1, 2. Хуцауи адӕнӕй беретӕ цӕхуӕн уавӕри бахаунцӕ ӕма сӕбӕл е куд рабӕрӕг уй?

НӔ ЦӔСТИТӔБӔЛ рауайун кӕнӕн ӕртӕ уавӕри. Ӕригон ӕнсувӕрмӕ уӕззау нез разиндтӕй ӕма бонӕй-бонмӕ ӕнӕхъаурӕдӕр кӕнуй. Еу 50 анземӕй фулдӕр кӕбӕл цӕуй, уӕхӕн ӕнсувӕр, бийнонти хестӕр, ӕ куст фесафта ӕма ӕндӕр куст ӕ бон иссерун нӕй. Ӕнзтӕ сӕ уӕзӕ кӕбӕл ӕруагътонцӕ, уӕхӕн еузӕрдон хуӕрӕ, ӕ ӕнзтӕмӕ гӕсгӕ лӕмӕгъдӕргӕнгӕ цӕуй ӕма раздӕр цӕйбӕрцӕ лӕггадӕ кодта, уойбӕрцӕ ӕ бон нӕбал ӕй.

² Кӕд аци уавӕртӕй дӕхе ескӕцими фӕууидтай, уӕд дӕмӕ, ӕвӕдзи, уотӕ кӕсуй, ӕма ди нецибал пайда ес. Уӕхӕн уавӕри адӕймаг ӕ цийнӕдзийнадӕ фесафуй, ӕхемӕ нецӕййаг ӕркӕсуй, ӕма е иннети хӕццӕ куд цӕруй, уобӕл дӕр рабӕрӕг уй.

3. Сайтан ӕма ӕ дӕлбарӕ ка ӕй, етӕ адӕймаги цардмӕ цӕхуӕн цӕстӕй кӕсунцӕ?

³ Аци дуйне дӕр адӕймаги цардмӕ Сайтани цӕстӕй кӕсуй. Уомӕ адӕни мӕтӕ некӕд адтӕй. Сайтан Евӕн сӕребарӕдзийнадӕй зӕрдӕ ку байвардта, уӕд ӕй хъӕбӕр хуарз лӕдӕрдтӕй, Хуцауи дзурди сӕрти ка рахеза, уомӕн ӕ кӕрон мӕлӕтмӕ ке цӕуй. Аци дуйней коммерци, политикӕ ӕма динтӕ алкӕддӕр Сайтани къохи адтӕнцӕ. Мадта дессаг дӕр нӕй, бизнесменти, политикти ӕма дини разамонгути цӕсти адӕймаги цард ке неци ӕй, е.

4. Аци статьяй цӕмӕ ӕркӕсдзиан?

⁴ Фал Йегови ба фӕндуй, цӕмӕй нӕхецӕн аргъ кӕнӕн, ӕма естӕй туххӕй нӕхемӕ нецӕййаг ку фӕккӕсӕн, уӕд нӕ бафедар кӕнуй (Пс. 136:23; Ром. 12:3). Аци статьяй базондзиан,  Йеговӕ нин куд фенхус кӕнуй: 1) уӕззау нези хӕццӕ ку фӕттох кӕнӕн, 2) ӕхцайӕй ку фӕттухсӕн, 3) ӕнзтӕ нӕбӕл сӕ уӕзӕ ке ӕруагътонцӕ, уой туххӕй Хуцауи гъуддаги нӕхемӕ ӕнӕпайда ку фӕккӕсӕн. Фиццаг бал ӕркӕсӕн, нӕ бон цӕмӕн ӕй федарӕй ӕууӕндун, Йеговӕ нин устур аргъ ке кӕнуй, уобӕл.

5. Адӕнӕн Йегови цӕсти устур аргъ ке ес, е ди цӕмӕн ӕруагӕс кӕнуй?

⁵ Кӕд зӕнхи ругӕй конд ан, уӕддӕр къохидзаг сикъитӕй ба хъазардӕр ан (Райд. 2:7). Ӕркӕсӕн, Йеговӕн хъазар ке ан, е цӕмӕй бӕрӕг ӕй, цалдӕр уӕхӕн гъуддагемӕ. Йеговӕ нӕ уотӕ ’скодта, цӕмӕй ӕй нӕ бон уа фӕнзун (Райд. 1:27). Уомӕ гӕсгӕ ба нӕ, зӕнхӕбӕл цидӕриддӕр сфӕлдиста, уонӕй уӕлдӕр исӕвардта ӕма нин зӕнхӕ, удта цӕрӕгойти нӕ барӕ бакодта (Пс. 8:4–8).

6. Йеговӕ ӕнӕнхӕст адӕнӕн ке аргъ кӕнуй, е ма цӕмӕй бӕрӕг ӕй?

⁶ Кӕд Адам фӕррӕдудӕй, уӕддӕр Йеговӕ адӕнӕн минкъийдӕр аргъ кӕнун нӕ райдӕдта. Ӕма е бӕрӕг ӕй, ӕ хъазар Фурти, Йесой, нӕ тӕрегъӕдти туххӕй ке равардта, уомӕй (1 Иоан. 4:9, 10). Киристей нивонди фӕрци, Йеговӕ райгас кӕндзӕй, Адами тӕрегъӕди туххӕй ка рамардӕй, уони, «рӕстгӕнгути дӕр ӕма фудгӕнгути дӕр» (Гъуд. 24:15). Библийӕй куд зиннуй, уомӕ гӕсгӕ ин хъӕбӕр хъазар ан, ӕма е нӕ карӕй, не ’нӕнездзийнадӕй ӕма нӕмӕ цӕйбӕрцӕ ӕхца ес, уомӕй кӕнгӕ нӕй (Гъуд. 10:34, 35).

7. Йеговӕ нин устур аргъ ке кӕнуй, уобӕл ма ӕ лӕггадгӕнгути бон цӕмӕн ӕй ӕууӕндун?

⁷ Йеговӕ нин устур аргъ ке кӕнуй, уомӕн ма берӕ ӕндӕр бӕрӕггӕнӕнтӕ ес. Е нӕмӕ е ’ргом раздахта, хуарз хабармӕ цӕхуӕн цӕстӕй ракастан, уой ку фӕууидта, уӕд (Иоан. 6:44). Хӕстӕг кӕнун имӕ ку райдӕдтан, уӕд нӕмӕ е дӕр ӕрбахӕстӕг ӕй (Иак. 4:8). Уомӕй уӕлдай ма Йеговӕ ӕ рӕстӕг ӕма ӕ хъауритӕ харз кӕнуй, цӕмӕй нӕ ахур кӕна, ӕма нин уотемӕй дӕр ӕвдесуй, аргъ нин ке кӕнуй, уой. Зонуй ӕй, нур цӕхуӕн ан ӕма цӕхуӕнттӕ нӕ бон ӕй исун, уой дӕр. Хатгай ба нин ӕ уарзондзийнадӕ бавдесуй, ке нӕ бараст кӕнуй, уомӕй (Ӕмб. 3:11, 12). Мадта бӕрӕг ӕй, Йегови цӕсти нин устур аргъ ке ес!

8. Псаломи 18:27–29 финст дзурдтӕ нин куд ӕнхус кӕнунцӕ нӕ зиндзийнӕдтӕмӕ раст цӕстӕй кӕсун?

⁸ Еуӕй-еуетӕ паддзах Давиди нецӕййаг лӕгбӕл нимадтонцӕ, фал ӕй е зудта, Йеговӕ ’й ке уарзуй ӕма ин ӕнхус ке кӕнуй, уой. Уой фӕрци ӕ бон адтӕй ӕ уавӕрмӕ раст цӕстӕй кӕсун (2 Сам. 16:5–7). Нӕхемӕ нецӕййаг ку фӕккӕсӕн кенӕ зиндзийнӕдтӕ ку февзарӕн, уӕд нин Йеговӕ банхус кӕнуй, цӕмӕй нӕ уавӕрмӕ ӕндӕр цӕстӕй ракӕсӕн ӕма уой фӕрци цийфӕнди зиндзийнӕдти сӕрти дӕр нӕ бон фӕууй рахезун. (Бакӕсӕ Псалом 18:27–29.) Йеговӕ нӕ ке федар кӕнуй, уой ку зонӕн, уӕд нӕ неци бахъор кӕндзӕй идарддӕр дӕр цийнӕгӕнгӕй лӕггадӕ кӕнунмӕ (Ром. 8:31). Мадта ӕркӕсӕн, цӕхуӕн ӕртӕ уавӕреми нӕ фӕгъгъӕуй уӕлдай хъӕбӕрдӕр нӕ зӕрдӕбӕл дарун, Йеговӕ нӕ ке уарзуй ӕма нин ке аргъ кӕнуй, уой.

9. Хатгай уӕззау нези туххӕй нӕхемӕ цӕхуӕн цӕстӕй фӕккӕсӕн?

⁹ Хатгай уӕззау нези туххӕй нӕ нифс басӕттуй ӕма нӕмӕ уотӕ фӕккӕсуй, цума ни нецибал пайда ес. Уомӕй уӕлдай ма ӕфсӕрми кӕнун дӕр райдайӕн, адӕн нӕмӕ ӕнахур каст ке кӕнунцӕ, уой ку балӕдӕрӕн кенӕ ба нӕ иннети ӕнхус ку багъӕуй, уӕд. Нӕ нези туххӕй нин ку неке фӕззонуй, уӕд дӕр тухсгӕ фӕккӕнӕн, уомӕн ӕма раздӕр цӕйбӕрцӕ кодтан, уойбӕрцӕ кӕнун нӕ бон нӕбал фӕууй. Уӕхӕн зин уавӕрти нӕ Йеговӕ бафедар кӕнуй. Кутемӕй?

10. Ӕмбесӕндти 12:25 куд финст ӕй, уомӕ гӕсгӕ нин нӕ нифс ци бафедар кӕндзӕй, уӕззау нези хӕццӕ ку тох кӕнӕн, уӕд?

 ¹⁰ Нези хӕццӕ ка тох кӕнуй, уӕхӕн адӕймагӕн «фӕлмӕн дзурд» ӕ нифс бафедар кӕнуй. (Бакӕсӕ Ӕмбесӕндтӕ 12:25.) Йеговӕ ӕ сугъдӕг хъаури разамундӕй Библий берӕ «фӕлмӕн дзурдтӕ» ниффинсун кодта ӕма нин етӕ нӕ зӕрдӕбӕл лӕуун кӕнунцӕ, цийфӕнди уавӕри ма уӕн, уӕддӕр ин хъазар ке ан (Пс. 31:19; 41:3). Ӕма сӕ арӕхдӕр ку кӕсӕн, уӕд нин Йеговӕ банхус кӕндзӕй, цӕмӕй нифссӕттӕн сагъӕстӕй исуӕгъдӕ уӕн.

11. Еу ӕнсувӕр Йегови ӕнхус ӕхебӕл куд бавзурста?

¹¹ Ӕркӕсӕн Хорхей хабармӕ. Ӕригон ма ку адтӕй, уӕд фӕссӕйгӕ ’й, ӕнӕхъаурӕ кӕмӕй кодта, уӕхӕн незӕй. Уой туххӕй ӕхемӕ хъӕбӕр ӕнӕпайда кастӕй. «Еци нези туххӕй мӕ нифс уотӕ ке басӕтдзӕй, уой ӕнгъӕл н’ адтӕн,– зӕгъуй Хорхе,– ӕма мӕмӕ иннетӕ ке кӕсиуонцӕ, уомӕй хъӕбӕр ӕфсӕрми кодтон. Мӕ уавӕр фуддӕрӕй-фуддӕр кодта ӕма мӕ цард идарддӕр куд уодзӕй, уобӕл тухстӕн. Мӕ нифс хъӕбӕр басастӕй ӕма Йеговӕн лигъстӕ кодтон, цӕмӕй мин банхус кодтайдӕ». Цума ин Йеговӕ куд банхус кодта? Хорхе зӕгъуй: «Берӕ ӕма лӕмбунӕг сагъӕс кӕнун мӕ бон ке н’ адтӕй, уомӕ гӕсгӕ мин загътонцӕ, цӕмӕй Псаломти киунугӕй цубур скъуддзӕгтӕ кастайнӕ. Еци скъуддзӕгти финст адтӕй, Йеговӕ ӕ лӕггадгӕнгутӕбӕл куд тухсуй, е. Еци цалдӕр стихи алли бон дӕр кӕсинӕ ӕма мӕхецӕн уодӕнцойнӕ ирдтон. Рӕстӕг цудӕй ӕма мин мӕ медбилти худт адӕн арӕхдӕр уинун райдӕдтонцӕ. Уотӕ дӕр ма мин фӕззӕгъиуонцӕ, дӕумӕ кӕсгӕй, дан, мах дӕр бафедар уӕн. Йеговӕ мин ӕцӕгӕйдӕр мӕ кувд фегъуста! Е мин банхус кодта мӕхемӕ ӕндӕр цӕстӕй ракӕсун. Библий фӕрци ӕй балӕдӕрдтӕн, Хуцау мӕмӕ цӕхуӕн цӕстӕй кӕсуй, уой».

12. Нези хӕццӕ тох кӕнгӕй нӕ бон куд ӕй Йегови ӕнхус нӕхебӕл бавзарун?

 ¹² Кӕд ду дӕр нези хӕццӕ тох кӕнис, уӕд ӕй федарӕй зонӕ, Йеговӕ дин дӕ уавӕр хъӕбӕр хуарз лӕдӕруй. Мадта имӕ ковӕ, цӕмӕй дин банхус кӕна дӕ уавӕрмӕ раст цӕстӕй кӕсун. Удта Библий агорӕ, Йеговӕ ци нифсфедаргӕнӕн дзурдтӕ загъта, уони. Дӕ гъос дарӕ, ӕ лӕггадгӕнгутӕн цӕхуӕн устур аргъ кӕнуй, е ци стихтӕй зиннуй, уонӕмӕ. Гъе уӕд ӕй фӕууиндзӕнӕ, Йеговӕ, еузӕрдонӕй ин ка лӕггадӕ кӕнуй, уонӕй алкӕмӕдӕр хӕларзӕрдӕ ке ӕй, уой (Пс. 84:11).

13. Бийнонти хестӕр ӕ куст ку фесафуй, уӕд имӕ цӕхуӕн сагъӕстӕ фӕззиннуй?

¹³ Бийнонти хестӕртӕй алкедӕр фӕндуй, цӕмӕй сӕ бийнонтӕ маци гъӕуагӕ уонцӕ. Фал, зӕгъӕн, ӕнсувӕр ӕ куст фесафта, лӕгъузӕй неци ракодта, уотемӕй. Ӕндӕр куст иссерунбӕл дӕр бӕргӕ архайуй, фал неци еруй. Уӕхӕн уавӕри гӕнӕн ес, ӕма ӕхемӕ нецӕййаг ӕркӕса. Цума ин Йеговӕ зӕрдӕ цӕмӕй байвардта, уой ку нӕ иронх кӕна, уӕд ин е куд банхус кӕндзӕй?

14. Йеговӕ ӕ зӕрдӕвӕрдтӕ алкӕддӕр цӕмӕн исӕнхӕст кӕнуй?

¹⁴ Йеговӕ зӕрдӕ цӕмӕй байвӕруй, уой алкӕддӕр исӕнхӕст кӕнуй (Йес. Н. 21:45; 23:14). Цума цӕмӕн? Фиццагидӕр уомӕн, ӕма ӕ хуарз номбӕл тухсуй. Йеговӕ зӕрдӕ байвардта ӕ еузӕрдон лӕггадгӕнгутӕбӕл ке тухсдзӕй ӕма ӕхе ихӕсгинбӕл нимайуй (Пс. 31:1–3). Уомӕй уӕлдай ма ’й Йеговӕ зонуй, ӕ дзурд ку не ’сӕнхӕст кӕна ӕма ӕ бийнонтӕй ка ӕй, уонӕн ку нӕ банхус кӕна, уӕд сӕ ке фӕффудӕнгъӕл кӕндзӕй. Йеговӕ нин зӕрдӕ ӕвӕруй, царди нӕ ӕнӕмӕнгӕй ци гъӕуй, е, удта нӕ еузӕрдонӕй лӕггадӕ кӕнунмӕ ци гъуӕй, е дӕр нин ке уодзӕй ӕма ’й ӕ дзурд исӕнхӕст кӕнунмӕ неци бахъор кӕндзӕй (Матф. 6:30–33; 24:45).

15. а) Фиццаг ӕноси киристӕнттӕ цӕхуӕн уавӕри бахаудтӕнцӕ? б) Псаломи 37:18, 19 финст дзурдтӕ нин цӕбӕл дзорӕг ӕнцӕ?

 ¹⁵ Йеговӕ ӕ зӕрдӕвӕрдтӕ цӕмӕн исӕнхӕст кӕнуй, уой ку нӕ иронх кӕнӕн, уӕд ӕй федарӕй зондзиан, ӕнӕ нецӕмӕй ку байзайӕн, уӕд дӕр нӕ Йеговӕ ке нӕ ниууадздзӕй. Ӕркӕсӕн фиццаг ӕноси киристӕнтти хабармӕ. Йерусалими ӕмбурд карзӕй ӕфхуӕрун ку райдӕдтонцӕ, уӕд апостолтӕй уӕлдай «ахуркӕнуйнӕгтӕ еугурӕйдӕр... ниппурхӕ ’нцӕ» (Гъуд. 8:1). Расагъӕс кӕнӕ, цӕхуӕн тухст уавӕри бахаудтӕнцӕ. Ӕвӕдзи, ӕнӕ хӕдзарӕ ӕма ӕнӕ кустӕй байзадӕнцӕ. Фал сӕ Йеговӕ нӕ ниууагъта ӕма сӕ цийнӕдзийнадӕ дӕр нӕ фесафтонцӕ (Гъуд. 8:4; Дзиуит. 13:5, 6; Иак. 1:2, 3). Йеговӕ еци еузӕрдон киристӕнттӕн ӕнхус кодта ӕма махӕн дӕр ӕнхус кӕндзӕй. (Бакӕсӕ Псалом 37:18, 19.)

16. Кӕд нӕмӕ райдайуй уотӕ кӕсун, ӕма Йеговӕн нецибал пайда ан?

¹⁶ Ӕнзтӕ нӕбӕл сӕ уӕзӕ ку ӕруадзунцӕ, уӕд нӕмӕ уотӕ кӕсун райдайуй, цума Йеговӕн нецибал пайда ан. Паддзах Давидмӕ дӕр, ӕвӕдзи, уӕхӕн сагъӕстӕ фӕззиндтӕй, ку базӕронд ӕй, уӕд (Пс. 71:9). Цума нин Йегови бон куд ӕй банхус кӕнун?

17. Джерий хабарӕй цӕбӕл ахур кӕнӕн?

¹⁷ Ӕркӕсӕн, хуӕрӕ Джерий хабармӕ. Джерий фӕххудтонцӕ, нӕ лӕггади кӕмӕй фӕппайда кӕнӕн, еци бунӕттӕмӕ зелун куд гъӕуй, уобӕл кӕми ахур кодтонцӕ, уӕхӕн фембӕлдмӕ. Фал ӕй нӕ фӕндадтӕй уордӕмӕ цӕун. Джери дзурдта: «Ӕз зӕронд, идӕдзӕ силгоймаг дӕн. Удта уӕхӕн куститӕмӕ дӕр нӕ арӕхсун. Ӕз ма си цӕмӕн гъӕун?» Фембӕлди размӕ, еци изӕр Джери Йеговӕн радзурдта, ӕ зӕрди ци адтӕй ӕма цӕбӕл тухстӕй, уой. Дуккаг бон фембӕлдмӕ ку цудӕй, уӕддӕр си нӕма ӕруагӕс кодта, ӕцӕгӕйдӕр  си ке гъӕуй, е. Программи рӕстӕг ӕнсувӕртӕй сӕ еу уӕхӕн гъуди загъта, зӕгъгӕ, дан, сӕйрагидӕр гъӕуама дӕсни уӕн Йеговӕй ахур кӕнунмӕ. Джери зӕгъуй: «Гъуди кӕнун уотӕ ке расагъӕс кодтон: „Уомӕ ба ма хуарз арӕхсун!“ Гъема мӕ зӕрдӕ рахъурмӕ ’й, уомӕн ӕма ’й балӕдӕрдтӕн, Йеговӕ мин мӕ кувдбӕл дзуапп ке равардта. Ба мин ӕй лӕдӕрун кодта, мӕн бон дӕр цидӕр пайда ӕрхӕссун ке ӕй ӕма ’й мӕн ахур кӕнун дӕр ке фӕндуй!» Джери ма ӕ дзурдтӕбӕл бафтудта: «Еци фембӕлдмӕ хъӕбӕр ӕнкъард, мӕстгун ӕма нифссастӕй цудтӕн, фал мӕбӕл фембӕлди фӕсте ба базуртӕ базадӕй, уомӕн ӕма ’й балӕдӕрдтӕн аргъ мин ке ес!»

18. Библи нин куд ӕвдесуй, Йеговӕ нӕ лӕггадӕн устур аргъ ке кӕнуй, кӕд бонӕй-бонмӕ зӕронддӕргӕнгӕ цӕуӕн, уӕддӕр?

¹⁸ Нӕ бон ӕй федарӕй ӕууӕндун, цийфӕнди кари ма уӕн, уӕддӕр нин Йеговӕ куст иссердзӕй (Пс. 92:12–15). Йесо куд дзурдта, уомӕ гӕсгӕ дӕр, цийфӕнди уавӕри ма уӕн кенӕ нӕ хъиамӕттӕ цийфӕнди минкъий ма зиннонцӕ, уӕддӕр, нӕ лӕггади ци кӕнӕн, уомӕн Йегови цӕсти устур аргъ ес (Лук. 21:2–4). Мадта фиццагидӕр сагъӕс кӕнӕ, дӕ бон ци ӕй кӕнун, уобӕл. Зӕгъӕн, дӕ бон ӕй иннетӕн Йегови туххӕй дзорун, хуӕртӕ ӕма ӕнсувӕрти туххӕй ковун ӕма сӕ разӕнгард кӕнун, цӕмӕй идарддӕр дӕр Йеговӕн еузӕрдонӕй лӕггадӕ кӕнонцӕ. Йеговӕ дӕ е ’мкосӕгбӕл нимайуй, дӕ бон ин цидӕр раттун ке ӕй, уой туххӕй нӕ, фал имӕ игъосгӕ ке кӕнис, уой туххӕй (1 Кор. 3:5–9).

19. Ромӕгтӕмӕ 8:38, 39 финст дзурдтӕ нин цӕхуӕн нифс дӕттунцӕ?

¹⁹ Йеговӕ ӕ еузӕрдон лӕггадгӕнгутӕн ӕцӕгӕйдӕр аргъ кӕнуй ӕма уӕхӕн Хуцауӕн ке лӕггадӕ кӕнӕн, уой туххӕй хъӕбӕр амондгун ан! Махӕн нӕ конд дӕр уотӕ ’й, цӕмӕй Йегови фӕндон ӕнхӕст кӕнӕн, ӕма нин е цийнӕдзийнадӕ хӕсса (Рарг. 4:11). Аци дуйней нӕ гӕнӕн ес, ӕма нецӕййаг адӕнбӕл нимайонцӕ, фал ни Йеговӕ ӕфсӕрми нӕ кӕнуй (Дзиуит. 11:16, 38). Мадта естӕй туххӕй нифссаст ку уӕн, зӕгъӕн, сӕйгӕ ке ан, ӕхцайӕй ке нӕ хъӕртӕн кенӕ нӕбӕл ӕнзтӕ сӕ уӕзӕ ке ӕруагътонцӕ, уой туххӕй, уӕд гъӕуама нӕ зӕрдӕбӕл дарӕн, нӕ уӕларвон Фиди уарзтӕй нӕ ке неци рахецӕн кӕндзӕй. (Бакӕсӕ Ромӕгтӕмӕ 8:38, 39.)