1-2. Kola problemija isi len but e Jehovase sluge hem sar o problemija šaj te utičinen upro olende?

ZAMISLIN akala trin situacije: Jekhe phraljese o doktorija phenena so isi le but pharo nabormipe, kova hari pohari ljela olesi snaga. Jekh bučarno phral kova isi le pobuter ando 50 berš, našali pi buti hem iako dela sa pestar, našti te arakhi aver buti. Jekh verno phen sebepi soj tani phuri, našti te čerel odova so angleder čerdža ki pi služba e Jehovase.

² Ako hem tu isi tut sar olenge problemija, tegani šaj hem tu osetineja tut so više na hijan korisno. Asavke problemija šaj te ljen to bahtalipe, šaj te čhiven tut lošno te misline kokri tutar hem šaj te utičinen ko toklo amalipe averencar.

3. Sar o Beng hem okola upro kaste ov utičini ponašinena pe premalo manuša?

³ Akava sveto upro manuša hem ko dživdipe dikhela sar o Beng. O manuša niked na hine važna e Bengese. Ov bezosećajno vačerdža e Evače so oj ka ovel slobodno ako na šunela e Jehova, iako džandža so i kazna tani o meribe. I politika, i trgovina hem i hovavni religija oduvek hine ko e Bengese vasta. Odolese, na hijam iznenadime so o but barvale manuša, o političarija hem o religiozna vođe na poštujinena e manušengo dživdipe hem na brininena pe odolestar sar o manuša osetinena pe.

4. So ka dikha ko akava članko?

⁴ O Jehova mangela amen te džana so hijam vredna hem pomožini amen ked sebepi o pharipa šaj te mislina so ništa na vredinaja (Ps. 136:23; Rimlj. 12:3). Ko akava članko ka dikha sar o Jehova pomožini amen ko akala situacije: (1) Ked hijam naborme, (2) ked nane lokho te zaradine  e dživdipase, hem (3) ked sebepi so phuriljam mislinaja so našti više ništa te čera ki služba. Ama, najangleder ka dikha sose šaj te ova uverime so svako amendar tano vredno e Jehovase.

5. So mothovi so o manuša tane vredna e Jehovase?

⁵ Iako amen hijam čerde ando e phuvjako prao, amen hijam but povredna ando odova prao (Post. 2:7). Te dikha nekobor razlogija sose amen džanaja so hijam vredna e Jehovase. Ov čerdža amen adžahar te šaj te mothova olese osobine (Post. 1:27). Adžahar, ov mothovdža amendže so vredinaja pobuter ando sa aver so čerdža hem so isi le poverenje ano amende so šukar ka brinina amen kotar i phuv hem kotar o životinje (Ps. 8:4-8).

6. So pana mothovi so o nesavršena manuša tane vredna e Jehovase?

⁶ Iako o Adam grešindža, e Jehovase o manuša tane pana vredna. Olese hijam odobor vredna so dindža pe Čhave, e Isuse, te merel amendže te šaj amare grehija te oven oprostime (1. Jov. 4:9, 10). Sebepi so o Adam grešindža, but manuša mulje. Ama, o Jehova ka vazdel hem „okolen soj tane pravedna hem okolen soj tane nepravedna“, odolese so o Isus dindža po dživdipe (Dela 24:15). E Devleso Lafi mothovi so sare amen hijam but vredna olese, iako hijam naborme, čorore, ja phure (Dela 10:34, 35).

7. Kola pana razlogija isi amen te verujina so hijam vredna e Jehovase?

⁷ Isi amen pana razlogija te verujina so hijam but vredna e Jehovase. Ov privucindža amen koro peste hem dikhlja sar amen reagujindžam ko šukar haberi (Jov. 6:44). Ked amen počmindžam te ova oleja paše hem ov počmindža te ovel popaše amencar (Jak. 4:8). Isto adžahar, ov mothovi amendže so olese hijam vredna, adžahar so sikavi amen ko but načinja. Ov džanela svakone amendar, džanela save hijam akana hem save šaj te ova. Odolese so mangela amen, ov hem ispravini amen (Posl. 3:11, 12). Odova mothovi so čače hijam vredna e Jehovase!

8. Sar o lafija ando Psalam 18:27-29 šaj te pomožinen amen te dikha ko amare problemija averčhane?

⁸ Anglo e manušenge jačha, o David na hine vredno. Ama, ov džandža so o Jehova mangela le hem so pomožini lese. Odova pomožindža le te istrajini ko pharipa hem te ovel le ispravno stav premalo pekle problemija (2. Sam. 16:5-7). Savo god problemi te ovel amen, o Jehova šaj te pomožini amen ko buča te dikha averčhane hem te ikljova ko krajo bilo kova problemeja. (Čitinen Psalam 18:27-29.) Ked tano o Jehova amencar, tegani ništa našti te čhinavi amen te služina olese radosno (Rimlj. 8:31). Akana ka dikha trin situacije ko kola tano važno te na bistra so o Jehova mangela amen hem so hijam vredna olese.

9. Sar šaj o nabormipe te utičini upro amende?

⁹ O nabormipe šaj odobor te utičini upro amare osećanja so šaj te čhivel amen te mislina so više nikase na hijam korisna. Amendže šaj te ovel ladžavo ked o manuša dikhena so hijam naborme ja so zavisinaja averendar. Iako šaj avera na džanena so hijam naborme, amendže šaj te ovel ladžavo odolese so više našti te čera odova so angleder čerdžam. Sar šaj o Jehova te pomožini amen ked adžahar osetinaja amen?

10. Premalo Poslovice 12:25, so šaj te pomožini amen ked hijam naborme?

 ¹⁰ Ked hijam naborme, jekh „šukar lafi“ šaj but te ohrabrini amen. (Čitinen Poslovice 12:25.) Ki Biblija, o Jehova pisindža šukar lafija kola mothovena amendže so amen hijam but važna hem vredna olese, čak iako hijam naborme (Ps. 31:19; 41:3). Ked čitinaja odola lafija, pa čak hem više putija, o Jehova ka pomožini amen te borina amen e negativno osećanjencar kola isi amen sebepi so hijam naborme.

11. Sar o Jehova pomožindža jekhe phraljese?

¹¹ Te dikha o iskustvo ando amaro phral o Horhe. Ked hine terno, ov naborsalo kotar jekh pharo nabormipe kolestar but sigate našaldža pi snaga. Sebepi odova, ov mislindža so ništa na vredini. Ov phenela: „Na džandžum sar mo nabormipe ka utičini upro mande. Hine maje but ladžavo so sebepi mo nabormipe sare bi dikhena man. Sar mo nabormipe ulo sa pobaro, počmindžum te razmislinav odolestar kobor mo dživdipe ka menjini pe. Hijum le but obeshrabrimo hem but molindžum e Jehova te pomožini man.“ Sar o Jehova pomožindža le? Ov phenela: „Hine maje but pharo te pamtinav odova so čitindžum, sebepi so but razmislindžum ando mo nabormipe. Odolese čitindžum samo nekobor stihija ando Psalmija kola mothovena so o Jehova brinini pe pekle slugendar. Svako dive čitindžum odola stihija kola čače but ohrabrindže man. Sar dželo o vreme, avera počmindže te dikhen so pobuter asava. Čak phendže so moklo pozitivno stav hrabrini len. Haljiljum so o Jehova šundža mekle molitve. Ov pomožindža man upro mande te dikhav averčhane. Razmislindžum so phenela e Devleso  Lafi odolestar sar ov dikhela man iako hijum nabormo.“

12. So šaj te čere te šaj o Jehova te pomožini tut ked hijan nabormo?

¹² Ako hem tu hijan nabormo, šaj te ove sigurno so o Jehova džanela sar osetineja tut. Molin e Jehova te pomožini tut ko ispravno način te dikhe odova so desini pe tuče. Palo odova, ki Biblija rode o stihija kola o Jehova pisindža baš tuče. Razmislin ando stihija kola mothovena kobor tane vredna e Jehovase olese sluge. Tegani ka dikhe kobor o Jehova brinini pe pekle slugendar kola verno služinena olese (Ps. 84:11).

13. Sar šaj jekh poglavari te osetini pe ked našali pi buti?

¹³ Svako poglavari mangela te anel pe porodicače odova so valjani. Ama, jekh phral šaj te našali pi buti iako na čerdža ništa pogrešno. Ov šaj te del sa pestar te arakhi aver buti, ama našti te arakhi la. Odolese, ov šaj te mislini so ništa na vredini. Sar šaj te pomožini lese ako razmislini ando e Jehovase obećanja?

14. Sose o Jehova ičeri pe ko poklo lafi?

¹⁴ O Jehova uvek ičeri pe ko poklo lafi (Is. Nav. 21:45; 23:14). Ov odova čerela sebepi nekobor razlogija. Jekh ando razlogija tano sose sa so čerela utičini upro leso nav. O Jehova dindža po lafi so ka brinini pe pekle verno slugendar, hem ov osetini soj tano dužno te ispunini po obećanje (Ps. 31:1-3). Uzo odova, o Jehova džanela so amen ka ova obeshrabrime ako ov na brinini pe okolendar kola tane deo andi olesi porodica. Ov dindža po lafi so ka del amen odova so valjani amendže te živina hem odova so valjani te šaj verno  te služina olese. Ništa na ka čhinavi le te čerel odova! (Mat. 6:30-33; 24:45).

15. (a) Kola pharipa hine len o hrišćanja ko prvo veko? (b) Ko so uverinena amen o lafija ando Psalam 37:18, 19?

¹⁵ Ked ičeraja ki godi sose o Jehova ičeri pe ko poklo lafi, tegani amen šaj te ova sigurna so ov ka pomožini amen ked tano amendže pharo te zaradina dživdipase. Te dikha o primer ando prva hrišćanja. Ked i skupština ko Jerusalim hine la baro progonstvo, sare našlje osim o apostolija (Dela 8:1). Odova značindža so on verovatno našaldže pi buti hem po čher hem odolese na hine len sostar te živinen. Ama, niti o Jehova mukhlja len, niti on našaldže poklo bahtalipe (Dela 8:4; Jevr. 13:5, 6; Jak. 1:2, 3). Sar so o Jehova pomožindža odole verno hrišćanendže, adžahar ka pomožini hem tuče. (Čitinen Psalam 37:18, 19.)

16. Sose šaj te počmina te mislina so amari služba e Jehovase nane više odobor vredno?

¹⁶ Sar phurjovaja, amen šaj te počmina te mislina so akana nane but buča kola šaj te da e Jehovase. Sar khuvdža ko berša, šaj hem o kralj David adžahar mislindža (Ps. 71:9). Sar šaj o Jehova te pomožini amen?

17. So šaj te sikljova ando amare phenjako primer?

¹⁷ Te dikha o primer kotar amari phen i Džeri. Oj hine vičimi ko sastanak kuri valjandža te sikljol pe sar održinena pe amare dvorane, ama oj na manglja te džal. Oj mislindža: „Me hijum phuri, mo rom mulo hem me na džanava te čerav o buča kola tane potrebna odothe. Me na ka ovav korisno.“ Jekh rat angleder te ovel odova sastanak, oj phravdža po vilo e Jehovase  hem phendža lese sar osetini pe. Tajsato dive ked alji ki dvorana, oj pana pučlja pe da li tano olako than odothe. Ko odova sastanko jekh ando phralja phendža so jekh andi najvažno buti tani te ova spremna te mukha e Jehova te sikavi amen. I Džeri phenela: „Mislindžum ano mande: ’Pa me hijum spremno te sikavi man o Jehova‘. Počmindžum te rovav sose haljiljum so o Jehova šundža mi molitva. Ov uverindža man so ipak isi man diso vredno so šaj lese te dav hem so ov mangela te sikavi man.“ Ked akana setini pe ko odova, i Džeri phenela: „Ked resljum ko odova sastanko, hijum le but nervozno, obeshrabrimi hem phage vilesi. Ama, palo sastanko, osetindžum so o Jehova isi le poverenje upro mande, haljiljum so hijum vredno hem hijum le ohrabrimi.“

18. Sar i Biblija mothovi so o Jehova cenini odova so čerena o phure?

¹⁸ Iako phurjovaja, amen šaj te ova sigurna so o Jehova pana isi le buti amendže (Ps. 92:12-15). O buča kola šaj te čera šaj amendže tane nevažna, ama o Isus sikavdža amen so o Jehova cenini so god čeraja olese (Luka 21:2-4). Odolese, razmislin odolestar so šaj te čere. Na primer, šaj te vačere averendže ando Jehova, te moline tut tekle phraljendže hem e phenjendže ja šaj te ohrabrine averen te ačhoven verna. E Jehovase, tu hijan oleso saradniko, na sebepi odova so tu šaj te čere, nego odolese so hijan spremno te šune le (1. Kor. 3:5-9).

19. Ko so uverinena amen o lafija ando Rimljanima 8:38, 39?

¹⁹ But hijam zahvalna so šaj te služina e Jehovase kova but cenini okolen so služinena olese. Ov stvorindža amen adžahar te šaj te čera olesi volja hem odova anela amendže bahtalipe (Otkr. 4:11). Iako o manuša ko sveto šaj te mislinen so na hijam vredna, o Jehova na ladžala amendar (Jevr. 11:16, 38). Ked hijam obeshrabrime sebepi o nabormipe, o čororipe ja o phuripe, tegani valjani te setina amen so ništa našti te odvojini amen ando amare Dadeso mangipe. (Čitinen Rimljanima 8:38, 39.)