1-2. Ndaga jitshi akombeledi avula a Yehowa ana tagana najio, nu jiana guatuma ha gudivu gikuatshi?

TUTADILE ifezegeselo eyi thathu yalandula: Minganga yawambela muvuala mungoshi wa yala egi udi nu misongo yakola diago. Phangi mumoshi udi nu ivo 50 wakatudiwa gu midimo; ngatshima udi mutshita ngolo ha guheta mudimo uko uvi gashigo guwuheta. Phangi mungoshi wa mukhetu wa gukola, gashigo luko nu ngolo jia gutshitshila Yehowa gifua luholo gakhalele gumutshitshila thomo.

² Gula udi mutagana nu ndaga imoshi gifua eyi tuazuelela haha, wajiya gudivua gifua ushigo nu ndando. Ndaga jia luholo elu jiajiya gugukatula gusuanguluga, jiajiya gugulebesa muila, nga gubolesa ufuta waye nu athu ako.

3. Luholo lutshi Satana nu athu enji ana tadila monyo wa athu?

³ Mavu awa adi mumonesa matangi Satana gakhala nawo mukunda nu lujingu lua athu. Satana wana kalegela athu ndaga gifua ashigo nu ndando. Wawambelele Eve egi mbawukhala mu guhuima, uvi wakhalele mujiya muabonga egi, gulumbugila Nzambi mbagubatela Eva gufua. Satana wana tuameza ndaga jia mungenda, ndaga jia politiki, nu ikombelelo ya ha mavu awa. Hene, tuajiyilego gudihula gula mafumu a midimo, nu enya politiki nu mafumu a mangumba ashigo munemesa monyo wa athu ako.

4. Itshi tuza muzuelela mu longo edi?

⁴ Yehowa wana tshigina egi tukhale muabonga, nu wana gutukuatesa  tangua tuana tagana nu malamba ajiya gutulebesa. (Ngi. 136:23; Lomo 12:3) Longo edi diza muzuelela luholo Yehowa wajiya gutukuatesa mu ndaga eji jialandula: (1) Gula misongo yakola yatukuata, (2) gula tuatagana nu lamba dia mbongo, nu (3) gula tuakola nu tudi mutangiza egi tushigo luko nu gima gia ndando gia gutshita mu mudimo wa Yehowa. Tukambenu gujiya thomo, mukunda natshi tudi naye guhaga mutshima egi, mukut’etu agasue tudi nu ndando gu meso a Yehowa.

5. Ndaga jitshi jidi mumonesa egi athu akhala nu ndando gu meso a Yehowa?

⁵ Ngatshima tuafugiwe nu fuluguta dia mavu, tuakhala nu ndando yavula gubalega mavu. (Gis. 2:7) Tutadilenu ndaga jiana monesa egi tuana khala nu ndando gu meso a Yehowa. Wafugile athu nu ndunge jia gulandula makalegelo enji. (Gis. 1:27) Ha tshitshile muene ngenyi, watuhanele ndando yavula gubalega ima yagasue ha mavu, watuhanele nji ginemo gia gubamba mavu nu jishitu.—Ngi. 8:4-8.

6. Ndaga tshi iko idi gutujiyisa egi Yehowa wana gutuzula nu ndando ngatshima tushigo athu atagana?

⁶ Adama wakalegele gubola, uvi Yehowa walanduile guzula athu nu ndando. Wana tuzula nu ndando yavula hene gatumine Mun’enji wa guzumba, Yesu, ha guza mufua mukunda nu gubola guetu. (1 Yone 4:9, 10) Mu njila ya mulambu wa Yesu, Yehowa mbawufuzumuna ‘athu abonga nu abola’ anyi afile mukunda nu gubola gua Adama. (Makal. 24:15) Mbimbi yenji yana gumonesa egi tuakhala nu ndando yavula gudi Yehowa ngatshima tudi nu misongo yakola, tudi nu lamba dia mbongo nga gula tuakola.—Makal. 10:34, 35.

7. Ndaga jitshi jiko jiana tshiginyisa akombeledi a Nzambi egi Yehowa wana guazula nu ndando?

⁷ Tudi nu ndaga jiko jidi gututuma ha guzuela egi Yehowa wana gutuzula nu ndando. Wana gutunana gudi muene, nu wana kamba gujiya gula tudi musuanguluga nu lukuma luabonga nga ndo. (Yone 6:44) Gula tuasuena hehi n’enji, muene nji wana suena hehi nu esue. (Yak. 4:8) Yehowa wana zula tangua diavula nu wana tshita ngolo ha gutulongesa, ha gumonegesa egi wana gutuzula nu ndando. Wana jiya gula tudi athu a luholo lutshi mangino, nu gula tuajiya gubua athu a luholo lutshi mu masugu adi muza. Wana gutuhana disipline handaga watuzumba. (Ish. 3:11, 12) Ndaga eyi idi diago mumonesa egi Yehowa wana gutuzula nu ndando!

8. Luholo lutshi mbimbi jidi mu Ngimbo 18:27-29 jiana gututuma ha gutadila malamba etu mu luholo luko?

⁸ Athu ako akhalele mumona Fumu Davidi gifua muthu wa gituhu, uvi muene wakhalele mujiya egi Yehowa wamuzumba nu wana gumukuatesa. Gujiya ngenyi guamukuatesele ha gukolesela mu malamba nu matangi a bonga. (2 Sam. 16:5-7) Gula tuatagana nu malamba, Yehowa wajiya gutukuatesa ha gutadila malamba ene mu luholo luko, nu wajiya gutukuatesa ha gubinga malamba ene agasue. (Tanga Ngimbo 18:27-29.) Gula tudi nu ukuateshi wa Yehowa, gushigo nga gima giajiya gutukanga njila ha gumukombelela nu gusuanguluga. (Lomo 8:31) Henyaha, tutadilenu ndaga thathu jidi gututuma ha gujiya egi Yehowa wana gutuzula nu ndando.

9. Luholo lutshi tuana gudivua gula tudi nu ukhashi?

⁹ Misongo yajiya gutuhana gikenene, nu yajiya gututuma ha gudimona gifua tuakhalago luko nu ndando. Tuajiya guvua musonyi gula athu ako ajiya egi tudi nu ukhashi, nga tangua tudi gifua ginemo mukunda nu athu ako. Ngatshima athu ako ashigo mujiya egi tudi nu ukhashi, tuajiya gukhala nu musonyi handaga  tuajiyilego luko gutshita ndaga tuakhalele mutshita. Yehowa wana gutuhana gikhesa mu matangua awa a lamba. Luholo lutshi?

10. Ha gutadila Ishima 12:25, itshi yajiya gutukuatesa tangua tudi mukata?

¹⁰ Gula tudi mukata, ‘mbimbi yabonga’ yajiya gutuhana gikhesa. (Tanga Ishima 12:25.) Mu Biblia, Yehowa wafundile mbimbi jiabonga jiana gutumonegesa egi tudi nu ndando gu meso enji ngatshima tudi mukata. (Ngi. 31:19; 41:3) Gula tudi mutanga Biblia tangua diagasue, Yehowa mbawutukuatesa ha gulua nu gikenene tudi muvua mukunda nu misongo.

11. Luholo lutshi Yehowa gakuatesele phangi mumoshi wa yala?

¹¹ Tutadile gifezegeselo gia Jorge. Hakhalele muene muvuala, wakatele misongo yakola, misongo yene yamutumine ha gudimona gifua gashigo luko nu ndando. Udi muzuela egi: “Ngakhalelego mujiya egi misongo yami yajiya gungubuisa ngegi, yakhalele gunguhana musonyi tangua athu akhalele gungutala. Tangua misongo yadivudishile, ngakhalele gudihula luholo lujingu luami mbalusombegesa. Ngakhalele gudisagesa muavula, nu ngatogele Yehowa ukuateshi.” Luholo ltshi Yehowa wamukuatesele? Udi muzuela luko egi: “Handaga ngakhalelego luko nu ngolo, angudijigile ha gutanga phamba verse jiazonda jia mukanda wa Ngimbo jidi mumonesa egi, Yehowa wana bamba akombeledi enji. Ngakhalele mutanga verse jiene jiazonda lusugu nu lusugu, nu jianguhanele diago ngolo. Gungima, athu ako asendesele gumona egi ngakhalele mu lela muavula. Akhalele muzuela egi gusuanguluga guami guakhalele guahana gikhesa. Ngajiyile diago egi Yehowa wahanele mvutu gu isambu yami! Wangukuatesele ha gusombegesa luholo ngakhalele guditadila hakhami. Ngasendesele guhaga matangi ami gu  ndaga Biblia yana zuela, handaga yana monesa luholo Yehowa gana gungutadila ngatshima ngudi mukata.”

12. Luholo lutshi wajiya guheta ukuateshi wa Yehowa gula udi mukata?

¹² Gula udi mukata, jiya egi Yehowa yowu mujiya luholo udi gudivua. Mutoge ukuateshi, hagula ukotelese muabonga ndaga idi gugubuila. Gungima, kamba mbimbi jiabonga Yehowa gafundile mu Biblia ha guguhana gikhesa. Kamba muavula verse jinyi jiana monesa egi Yehowa wana zula akombeledi enji nu ndando. Gula watshita ngenyi, mbawumona egi Yehowa wakhala wabonga mukunda nu akombeledi enji agasue a gujinginyina.—Ngi. 84:11.

13. Tata wajiya gudivua gikuatshi gula watotesa mudimo?

¹³ Tata wagasue udi naye guhana fami yenji ima adi nayo funu ha gujingila. Tangiza gale egi, phangi mumoshi wakatudiwa gu mudimo, ngatshima ngatshitshilego gima giabola. Phangi muene udi mutshita ngolo ha guheta mudimo uko uvi guheta ndo. Ndaga ya luholo elu yajiya gumulebesa muila. Luholo lutshi gusha mutshima gu mafelela a Yehowa guajiya gumukuatesa?

14. Mukunda natshi Yehowa gana tagenesa malaji enji?

¹⁴ Yehowa wana tagenesa malaji enji tangua diagasue. (Yosh. 21:45; 23:14) Gudi nu ndaga jiavula jiana gumutuma ha gutshita ngenyi. Ya thomo, idi mukunda nu jina dienji nu lukuma luenji. Yehowa wazuelele egi mbawukuatesa akombeledi enji, nu wana khala hehi ha gutagenesa felela dienji. (Ngi. 31:1-3) Luko, Yehowa wana jiya egi, tuana guvua gikenene giavula gula muene gatukuateselego esue enya fami yenji. Watulayele egi mbawutuhana ima tudi naye funu mu muila nu mu nyuma, nu  gushigo nga muthu wajiya gumukanga njila ha gutagenesa laji dienji!—Mat. 6:30-33; 24:45.

15. (a) Lamba tshi Aklisto a mu siekle ya thomo atagenele nadio? (b) Mukanda wa Ngimbo 37:18, 19 udi gutukuatesa ha gutshigina itshi?

¹⁵ Gula tuajiya gishina Yehowa gana tagenesa malaji enji, tuajiya diago gulua nu lamba dia mbongo mu luholo luabonga. Tutadile gifezegeselo gia Aklisto a mu siekle ya thomo. Tangua atagenele nu usageshi wakola gu Yelusalema, ‘alandudi agasue amuangegenele phamba apostolo asalele.’ (Makal. 8:1) Lamba ditshi ndaga yene yabatele? Lamba dia mbongo! Aklisto atotesele jinzo jiawo nu midimo yawo. Ngatshima akhalelego nu gusuanguluga, uvi Yehowa gaabembele ndo. (Makal. 8:4; Heb. 13:5, 6; Yak. 1:2, 3) Yehowa wakuatesele Aklisto awa a gujinginyina, esue nji mbawutukuatesa.—Tanga Ngimbo 37:18, 19.

16. Itshi yajiya gututuma ha gudihula gula Yehowa wana zula gikombelelo gietu nu ndando?

¹⁶ Gula tuakola, tuajiya gusendesa gudivua gifua tushigo luko nu ima yavula ya guhana Yehowa. Fumu Davidi nji wadivile ngenyi tangua diakolele muene. (Ngi. 71:9) Luholo lutshi Yehowa gajiya gutukuatesa?

17. Malongo tshi tuajiya guzula mu eksperianse ya phangi Jheri?

¹⁷ Tutadilenu gifezegeselo gia phangi wa mukhetu mu jina dia Jheri. Watamegewe gu Inzo ya Ufumu ha guzula formasio ya gulondega Jinzo jia Ufumu, uvi watunyile genji. Udi muzuela egi: “Ngudi muthu wa gukola, nu ngudi mukhetu wa gafunda, ngushigo mujiya nga gima ngajiya gutshita ha gukalagala mudimo wene. Ngushigo nu ndando nga hazonda.” Gutuama dia guya gu formasio yene, wasambele Yehowa nu mutshima umoshi mu phipha. Lusugu lua landuile, wayile gu Inzo ya  Ufumu nu wakhalele gudihula gula itshi gaya mutshita guene. Tangua gayile guene, phangi wa yala wakhalele guahana formasio wazuelele egi ndaga ya ndando tudi naye gutshita idi gubemba egi Yehowa atulongese. Jheri udi muzuela egi: “Ngatangijile egi, ‘Ngudi naye gubemba Yehowa angulongese!’ Ngasendesele gudila tangua ngamonele egi Yehowa wahana mvutu gu isambu yami. Wangutshiginyishile diago egi ngudi nu gima gia ndando ngajiya gumuhana, muene udi hehi ha gungulongesa!” Jheri udi muzuela luko egi: “Tangua nganginyile mu formasio yene, ngakhalele nu woma, muila wa guleba. Uvi tangua ngazogele, ngakhalele nu ngolo nu gikhesa, ngadivile nji nu ndando!”

18. Luholo lutshi Biblia idi gutumonesa egi Yehowa wana landula guzula gikombelelo gietu nu ndando ngatshima tuakola?

¹⁸ Ngatshima tuakola, tudi naye gujiya egi Yehowa gana gutujimbila ndo, wana gutuhana mudimo wa gutshita. (Ngi. 92:12-15) Yesu watulongele egi ngatshima tudi mutangiza egi ndaga tudi mutshita jishigo nu ndando, uvi Yehowa wana gujizula nu ndando yavula. (Luka 21:2-4) Hene, haga matangi aye gu ndaga udi mutshita. Wajiya gulongesa athu ndaga jiatadila Yehowa, wajiya gusamba mukunda nu athu ako, nga guhana athu ako gikhesa ha gusala ya gujinginyina. Yehowa gana gugumona ndo egi udi futa dienji dia mudimo mukunda nu ndaga wana gutshita, uvi idi mukunda nu luholo wana gumutumagela.—1 Kol. 3:5-9.

19. Ndaga jitshi mukanda wa Lomo 8:38, 39 udi gututshiginyisa?

¹⁹ Tudi nu gusuanguluga guavula ha gukombelela Yehowa, Nzambi yonu wana zula akombeledi enji nu ndando! Watufugile ha gutshita gutshigina guenji, nu idi yadiago egi gumukombelela guana gutusuanguluisa muavula diago. (Yat. 4:11) Enya ha mavu awa ajiya gutumona gifua tushigo nu ndando, uvi Yehowa wana gutuzula nu ndando. (Heb. 11:16, 38) Gula tualeba muila mukunda nu misongo, lamba dia mbongo, nga gukola, tujimbilago egi, gushigo nga gima giajiya gutukhaphumuna nu guzumba guana gutuzumba Sh’etu wa mu dilu.—Tanga Lomo 8:38, 39.