1, 2. ¿Imakunapataq Diospa sirweqninkuna pasayan, y imamantaq tsëkuna chätsin?

JUK JÖVIN wawqim qeshyanqanta musyarin y junaqkuna pasanqanmannömi mas antsäkurkun. 50 watayoq alli trabajador juk wawqitam trabäjumpita qarquriyan y mëläya ashirpis manam juk trabäjuta tarintsu. Juk paninam chakwanna kar Jehoväta sirwita manana puëdinampaq kaqta pensar llakikun.

² Tsënö mana allikunapa pasarninqa, imapaqpis mana sirwinqantsiktam pensarishwan. Tsëkunaqa yamë y kushishqa kanqantsikta y wakinkunawan shumaq kawakuynintsiktam ushakäratsinman.

3. ¿Imanötaq Satanaswan makinchö këkaq nunakunaqa kawëta rikäyan?

³ Satanasqa imapaqpis mana sirweqtanömi nunakunata rikan. Diosta mana cäsukurqa wanunampaq kaqta musyëkarpis, “allim kawakunki” nirmi Ëvata engañarqan. Kanan witsan nunakunaqa pënöllam kawëta rikäyan. Satanaspa makinchömi imëkayoq kë, polïtica y religionkunapis këkäyan. Tsëmi qellëyoq nunakuna, autoridäkuna y pushakoq religiösukunaqa kawëta ni nunakunata respetayantsu.

4. ¿Imatataq yachakushun?

⁴ Jehovä Diosnintsikqa yamë kawakunantsiktam munan y mana allikunapa pasarnin imapaqpis mana sirwinqantsikta pensanqantsik höram yanapamantsik (Sal. 136:23; Rom. 12:3). Qeshyapäkurnin, trabäjupita qarqumashqa y awkinna o chakwanna kar munanqantsiknöna Diosta mana sirwita puëdirmi llakikuntsik. Tsëkunapa  pasashqa Jehovä Dios imanö yanapamanqantsiktam, kë yachatsikuychöqa yachakushun. Tsëkunapita manaraq yachakurnin, kuyamanqantsikta Jehovä rikätsimanqantsikpita puntata yachakurishun.

5. ¿Imanirtaq nintsik Jehovä Dios kuyamanqantsikta?

⁵ Teytantsik Jehovä allpapita kamamashqantsik karpis, llapantsiktam kuyamantsik (Gen. 2:7). ¿Imanirtaq kuyamanqantsikta nintsik? Puntataqa, kikin niraqta kamamashqantsik kaptinmi (Gen. 1:27). Kikin niraqta kamamashqantsik kaptinmi, wakin ruranqankunaqa noqantsiknötsu kayan. Animalkunata y Patsata cuidanapaqmi churamashqantsik (Sal. 8:4-8).

6. ¿Ima mastaq rikätsimantsik Jehovä Dios kuyamanqantsikta?

⁶ Jutsantsikkunarëkur tsurin Jesusta wanunampaq mandamurmi, shonqupita patsë kuyamanqantsikta rikätsimarquntsik (1 Juan 4:9, 10). Jesus wanunqanrëkurmi, Adanpa culpanrëkur llapan wanushqa kaqkunata Diosqa kawaritsimunqa (Hëch. 24:15). Tsëta ruranqanchömi rikantsik, Adan jutsallakushqana kaptimpis Jehoväqa kuyëkämanqantsikta. Palabranchöqa nimantsik qeshyapäkushqa, trabäjunnaq y awkinna o chakwanna kashqapis Diosnintsik kuyamanqantsiktam (Hëch. 10:34, 35).

7. ¿Imakuna maschötaq rikantsik Diosnintsik kuyamanqantsikta?

⁷ Diospa sirweqninkunaqa, imëkachömi rikantsik Jehovä Diosnintsik kuyamanqantsikta. Shonquntsikchö imanö kanqantsiktam rikarqan y sirweqnin kanapaqmi akramarquntsik (Juan 6:44). Diosnintsik Jehoväman witir qallëkushqaqa, pëpis noqantsikmanmi witimurqan (Sant. 4:8). Jehoväqa tukuynöpam yachatsimantsik. Allim musyan imanö nuna kanqantsikta y mas alliyänapaq kaqtapis. Y mana allikunata rurëkashqapis willapämantsikmi (Prov. 3:11, 12). Tsëkunachömi Diosnintsik Jehovä kuyamanqantsikta rikantsik.

8. Salmus 18:27-29 Bibliachö ninqanqa, ¿imanötaq yanapamantsik mana allikunapa pasashqa?

⁸ Rey Davidqa allim musyarqan Jehovä Dios kuyanqanta y yanapanampaq kaqta. Tsëta musyanqanmi yanaparqan, “imatapis mana alli ruraq nuna” kanqanta niyaptin (2 Sam. 16:5-7). Llakishqa këkashqa y mana allikunapa pasashqam, Teytantsik Jehoväqa alläpa mana llakikunapaq y alli tsarakunapaq yanapamäshun (leyi Salmus 18:27-29 *). Diosnintsik yanapamashqam mana allikunapa pasarpis kushishqa sirwintsik (Rom. 8:31). ¿Imakunapa pasarnintaq Jehovä Diosnintsik kuyamanqantsikta masqa rikantsik? Rikärishun.

9. ¿Imatataq qeshyapäkoq kaqkuna pensayan?

⁹ Qeshyapäkurninqa llakishqallam kakuntsik y manana sirwinqantsiktam pensantsik. Imanö këkanqantsikta wakinkuna rikämashqa y yanapëpaqnö kanqantsikta rikämashqam höraqa penqakuntsik. Y wakinkuna imanö këkanqantsikta mana musyayaptimpis, unënöna imatapis  rurëta mana puëdinqantsikta pensarmi llakikuntsik. Tsënö llakikunqantsik höraqa, ¿imanötaq Jehovä yanapamantsik?

10. Proverbius 12:25 Bibliachö ninqannö, ¿imataq qeshyëkashqa yanapamantsik?

¹⁰ Qeshyëkashqa “alli shiminpa” pillapis parlapäramashqaqa, mana alli këkarpis yamëmi sientikurintsik (leyi Proverbius 12:25 *). Qeshyëkashqapis kuyamanqantsikta rikätsimänapaqmi, Jehovä Diosqa Palabran Bibliaman shumaq yanapakuykunata churatsimushqa (Sal. 31:19; 41:3). Palabranta kutin kutin leyishqam, qeshyapäkurnin imapapis mana sirwinqantsikta pensashqa Jehovä yanapamantsik.

11. ¿Imanötaq juk wawqi rikarqan Jehovä Dios yanapëkanqanta?

¹¹ Wawqintsik Jorgita ima pasanqanta rikärishun. Pëqa, jövinllaraq këkarmi qeshyakurkurqan y junaqkuna pasanqanmannömi mas antsäkurkurqan. Tsëmi imapaqpis mana sirwinqanta pensarqan. Jorgim willakun: “Qeshyarnin alläpa llakikunäpaq kaqta y imanö këkanqäta wakinkuna rikäyaptin penqakunäpaq kaqtaqa manam musyarqätsu. Mas antsar imanö kanäpaq kaqtam pensarqä. Yarpachakurnin y llakikurninmi, yanapëkamänampaq Jehovä Diosman rogakurqä”. Dios imanö yanapashqa kanqantam willakun: “Manam atskata leyita puëdirqätsu, tsëmi sirweqninkunata Jehovä Dios kuyanqanta rikätsikoq Salmus libruta wallka wallkalla leyinäpaq niyämarqan. Tsëta kutin kutin leyinqämi yanapamarqan. Ichik tiempu pasariptinqa mas kushishqatanam wakinkuna rikäyämaq, y tsënö rikäyämanqanqa  yanapashqa kanqantam niyämarqan. Jehovä Dios mañakuynïta wiyamashqa kanqantam rikarqä. Qeshyëkaptïpis Jehovä kuyamanqanta Bibliachö leyinqämanmi masqa pensarqä”.

12. ¿Imakunatataq ruranantsik Jehovä Dios yanapamänata munarqa?

¹² Qeshyapäkurnin imanö këkanqantsikta y imakunapa pasëkanqantsikta Jehoväqa allim musyan. Tsëmi alläpa mana yarpachakunapaq rogakunantsik. Yanapamänantsikpaq Palabranchö churatsimunqankunatam leyinantsik. Y Jehovä Diosnintsikqa sirweqninkunata kuyanqanmanmi masqa pensanantsik. Tsëkunata rurashqaqa, llapan sirweqninkunata yanapanampaq listu këkanqantam rikäshun (Sal. 84:11).

13. ¿Imatataq pensayan trabäjunkunapita qarqushqa kaqkuna?

¹³ Ollqu kaqkunaqa familiankunata manteniyänampaqmi masqa yarpachakuyan. Alli trabajador këkaptimpis, juk wawqita trabäjumpita qarquriyanqanman pensarishun. Mëläya ashirpis mana tarirmi, imapaqpis mana sirwinqanta pensan. Dios änikunqanman pensanqanqa, ¿imanötaq kë wawqita yanapan?

14. ¿Imanirtaq Jehoväqa llapan änikunqankunata cumplin?

¹⁴ Jehovä Diosqa änimashqantsik imapis mana pishipamänapaq y pëta sirwinqantsikchö yanapamänapaqmi (Mat. 6:30-33; 24:45). Y Jehoväqa llapan änikunqantam imëpis cumplin (Jos. 21:45; 23:14). ¿Imanirtaq Jehoväqa llapan änikunqankunata cumplin? Puntataqa, änikunqankunata mana cumpliptinqa jutinmi mana alli rikashqa kanman. Pëqa  kuyashqa sirweqninkunata yanapanampaqmi änikushqa, tsëmi imëkata ruranqa änikunqanta cumplinampaq (Sal. 31:1-3). Jina Diosnintsik këkarnin noqantsikpaq mana yarpachakuptinqa llakikunapaq kaqtam musyan.

15. (1) ¿Ima mana allipataq Jerusalenchö creikoqkuna pasayarqan? (2) ¿Imanötaq Salmus 37:18, 19 textuqa yanapamantsik?

¹⁵ Änikunqankunata cumpleq kaptinmi, Jehovä Diosnintsik yanapamänampaq kaqtaqa següru kantsik. Unë witsan Jerusalenchö täraq creikoq mayintsikkunaman pensarishun, chikir sufritsiyaptinmi pëkunaqa më tsëman ‘witsikätsishqa kayarqan, peru apostolkunaqa manam’ (Hëch. 8:1). Juk markakunaman ewkurninqa wayinkunata y trabäjunkunatachi jaqiyarqan, y imëkankunachi pishirqampis. Tsënö kaptimpis, Jehovä Diosqa manam pëkunata qonqarqantsu, y pëkunaqa kushishqam sirwiyarqan (Hëch. 8:4; Heb. 13:5, 6; Sant. 1:2, 3). Tsë witsan creikoqkunata yanapanqannöllam, Diosnintsikqa noqantsiktapis yanapamäshun (leyi Salmus 37:18, 19 *).

16. ¿Imataq pensatsimashwan Jehovä manana kuyamanqantsikta?

¹⁶ Awkinna o chakwanna karmi, Jehovä Diosta unënöna sirwita manana puëdinqantsikta pensashwan. Awkinna kartsunchi, rey Davidpis noqantsiknölla llakikurqan (Sal. 71:9). Tsënö pensashqaqa, ¿imanötaq Jehovä yanapamantsik?

17. ¿Imatataq yachakuntsik panintsik Jenypita?

 ¹⁷ Panintsik Jenyta imapa pasanqanta rikärishun. Pëtaqa, reunionkunata ruranqantsik wayikunata altsayänampaq yachatsikuyanqanmanmi invitariyarqan, peru manam ëwëta munarqantsu. ¿Imanirtaq ëwëta munarqantsu? Pëmi kënö nin: “Chakwanna y majannaqmi kä, y imatapis manam rurëta yachätsu. Manam imapaqpis sirwïtsu”. Tsë reunionman manaraq ëwarnin shonqupita patsë Jehoväman mañakushqa karpis, imanir tsëman ëwashqa kanqantaqa tapukuykarqanllaran. Yachatsikuykarmi juk wawqi nirqan, yanapakuy munanqantsikta Jehoväqa mas valoranqanta. Tsëmi Jenyqa “‘tsëtaqa rurëta puëdïmi’ nirqan. Jehovä mañakuynïta wiyashqa kaptinmi waqakurirqä. Chakwanna karpis, Jehovä yachatsimaptinqa imëkata rurar-raq yanapakuyta puëdinqätam musyarirqä”. Pasanqanta yarparmi Jenyqa kënö nin: “Mantsapakuykar y llakinashqam tsë reunionman yëkurqä. Tsënö kaptimpis, tsë reunionpitaqa kushishqam yarqaramurqä”.

18. ¿Imanötaq Bibliaqa rikätsikun awkinna o chakwanna karpis ruranqantsikta Jehovä mana qonqëkushqa kanqanta?

¹⁸ Awkinna o chakwanna karpis Jehovä Diosta sirwinqantsikchöqa imëkataran rurëta puëdintsik (Sal. 92:12-15). Wallkallata ruranqantsikta pensashqa o imatapis rurëta mana yachanqantsikta pensashqapis, Jehoväqa allipa rikanqanta y kushikunqantam Jesusqa yachatsikurqan (Lüc. 21:2-4). Tsëmi puëdinqantsikmannö yachatsikunantsik, wawqi panintsikkunapaq mañakunantsik y Jehoväta imëpis sirwiyänampaq wakinkunata yanapanantsik. Jehovä Diosnintsikqa cäsukoq kanqantsikpitam sirweqnintanö rikämantsik (1 Cor. 3:5-9).

19. ¿Imanötaq yanapamantsik Romänus 8:38, 39?

¹⁹ Llapan sirweqninkunata kuyaq Jehovä Diosta sirwirninqa alläpam kushikuntsik. Pëqa, sirwirnin kushishqa kawakunapaqmi kamamarquntsik (Rev. 4:11). Nunakunaqa imapaqpis mana sirweqtanö rikämashqapis Jehoväqa kuyamantsikmi (Heb. 11:16, 38). Qeshyapäkurnin llakikuy, trabäjunnaq kë y awkinna o chakwanna këpis Diosnintsikpa kuyakuynimpitaqa manam rakimäshuntsu (leyi Romänus 8:38, 39).