ulitehelela okuti kusilivila vali. Tyina omunthu ena ovitateka ngovio, upondola okusoya, asoko okuti kesilivila. Iya atee umwe upondola okuhelivili na vakuavo.

3. Oñgeni Satanasi novanthu ahongiliya vatala omuenyo?

³ Ouye utala ovanthu ngetyi Satanasi ahanda. Satanasi kesukile nomuenyo wovanthu. Ku Satanasi, ovanthu vetupu esilivilo. Wapopilile Eva okuti ankho upondola okulinga etyi muene ahanda. Mahi Satanasi ankho utyii nawa okuti inkha Eva ketavela ku Huku, mankhi. Mokonda Satanasi omutumini wouye uno, uhongiliya ovanthu vokulinga onondando, novatumini, nononkhalamutwe mbonongeleya. Moluotyo, katyituhuvisa okutala okuti ovanthu ovo, vetupu onthilo na vakuavo iya kavesukile nomuenyo.

4. Oityi matulilongesa monthele ei?

⁴ Mahi Siovaa welikalela unene na Satanasi. Siovaa uhanda tuhinangele okuti tuakolela unene iya apeho utukuatesako tyina tuna ovitateka vitusoyesa. (Sal. 136:23; Loma  12:3) Onthele ei, maitulekesa oñgeni Siovaa etukuatesako tyina tuna ovitateka ngevi: (1) Tyina tuvela, (2) tyina onombongo mbuhamoneka, (3) tyina tuakulupa atulitehelela okuti tutupu vali etyi tupondola okulingila Siovaa. Mahi tete matukumbulula epulo eli: Oityi tyilekesa okuti kese umwe pu onthue wakolela unene ku Siovaa?

5. Oityi tyikukalesa nonthumbi yokuti ovanthu vakolela unene ku Siovaa?

⁵ Namphila Siovaa etutunga neheke, mahi tuakolela unene kwe. (Gên. 2:7) Tutalei omahunga amwe etukalesa nonthumbi yokuti tuakolela unene ku Siovaa. Huku wetutunga nounongo wokuhetekela ovituwa viae. (Gên. 1:27) Mokualinga ngotyo, walekesa okuti ovanthu vakolela vali kovipuka aviho alinga kombanda yohi. Atee umwe wetuavela otyilinga tyokuyunga eheke, novinyama. — Sal. 8:4-8.

6. Oityi vali tyilekesa okuti tuakolela unene ku Siovaa namphila tuvakuankhali?

⁶ Andau wakuata onkhali. Mahi no ngotyo Siovaa kayekele-ko okusuka novanthu. Tyina usoka, omokonda yatyi Siovaa avela omona wae ehole unene opo ankhile ononkhali mbetu? Omokonda tuakolela unene kwe. (1 Suau 4:9, 10) Iya mokonda yotyilikutila tya Sesusi, Siovaa makatutilisa vokuankhia mokonda yonkhali ya Andau, tyilinge ‘ovaviuki na vana vehevaviuki.’ (Ovil. 24:15) Ondaka yae ipopia okuti tuakolela unene kwe, atee umwe tyina tuvela, tuhena onombongo, na tyina tuakulupa. — Ovil. 10:34, 35.

7. Ovipuka patyi ovikuavo vitukalesa nonthumbi yokuti tuakolela unene ku Siovaa?

⁷ Tuna vali omahunga omakuavo etukalesa nonthumbi yokuti tuakolela unene ku Siovaa. Wamona onkhalelo tuakala etyi tueiva onondaka onongwa iya etukokela kwe. (Suau 6:44) Tyina tufuena ku Siovaa, nae ufuena vali ku onthue. (Tia. 4:8) Tupu Siovaa umanena omuvo wae mokutulongesa, tyilekesa nawa okuti wesuka no onthue. Wii ovituwa tuna-vyo pahetyino, nevi tupondola okukala navio opo tukale ovanthu vekahi vali nawa. Iya utuviyula mokonda una oluembia no onthue. (Pro. 3:11, 12) Ovipuka ovio, vilekesa nawa okuti tyotyili tuakolela unene ku Siovaa!

8. Oñgeni o Salmo 18:27-29 ipondola okutukuatesako tyina tuna ovitateka?

⁸ Namphila ovanthu vamwe ankho vatomba Ohamba Daviti, mahi ngwe ankho uhinangela okuti Siovaa una oluembia nae iya umukuatesako. Okulinga ngotyo, tyemukuatesileko okuhasoyo povitateka. (2 Sam. 16:5-7) Tyina tuasoya na tyina tuna ovitateka, Siovaa upondola okutukuatesako okutala ovipuka monkhalelo yaviuka, nokutukuatesako okulambela mu kese tyitateka tyitumonekela. (Tanga Salmo 18:27-29.) Mokonda Siovaa ukahi nokutukuatesako, natyike matyitutyilika okutualako okumuumbila nehambu. (Loma 8:31) Pahe matulilongesa ovitateka vitatu vipondola okutumonekela. Movitateka ovio, omo tuesukisa okuhinangela okuti Siovaa utuhole iya tuakolela unene kwe.

9. Oñgeni ouvela utukalesa?

⁹ Tyina tuavela tupondola okukala tyasoya, atusoko okuti katusilivila vali. Pamwe tupondola okulitehelela omapita tyina vakuetu vamona okuti tuvela, na tyina pena ovipuka vimwe tuna okulingilwa-ko. Atee umwe tyina ovanthu vehetyii okuti tuvela, tupondola okulitehelela omapita mokonda yokuhetyivili  vali okulinga ovipuka ankho tulinga. Tyina tulitehelela ngotyo, Siovaa utukuatesako. Mahi oñgeni etyilinga?

10. Ngetyi tyipopia Provérbios 12:25, oityi tyipondola okutukuatesako tyina tuavela?

¹⁰ Tyina tuavela, “ondaka ikahi nawa” ipondola okutupameka. (Tanga Provérbios 12:25.) Mondaka yae Ombimbiliya, Siovaa wapopia-mo ovipuka ovinyingi vituhinangelesa okuti onthue tuakolela unene kwe, atee umwe tyina tuavela. (Sal. 31:19; 41:3) Inkha apeho tutanga Ombimbiliya, Siovaa metupameka, atuhasoyo mokonda youvela wetu.

11. Oñgeni Siovaa akuatesako Jorge?

¹¹ Tala etyi tyaendele na Jorge. Puetyi omukuendye, ondotolo aimupopila okuti ankho una ouvela umwe omuvi. Otyo atyimusoyesa iya asoko okuti kesilivila vali. Wati: “Andyisoyo unene, iya ankho ndyina ohonyi mokonda ovanthu aveho ankho vetyimona okuti ndyimuvei. Ouvela wange auhimbika okuvilapo. Pahe ankho ndyikalela vala okusoka oñgeni omuenyo wange maupiluluka. Ankho nasoya unene iya andyiiti Siovaa ankhuateseko.” Oñgeni Siovaa emukuatesako? Wati: “Mokonda pahe ankho tyimphuiya okunoñgonoka nawa ovipuka, andyihimbika okutanga ono velesikulu mbehehi mbomukanda wa Salmu. Haunene ankho ndyitanga ono velesikulu mbupopia okuti Siovaa wesuka novaumbili vae. Ononthiki ambuho ankho ndyimbutanga. Iya tyotyili mbamphamekele unene. Katutu-katutu vakuetu avahimbika okumona okuti pahe ndyiyola-yola. Atee umwe vapopia okuti onkhalelo ankho ndyitala otyitateka tyange yevepameka unene. Namona okuti Siovaa ankho ukahi nokukumbulula omalikuambelo ange! Siovaa wankhuatesako okupilulula onkhalelo ankho ndyilitala. Pahe  ankho ndyisoka vala etyi Ondaka yae ipopia konthele yo ñgeni Siovaa anthala, namphila navela.”

12. Oityi wesukisa okulinga opo Siovaa ekukuateseko tyina wavela?

¹² Inkha uvela, hinangela okuti Siovaa wii atyiho ukahi nokulambela. Ngotyo, muita ekukuateseko okutala otyitateka tyove monkhalelo yaviuka. Konyima, tanga Ombimbiliya. Inkha utanga Ombimbiliya, movasi-mo onondaka ononyingi mba Siovaa mambukupameka. Haunene tala nawa ono velesikulu mbupopia okuti Siovaa wesuka unene no ove. Okulinga ngotyo, momono okuti Siovaa una okankhenda novaumbili vae ovakuatyili. — Sal. 84:11.

13. Oñgeni onkhalamutwe yombunga apondola okulitehelela tyina apolwa movilinga?

¹³ Ononkhalamutwe mbonombunga ambuho, vahanda okutekula nawa ombunga yavo. Pahe soka ñgeno onkhalamutwe yombunga wataatwa movilinga namphila ehena etyi alinga. Ulinga ononkhono mbokutaindya ovilinga ovikuavo, mahi otyo ehevivasi. Mokonda yotyo, upondola okulitehelela okuti kasilivila. Oñgeni okusoka komilao vya Siovaa tyipondola okumukuatesako?

14. Omokonda yatyi Siovaa afuisilapo omilao viae?

¹⁴ Siovaa apeho ufuisapo etyi apopia. (Jos. 21:45; 23:14) Omokonda yatyi etyilingila? Tete, omokonda yenyina liae. Siovaa walaa okutekula nawa ovaumbili vae. Iya ulitehelela okuti ondaka yae kaipondola okulikondoka. (Sal. 31:1-3) Vali, onthue tumbunga ya Siovaa. Siovaa utyii nawa okuti matusoyo inkha ketuavela etyi tuesukisa. Walaa okutuavela etyi tuesukisa opo tulitekule, netyi  tuesukisa opo tutualeko noupanga omuwa nae. Natyike tyipondola okutyilika Siovaa okufuisapo ovipuka ovio etulaa! — Mat. 6:30-33; 24:45.

15. (a) Otyitateka patyi Ovakilisitau vo potyita tyo tete vakalele natyo? (b) Onthumbi patyi tukala nayo tyina tutanga Salmo 37:18, 19?

¹⁵ Okuhinangela omokonda yatyi Siovaa afuisilapo omilao viae, matyitukuatesako okutula omutima tyina onombongo mbuhamoneka, na tyina tuhena etyi tulia. Soka kongeleka yo Vakilisitau vo potyita tyo tete. Etyi vahimbika okuhataikiswa, “aveho aveliyandyana . . . amusala vala ono apositolu.” (Ovil. 8:1) Avasipo omaumbo avo, novitanda viavo. Otyo atyivetela oluhepo. Mahi no ngotyo Siovaa eheveyeke-po iya navo avahasoyo. (Ovil. 8:4; Heb. 13:5, 6; Tia. 1:2, 3) Ngetyi Siovaa akuatesileko Ovakilisitau ovo, no onthue metukuatesako. — Tanga Salmo 37:18, 19.

16. Omokonda yatyi vamwe vasokela okuti kavesilivila ku Siovaa?

¹⁶ Tyina tukulupa, tupondola okuhimbika okusoka okuti tutupu vali etyi tupondola okulingila Siovaa. Tyafuile Ohamba Daviti nae ankho otyo elitehelela ngotyo etyi akulupa. (Sal. 71:9) Mahi oñgeni Siovaa apondola okutukuatesako?

17. Oityi tulilongesila kongeleka ya Jeri?

¹⁷ Tala ongeleka yomukulukai umwe utiwa Jeri. Wakongwa opo alongeswe okupangiya ovipuka viateka Mondyuo Yomaliongiyo. Mahi Jeri ahande okuanya. Omokonda yatyi? Wati: “Ame nakulupa-le tupu ndyimuhepe, iya ndyitupu-ale etyi ndyivila okulinga movilinga vya Siovaa. Ame hisilivila.” Etyi kuakambela onthiki ike, elikuambela nomutima auho ku Siovaa. Welikuambela  kongulohi iya eliongiyo alihimbika komuhuka. Etyi ehika Kondyuo Yomaliongiyo, nkhele ankho usoka okuti katokalele okulongeswa otyilinga otyo. Umwe povalongomoni apopi okuti otyipuka tyakolela vali unene, okuliava opo tulongeswe na Siovaa. Oñgeni onondaka ombo mbakalesa Jeri? Wati: “Andyilipopila okuti: ‘Inkha otyo vala, na ame ndyihanda okulongeswa na Siovaa!’ Namona okuti Siovaa ankho ukahi nokukumbulula elikuambelo liange iya andyihimbika okulila. Ankho ukahi nokumphopila okuti nkhele ndyina etyi ndyipondola okumulingila iya ngwe wafuapo opo andongese!” Jeri wapopia okuti welikuluminyine okuenda keliongiyo olio iya ankho wasoya unene. Mahi konyima apopi okuti: “Etyi eliongiyo liapwa pahe ankho ndyilitehela okuti nakolela unene ku Siovaa iya mandyityivili!”

18. Oñgeni Ombimbiliya ilekesa okuti Siovaa upanda etyi tumulingila atee umwe tyina tuakulupa?

¹⁸ Ankho wakulupa, uhalimbueko okuti Siovaa nkhele uhanda okukuavela ovilinga. (Sal. 92:12-15) Sesusi wetulongesa okuti Siovaa upanda etyi tumulingila, namphila pamwe tusoka okuti katyihi. (Luka 21:2-4) Ngotyo, linga vala etyi uvila. Ovipuka vimwe uvila okulinga, okupopila vakuenyi konthele ya Siovaa, nokuitilako vakuenyi momalikuambelo ove, nokuvelunda opo vatualeko okukala ovakuatyili ku Siovaa. Ove wakolela unene ku Siovaa, ha mokonda vala yetyi walinga, mahi omokonda umutavela nomutima auho. — 1 Kol. 3:5-9.

19. Onthumbi patyi tukala nayo tyina tutanga Ova Loma 8:38, 39?

¹⁹ Onthue tuna ehambu mokonda tuakolela unene ku Siovaa, Huku tufenda! Huku wetutunga opo tulinge ehando liae. Iya opo tukale nehambu liotyotyili tuna okumufenda. (Ehol. 4:11) Ouye ututala okuti katusilivila, mahi Siovaa hangotyo etutala. (Heb. 11:16, 38) Tyina wamasoyo mokonda yokuvela, nonombongo mbuhamoneka, nekulupo, hinangela okuti Tate yetu wo keulu una oluembia no ove, iya nalumwe mayekepo okusuka novaumbili vae. — Tanga Ova Loma 8:38, 39.