1-2. O ā tulaga o loo feagai ma le toʻatele o auauna a Ieova, ma o ā aafiaga iā i latou?

SEʻI mafaufau i faataʻitaʻiga nei e tolu: O se uso talavou ua aafia i se maʻi tugā. O se uso ua silia ma le 50 ona tausaga, ua tuli mai i lana galuega, ma e ui i le tele o ana taumafaiga e suʻe se isi galuega ae e leʻi maua. O se tuafafine matua e auauna faamaoni iā Ieova, ae ua itiiti mea e mafai ona ia faia i lana auaunaga.

² Pe afai o loo e aafia i se tasi o nei tulaga, atonu ua iā te oe le lagona ua lē toe iai la sou aogā. O na tulaga e mafai ona aveesea ai lou olioli, lē toe iai ni lagona mautinoa iā te oe lava, ma faaleagaina ai lau faiā ma isi.

3. O le ā le vaaiga a Satani ma i latou o loo ia taaʻina e faatatau i le ola o tagata?

³ O loo faaalia e le lalolagi le vaaiga a Satani i ola o tagata. Ua leva ona vaai Satani i tagata e pei e leai so latou aogā. O le lē alofa o Satani, na ia ofo atu ai iā Eva se saʻolotoga e ui na ia iloa lelei e iʻu atu i le faasalaga oti, ona o le lē usitaʻi i le Atua. Na pulea e Satani mai lava i le amataga faiga faapisinisi, faiga faapolotiki ma faiga faalotu a lenei lalolagi. E lē o se mea la e faateʻia ai le leai o se faaaloalo o le toʻatele o tagata faipisinisi, tagata faipolotiki ma taʻitaʻi lotu i le ola ma le faamamaluina o tagata.

4. O le ā o le a tatou talanoaina i lenei suʻesuʻega?

⁴ I le isi itu, e manaʻo Ieova ia lelei o tatou faalogona e faatatau iā i tatou lava, ma e fesoasoani mai foʻi o ia pe a feagai  ma tulaga e tatou te lagona ai le leai o se aogā. (Sala. 136:23; Roma 12:3) I lenei suʻesuʻega, o le a talanoaina ai auala e fesoasoani mai ai Ieova i tulaga nei: (1) Pe a tatou mafatia ona o maʻi, (2) pe a tatou feagai ma faafitauli tau tamaoaiga, ma le (3) pe afai ua oo i le tino matua ma ua lagona ua pei e leai so tatou aogā i le auaunaga iā Ieova. Ae muamua, seʻi o tatou iloilo le māfuaaga e tatou te mautinoa ai e tāua i tatou taʻitoʻatasi iā Ieova.

5. E faapefea ona e faamaonia e tāua tagata iā Ieova?

⁵ E tusa pe na faia mai i tatou i le efuefu o le eleele, ae e sili atu ona tāua i tatou nai lo o se luuga palapala e lē aogā. (Kene. 2:7) Seʻi o tatou talanoa i ni māfuaaga e tāua ai i tatou iā Ieova. Na ia foafoaina tagata ma tomai e faaata mai ai ona uiga. (Kene. 1:27) O lona faia faapea, ua ia faamamaluina ai i tatou nai lo o isi foafoaga i le lalolagi, ma tofia i tatou e vaavaaia le lalolagi ma meaola.​—Sala. 8:4-8.

6. O ā isi faamaoniga e tatou te iloa ai e tāua iā Ieova tagata lē lelei atoatoa?

⁶ E tāua pea tagata iā Ieova e ui na agasala Atamu. O le tāua tele o i tatou iā Ieova, na ia auina mai ai Iesu lona atalii pele e fai ma togiola mo a tatou agasala. (1 Ioa. 4:9, 10) O le a faaaogā e Ieova aogā o le togiola e toe faatutū ai “tagata amiotonu ma tagata amiolētonu” na maliliu ona o le agasala a Atamu. (Galu. 24:15) Ua faailoa mai e lana Afioga e tāua i tatou iā te ia, e tusa po o le ā lo tatou tulaga i le soifua mālōlōina, tulaga tau tamaoaiga po o le tulaga matua foʻi.​—Galu. 10:34, 35.

7. O ā isi māfuaaga e talitonu ai auauna a Ieova e tāua i latou iā te ia?

⁷ E iai isi māfuaaga e tatou te talitonu ai e tāua i tatou iā Ieova. Na ia tosina atu i tatou iā te ia, ma na ia mātauina le auala na tatou tali atu ai i le tala lelei. (Ioa. 6:44) A o tatou vavalalata atu iā Ieova, e vavalalata mai foʻi iā i tatou. (Iako. 4:8) E faaalu e Ieova le taimi ma le malosi e aʻoaʻo ai i tatou, ona e tāua i tatou iā te ia. E silafia e Ieova ituaiga tagata e iai i tatou taʻitoʻatasi i le taimi nei, ma le auala e tatou te agaʻigaʻi ai i luma. Ona o lona alofa e aʻoaʻia ai foʻi e Ieova i tatou. (Faata. 3:11, 12) Maʻeu le tele o faamaoniga e iloa ai e tāua i tatou iā Ieova!

8. E faapefea i upu o loo faamauina i le Salamo 18:27-29, ona aafia ai le auala e tatou te vaai ai i faafitauli?

⁸ Na manatu nisi e leai se aogā o le tupu o Tavita, ae na iloa e Tavita e alofa ma e fesoasoani Ieova iā te ia. O lenā manatu, na ia maua ai se vaaiga saʻo i lona tulaga. (2 Samu. 16:5-7) Pe a tatou lagona le lotomafatia pe feagai ma faigatā, e fesoasoani mai Ieova ia sui la tatou vaai i mea, ma manumalo mai i so o se luʻi. (Faitau le Salamo 18:27-29.) Pe a tatou maua le fesoasoani a Ieova, e leai la se mea e mafai ona taofia i tatou e auauna atu iā te ia ma le olioli. (Roma 8:31) Seʻi o tatou talanoa i na tulaga patino e tolu, pe a tulaʻi mai, e tāua ona tatou manatua e alofa Ieova iā i tatou ma e tāua i tatou iā te ia.

9. E faapefea ona aafia le auala e tatou te vaai ai iā i tatou lava ona o maʻi?

⁹ E tatou te lagona le lotovaivai pe a aafia i maʻi, ma e oo mai ai iā i tatou lagona o le lē toe aogā. E tatou te ono lagona le māsiasi pe a iloa mai e isi ua lē mafai ona tatou faia ni mea, pe ua tatou faalagolago foʻi i isi mo se fesoasoani. E tusa pe e lē o iloa mai foʻi e isi e tatou te mamaʻi, ae atonu o loo tatou tauivi pea ma faalogona māsiasi, ona ua lē mafai ona toe fai mea na masani ai. E faamalosia i tatou e Ieova i na taimi faigatā. E faapefea?

10. E tusa ai o le Faataoto 12:25, o le ā e fesoasoani iā i tatou pe a tatou mamaʻi?

 ¹⁰ Pe a tatou mamaʻi, e mafai ona faalaeiauina i tatou e se “tala lelei.” (Faitau le Faataoto 12:25.) Ua teuina e Ieova tala lelei i le Tusi Paia, e faamanatu mai ai e tāua i tatou iā te ia e ui ina tatou mamaʻi. (Sala. 31:19; 41:3) Pe a tatou faitau e lē aunoa na upu faagaeeina, o le a fesoasoani mai ai Ieova iā i tatou e feagai ma faalogona lē lelei e māfua ona o maʻi.

11. Na faapefea ona maua e se uso le fesoasoani a Ieova?

¹¹ Seʻi manatu i le mea na tupu iā Jorge. A o talavou, na aafia Jorge i se maʻi tigāina lea na ia lagona ai le lē aogā. Na ia faapea mai: “Ou te leʻi sauni e fesagaʻia aafiaga o oʻu faalogona, ma loʻu māsiasi ona o le vaai mai o tagata ou te maʻi. A o faasolo ina leaga le tulaga o loʻu maʻi, na ou mafaufau ai i suiga o le a iai loʻu olaga. Na ou matuā lagona le mafatia ma na ou talosaga atu iā Ieova mo le fesoasoani.” Na faapefea ona fesoasoani Ieova iā Jorge? “Talu ai e lē mafai ona ou uaʻi umi atu i se mea, na faalaeiauina aʻu e faitau ni nai fuaiupu o le Salamo, lea o loo faamatala mai ai le manatu mamafa o Ieova i ona tagata. Na ou toe faitau i na mau i aso taʻitasi, ma na faamāfanafanaina ma faalaeiauina ai aʻu. Na amata ona mātauina e tagata oʻu foliga fiafia. Na latou faapea mai ua faalaeiauina i latou i oʻu foliga fiafia ma na ou iloa ai ua tali mai Ieova i aʻu tatalo! Na ia fesoasoani mai e sui laʻu vaaiga iā te aʻu lava. O lea, ua amata ona ou uaʻi atu i upu o lana Afioga e faatatau i le auala e silasila mai ai o Ia iā te aʻu, e ui i loʻu maʻi.”

12. Pe a e tauivi ma se maʻi, e mafai faapefea ona e maua le fesoasoani a Ieova?

¹² Pe afai o loo e tauivi ma se maʻi, ia e mautinoa o loo silafia e Ieova ou faalogona. Ia  ʻaiʻoi atu iā te ia mo le fesoasoani ia maua se vaaiga saʻo e faatatau i lou tulaga. Ona faaaogā lea o le Tusi Paia e saʻili ai tala lelei o loo teuina e Ieova mo oe. Ia uaʻi atu i fuaiupu o loo faailoa mai ai le tāua tele iā Ieova o ana auauna. O lou faia faapea, o le a e iloa ai e agalelei Ieova i ē uma e auauna faamaoni iā te ia.​—Sala. 84:11.

13. E faapefea ona aafia se uso pe a lē toe iai sana galuega?

¹³ E faanaunau ulu uma o aiga e saunia mea e manaʻomia e tausia ai le aiga. Seʻi faapea ua tuli se uso mai i se galuega, e ui e na te leʻi faia se mea sesē. Na ia taumafai malosi e saʻili se isi ana galuega ae e leʻi taulau. O le feagai ai ma na tulaga, e na te ono lagona ai le lē aogā. E faapefea ona fesoasoani iā te ia le uaʻi atu i folafolaga a Ieova?

14. O ā māfuaaga e tausia ai e Ieova ana folafolaga?

¹⁴ E tausia pea e Ieova ana folafolaga. (Iosua 21:45; 23:14) E na te faia faapea mo le tele o māfuaaga. Muamua, ona e aafia ai Lona suafa po o lona talaaga. Ua folafola mai e Ieova e na te tausia ana auauna faamaoni, ma e naunau foʻi e faataunuu lenā tiute. (Sala. 31:1-3) Ua silafia foʻi e Ieova e tatou te lagona le lotovaivai pe afai e na te lē tausia i latou ua avea ma vaega o lona aiga. Ua ia folafola mai e na te tausia i tatou i le itu faaletino ma le itu faaleagaga, ma e leai se mea e taofia ai o ia mai i le faataunuuina o lenā folafolaga!​—Mata. 6:30-33; 24:45.

15. (a) O le ā le faafitauli na fesagaʻia e Kerisiano o le uluaʻi senituri? (e) O le ā le faamautinoaga o loo i le Salamo 37:18, 19?

¹⁵ Pe a tatou manatua māfuaaga e tausia ai e Ieova ana folafolaga, o le a mafai la ona tatou fesagaʻia ma le mautinoa faafitauli tau  tamaoaiga. Seʻi manatu i le faaaʻoaʻoga a Kerisiano i le uluaʻi senituri. Ina ua tulaʻi mai sauāga ogaoga i le faapotopotoga i Ierusalema, na ʻfaataapeapeina i latou uma seʻi vaganā ai le ʻauaposetolo.’ (Galu. 8:1) Seʻi mafaufau i faafitauli tau tamaoaiga na oo i ai! Na ono leai ni fale ma ni pisinisi a Kerisiano. Peitaʻi, e leʻi tuulafoaʻiina i latou e Ieova, ma e leʻi mou ese foʻi lo latou olioli. (Galu. 8:4; Epe. 13:5, 6; Iako. 1:2, 3) Na lagolagoina e Ieova na Kerisiano faamaoni, ma o le a ia lagolagoina foʻi i tatou.​—Faitau le Salamo 37:18, 19.

16. O le ā le tulaga e tatou te ono manatu ai po o tāua iā Ieova la tatou tapuaʻiga?

¹⁶ Pe a matua le soifua, e tatou te ono lagona ua itiiti mea e mafai ona tatou faia mo Ieova. Atonu na mafatia foʻi le tupu o Tavita i na faalogona a o faasolo ina matua. (Sala. 71:9) E faapefea ona fesoasoani mai Ieova iā i tatou?

17. O le ā e mafai ona tatou aʻoaʻoina mai i le mea na tupu i se tuafafine e igoa iā Jheri?

¹⁷ Seʻi mātau le mea na tupu i se tuafafine e igoa iā Jheri. Na valaaulia o ia e auai i se toleniga mo le faaleleia o mea i le Maota mo Sauniga, ae e leʻi manaʻo e alu. Na ia faapea mai: “Ua ou matua, ua maliu laʻu tane, ma e leai foʻi soʻu tomai e mafai ona faaaogā ai aʻu e Ieova. Ua ou lē toe aogā.” I le pō a o lumanaʻi le toleniga, na sasaa atu ai ona faalogona iā Ieova e ala i le tatalo. Ina ua taunuu i le Maota mo Sauniga i le aso na sosoo ai, na taumānatu pea o ia pe e tatau ona auai. A o faagasolo le polokalame, na faamamafa e se tasi o failauga, o le tomai e sili ona tāua o loo iā i tatou, o le lotomalie lea e aʻoaʻoina e Ieova. Na taʻua e Jheri: “Na ou faapea ifo, ua  iā te aʻu lenā tomai! Na amata ona ou tagi, ona ua ou iloa ua tali mai Ieova i laʻu tatalo. Na faamautinoa mai e Ieova e iai se tomai iā te aʻu e mafai ona ofo atu mo ia, ma e lotomalie foʻi e aʻoaʻoina aʻu!” Ua faapea atili mai Jheri: “Pe a ou toe mafaufau i le mea na tupu, na ou alu i lenā toleniga ma faalogona popole ma le lotovaivai. Ae na ou toe foʻi i le fale ma faalogona mautinoa, faalaeiauina, ma le faatāuaina!”

18. Ua faapefea ona faailoa mai e le Tusi Paia, e tāua pea iā Ieova la tatou auaunaga a o faasolo ina tatou matutua?

¹⁸ A o faasolosolo ina tatou matutua, ia mautinoa o loo iai pea galuega a Ieova mo i tatou. (Sala. 92:12-15) Na aʻoaʻoina i tatou e Iesu, e tusa lava pe e tatou te manatu e itiiti tomai ma mea e mafai ona tatou faia, ae e faatāua e Ieova so o se mea e mafai ona tatou faia e auauna ai iā te ia. (Luka 21:2-4) Ia uaʻi atu i mea e mafai ona e faia. O se faaaʻoaʻoga, e mafai ona e talanoa i isi e uiga iā Ieova, tatalo mo ou uso, ma faalaeiau isi ia tumau ma le faamaoni. E silasila Ieova iā te oe o sē e la te galulue faatasi, e lē ona o mea e mafai ona e faia, ae ona o lou lotomalie e usiusitaʻi iā te ia.​—1 Kori. 3:5-9.

19. O le ā le faamautinoaga o loo i le Roma 8:38, 39 mo i tatou?

¹⁹ Maʻeu lo tatou lotofaafetai ona o loo tatou tapuaʻi iā Ieova, o se Atua e faatāuaina moni i latou e auauna iā te ia! Na ia foafoaina i tatou e fai lona finagalo, ma ua faamalieina o tatou olaga i le tapuaʻiga moni. (Faaa. 4:11) Atonu e ui e lē aogā i tatou i le vaaiga a le lalolagi, ae e lē o māsiasi Ieova iā i tatou. (Epe. 11:16, 38) Pe a tatou lagona le lotovaivai ona o maʻi, faafitauli tau tamaoaiga, ma le soifua matua, ia tatou manatua e leai lava se mea e mafai ona faateʻaeseina i tatou mai i le alofa o lo tatou Tamā i le lagi.​—Faitau le Roma 8:38, 39.