1-2. Eaa te au turanga ta te maata anga o te iti tangata o Iehova ka aro atu, e eaa tei tupu kia ratou?

AKAMANAKO ana i teia au akatutuanga e toru: E tai taeake mapu kua tuia e tetai maki kino tikai. Tetai taeake mei te 50 mataiti kua akanooia aia mei tana ngai angaanga moni, noatu tana angaanga maroiroi e te pakari, kare e rauka tetai ngai angaanga ke atu. E tetai tuaine tiratiratu kua ruaine e kare ona maroiroi akaou i te tavini ia Iehova.

² Me kua tupu ana teia kia koe, penei ka manako koe e kare oou puapinga. Ka apai ke teia au turanga i toou mataora, ka manako kino koe, e ka tamanamanata i toou pirianga ki tetai ke.

3. Akapeea a Satani e te aronga tana i akatere te akono kore anga i te oraanga tangata?

³ Te akaata maira teianei ao i to Satani manako i te oraanga o te tangata. E akono kore ana a Satani i te tangata mei te mea atura e kare o ratou puapinga. Kua pikikaa aia kia Eva e ka ora aia me akarongo kore aia ki te Atua, noatu e kua kite aia e ko te utunga no te reira, e mate. Ka rauka ia Satani i te akatere i te au mea akaariari, te poritiki, e te au akonoanga o teianei ao. No reira kare i te mea poitirere e maata o te aronga pitiniti, te aronga poritiki, e te au arataki akonoanga, kare ratou e akangateitei ana i te oraanga tangata.

4. Eaa ta tatou ka uriuri i teia atikara?

⁴ E inangaro ana a Iehova ia tatou kia meitaki tatou, e ka tauturu aia ia tatou me aro atu i te au timataanga te ka  manako tatou e e puapinga kore tatou. (Sala. 136:23; Roma 12:3) Ka uriuri teia atikara akapeea a Iehova me tauturu ia tatou mei teia turanga: (1) Me mamae tatou i tetai au maki kino, (2) me tupu te manamanata no te moni, e te (3) me ruaine tatou e kare o tatou maroiroi i te rave angaanga na Iehova. Te mea mua, ka akara tatou eaa te akapapu anga e aronga akaperepere tatou kia Iehova.

5. Eaa te akapapu anga kia koe e te akaperepere ra a Iehova i te tangata?

⁵ Noatu e kua angaia tatou mei te one pueu, e aronga akaperepere maata ia tatou. (Gene. 2:7) E akamanako ana i tetai au tumu i kite ei tatou e te akaperepere ra a Iehova ia tatou. Kua anga aia i te tangata kia rauka te tu karape me aru i tona au tu. (Gene. 1:27) Na te rave anga i te reira, kua akateitei aia i te tangata kia akatere i te enua e te au manu.—Sala. 8:4-8.

6. Eaa te akapapu anga ta tatou i kite e te akaperepere ra a Iehova i te tangata ara?

⁶ Te ara anga a Adamu, kua akaperepere ua atu rai a Iehova i te tangata. Akaperepere maata aia ia tatou na te oronga anga mai i tana Tamaiti akaperepere, ko Iesu, ei atinga oko no ta tatou au ara. (1 Ioa. 4:9, 10) Na te taangaanga anga i teia, ka akatu mai a Iehova i te aronga tei mate mei te ara a Adamu, “te aronga tuatua-tika e te aronga tuatua-tika kore.” (Anga. 24:15) Akaari mai tana Tuatua e aronga akaperepereia tatou kiaia, noatu to tatou turanga maki, te moni, e te ruaine.—Anga. 10:34, 35.

7. Eaa te tumu ta te au tavini o te Atua e irinaki ra, te akaperepere ra a Iehova ia ratou?

⁷ E au tumu ke tetai i irinaki ei tatou e te akaperepere ra a Iehova ia tatou. Te akavaitata maira aia ia tatou kiaia e te kite maira aia akapeea tatou me ariu ki te nuti meitaki. (Ioa. 6:44) Ia tatou e akavaitata ra kia Iehova, te akavaitata maira aia kia tatou. (Iako. 4:8) Kua oronga katoa a Iehova i tona taime e te maroiroi i te apii ia tatou, te akaari anga mai e e aronga akaperepereia tatou kiaia. Kua kite meitaki aia ia tatou tataki tai i teianei e akapeea tatou e puapingaia ai. E te ako maira aia ia tatou no tona inangaro ia tatou. (Mase. 3:11, 12) Eaa te au akapapu anga e te akaperepere ra a Iehova ia tatou!

8. Akapeea a Salamo 18:27-29 me tauturu ia tatou kia akamanako i to tatou manamanata?

⁸ Te manako o tetai pae i te Ariki ko Davida, e tangata puapinga kore, kua kite ra aia i to Iehova inangaro e te tauturu iaia. Kua tauturu teia ia Davida kia akakoromaki i tona turanga. (2 Samu. 16:5-7) Me taitaia tatou, ka tauturu a Iehova ia tatou kia akakoromaki e kia autu i tetai ua atu manamanata. (E tatau ia Salamo 18:27-29.) Me rauka ia tatou te turuturu a Iehova, kare e mea e tapu ia tatou i te tavini iaia ma te rekareka. (Roma 8:31) Ka akara tatou e toru turanga ka anoanoia tatou kia akamaara e te akaperepere maira a Iehova ia tatou.

9. Akapeea te maki me akatupu i te manako paruparu kia tatou?

⁹ Ka riro te maki ei akatupu i te au manako paruparu kia tatou, e te manako ra e kare tatou e puapinga ki tetai ke. Ka akama tatou me kite mai te tangata i to tatou tu maki me kore me irinaki ua tatou ki te tauturu a tetai ke. Noatu kare tetai i  kite i to tatou maki, penei kua kotingaia ta tatou i rave mei to mua ana. No te reira turanga taitaia, ka akamaroiroi a Iehova ia tatou. Akapeea ra?

10. Kia tau kia Maseli 12:25, eaa te ka tauturu ia tatou me maki tatou?

¹⁰ Me maki tatou, ka akamaroiroi te “tuatua meitaki” i to tatou turanga. (E tatau ia Maseli 12:25.) I roto i te Pipiria, kua oronga mai a Iehova i te au tuatua meitaki ei akamaara e e puapinga tatou kiaia me maki tatou. (Sala. 31:19; 41:3) Me tatau ua atu tatou i te Tuatua akauruia, ka tauturu a Iehova ia tatou kia autu atu i te au manako tika kore ta te maki ka apai mai.

11. Akapeea tetai taeake te kite anga i te tauturu a Iehova?

¹¹ Akamanako ana i te tupuanga o Jorge. Ei taeake mapu, kua tuia a Jorge e tetai maki e kua kino takiri te reira e kua tupu te manako puapinga kore kiaia. “Kare au i papa meitaki no toku maki e te tu akama me akaraia mai au e te tangata,” i karanga ai a Jorge. “Te kino anga toku maki, kua akamanako au akapeea toku oraanga me taui. Kua maromaroa tikai au, e kua pati akatenga i ta Iehova tauturu.” Akapeea a Iehova te tauturu anga iaia? “No te mea e ngata iaku i te akamanako, kua akamaroiroiia au kia tatau i te au irava mei ia Salamo tei akaari i te tu akono o Iehova i tona au tavini. Kua tatau akaou au i te au irava i te au rā tataki tai, e kua riro ei akapumaana e te akamaroiroi iaku. I tetai taime, ka kite mai te tangata iaku e katakata ra. Pera katoa toku tu mataora kua akamaroiroi te reira ia ratou. Kite mai au kua pau mai a Iehova i taku pure! Kua tauturu mai aia iaku kia taui i toku tu. Kua akamou au ki  runga i tana Tuatua tona manako iaku noatu toku maki.”

12. Me e maki toou, akapeea e rauka ai ia koe ta Iehova tauturu?

¹² Me kua tuia koe e te maki, papu e kua kite a Iehova i taau e na roto ra. Pati akatenga kiaia no te tauturu te ka arataki ia koe na tetai au turanga ke. E oti e kimi i te akapumaana a te Pipiria ta Iehova i oronga mai noou. Akamou ki runga i te irava tei akaari mai akapeea a Iehova te akaperepere anga i tona au tavini. Me rave koe i te reira, ka kite koe e e meitaki a Iehova ki te aronga tei tavini tiratiratu iaia.—Sala. 84:11.

13. Eaa te manako o te upoko ngutuare me ngere aia i tana ngai angaanga?

¹³ Pouroa te upoko o te ngutuare ka akono ratou i te anoano o tona ngutuare tangata. Noatu kare nona te tarevake, ka ngere rai te taeake i tana ngai angaanga. Ka tauta aia i te kimi i tetai ngai angaanga akaou. No tei tupu kiaia, kua o mai te manako puapinga kore. Akapeea te akamou anga ki ta Iehova taputou te tauturu anga iaia?

14. Eaa te tumu ka akatupu ei a Iehova i tana taputou?

¹⁴ E akatupu ua ana a Iehova i tana au taputou. (Iosu. 21:45; 23:14) E maata te au tumu e rave ua ana aia i te reira. Te mea mua, ka akakinoia tona ingoa. Kua oronga mai a Iehova i tana taputou e ka akono aia i tona au tavini tiratiratu, e ka akatupu i te reira. (Sala. 31:1-3) Inara kua kite a Iehova e ka maromaroa tatou me kare aia e akono i tetai pae o tona ngutuare tangata. Kua taputou mai aia e ka oronga aia i tei tau no tatou i te pae kopapa e te pae vaerua, ka akatupu  rai aia i tana taputou!—Mata. 6:30-33; 24:45.

15. (a) Eaa te manamanata ta te au Kerititiano mua i te anere mataiti i aro atu? (e) Eaa tei akapapuia ia Salamo 37:18, 19?

¹⁵ Me maara ia tatou i te tumu i akatupu ei a Iehova i tana au taputou, papu ka tauturu mai aia i to tatou turanga ngata i te pae moni. Akamanako ana i te akaraanga o te au Kerititiano i te anere mataiti mua. Te tupu anga te takinokino maata i te putuputuanga i Ierusalema, kua “pueurikiriki ke atura [te au apotetoro] katoa.” (Anga. 8:1) Akamanako ana eaa te aiteanga o te reira. Kare e rava ana te moni! Ka ngere te au Kerititiano i to ratou kainga e te pitiniti. Inara kare a Iehova e akaruke ia ratou; e ka mataora ua ratou. (Anga. 8:4; Ebe. 13:5, 6; Iako. 1:2, 3) Kua tauturu a Iehova i te au Kerititiano tiratiratu, e ka pera katoa aia ia tatou.—E tatau ia Salamo 37:18, 19.

16. Eaa te tumu ka manako ei tatou e kare a Iehova e akaperepere ana i ta tatou akamori anga?

¹⁶ Me ruaine tatou, ka akamata tatou i te manako e e meangiti ua ta tatou ka oronga kia Iehova. Penei kua manako ana te Ariki ko Davida i te reira i tona pakari anga. (Sala. 71:9) Akapeea a Iehova me tauturu ia tatou?

17. Eaa ta tatou ka apii mai mei te akaraanga o te tuaine Jheri?

¹⁷ Akamanako ana i te akaraanga o te tuaine ko Jheri. Kua patiia aia kia aere mai ki tetai apii no te akono i te Are Uipaanga Patireia, inara kare aia e inangaro i te aere. Karanga aia: “Kua ruaine au, e takaua, e kare au e kite i te angaanga. Kare oku puapinga.” Te po i mua ake ka  apii ei, kua pure akatenga au kia Iehova no te tauturu. Tae au ki te Are Uipaanga Patireia i tera mai rā, kua manako au me ka tau rai au ki konei. I roto i te porokaramu, kua akakite te vaa tuatua e ko to tatou au tu karape maata kia inangaro i ta Iehova e apii maira. Maara ia Jheri: “I toku manako, ‘kua rauka iaku teia tu karape!’ Kua aue au, no te mea kua pau mai a Iehova i taku pure. Akapapu mai aia e e apinga akaperepere taku ka rauka i te oronga e ka puareinga ua aia i te apii mai iaku!” Karanga a Jheri: “Te tomo anga ki roto, kua ru au e kua taitaia. Inara kua oki mai au ma te tu papu, maroiroi e te akaperepereia!”

18. Eaa ta te Pipiria e akaari maira e ka akaperepere a Iehova i ta tatou akamori anga me ruaine tatou?

¹⁸ Me ruaine tatou, e mea papu e angaanga ta Iehova ka oronga mai na tatou. (Sala. 92:12-15) Kua apii mai a Iesu ia tatou noatu e kua kotingaia to tatou turanga e te meangiti ta tatou ka rauka i te rave, ka akaperepere a Iehova ia tatou me tavini iaia. (Luka 21:2-4) No reira e akamou ki runga i taau ka rauka. Ka rauka ia koe, tetai akaraanga, tuatua no runga ia Iehova, pure no te au taeake e te akamaroiroi i tetai e tetai kia vai tiratiratu. Te manako maira a Iehova ia koe ei oa rave angaanga, kare no taau i rauka, mari ra no toou tu puareinga ua i te akarongo kiaia.—1 Kori. 3:5-9.

19. Eaa te akapapuanga ta Roma 8:38, 39 e oronga maira kia tatou?

¹⁹ E tikaanga ngateitei no tatou i te akamori ia Iehova, e Atua tei akaperepere i te aronga e tavini ra iaia! Kua anga aia ia tatou kia rave i tona anoano, e kua riro te akamori anga mou ei akatupu i te oraanga mataora. (Apo. 4:11) Noatu te manako ra tetai aronga ia tatou e e puapinga kore, kare ra a Iehova e manako akapera ana ia tatou. (Ebe. 11:16, 38) Me paruparu tatou no te maki, te ngata o te moni, me kore te ruaine, e akamaara tatou kare te reira e akatakake ia tatou mei te aroa o to tatou Metua i te rangi.—E tatau ia Roma 8:38, 39.