1, 2. 1) ¿Ima llakiykunasniyojtaj wakin hermanos kanku? 2) Llakiykunasniyoj kaspa, ¿imaynataj kasunman?

KINSA hermanospi piensarina. Uj joven hermanoman doctor willan sinchʼi onqoyniyoj kasqanta, chay onqoytaj kallpanta pisimanta pisi tukuchinanta. Waj hermanotataj sumajta trabajajtinpis, trabajonmanta wijchʼunku, manataj waj trabajota tarikuyta atinchu. Paytaj 50 kuraj watasniyojña. Waj hermanataj viejitaña kasqanrayku, Jehová Diospaj pisillataña llankʼasqanta yuyan.

² Chay jina llakiykunasniyoj kanchej chayqa, ichapis niña imapaj valesqanchejta yuyanchej. Chay jina llakiykunaqa, kusiyninchejta qhechuwasunman, pisipaj qhawakunanchejpaj tanqawasunman, wajkunamantataj karunchawasunman.

3. Satanaswan paypa makinpi kajkunawan, ¿imaynatá runasta qhawanku?

³ Kay mundomanta runasqa, wajkunata Satanás jina pisipaj qhawanku. Satanaspajqa ni imapaj valenchejchu. Payqa yacharqa Eva Jehová Diosta mana kasukojtin wañunanta. Jinapis sajra kasqanrayku, Evaman nerqa: “Sapallaykimanta aswan allinta kausanki”, nispa. Kay mundomanta religiones, gobiernos, jatuchaj negociospis, Diabloj makinpi kashanku. Chayrayku negocioyoj kajkuna, políticos, religionesta kamachejkunapis, runasta pisipaj qhawanku, nitaj paykunamanta llakikunkuchu.

4. ¿Imatataj kay yachaqanapi yachakusun?

⁴ Jehová Diosninchejqa mana munanchu pisipaj qhawakunanchejta. Ima llakiyllapis mana imapaj valesqanchejta yuyachiwanchej chayqa, pay yanapariwanchej (Sal. 136:23; Rom. 12:3). Chayrayku kay yachaqanapeqa, imaynatachus kay llakiykunapi yanapawasqanchejta yachakusun: onqosqa kajtinchej, qolqe mana kapuwajtinchej, viejitosña kasqanchejrayku Jehovapaj niña sirvisqanchejta yuyajtinchej ima. Jinapis,  ¿imaraykutaj Jehová Diospaj mayta valesqanchejta creesunman? Chayta qhepan parrafospi yachakusun.

5. ¿Imaraykutaj Jehová Diospaj mayta valesqanchejta creesunman?

⁵ Jehová Dios ñutʼu jallpʼamanta ruwawajtinchejpis, paypajqa mayta valenchej (Gén. 2:7). ¿Imaraykutaj creesunman Jehová Diospaj mayta valesqanchejta? Ñaupajtaqa payman rijchʼakojta ruwawasqanchejrayku (Gén. 1:27). Payqa jallpʼapi tukuy ima ruwasqanmanta aswan patapi churawarqanchej. Chantapis jallpʼata, animalesta ima makisninchejman churarqa (Sal. 8:4-8).

6. ¿Imaraykutaj Jehová Diospaj mayta valesqanchejta nillasunmantaj?

⁶ Adán juchallejtinpis, Jehová Diospajqa valellanchejpuni. Payqa anchatapuni munakuwasqanchejrayku, Wawanta juchasninchejrayku wañunanpaj kachamorqa (1 Juan 4:9, 10). Jesús kausayninta qosqanrayku, Diosqa Adanpa juchannejta wañojkunata kausarichimonqa, “cheqan runasta, mana cheqan runastapis” (Hech. 24:15). Jehová Diosqa Palabranpi niwanchej, onqosqa kajtinchejpis, mana qolqeyoj kajtinchejpis, viejitoña kajtinchejpis, paypaj mayta valesqanchejta (Hech. 10:34, 35).

7. Jehová Dios may valorniyojpaj qhawawasqanchejta, ¿imaspi reparallanchejtaj?

⁷ Jehová Dios may valorniyojpaj qhawawasqanchejtaqa, waj imaspi reparallasunmantaj. Payqa payman pusawanchej. Chantapis imayna sonqowanchus sumaj willaykunata japʼikusqanchejta yachan (Juan 6:44). Jehová Diosman qayllaykojtinchej, paypis noqanchejman qayllaykamuwarqanchej (Sant. 4:8). Chantapis payqa yachachinawanchejpaj tiemponta, kallpanta ima churan. Jehová Diosqa yachan imaynachus kasqanchejta, sumaj runasman tukuyta atisqanchejtapis. Pantajtinchejtaj, munakuwasqanchejrayku kʼamiwanchej (Pro. 3:11, 12). Chay tukuy imasqa, Jehová Diospaj may munasqa kasqanchejta rikuchiwanchej.

8. ¿Imaynatataj Salmo 18:27-29 llakiypi kashajtinchej yanapawanchej?

⁸ Rey Davidqa yacharqa Jehová Dios payta munakusqanta, yanapasqantataj. Chayta yachaytaj, runas ni imapaj valesqanta nejtinku yanaparqa (2 Sam. 16:5-7). Sinchʼi llakisqa kashajtinchej chayri problemasniyoj kashajtinchejqa, llakiyninchej mana tukukoj jina kasqanta yuyanchej. Jehová Diostajrí yanapawasunman mana jinata yuyanapaj, llakiykunata atipanapajpis (Salmo 18:27-29 leey). Jehová Dios noqanchejwan kajtenqa, ni imapis payta kusiywan sirvinapaj jarkʼawasunmanchu (Rom. 8:31). Chayrayku Jehová Dios munakuwasqanchejta, may valorniyojpajtaj qhawawasqanchejta yuyarikunapuni. Qhepan parrafospi, ima kutispichus chayta astawan yuyarikunanchej kasqanta yachakusun.

9. ¿Imatataj onqosqa kaspa nisunman?

⁹ Onqosqa kaspaqa mayta llakikusunman, nisunmantaj: “Imapajña valeniri”, nispa. Chantapis wakin imasta niña ruwayta atisqanchejmanta, chayri waj yanapana kasqanchejmanta pʼenqakusunman. Onqosqa kasqanchejta wajkuna mana reparajtinkupis, ichá llakikunchej manaña sano jinachu imatapis ruwayta atisqanchejmanta. Ajina llakiypi kashajtinchej, Tatanchej Jehová kallpachawanchej. Qhepan parrafopi yachakusun, imaynatachus chayta ruwasqanta.

10. Proverbios 12:25 nisqanman jina, ¿imataj yanapawasunman onqosqa kashajtinchej?

¹⁰ Onqosqa kashajtinchejqa, ‘miskʼi palabras’ sonqonchejta tʼikarichinman (Proverbios 12:25 leey). Jehová Diosqa Bibliapi kʼacha palabrasta churacherqa. Ajinamanta  yuyarichinawanchejpaj, onqosqa kaspapis paypaj may munasqas kasqanchejta (Sal. 31:19; 41:3). Bibliapi chay kʼacha palabrasta kutin kutita leesunchej chayqa, Jehová Diosqa onqoyninchejmanta mana anchata llakikunapaj yanapawasun.

11. ¿Imaynatá Jehová Dios hermanonchej Jorgeta yanaparqa?

¹¹ Hermano Jorgemanta parlarina. Payqa joven kashaspa onqoykorqa, chay onqoytaj rato sinchʼiyarqa. Payqa chay onqoyninrayku niña ni imapaj valesqanta yuyarqa. Pay nin: “Onqoykusqaytawanqa tukuy imata yuyarqani, anchatataj sufrerqani, runaspis noqa qhawarisqalla kaj kanku. Ni jaykʼaj yuyarqanichu chay jinata onqoykunaytaqa. Onqoyniy sinchʼiyasqanman jina, imastachus niña ruwayta atinaypi piensaj kani. Manchay phutisqapuni kasharqani. Chayrayku Jehová Diosman qhaparikorqani yanapanawanpaj”, nispa. Jehová Diosrí, ¿yanaparqachu? Arí. Hermanonchej nillanpuni: “Leesqayta mana umaypi japʼiyta atillajchu kani. Chayrayku Salmos libropi Jehová Dios kamachisninmanta llakikusqanta leerinayta niwarqanku. Jinapis uj mashkha versiculosllata leerinayta niwarqanku. Chay textostaqa kutin kutita leej kani, sapa diataj. Chayta ruwayqa sonqoyta tiyaykucherqa, yanapawarqataj. Pisi tiemponman wajkunapis astawanña asirisqayta niwaj kanku. Wakintaj ajinata rikuwaspa, paykunata kallpachasqayta niwaj kanku. Jehová Diosqa mañakuyniyta uyariwarqa. Payqa manaña pisipaj qhawakunaypaj yanapawarqa. Bibliapi leerqani, onqosqa kajtiypis Jehová Diospaj mayta valesqayta. Chaypitaj astawan yuyarqani”.

12. Onqosqa kashajtinchej, ¿imatá ruwasunman Jehová Dios yanapanawanchejpaj?

¹² Jehová Diosninchejqa, yachan onqosqa kashajtinchej imaynachus kashasqanchejta. Chayrayku paymanta yanapata mañakuna,  ama anchata phutikunapaj. Chantapis Bibliapi churachisqan kʼacha palabrasta maskʼana. Ima versiculoschus Jehová Dios munakuwasqanchejmanta parlan, chaykunata astawan leerina. Chayta ruwaspaqa, reparasunchej payqa tukuy sonqo sirvejkunapaj may kʼacha kasqanta (Sal. 84:11).

13. ¿Imatataj uj tata yuyanman mana trabajoyoj qhepakojtin?

¹³ Tatasqa familiankuman imatachus necesitasqankuta qoyta munanku. Uj hermanota mana imallamanta trabajonmanta wijchʼurparisqankupi piensarina. Payqa tukuy atisqanta trabajota maskʼan, manataj tarinchu. Ajinapi rikukuspa, ichapis yuyanman ni imapaj valesqanta. Qhepan parrafospi yachakusun, imaynatachus Jehová Diospa nisqasnin chay hermanota yanapananta.

14. ¿Imaraykutaj Jehová Dios nisqasninta juntʼanpuni?

¹⁴ Jehová Diosqa nisqasninta juntʼanpuni (Jos. 21:45; 23:14). ¿Imaraykutaj chayta ruwan? Ñaupajtaqa sutinrayku chayri mana pipis paymanta sajrata rimananpaj. Jehová Diosqa tukuy sonqo sirvej kamachisninta cuidananta nin. Chay nisqantataj juntʼaytapuni munan (Sal. 31:1-3). Chantapis familianmanta kajkunata mana cuidanman chayqa, mayta llakikusunman, sonqo pʼakisqataj kasunman. Jehová Diostaj chayta sumajta yachan. Payqa niwanchej, kausananchejpaj, payta sirvinapajpis necesitasqanchejta qonawanchejta. Chayta ruwanantataj ni ima jarkʼanqachu (Mat. 6:30-33; 24:45).

15. 1) ¿Ima llakiypitaj ñaupa tiempomanta cristianos rikukorqanku? 2) Salmo 37:18, 19 nisqanman jina, ¿imatataj Jehová Dios kamachisninrayku ruwanqa?

¹⁵ Yachanchejña imaraykuchus Jehová Dios nisqasninta juntʼasqanta. Chayta mana qonqasunchu chayqa, qolqe pisiwajtinchejpis  pay yanapanawanchejpi atienekusun. Ñaupa tiempomanta cristianospi piensarina. Runas Jerusalenpi kaj congregacionta sinchʼita qhatiykachayta qallarejtinku, chay llajtapi apostoleslla qhepakorqanku, tukuy hermanostaj waj llajtasman ayqekorqanku (Hech. 8:1). Chay hermanosqa, ichapis wasisninkuta, trabajonkuta chayri negocionkuta saqerqanku. Chayrayku ichá wakin imasmanta pisichikorqanku. Jinapis Jehová Diosqa mana paykunata saqerparerqachu. Paykunataj kusisqallapuni karqanku (Hech. 8:4; Heb. 13:5, 6; Sant. 1:2, 3). Jehová Diosqa chay tiempomanta kamachisninta yanaparqa, noqanchejtapis yanapallawasuntaj (Salmo 37:18, 19 leey).

16. ¿Imaraykutaj Jehová Diospaj niña valesqanchejta yuyasunman?

¹⁶ Viejoyapushanchej chayqa, ichapis ninchej: “Niña Jehová Diospaj imatapis ruwayta atinichu”, nispa. Rey Davidpis machuyapuspa ichapis ajinallatataj yuyarqa (Sal. 71:9). Qhepan parrafospi yachakusun, imaynatachus Jehová Dios yanapawasqanchejta.

17. ¿Imatataj hermananchej Jherimanta yachakusunman?

¹⁷ Hermananchej Jherimanta parlarina. Paytaqa Diosta yupaychanapaj wasista allinchayta yachakunanpaj, uj reunionman invitasqanku. Paytajrí mana riyta munasqachu, nisqataj: “Noqaqa viejitaña kani, viudataj. Ima yachasqaywantaj Jehová Diospaj llankʼaymanri. Manaña valenichu”, nispa. Chay reunionman rinanpaj uj chʼisi faltashajtin, hermananchejqa Jehová Diosmanta sonqomantapacha mañakusqa. Qʼayantintaj salonman chayaytawanñapis, “imapaj jamuniri” nispa sonqonpi nisqa. Jinapis chay reunionpi ujnin yachachej hermanoqa nisqa: “Jehová Dios yachachinawanchejta munananchej tiyan. Chaymin  aswan sumajqa”, nispa. Hermananchej Jheri nin: “Chayta uyariytawan sonqoypi nerqani, ‘chaytaqa ruwayta atinipuni’ nispa. Jehovaqa mañakuyniyta uyariwarqa. Chayrayku waqarikorqani. Payqa nishawarqa paypaj llankʼayta atisqaytaraj, yachachiwaytataj munasqanta”, nispa. Kunantaj Jheriqa chaymanta yuyarikuspa nin: “Chay reunionmanqa mancha manchalla yaykorqani, may llakisqa, ni imapaj valesqayta yuyaspataj. Jinapis chaymantaqa llojserqani manchay kusisqa, kallpachasqa, yanapakuyta atisqayta yuyaspataj”, nispa.

18. ¿Imaynatá Biblia rikuchin Jehová Dios viejitosta mana pisipajchu qhawasqanta?

¹⁸ Viejoyapushanchejña chaypis, Jehová Diospaj llankʼayta atinchejraj (Sal. 92:12-15). Ichapis Jehová Diospaj pisillata llankʼasqanchejta, chayri ashkha imasta mana ruwayta atisqanchejta yuyanchej. Jinapis Jesusqa yachachiwarqanchej, chay ruwasqanchejta Jehová Dios may sumajpaj qhawasqanta (Luc. 21:2-4). Chayrayku ama llakikunachu imatachus mana ruwayta atisqanchejmanta. Imaraykuchus Jehová Diosmanta wajkunaman willariyta atinchejraj, hermanosninchejpaj mañakuyta atinchej, wajkunatapis Diosta sirvinallankupajpuni kallpachayta atinchej. Jehová Diosninchejqa paywan khuska llankʼasqanchejta nin. Chaytataj nin mana uj imata ruwasqanchejraykuchu, manaqa payta tukuy sonqo kasukuyta munasqanchejrayku (1 Cor. 3:5-9).

19. ¿Imatataj Romanos 8:38, 39 niwanchej?

¹⁹ Jehová Diosta sirviyqa may sumajpuni. Payqa kamachisninta mayta munakun. Jehová Diosqa munayninta ruwanapaj ruwawarqanchej. Chayrayku payta yupaychaspa kusisqa kausakunchej (Apo. 4:11). Kay mundomanta runaspajqa mana valenchejchu. Jehová Diosninchejpajrí ashkha valenchej (Heb. 11:16, 38). Sichus onqosqa kasqanchejrayku, qolqenchej pisiyasqanrayku chayri viejoyapusqanchejrayku llakikunchej chayqa, kayta yuyarikuna: Tatanchej Jehovaj munakuyninmantaqa ni ima tʼaqawasunchu (Romanos 8:38, 39 leey).