1, 2. a) Huaquin huauquipanicunaca ¿ima llaquicunatata charin? b) Chai llaquicunata charishcamandaca ¿imashinata paicunaca sintirin?

CAI quimsa ejemplocunata ricupashunchi. Shuj joven huauquica shuj ungüitami charin. Cutin 50 yali huatacunata charij shuj huauquica trabajo illajmi quedan, trabajota mascashpapash na tarinllu. Shuj mayorlla paniguca Jehová Diosta pundashna ñana sirvi ushanichu nishpami pensarin.

² Ñucanchicuna cai llaquicunata charishpaca nimapapash na sirvij cuendami sintiri ushapanchi. Chaimi llaquilla, ñucanchimandallatapash nali sintiri ushanchiman, shujcunahuan llevaritapash na ushanchiman.

3. Diablopash, paita catijcunapash gentecunapa causaimandaca ¿imatata yuyan?

³ Diabloca gentecunataca na juyanllu. Paishnallatami cai mundopi gentecunapash shujcunapa causaitaca na sirvichishpa ricun. Diabloca siempremi gentecunataca nimapa na sirvijtashna tratashca. Chaimandami Eva na micuna frutata micushpa huañuna cashcata yachashpapash, chaita micuchun Diabloca animarca. Diabloca siempremi gobiernocunata, panda religiongunata, negociocunatapash controlajushca. Chaimandallatami tauca gobiernocuna, negociocunata charijcuna, panda religiongunata ñaupaman pushajcunapash gentecunataca na respetashpa, nimapa na sirvijtashna ricushca.

4. Cai temapica ¿imatata yachajupashun?

⁴ Jehová Diosca ñucanchimandallata ali sintirichunmi munan. Shinallata llaquicunahuan cashpa nimapa na sirvinshna  sintirijujpipash Jehová Diosca ayudasha ninmi (Sal. 136:23; Rom. 12:3). Shuj ungüita charijpi, culquigu illajpi, ña mayorlla caimanda Jehová Diosta ñana pundashna sirvi ushanichu nishpa pensarijujpi Jehová Dios imashina ayudajtami cai temapica yachajupashun. Pundapica Jehová Dios tucuicunatallata juyashcata imamanda seguro cai ushashcatami yachajupashun.

5. Jehová Dios juyashcataca ¿imashinata yachai ushapanchi?

⁵ Ñucanchicuna ñutu alpamanda rurashca cajpipash Jehová Diosca ninandami juyan (Gén. 2:7). Jehová Dios ñucanchita juyashcataca ¿imashinata yachai ushapanchi? Ñucanchicunataca Jehová Diosca paishna ali cualidadcunata charichunmi rurashca (Gén. 1:27). Jehovapa tucui rurashcacunamandaca, gentecunami ashtahuanbachaca ali rurashca can. Chaimi cai Alpapi tucui tucuita ricuchun gentecunataca churarca (Sal. 8:4-8).

6. Jehová Dios ñucanchita juyashcata ¿imashinata ricuchishca?

⁶ Adán juchata rurashca jipapashmi Jehová Diosca gentecunata juyashpa catirca. Ñucanchita juyaimandami ñucanchi juchacunamanda huañuchun Jesusta cachamurca (1 Juan 4:9, 10). Jesús huañushcamandami, Jehová Diosca ‘[alita] rurajcunata, [nalita] rurajcunatapash’ causachinga (Hech. 24:15). Ñucanchicuna ungüicunahuan cajpipash, culquigu illaj cajpipash, mayorllacuna cajpipash Jehová Dios ñucanchita ninanda juyashcatami Bibliapica nijun (Hech. 10:34, 35).

7. Ñucanchita juyashcataca ¿imata ricushpata ashtahuan cri ushapanchi?

⁷ Jehová Dios ñucanchita juyashcataca ¿imata ricushpata ashtahuan cri ushapanchi? Jehová Diosca paiman quimirichunmi paillata ayudashca. Ñucanchicuna ali villaigucunata uyashpa aliguman chasquishcatapashmi Jehová Diosca ali ricushca (Juan 6:44). Paimanda yachajui callarishpa paipaman quimirijpica, paipashmi ñucanchipaman quimirishca (Sant. 4:8). Ñucanchita juyaimandami cutin cutin yachachijun. Ñucanchicuna imashina cajta, jipacunaman imacunatalla rurai ushashcatapashmi ali yachan. Shinallata juyaimandami disciplinaitapash disciplinan (Prov. 3:11, 12, NM ). ¿Nachu cai tucui cosascunaca Jehová Dios ñucanchita juyashcata ricuchin?

8. Salmo 18:27-29​pi shimicunaca ¿imashinata llaquicunahuan cajpi ama yapata llaquirichun ayudan?

⁸ Rey Davidca, Jehová Dios paita juyashcata, siempre paita ayudaj cashcataca seguromi carca. Chaita yachanami shujcuna paita yangata tratajpipash ama desanimarichun ayudarca (2 Sam. 16:5-7). Problemacunahuan, llaquicunahuan ñana ushajujpica Jehová Diosmi ama yapata preocuparichun, imapash llaquicunata aguantai ushachunbash ayudanga (Salmo 18:27-29, liingui). Jehovapa ayudahuanga ima llaquicunata, problemacunata charishpapash paita cushilla sirvishpami catita ushapashun (Rom. 8:31). Cunanga shuj ungüita charijpi Jehová Dios ñucanchita ninanda juyashcata yachajupashunchi.

9. Ungüihuan cashpaca ¿imashinata sintiripanchi?

⁹ Ungüicunahuan cashpaca llaqui llaqui sintirimandami nimapa na sirvij cuenda sintiripanchi. Ñucanchimandallata imagutapash na rurai ushaimanda, shujcuna ayudachunbacha minishtimandami pingaitapash pinganayachinchi. Talvez shujcunaca ñucanchi saludhuan nali cashcataca na yachangachu. Shinapash paicunapa ñaupajpi pundashna imagutapash na rurai ushashcamandami nali sintirinchi. Shina sintirijujpimi Jehová Diosca ñucanchita ayudan. ¿Imashinata ayudan?

10. Imapash ungüihuan cajpica ¿imashinata Proverbios 12:25​pi shimicunaca ayudan?

 ¹⁰ Shuj ungüihuan cajpica ‘alita rimashca shimicunami cushichishpa’ ayudan (Proverbios 12:25, liingui). Ungüihuan na ushajujpipash, Jehová Dios ñucanchita ninanda juyashcataca Bibliapi escribishca shimicunahuan ayudashcatami ricuchin (Sal. 31:19; 41:3). Shinaca Bibliata cutin cutin liinami ungüicunahuan cashpapash ama yapata preocuparichun ayudan.

11. Jehová Dios ayudashcataca ¿imashinata shuj huauquica ricurca?

¹¹ Cunanga Julio * shuti huauquimanda parlapashunchi. Pai joven cajpillatami shuj ungüi japijpi paipa cuerpo enterota ninanda nanachin carca. Chaimandami Julioca nimapa na sirvinshna sintirin carca. Paica ninmi: “Cai ungüi japinataca yaitallapash na yashcarcanichu. Chaimi shujcuna ñucata ricushpa quedajpica llaquillapacha sintirin carcani. Chai ungüi ñucata asha asha tucuchishpa catijpimi ñuca causaica cambiaitapacha cambiarca. Shina llaquilla caimandami Jehovata ayudahuai nishpa rogarcani” nin. ¿Imashinata Jehová Diosca paita ayudarca? Julioca ninmi: “Bibliata liishpapash na intindinllu carcani. Chaimi Salmos libromanda uchilla versocunata lii callarircani. Chaipimi Jehová Dios paipa sirvijcunata ninanda juyashcata yachajurcani. Chai textocunataca cada punllami cutin cutin liin carcani. Chaicunami alillata sintirichun ayudahuarca. Shuj tiempo jipaca ashtahuan cushilla cajtami shujcunaca ricuhuarca. Shina cushilla cajta ricushpami paicunapash animarin carca. Chaipimi cuenta japircani Jehová Dios ñucata uyahuashcata. Ñucamandallata ali sintirichunbashmi Jehová Diosca ayudahuarca. Ñuca ungüihuan cajpipash Jehová Dios ñucata juyashcataca nimahora na cungashachu” nishpa.

12. Shuj ungüihuan cajpi Jehová Dios ñucanchita ayudachunga ¿imatata rurana capanchi?

 ¹² Jehová Diosca quiquin shuj ungüihuan cajpi imashina sintirijushcataca alimi yachan. Chaimi ama yapata llaquiringapaj ayudahuai nishpa Jehovata mañanalla capanchi. Cushilla shimicunata taringapaca Bibliatami liina capanchi. Shinami Jehová Dios paita sirvijcunata ninanda juyashcata, ayudaj cashcatapash cuenta japipashun (Sal. 84:11).

13. Cusa paipa familiata mantininata na ushashpaca ¿imashinata sintirin?

¹³ Cusacunaca paipa familiata mantiningapami ninanda esforzarin. Cunanga caipi pensaripashunchi. Shuj huauqui ali trabajajushca jahua na yashcapi trabajomanda llujchi tucushcanman. Shina llujchijpimi paica trabajota mascashpapash trabajotaca na tarin. Trabajota na tarimandami nimapa na sirvij cuenda sintirin. Jehovapa nishcacunata yarinaca ¿imashinata chai huauquitaca ayudaita ushan?

14. Jehová Diosca ¿imamandata paipa nishcacunataca pactachin?

¹⁴ Jehová Dios carasha nishcacunataca siempremi pactachin (Jos. 21:45; 23:14). ¿Imamandata pactachin? Jehová Diosca paipa shutita ali quedachingapami paipa nishcacunata pactachin. Jehová Diosca paita tucui shunguhuan catijcunata cuidasha nishcataca pactachingapachami (Sal. 31:1-3). Shinallata Jehová Dios paipa nishcacunata na pactachijpi ñucanchicuna llaquilla sintirinataca alimi yachan. Jehová Diosca, ñucanchipa imagu faltajpipash cushpa ayudasha, paita sirvishpa catichunbash ayudasha ninmi. Shina ayudachunga pipash na jarcaita ushangachu (Mat. 6:30-33; 24:45).

15. a) Apostolcunaca ¿ima llaquicunatata charirca? b) Salmo 37:18, 19​mandaca ¿imatata yachajupanchi?

¹⁵ Jehová Dios carasha nishcata pactachijta yachashpaca, masqui culquigu illashpapash  Jehová Dios cuidanataca seguromi capanchi. Cunanga apostolcunapa punllacunamanda yaripashunchi. Jerusalén congregacionmanda huauquipanicunata contracuna llaquichingapaj catirianajujpipash apostolcunaca ‘Jerusalenbimi quedarca’ (Hech. 8:1). Chaimi culquigu illaimanda sufririanga. Shinallata trabajo illaj, huasi illaj, negociocunapash illajmi quedarianga. Shina llaquilla causanajushpapash paicunataca Jehová Diosca siempremi cuidarca. Chaimi cushilla causanajurca (Hech. 8:4; Heb. 13:5, 6; Sant. 1:2, 3). Imashnami punda tiempopi paita catijcunataca cuidarca. Shinallatami ñucanchitapash cuidashpa catinga (Salmo 37:18, 19, liingui).

16. ¿Imamandata Jehovamandaca na ashtacata rurai ushanichu nipanchiman?

¹⁶ Ña mayorllagucuna tucushpaca talvez cashnachari pensaripanchi. Jehovamandaca na ashtacata rurai ushanichu nishpa. Rucullagu cashpaca rey Davidpashmi shinallata pensarca (Sal. 71:9). Shina pensajujpipash Jehová Diosca ¿imashinata ayudaita ushan?

17. Joanna panigumandaca ¿imatata yachajupanchi?

¹⁷ Joanna panigumanda yachajupashunchi. Tandanajui Huasita arreglashpa ayudangapaj shuj cursomanmi chai panigutaca invitarca. Na ringapaj munaimandami paica cashna pensarirca: “Ñucaca paya, viudapash viuda, nimata na rurai ushanica, nimapa na sirvinica” nishpa. Chai curso callaringapaj shuj tuta faltajpillatami Jehovata tucui shunguhuan mañarca. Cayandi punlla ña Tandanajui Huasipi cashpapash na caipichu cana cani yarin nishpami pensarirca. Chai cursopi yachachij huauquica nircami, Jehová Dios yachachichun saquinami ashtahuan alipacha can nishpa. Joannaca caitami yarin: “Jehová Dios ‘yachachihuachunmi munani’. Ñuca mañashcata Jehová Dios uyahuashca  nishpami huacai callarircani. Shinaca ñucaca usharishcaguta rurashpa ayudasha. Jehovami imaguta rurachunbash ayudahuanga” nirca. Joannaca ninmi: “Tandanajui Huasiman yaicushpaca manllaihuan, llaquilla, nimata na rurai ushashachu yashpami yaicurcani. Shinapash ña huasiman tigrajushpaca ayudaita ushashcamandami cushilla tigrarcani” nin.

18. Ña mayorgucuna tucushpapash ¿imatata seguro capanchi?

¹⁸ Ñucanchicuna ña mayorgucuna tucujpipash imagutapash ñucanchi rurachun Jehová Dios ayudachun saquijtaca seguromi capanchi (Sal. 92:12-15). Jesús cai alpapi cashpaca ¿imatata yachachirca? Ñucanchi imagutapash pundashna ñana rurai ushajpipash, usharishcaguta tucui shunguhuan rurashcataca Jehová Diosca alicachishpa ricujun nishpami Jesusca yachachirca (Luc. 21:2-4). Shinaca usharishcaguta tucui shunguhuan rurashpa catipashunchi. Por ejemplo, shuj gentecunaman Jehovamanda parlashpa, huauquipanicunamanda mañashpa, Jehovata tucui shunguhuan sirvishpa catichunbash ayudapashunchi. Shina rurajpica Jehová Diosca cashnami ninga, paicunaca ñucata ‘ayudajcunami’ can nishpa (1 Cor. 3:5-9).

19. Romanos 8:38, 39​ta liishpaca ¿imashinata sintiripanchi?

¹⁹ Jehovata sirvinajushcamandaca cushillami sintiripanchi. Paita tucui shunguhuan sirvijcunataca Jehová Diosca ninanda alicachishpami ricujun. Jehová Diosca paipa munaita rurachunmi gentecunataca rurashca. Shinaca cushilla causangapaca ñucanchi causaipica Jehovatallami sirvishpa causana capanchi (Apoc. 4:11). Mundomanda gentecunaca ñucanchitaca nimapa na sirvin nishpami nin. Gentecuna shina ninajujpipash Jehová Diosca ñucanchitaca ninanda alicachishpami ricun (Heb. 11:16, 38). Shinaca imapash ungüihuan cashpa, culqui faltalla causajushpa, mayorlla tucushpapash Jehovata sirvishpa causanataca nimahora na saquinachu capanchi (Romanos 8:38, 39, liingui).