Nkhani Yakupfunza 3
Imwepo Ndimwe Wakufunika kwa Yahova!
‘Iye adatikumbukira pomwe tikhanyazidwa.’—PSALYMO 136:23.
NYIMBO 33 Tulirani Yahova Thupo Lanu
BZOMWE TIN’PFUNZA *
1-2. Kodi ni mabvuto yaponi yomwe atumiki wa Yahova ambagumana nayo, ndipo iwo ambabziwona tani akagumana nayo?
KUMBUKIRANI mabvuto matatu aya: Lakuyamba, m’bale winango omwe ni tswaka auzidwa na dotolo kuti ana matenda makulu. Laciwiri, m’bale wa magole yakupitirira 50 omwe ambaphata basa na nyongo, waluza basalo, ndipo akucita ciri-centse kuti agumane linango, koma bzikumunesa. Lacitatu, mpfumakazi inango yakukhulupirika ikukwanisa lini kucita bzomwe ikhacita kale-kale, pa kutumikira Yahova thangwe ra kukalamba.
2 Penu imwepo mukugumana na mabvuto ninga yamweya, pinango mungabziwone kuti ndimwe lini wakufunika na pang’onopo. Mabvuto ninga yamweya yangakucitiseni kuleka kukhala wakukondwa, kuleka kubziwona kukhala wakufunika ndipo yangadzonge mbverano omwe ulipo pakati pa imwepo na winango.
3. Kodi n’ciyani comwe Sathani adacita kuna Eva comwe cikulatiza kuti iye ambalemekeza lini moyo, ndipo ni mbani omwe ambamutewezerambo?
3 Dzikoli likulatiza momwe Sathani ambawonera moyo. Kuyambira kale-kale, Sathani ambacita bzinthu bzomwe bzimbacitisa wanthu kubziwona kuti mbakusaya kufunika. Pakuti iye ngwakuipa basi, adauza Eva kuti angadakhala na ufulu bwakubzisankhulira bzinthu, angadaleka kubvera Mulungu, napo kuti Sathaniyo akhadziwa bwino kuti Evayo angadacita bzimwebzo, angadafa. Ndipo pakuti Sathani ndiye omwe akutsogolera nkhani za malonda, za ndale na za bzipembedzo bza m’dzikoli, mpsakudabwisa lini kuwona anyakucita malonda, wandale na atsogoleri wa bzipembedzo akucita bzinthu ninga momwe iye ambacitira, bzomwe bzimbalatiza kuti iwo ambalemekeza lini moyo ne wanthu anzawo.
4. Kodi nkhani ino in’fotokoza bzinthu bziponi?
4 Koma mwakusiyana na Sathani, Yahova an’funa kuti ifepano timbabziwone kuti ndife wakufunika ndipo iye ngwakukonzeka kutithandiza tikagumana na mabvuto. (Psalymo 136:23; Waroma 12:3) Nkhani ino in’fotokoza momwe Yahova ambatithandizira tikagumana mabvuto ninga aya: (1) Tikaduwala, (2) tikagumana na bvuto lakusaya kobiri, ndipo (3) tikakalamba ticiyamba kukumbuka kuti ndife lini pomwe wakufunika kwa Yahova. Tsono tikanati kuyamba kucezerana bza mabvutoya, mbatiwoneni bzomwe bzingatithandize kuwona kuti ali-wentse wa ifepano ngwakufunika kwene-kwene kwa Yahova.
IFEPANO NDIFE WAKUFUNIKA KWA YAHOVA
5. Kodi n’ciyani comwe cimbakuthandizani kuwona kuti wanthu mbakufunika kwa Yahova?
5 Napo ifepano tidalengedwa na pfumbi, koma kwa Yahova ndife wakufunika kwene-kwene kuposa pfumbiro. (Ciyambo 2:7) Kodi timbadziwa tani bzimwebzi? Timbadziwa thangwe rakuti Yahova adalenga wanthufe na luso lakuti timbatewezere makhalidwe yace. (Ciyambo 1:27) Mwakucita bzimwebzi, iye adaticitisa kukhala wakufunika kwene-kwene kuposa cakulengedwa ca moyo ciri-centse ca pano pa dziko la pantsi, ndipo adatipasambo udindo bwakusamalira dziko na bzirombo.—Psalymo 8:4-8.
6. Kodi ndiponi thangwe linango lomwe likulatiza kuti wanthu wakuperewerafe ndife wakufunika kwa Yahova?
6 Napo kuti Adamu adaphonya, Yahova akupitiriza kuwona wanthu kukhala wakufunika kwene-kwene. Kodi timbadziwa tani bzimwebzi? Timbadziwa thangwe rakuti Yahova adapereka Mwana wace wakufunidwa, Jezu ninga ntsembe kuti atilombole ku pikado zathu. (1 Juwau 4:9, 10) Ndipo thangwe ra ntsembeyo, Yahova an’dzalamusa wanthu omwe adafa thangwe ra pikado ya Adamu, ‘wakulungama na wakusaya kulungama.’ (Mabasa 24:15) Fala la Mulungu limbalatiza kuti ifepano ndife wakufunika kwa Yahova, bziribe basa penu tikuduwala, tidasauka ayai tidakalamba.—Mabasa 10:34, 35.
7. Kodi ni mathangwe yaponi yakulatiza kuti wanthufe ndife wakufunika kwene-kwene kwa Yahova?
7 Tina mathangwe yanango yakulatiza kuti wanthufe ndife wakufunika kwene-kwene kwa Yahova. Iye adatikwewa ndipo adawona momwe tidabvumira bzipsa bzabwino. (Juwau 6:44) Ndipo pomwe tidayamba kumufenderera Yahova, iye adatifendererambo. (Tiyago 4:8) Yahova ambalatizambo kuti ndife wakufunika, mwa kupambula nthawe yace na kucita nyongo kuti atipfunzise. Iye ambadziwa momwe ifepano tiriri na momwe tingadzakhalire kutsogolo. Ndipo iye ambatilanga thangwe ambatifuna. (Mimwani 3:11, 12) Bzimwebzi bzikulatiza kuti ifepano ndife wakufunika kwene-kwene kwa Yahova!
8. Kodi cinembo ca Psalymo 18:27-29, cingatithandize tani tikagumana na mabvuto?
8 Napo kuti wanthu winango akhawona Mambo Davide kukhala wakusaya kufunika, koma iye akhadziwa kuti Yahova akhamufuna ndipo akhamuthandiza. Kukhala na makumbukidwe yamweya, kudathandiza Davideyo kupirira mabvuto yomwe akhagumana nayo pa moyo wace. (2 Samuweri 16:5-7) Mpsibodzi-bodzimbo na ifepano, tikasunama ayai tikagumana na mabvuto, Yahova angatithandize kuwona bzinthu mwakusiyana na momwe tikubziwonera, na kupirira bvuto liri-lentse lomwe tingagumane nalo. (Werengani Psalymo 18:27-29. *) Na thandizo la Yahova, palibe comwe cingatitazise kumutumikira mwakukondwa. (Waroma 8:31) Tsapano mbatiwoneni mabvuto matatu yomwe yan’tithandiza kuwona kuti Yahova ambatifuna ndipo ambatiwona kuti ndife wakufunika kwene-kwene.
BZOMWE TINGACITE TIKADUWALA
Kuwerenga Bibliya kungatithandize kulimbana na makumbukidwe yakuipa yomwe yangabwere thangwe ra kuduwala (Onani ndime 9-12)
9. Kodi matenda yangatokonye tani makumbukidwe yathu?
9 Matenda yangatokonye kwene-kwene makumbukidwe yathu, ndipo tingafike pakubziwona kuti ndife lini wakufunika kwa munthu ali-wentse. Ndipo nthawe zinango tingacite manyazi tikadziwa kuti winango akuwona kuti tikutazira kucita bzinthu bzinango, ayai tikafuna kuti winango atithandize. Ndipo napo winango angadziwe lini kuti tikuduwala, pinango tingabzibve lini bwino tikawona kuti tikutazira kucita bzinthu bzinango bzomwe tikhacita kale-kale. Napo kuti bvutoli limbatisunamisa, Yahova ambatipasa mphanvu kuti tikwanise kupirira. Mwa njira iponi?
10. Mwakubverana na cinembo ca Mimwani 12:25, kodi n’ciyani comwe cingatithandize tikaduwala?
10 Tikaduwala, ‘mafala yabwino’ yangatitsangalaze. (Werengani Mimwani 12:25. *) Ndipo thangwe ra kudeka mtima, Yahova adaikha m’Bibliya mafala yabwino kuti yambatikumbuse kuti ifepano ndife wakufunika kwene-kwene kwa iye, napo tikaduwala. (Psalymo 31:19; 41:3) Tenepo, tikambawerenga Bibliya mwakubwereza-bwereza, Yahova an’dzatithandiza kulimbana na makumbukidwe yakuipa yomwe yangabwere tikaduwala.
11. Kodi Yahova adathandiza tani m’bale winango omwe akhaduwala?
11 Onani bzomwe bzidacitika na Jorge. Pomwe akhali tswaka, iye adaduwala matenda yomwe yakhalimba lini, tenepo, iye adayamba kubziwona kuti ngwakusaya kufunika. Jorge adati: “Inepano ndikhalibe kukonzekera momwe ningadalimbanira na makumbukidwe yomwe yangadabwera thangwe ra matendayo, ne manyazi na wanthu omwe angadandiwona momwe ndikhaliri. Ndipo pomwe matendayo yakhakula, ndikhandokumbukira kuti moyo wangu ungadacinja tani. Ndikhadziwa lini kuti ningadaphata muti wanyi, tenepo ndidadandaulira Yahova kuti andithandize.” Kodi Yahova adamuthandiza tani? Jorge adalewa kuti: “Pakuti bzikhandinesa kuikha makumbukidwe yangu pa bzomwe ndikhawerenga, ndidabzilimbisa kuti nimbawerenge kokha mavesi mang’ono-ng’ono ya bukhu la Psalymo, yomwe yambalewa momwe Yahova ambasamalirira atumiki wace. Ndipo ndikhawerenga mwakubwereza-bwereza mavesi mang’ono-ng’onoyo ntsiku iri-yentse, ndipo bzimwebzi bzikhanditsangalaza. Na kupita kwa nthawe, wanthu akhawona kuti ndikhakondwa kwene-kwene, mpaka adafika pakulewa kuti akhalimbisidwa na makhalidwe yangu yabwino. Bzimwebzi bzidandithandiza kuwona kuti Yahova akhatawira mipembo yangu! Iye adandithandiza kucinja momwe ndikhabziwonera. Ndipo ndidayamba kuikha makumbukidwe yangu pa bzomwe Bibliya limbalewa, maka-maka momwe Mulungu ambandiwonera napo ndikaduwala.”
12. Penu imwepo mukuduwala, kodi mungacite ciyani kuti Yahova akuthandizeni?
12 Penu imwepo mukuduwala, khalani na citsimikizo cakuti Yahova akudziwa bza matendayo. Tenepo, mukumbireni kuti akuthandizeni kumbawona bzinthu mu njira yakuthemera pa matendayo. Mukamala werengani m’Bibliya mafala yabwino yomwe Yahova adakunemberani kuti yakutsangalazeni. Ndipo ikhani makumbukidwe yanu pa mavesi yomwe yakulatiza momwe Yahova ambawonera mtumiki wace ali-wentse kukhala wakufunika. Mukacita bzimwebzi, mun’dzawona kuti Yahova ngwabwino kwa wentse omwe ambamutumikira mwakukhulupirika.—Psalymo 84:11.
BZOMWE TINGACITE TIKAKHALA NA BVUTO LA KOBIRI
Kukumbukira bzomwe Yahova adalewa kuti an’dzaticitira kutsogolo, kungatithandize bzikakhala bzikutinesa kugumana basa (Onani ndime 13-15)
13. Kodi msolo wa banja angabzibve tani akacosewa basa?
13 Msolo wa banja liri-lentse ambafuna kusamalira bzakusaya bza mkazace na wana wace. Tsono kumbukirani kuti m’bale omwe ali pa basa, wacosewa basalo, napo kuti iye alibe kuphonya na cinthuco. Tenepo, iye akuyezera kunyang’ana linango, koma akuligumana lini. Bzimwebzi bzingacitise m’baleyo kubziwona kuti ngwakusaya kufunika. Koma kukumbukira bzomwe Yahova an’dzacita kutsogoloku kungamuthandize kwene-kwene. Mwa njira iponi?
14. Thangwe ranyi Yahova ambacita bzentse bzomwe ambalewa?
14 Nthawe zentse Yahova ambacita bzomwe ambalewa. (Djosuwe 21:45; 23:14) Ndipo pana mathangwe mazinji yomwe yambamucitisa bzimwebzi. Thangwe lakuyamba, ndakuti bzomwe ambacitabzo bzimbatokonya dzina, ayai mbiri yace. Yahova adalewa kuti angadadzasamalira atumiki wace wakukhulupirika, ndipo iye ambacita ciri-centse kuti akwanirise bzomwe adalewabzo. (Psalymo 31:1-3) Kuthimizira bzimwebzi, Yahova ambadziwa kuti akasaya kutisamalira, ifepano tingasuname. Ndipo iye adalewa kuti an’dzatipasa bzinthu bzomwe timbafunikira kuti tikhale na moyo, na bzomwe timbafunikira kuti tipitirize kumutumikira mwakukhulupirika!—Mateu 6:30-33; 24:45.
15. (a) Kodi akristau wa m’magole dzana yakuyambirira adagumana na bvuto liponi? (b) Kodi mafala ya pa Psalymo 37:18, 19, yangatithandize tani?
15 Tikambakumbukira kuti Yahova ambacita bzentse bzomwe ambalewa, bzingatithandize kumukhulupira napo tikagumana na bvuto la kobiri. Kumbukirani bzomwe bzidacitika na akristau wa m’magole dzana yakuyambirira. Pomwe akristau wa ku Jeruzalemu adayamba kuzunziwa ‘wentse adabalalikira m’bzigawo bza Djudeya na Samariya, kupambula apostolo okha.’ (Mabasa 8:1) Kodi mukudziwa bzomwe bzidadzacitika? Iwo adagumana na bvuto la kobiri! Bzikuwoneka kuti akristau adaluza nyumba na mabasa yawo. Napo bzikhali tenepo, Yahova alibe kuwasiya, ndipo iwo adapitiriza kukhala wakukondwa. (Mabasa 8:4; Wahebereu 13:5, 6; Tiyago 1:2, 3) Tenepo, ninga momwe Yahova adathandizira akristau wakukhulupirika wa m’magole dzana yakuyambirira, iye an’dzatithandizambo.—Werengani Psalymo 37:18, 19. *
BZOMWE TINGACITE TIKAKALAMBA
Kuikha makumbukidwe yathu pa bzomwe tingakwanise kucita, napo takalamba, kungatithandize kuwona kuti Yahova ambawona ife na bzomwe timbacita pakumutumikira kukhala bzakufunika (Onani ndime 16-18)
16. Kodi n’ciyani comwe cingaticitise kubziwona kuti ndife lini pomwe wakufunika kwa Yahova?
16 Tikakalamba, pinango tingayambe kukumbuka kuti ndife lini pomwe wakufunika kwa Yahova. Pinangopentse Mambo Davide adakhala nayombo makumbukidwe ninga yamweya pomwe adakalamba. (Psalymo 71:9) Kodi Yahova angatithandize tani?
17. Kodi tikupfunza ciyani na bzomwe bzidacitika na mpfumakazi Jheri?
17 Onani bzomwe bzidacitika na mpfumakazi yakucemeredwa Jheri. Mpfumakaziyi ikhadacemerewa kuti iyende ku mtsonkhano wakupfunza bza kukonza-konza mbuto zakudzongeka pa Nyumba ya Umambo, koma ikhafuna lini kuyenda. Thangwe ranyi? Iyo idalewa kuti: “Ndine mkhalamba, ndine mansiwa, ndikudziwa lini kuti ningathandize tani pa basali ndipo ndine wakusaya kufunika.” Mtsonkhanoyo ukanati wacitika, Jheri adapemba kwa Yahova usiku kuti amuthandize. Mangwana yace, pomwe adafika pa Nyumba ya Umambo, iye adapitiriza kubzibvunza penu akhali wakuthemera kufika pa mtsonkhanoyo. Pomwe mtsonkhanoyo ukhacitika, mfotokozi m’bodzi adatsindika nfundo yakuti cinthu cakufunika kwene-kwene comwe tingakhale naco ni kufunisisa kupfunzisidwa na Yahova. Jheri adalewa na mu mtima kuti: “Inepano ndikufunisisa! Tenepo, ndidayamba kulira, thangwe ndidazindikira kuti Yahova watawira mpembo wangu. Ndipo Yahovayo akhanditsimikizira kuti ndina cinthu cakufunika comwe ningamupase nakuti iye akhali wakukonzeka kundipfunzisa!” Pakukumbukira bza ntsiku imweyi, Jheri adati: “Ndidafika pa mtsonkhano na thupo, wakusunama ndipo ndikhabziwona kuti ndine wakusaya kufunika. Ndipo pomwe mtsonkhanoyo udamala, ndidabzibva kukhala wakukonzeka, wakulimbisidwa na wakufunika kwene-kwene!”
18. Kodi Bibliya limbalatiza tani kuti Yahova angapitirize kutiphatisira basa, napo tikakalamba?
18 Yahova angapitirize kutiphatisira basa, napo tikakalamba. (Psalymo 92:12-15) Pinango mungakumbuke kuti bzomwe mumbacitira Yahova mpsing’ono-ng’ono. Tsono Jezu adatipfunzisa kuti kwa Yahova, bzentse bzomwe timbacita pakumutumikira mpsakufunika kwene-kwene. (Luka 21:2-4) Tenepo, mbaikhani makumbukidwe yanu pa bzomwe mungakwanise kucita. Mwa ciratizo, imwepo mungauze winango bza Yahova, kupembera abale na mpfumakazi zanu na kuwalimbisa kuti apitirize kutumikira mwakukhulupirika. Bzomwe bzimbacitisa Yahova kukuwonani kukhala anyabasa anzace, ni kumubvera komwe mungacite sikuti bzinthu bzomwe mungakwanise kucita.—1 Wakolinto 3:5-9.
19. Kodi cinembo ca Waroma 8:38, 39, cimbatitsimikizira ciyani?
19 Tikutenda kwene-kwene thangwe ra kunamata Yahova, Mulungu omwe ambawona mtumiki wace ali-wentse kukhala wakufunika! Iye adatilenga kuti timbacite kufuna kwace, ndipo kunamata kwacadidi kumbatikondwesa kwene-kwene pa moyo wathu. (Cibvumbulutso 4:11) Ndipo napo dziko litiwone kukhala wakusaya kufunika, koma kwa Yahova ndife wakufunika kwene-kwene. (Wahebereu 11:16, 38) Tenepo, bziribe basa penu tikuduwala, tina bvuto la kobiri ayai tidakalamba, tin’funika kukumbukira kuti palibe cinthu ciri-centse comwe cingatilekanise na lufoyi la Baba wathu wakudzulu.—Werengani Waroma 8:38, 39. *
^ ndi. 5 Kodi pa moyo wanu, mukugumana na bzinthu bzomwe bzikukucitisani kuwona kuti ndimwe lini wakufunika? Nkhani ino in’kuthandizani kuwona kuti kwa Yahova imwepo ndimwe wakufunika kwene-kwene. Ndipo in’kuthandizanimbo kuti mumbabziwone kukhala wakufunika, napo mukagumana na mabvuto pa moyo wanu.
^ ndi. 8 Psalymo 18:27 Imwepo mumbapulumusa wanthu wakutsautsika, koma mumbawenga wanthu wakubzikuza. 28 Pakuti ndimwe omwe mumbagasa ceza cangu, imwe Yahova, Mulungu wangu omwe mumbandibvunikira pa mdima. 29 Na thandizo lanu ningalimbane na thimu la akapondo; na mphanvu za Mulungu, ningakwanise kukwira litsito.
^ ndi. 10 Mimwani 12:25 Thupo limbalemeresa mtima wa munthu, tsono mafala yabwino yambakondwesa mtimayo.
^ ndi. 15 Psalymo 37:18 Yahova ambadziwa bzentse bzomwe bzimbacitikira anyakulungama, ndipo utaka bwawo bun’dzakhala mpaka kale-kale. 19 Iwo an’dzacita lini manyazi pa nthawe ya tsoka; pa nthawe ya njala iwo an’dzakhala na cakudya cizinji.
^ ndi. 19 Waroma 8:38 Pakuti ndikutsimikiza kuti ne infa, ne moyo, ne anjo, ne maboma, ne bzinthu bzomwe bziripo, ne bzinthu bzomwe bzikubwera, ne mphanvu 39 ne msinkhu, ne kuzika, ne cakulengedwa ciri-centse cin’dzakwanisa kutilekanisa na lufoyi la Mulungu lomwe liri mwa Kristu Jezu, Mbuya wathu.
NYIMBO 30 Baba Wangu, Mulungu Wangu na Xamwali Wangu
