1-2. Abajurizi ba Yehova abaingi bari mu mbeera ki, kandi eki nikibaasa kubakwataho kita?

TEEKATEEKA aha mbeera ezi ishatu: Ow’eishe-emwe muto acebeize yaashanga aine endwara y’akabi munonga. Ow’eishe-emwe orikukora n’obweziriki ow’emyaka ya rwa gati afeereirwe omurimo gwe, kandi bwanyima y’okuteeraho munonga tarikubaasa kutunga ogundi. Munyaanyazi-itwe omwesigwa ori omu myaka ya bukuru amaani ge makye nigaguma nigamuremesa kuheereza gye Yehova.

² Ku oraabe ori omu mbeera nk’ezagambwaho, noobaasa kureeba ngu tokiri w’omugasho. Embeera ezo nizibaasa kukumaraho okushemererwa, kwetamwa, n’okushiisha omukago gwawe n’abantu abandi.

3. Sitaane n’abarikumushagika nibatwara bata amagara g’abantu?

³ Abantu omu nsi baine emiteekateekyere nk’eya Sitaane aha ku barikureeba amagara g’abantu. Sitaane atwire naatwara abantu nk’abataine mugasho. Ataine saasi akagambira Haawa ngu naija kugira obugabe yaagomera Ruhanga, n’obu araabe yaabaire naamanya ngu ekifubiro ky’obugomi n’okufa. Sitaane atwire naayebembera entebeekanisa z’eby’obushuubuzi, eby’obutegyeki, n’ediini omu nsi egi. N’ahabw’ekyo tikirikutangaaza kureeba ngu abashuubuzi, abategyeki, n’abeebembezi b’ediini nibooreka emitwarize nk’eye ey’okutaha amagara g’abantu ekitiinisa n’okutafayo aha nyehurira zaabo.

4. Nituza kushwijuma ki omu kicweka eki?

 ⁴ Kwonka Yehova naayenda ngu twegiremu amatsiko, kandi naatuhwera twaba turi omu mbeera ezirikutureetera kwehwa amatsiko. (Zab. 136:23; Rom. 12:3) Ekicweka eki nikiza kworeka oku Yehova arikutuhwera omu mbeera ezi: (1) Twaba turwaire, (2) twaba twine oburemeezi bw’eby’esente, (3) na bukuru yaatureetera kwehurira nk’abataine mugasho omu kuheereza Yehova. Kwonka ka tubanze tureebe ahabw’enki turikubaasa kuhamya ngu buri omwe ahariitwe n’ow’omuhendo ahari Yehova.

5. Niki ekirikukuhamiza ngu abantu n’ab’omuhendo ahari Yehova?

⁵ N’obu turaabe tukozirwe omu mucuucu gw’aha nsi, turi ab’omuhendo munonga kukirira kimwe omucuucu. (Kut. 2:7) Yetegyereze enshonga zimwe ahabw’enki nitumanya ngu turi ab’omuhendo ahari Yehova. Akahanga abantu barikubaasa kworeka emitwarize nk’eye. (Kut. 1:27) Omu kukora atyo, akatuhanga turi ab’omuhendo munonga kukira ebyahangirwe ebindi byona, yaatuha n’obujunaanizibwa bw’okureeberera ensi n’enyamaishwa.​—Zab. 8:4-8.

6. Ni buhame ki obundi oburikworeka ngu abantu abatahikiriire n’ab’omuhendo ahari Yehova?

⁶ Na bwanyima ya Adamu kushiisha, Yehova akagumizamu naatwara abantu nk’ab’omuhendo. Kumanya ngu naatutwara nk’ab’omuhendo akahika n’aha kuhayo Omwana we omukundwa Yesu, kuba ekitambo ahabw’ebibi byaitu. (1 Yoh. 4:9, 10) Yehova naija kwihirira aha kitambo kuzoora boona, “abahikiriire n’abatahikiriire” abaafiire ahabw’ekibi kya Adamu. (Byak. 24:15) Ekigambo kye nikyoreka ngu turi ab’omuhendo ahariwe n’obu twakuba turwaire, turi abooro, nari turi omu myaka ya bukuru.​—Byak. 10:34, 35.

7. Ni nshonga ki ezindi ezirikureetera abaheereza ba Ruhanga kwikiriza ngu n’ab’omuhendo ahariwe?

⁷ Hariho enshonga ezindi ezirikutureetera kwikiriza ngu turi ab’omuhendo ahari Yehova. Akareeba oku twakunzire amakuru marungi reero yaatweyiriza haihi. (Yoh. 6:44) Ku twatandikire kwirira haihi Yehova, nawe yaatandika kutwirira haihi. (Yak. 4:8) Kandi ahabw’okugira ngu Yehova naafayo munonga kutwegyesa, nikyoreka ngu turi ab’omuhendo ahariwe. Naamanya entwaza yaitu hati, kandi naamanya n’ahu turikubaasa kuhinduramu. Kandi naatuhana ahabw’okugira ngu naatukunda. (Enf. 3:11, 12) Obu ka n’obuhame ngu buzima turi ab’omuhendo ahari Yehova!

8. Ebigambo ebiri omuri Zaaburi 18:27-29 nibibaasa kukwata bita aha ku turikureeba oburemeezi bwaitu?

⁸ Abantu abamwe bakaba nibatwara Omugabe Daudi nk’otaine mugasho, kwonka we Daudi akaba naamanya ngu Yehova naamukunda kandi naamushagika. Okumanya ekyo kikakwata aha ku yaabaire naareeba embeera ye. (2 Sam. 16:5-7) Twaba twine enaku nari emirabanamu, Yehova naabaasa kutuhwera kureeba enshonga omu muringo gw’omutaano, kandi naabaasa kutuhwera kusingura buri mbeera yoona egumire. (Shoma Zaaburi 18:27-29.) Twaba twine obushagiki bwa Yehova, tihaine ekirikubaasa kuturemesa kumuheereza twine okushemererwa. (Rom. 8:31) Hati ka tushwijume embeera ishatu ezishemereire kutureetera kwijuka ngu Yehova naatukunda kandi naatutwara nk’ab’omuhendo.

9. Endwara neebaasa kukwata eta aha ku turikwereeba?

⁹ Endwara neebaasa kuteganisa enyehurira zaitu kitureetere kwehurira nk’abatarikubaasa kugasira muntu weena. Nitubaasa kuhemuka abantu baareeba obweremwa bwaitu, nari twaba twine kwesiga abandi kutuhwera. Nangwa n’obu abandi baakuba batarikumanya  ngu turwaire, nitubaasa kuhurira nituhemuka ahabw’okugira ngu titurikubaasa kukora bingi. Omu bwire obwo obw’amaganya, Yehova naatuhuumuriza. Mu muringo ki?

10. Kurugiirira aha Enfumu 12:25, niki ekirikubaasa kutuhwera twaba turwaire?

¹⁰ Twaba turwaire, “ekigambo kirungi” nikibaasa kutuhuumuriza. (Shoma Enfumu 12:25.) Yehova akahandiikisa ebigambo birungi omu Baibuli ebirikutwijutsya ngu turi ab’omuhendo ahariwe n’obu twakuba turwaire. (Zab. 31:19; 41:3) Twaguma nitushoma ebigambo ebyo turikuguma nitubigarukamu emirundi mingi, Yehova naija kutuhwera kusingura enyehurira zigwire ezi twine ahabw’okurwara.

11. Ow’eishe-emwe akatunga ata obuhwezi bwa Yehova?

¹¹ Teekateeka aha mbeera ya Jorge. Obu yaabaire akiri muto, akatunga endwara y’akabi munonga eyaarahukire kukura ekamureetera kwehurira nk’otaine mugasho. “Nkaba ntetebeekanisiize enyehurira ezi endwara yangye yaandeeteire kugira nari okuhemuka oku naagizire ahabw’abantu kuguma nibandeeba,” Jorge nikwo arikugira. “Endwara yangye ku yaayeyongyeire kukura, nkateekateeka aha ku embeera zangye ziraahindukye. Nkagira obusaasi bwingi, reero naayeshengyereza Yehova kumpwera.” Yehova akamuhwera ata? “Ahabw’okugira ngu nkaba ntarikubaasa kugira eki naataho omutima, bakampiga kushoma emishororongo migufu omuri Zaaburi erikworeka oku Yehova arikufayo aha abaheereza be. Nkaba nguma ninshoma ebyahandiikirwe ebyo emirundi mingi buri izooba, kandi nkashanga birikuhuumuriza kandi birikugaruramu amaani. Bwanyima y’obwire, abandi bakatandika kureeba ndikumwenya. Nangwa bakaba nibagira ngu emiteekateekyere yangye mirungi neebagumya. Nkamanya ngu Yehova agarukiremu okushaba kwangye! Akampwera kuhindura emiteekateekyere yangye. Nkatandika  kuta omutima aha bi Ekigambo kye kirikugamba aha ku arikundeeba n’obu ndaabe nyine endwara.”

12. Waaba nooteganisibwa endwara y’amaani, noobaasa kukora ki kutunga obuhwezi bwa Yehova?

¹² Waaba nooteganisibwa endwara y’amaani, gira obuhame ngu Yehova naamanya obusaasi bwawe. Mweshengyereze kukuhwera kugira emiteekateekyere mirungi aha mbeera yaawe. Kandi za omu Baibuli kutungamu obutumwa burikuhuumuriza obu Yehova yaahandiikiise. Ta omutima aha byahandiikirwe ebirikworeka oku Yehova arikutwara abaheereza be nk’ab’omuhendo. Waakora otyo, noija kureeba ngu Yehova ni murungi ahari boona abarikumuheereza omu bwesigwa.​—Zab. 84:11.

13. Omutwe gw’eka naabaasa kugira nyehurira ki yaafeerwa omurimo gwe?

¹³ Buri mutwe gw’eka naaba naayenda kuhwera eka ye kutunga ebirikwetengyesa. Kwonka ow’eishe-emwe naabaasa kufeerwa omurimo gwe ataine nshobe ei akozire. Naabaasa kuteeraho n’obweziriki kutunga ogundi kwonka gubure. Omu mbeera egi, naabaasa kwehurira ari nk’otaine mugasho. Mbwenu shi okuteekateeka aha bi Yehova arikuraganisa nikubaasa kumuhwera kuta?

14. Ahabw’enki Yehova naahikiiriza ebi arikuraganisa?

¹⁴ Yehova butoosha naahikiiriza ebi arikuraganisa. (Yos. 21:45; 23:14) Naakikora ahabw’enshonga nyingi. Ey’okubanza, n’ahabw’okugira ngu ekyo nikikwata aha iziina rye rirungi. Yehova araganiise ngu naaza kureeberera abaheereza be abeesigwa, kandi n’obujunaanizibwa bwe kuhikiiriza okuraganisa oku. (Zab. 31:1-3) Kandi Yehova naamanya ngu nitwija kwehurira kubi yaaba atahikiriize obujunaanizibwa bwe obw’okureeberera ab’eka ye.  Naaraganisa kutureeberera omu by’omubiri n’omu by’omwoyo, kandi tihaine ekirikubaasa kumuremesa kuhikiiriza okuraganisa okwo!​—Mat. 6:30-33; 24:45.

15. (a) Abakristaayo b’omu kyasha ky’okubanza bakatunga buremeezi ki? (b) Ni buhame ki obu turikutunga omuri Zaaburi 37:18, 19?

¹⁵ Twaijuka enshonga ahabw’enki Yehova naahikiiriza ebi arikuraganisa, nikibaasa kutuhwera kwemera oburemeezi bw’esente twine obwesigye. Teekateeka aha ky’okureeberaho ky’Abakristaayo omu kyasha ky’okubanza. Ku haabaireho okuhiiganisibwa kw’amaani omu bibiina by’omuri Yerusaalemu, ‘boona bakataataana, okwihaho entumwa zonka.’ (Byak. 8:1) Teekateeka aha kyabaire nikiija kuruga omuri eki. N’oburemeezi bw’eby’entaatsya! Abakristaayo nibabaasa kuba baatsigireho amaka gaabo n’eby’obushuubuzi byabo. Kwonka, Yehova tarabatsigireho, kandi bakaguma baine okushemererwa kwabo. (Byak. 8:4; Heb. 13:5, 6; Yak. 1:2, 3) Yehova akashagika Abakristaayo abo abeesigwa, kandi naitwe naija kutushagika.​—Shoma Zaaburi 37:18, 19.

16. Ni mbeera ki ezirikubaasa kutureetera kwebuuza yaaba Yehova naasiima okuramya kwaitu?

¹⁶ Twaguma nitweyongyera kukaikuhara, nitubaasa kutandika kuteekateeka ngu titwine kihango eki turikukorera Yehova. Omugabe Daudi naabaasa kuba yaagizire enyehurira nizo zimwe ku yaakuzire. (Zab. 71:9) Yehova naabaasa kutuhwera ata?

17. Nitubaasa kwegyera ki aha ky’okureeberaho kya munyaanyazi-itwe Jheri?

¹⁷ Teekateeka aha kyahikire ahari munyaanyazi-itwe orikwetwa Jheri. Bakamweta kuza omu ruteerane rw’okutendekwa kuhunduuza Ekyombeko ky’Obukama, kwonka akaba atarikwenda kuzayo. Akagira ati:  “Nkaikwire, ndi efaakazi, kandi tinyine mwoga gwona ogu ndikubaasa kukoresa omu kuheereza Yehova. Tinyine mugasho gwona.” Ekiro eky’enyima eizooba ry’okutendekwa ritakahikire, akashaba Yehova yaamugambira buri kimwe ekimuri aha mutima. Ku yaahikire aha Kyombeko ky’Obukama omu kasheeshe, akaba naakyebuuza yaaba ashemereire kubaho. Omu ruteerane rw’okutendekwa orwo, omugambi omwe akahamiiriza enshonga ngu omwoga ogurikukirayo obukuru n’okuba tweteekateekire kwegyesibwa Yehova. Jheri naijuka arikuteekateeka ati: “Ningira, ‘omwoga ogwo ngwine!’ Nkatandika kurira ku naamanyire ngu Yehova ariyo naagarukamu okushaba kwangye. Akaba ariyo naampamiza ngu nyine ekintu ky’omuhendo eky’okuhayo, kandi ngu akaba ayeteekateekire kunyegyesa!” Jheri ku arikureeba enyima, naagira ati: “Nkaza aha kutendekwa okwo ntiinire, ntamirwe, kandi nyine enaku. Kwonka nkaza kuhendera okutendekwa ndikuhurira ndikweyesiga, ngarukirwemu amaani, kandi ndi ow’omuhendo!”

18. Baibuli neeyoreka eta ngu Yehova naagumizamu naasiima okuramya kwaitu n’obu twakuhika omu myaka ya bukuru?

¹⁸ Twaguma nitweyongyera kukaikura, nitubaasa kugira obuhame ngu Yehova nabwo akitwiniire omurimo gw’okukora. (Zab. 92:12-15) Yesu akatwegyesa ngu n’obu twakuba tutaine mwoga nari twine amaani makye, Yehova naatwara kyona eki turikukora omu buheereza bwe nk’eky’omuhendo. (Luk. 21:2-4) N’ahabw’ekyo ta omutima aha ki orikubaasa kukora. Nk’eky’okureeberaho, noobaasa kugambira abandi ebirikukwata ahari Yehova, kushabira ab’eishe-emwe, kandi ohigye n’abandi kuguma bari abeesigwa. Yehova naagira ngu ori omukozi mugyenzi we, ti ahabw’okugira ngu noobaasa kukora bingi, beitu ahabw’okugira ngu oyeteekateekire kumworobera.​—1 Kor. 3:5-9.

19. Ebiri omu Abarooma 8:38, 39 nibituhamiza ki?

¹⁹ Ka twine okushemererwa kuramya Yehova, Ruhanga orikutwara abarikumuramya nk’ab’omuhendo! Akatuhanga kugira ngu tukore ebi arikukunda, kandi okuramya okw’amazima nikwo kurikutureetera kutunga okumarwa. (Kush. 4:11) N’obu ensi yaakuba neetureeba nk’abataine mugasho, Yehova tarikukwatwa nshoni ahabwaitu. (Heb. 11:16, 38) Twaba twine enaku ahabw’endwara, oburemeezi omu by’esente, nari ahabwa bukuru, ka tugume nitwijuka ngu tihaine ekirikubaasa kututaanisa na rukundo ya Tataitwe ow’omu iguru.​—Shoma Abarooma 8:38, 39.