1-2. Саве ситуациенцар соочинена пе бут Јеховаскере слуге, хем сар адава шај те влијајнел упри ленде?

РАЗМИСЛИН башо акала трин ситуацие: Јекх терно пхрал дознајнела кај иси ле пхаро насвалипе. Јекх буќарно пхрал со иси ле повише таро пинда берш ачховела бизи бути хем иако трудинела пе бут, нашти те аракхел јавер бути. Јекх верно попхури пхен нашти те керел добором бут ки служба е Јеховаске сар англедер.

² Ако ту да аракхљовеа ки слично ситуација, шај мислинеа туке кај на сиан више корисно. Асавке околностија шај те лен тло бахталипе, те керен те дикхе лошно ки туте хем те руминен тле односија е јаверенцар.

3. Сар дикхена ко манушикано живото о Сатана хем адала со контролиринела лен?

³ О свето сикавела исто сар е Сатанаскоро стави спрема о манушикано живото. Ов отсекогаш понашинела пе сине е манушенцар сар те пхене на врединена ништо. Ни хари на жалинѓа е Ева кеда вакерѓа лаке кај ка овел слободно ако на шунела е Девле, иако бут шукар џанља кај и казна башо адава тано о мерибе. О Сатана цело време контролиринела о трговско, о политичко хем о религиозно систем акале светоскоро. Адалеске ни хари на изненадинела амен со бут бизнисменија, политичарија хем верска водачија нане лен нисаво поштовање спрема о манушикано живото хем на грижинена пе сар осетинена пе о мануша.

4. Со ка дикха ки акаја статија?

⁴ Ама, о Јехова мангела те уверинел амен кај врединаја хем кај ов тано аменцар кеда накхаја таро пхаре ситуацие кола со шај те керен аменге негативна чувствија  (Пс. 136:23; Рим. 12:3). Ки акаја статија ка дикха сар о Јехова поможинела аменге: 1) кеда сием насвале, 2) кеда иси амен финансиска проблемија хем 3) кеда мислинаја кај на сием више корисна ки служба адалеске со сием пхуре. Ама, најангле те дикха соске шај те ова сигурна кај секова јекх амендар тано скапоцено е Јеховаске.

5. Со уверинела тут кај о мануша тане скапоцена е Јеховаске?

⁵ Иако сием створиме таро право е пхувјакоро, амен врединаја бут повише тари јекх шака пхув (1. Мој. 2:7). Размислин само башо некобор буќа со уверинена амен кај сием скапоцена е Јеховаске. Ов створинѓа е манушен хем денѓа лен способност те сикавен лескере особине (1. Мој. 1:27). Адалеа, о мануш уло пошукар таро са о јавера материјална буќа со створинѓа, хем чхивѓа ле те грижинел пе баши Пхув хем башо животне (Пс. 8:4-8).

6. Кова јавер доказ иси амен кај о Јехова ценинела е несовршена манушен?

⁶ Чак откеда грешинѓа о Адам, о Јехова понадари да ценинела сине е манушен. Добором бут ценинела амен со денѓа пле мангле Чхаве, е Исусе, сар откупнина башо амаре гревија (1. Јов. 4:9, 10). Адалеске со денѓа адаја жртва, о Јехова ка воскреснинел околен со муле башо е Адамескоро грево. Ки ленде тане вклучиме хем о праведна хем окола со нане праведна (Дела 24:15). Лескоро Лафи уверинела амен кај сием леске скапоцена бизи разлика дали сием насвале, чороле или пхуре (Дела 10:34, 35).

7. Кола јавера доказија сикавена е Девлескере слугенге кај тане скапоцена е Јеховаске?

⁷ Иси јавера да причине соске шај те ова увериме кај о Јехова ценинела амен. Ов дикхља сар реагиринѓем кеда шунѓем о шукар хабери хем привлечинѓа амен ки песте (Јован 6:44). Кеда почминѓем те кера чекорија те шај те ова леа попаше, ов да керѓа чекорија те шај те овел аменцар попаше (Јак. 4:8). Исто аѓаар, о Јехова дела пло време хем пло трудо те шај те сикавел амен, хем адалеа сикавела кобор бут сием леске важна. Ов џанела саве сием акана хем саве шај те ова ки иднина. Освен адава, ов дела амен советија хем укоринела амен адалеске со мангела амен (Изр. 3:11, 12). Акала тане чаче силна доказија кај сием бут скапоцена е Јеховаске!

8. Сар шај о лафија таро Псалм 18:27-29 те поможинен аменге исправно те дикха ко амаре проблемија?

⁸ Иако несаве мислинена сине кај о цари о Давид на врединела ништо, ов џанља кај о Јехова мангела ле хем поддржинела ле. Адава поможинѓа леске исправно те дикхел ки пли ситуација (2. Сам. 16:5-7). Ако сием обесхрабриме или ако соочинаја амен проблеменцар, о Јехова шај те поможинел аменге појавер те дикха ко буќа хем те накхава секоја пречка. (Читин Псалм 18:27-29.) Кеда џанаја кај ов поддржинела амен, ништо нашти те чхинавел амен те служина леске бахтале (Рим. 8:31). Те дикха трин конкретна ситуацие ко кола со на смејнаја те бистра кај о Јехова мангела амен хем ценинела амен.

9. Саве чувствонцар шај боринаја амен кеда сием насвале?

⁹ Кеда сием насвале, адава шај те влијајнел упро амаре чувствија хем те чхивел амен те мислина кај на сием више корисна башо ништо. Шај лаџаја адалеске со о мануша дикхена кај сием насвале или адалеске со зависинаја таро јавера. Чак кеда о јавера на дикхена кај сием насвале, шај пхаро аменге соске лаџаја кај нашти те кера добором  бут сар англедер. Сар охрабринела амен о Јехова кеда накхаја таро асавко пхаро периоди?

10. Спрема Изреки 12:25, со шај те поможинел аменге кеда сием насвале?

¹⁰ Кеда сием насвале, „о шукар лафи“ шај бут те охрабринел амен. (Читин Изреки 12:25.) И Библија тани пхерди шукар лафенцар кола со сетинкерена амен кај е Јеховаске сием скапоцена иако сием насвале (Пс. 31:19; 41:3). Ако повише пути читинаја адала лафија, о Јехова ка поможинел аменге те икљова ко крајо е негативно чувствонцар кола со мучинена амен адалеске со сием насвале.

11. Сар о Јехова поможинѓа јекхе пхралеске?

¹¹ Те дикха о пример јекхе пхралескоро со викинела пе Хорхе. Кеда сине терно, ов насвалило таро јекх пхаро насвалипе кова со сигате напредујнела сине. Адалеске, ов мислинела сине кај на врединела ништо. О Хорхе вакерела: „На мислинѓум кај ка овел манге добором пхаро те икљовав ко крајо е последиценцар таро насвалипе. Сој панда полошно, лаџава сине адалеске со мло насвалипе сине бут приметливо англо мануша. Џикоте мло састипе овела сине са полошно, размислинава сине кобор ка променинел пе мло живото. Осетинава ман сине бут тажно хем таро вило молинава сине е Јехова те поможинел манге“. Сар поможинѓа леске о Јехова? О Хорхе вакерела: „Адалеске со нашти сине те концентриринав ман, читинава сине само по некобор стихија таро Псалмија кола со сикавена кобор о Јехова грижинела пе пле слугенге. Повише пути читинава сине адала стихија секова диве хем чаче дена ман сине бари утеха. Сар со накхела сине о време, о јавера почминѓе те приметинен кај асава почесто. Чак пхенѓе манге кај охрабринава лен мле позитивно ставеа. Халиљум кај о Јехова одговоринѓа  ко мле молитве! Поможинѓа манге те дикхав ман јавере јакхенцар. Почминѓум повише те мислинав ко адава со ов вакерела ки Библија — кај бут ценинела ман иако сиум насвало“.

12. Ако сиан насвало, со шај те кере те шај те добине е Јеховаскири помош?

¹² Ако туте да иси тут несаво насвалипе, ов сигурно кај о Јехова џанела таро со накхеа. Молин ле те поможинел туке те шај исправно те дикхе ки тли ситуација. А пало адава, читин и Библија те шај те сетине тут ко шукар лафија кола со о Јехова денѓа те овен пишиме ки лате. Посебно концентририн тут ко стихија кола со сикавена кобор ов ценинела пле слуген. Аѓаар ка уверине тут кај о Јехова тано шукар спрема сарине со верно служинена леске (Пс. 84:11).

13. Сар шај те осетинел пе јекх ром хем дад ако нашавела пли бути?

¹³ Секова ром хем дад мангела те грижинел пе башо потребе пле фамилијакере. Ама замислин туке кај несаво пхрал ачхола бизи бути. Иако бут трудинела пе те аракхел бути, на успејнела ко адава. Ко асавке околностија шај ка мислинел кај на врединела. Сар ка поможинел леске адава со ка размислинел башо е Јеховаскере ветувања?

14. Соске о Јехова исполнинела адава со ветинела?

¹⁴ О Јехова секогаш исполнинела адава со ветинела (Ис. Нав. 21:45; 23:14). Адава керела ле таро некобор причине. Прво, адава ка влијајнел упро лескоро анав, јавере лафенцар упро лескоро углед. О Јехова ветинѓа кај ка грижинел пе пле верна слугенге хем осетинела пе должно те икерел пе ко пло лафи (Пс. 31:1-3). Освен адава, џанела кај амен, сар дело тари лескири фамилија, ка ова бут разочариме ако на грижинела пе аменге. Ов ветинела кај ка дел  амен са со ваљани аменге хем ко материјално хем ко духовно поглед. Ништо нане те чхинавел ле те исполнинел адава со ветинѓа! (Мат. 6:30-33; 24:45).

15. а) Саве проблеменцар соочинѓе пе о христијања ко прво веко? б) Ко со уверинела амен о Псалм 37:18, 19?

¹⁵ Ако на бистраја соске о Јехова исполнинела пле ветувања, шај те ова увериме кај ка поможинел аменге кеда ка овен амен финансиска проблемија. Те дикха со случинѓа пе е христијаненцар ко прво веко. Кеда почминѓа о прогонство против о собрание ко Ерусалим, сарине нашле, освен о апостолија (Дела 8:1). Размислин со значинела сине адава. О христијања соочинѓе пе чоролипаја веројатно адалеске со нашавѓе пле кхера хем пли бути. Сепак, о Јехова на мукхља лен хем ола понадари да служинена леске сине бахтале (Дела 8:4; Евр. 13:5, 6; Јак. 1:2, 3). Ов поможинѓа адале верна христијаненге, а ка поможинел аменге да. (Читин Псалм 37:18, 19.)

16. Соске шај те мислина аменге кај амари служба нане више добором важно е Јеховаске?

¹⁶ Сар со пхујроваја, шај те почмина те мислина аменге кај нашти те кера бут е Јеховаске. Шај е царе е Давиде да мучинена ле сине иста чувствија кеда пхурило (Пс. 71:9). Сар шај о Јехова те поможинел аменге?

17. Со сикљоваја тари јекх пхен со викинела пе Чери?

¹⁷ Размислин баши јекх пхен со викинела пе Чери. Ој сине каними ко јекх состанок башо одржибе амаре дворане, ама на мангља те џал. И Чери вакерѓа песке: „Пхури сиум, удовица сиум, хем нане ман нисави вештина колаја со ка шај те овав корисно е Јеховаске. Мандар нане ле нисави корист!“ И рат англедер адава состанок, ој молинѓа  пе е Јеховаске таро вило. Кеда ресља ки сала о јавер диве, пучела пе сине соске уствари али. Ама ко состанок, јекх таро говорникија вакерѓа кај амари најважно вештина тани и желба те ова сикавде таро Јехова. И Чери вакерела: „Мислинѓум манге — па, ман иси ман адаја вештина! Почминѓум те ровав кеда халиљум кај о Јехова одговоринѓа ки мли молитва. Ов уверинѓа ман кај иси ман нешто вредно со шај те дав, хем кај ов тано спремно те сикавел ман!“ Кеда сетинела пе ко адава и Чери вакерела: „Џикоте џава сине ко состанок осетинава ман сине вознемирими хем обесхрабрими. Ама, кеда иклиљум адатхар осетинава ман сине охрабрими хем корисно“.

18. Сар сикавела и Библија кај о Јехова понадари да ценинела амари служба иако сием ко попхуре берша?

¹⁸ Чак ако сием ко попхуре берша, шај те ова сигурна кај е Јехова иси ле панда бути аменге (Пс. 92:12-15). О Исус сикавѓа амен кај, бизи разлика кобор сием ограничиме или кобор тикне дикхјона аменге о буќа со кераја лен, о Јехова ценинела са со кераја баши лесте ки служба (Лука 21:2-4). Адалеске, мислин ко адава со шај те кере. На пример, шај те кере лафи башо Јехова, те молине тут е пхраленге хем те охрабрине е јаверен те ачхон верна. О Јехова дикхела тут сар пло соработнико, на башо адава кобор кереа, него адалеске со сиан леске послушно таро вило (1. Кор. 3:5-9).

19. Ко со уверинена амен о лафија таро Римјаните 8:38, 39?

¹⁹ Кобор сием благодарна со служинаја е Јеховаске, о Девел кова со чаче ценинела околен сој леске верна! Ов створинѓа амен те кера лескири волја, хем адалеске адава дела амен чачутни смисла ко амаро живото (Отк. 4:11). Иако е светоске шај на врединаја ништо, о Јехова на лаџала амендар (Евр. 11:16, 38). Чак ако сием обесхрабриме адалеске со иси амен несаво насвалипе, финансиска проблемија или адалеске со сием ко попхуре берша, никогаш ма те бистра кај ништо нашти те одвојнел амен таро мангипе амаре Дадескоро сој ко небо! (Читин Римјаните 8:38, 39.)