1-2. Un fuka ta miti sömëni u dee sëmbë u Jehovah, nöö unfa dee fuka aki sa mbei soni ko dë da de?

BOO buta pakisei a dee dii woto aki: Wan njönku baaa go a data, hën di data piki ën taa a abi wan taku siki di o mbei a o ta suwaki nango nöömö. De puu wan baaa di pasa 50 jaa, a wooko. Nöö hii fa a ta mbei taanga möiti faa feni wan woto wooko, tökuseei an ta feni möönsö. Wan sisa di ko gaandi kaa, an sa ta du hia soni da Jehovah möön.

² A sa kan taa wan u dee fuka aki ta miti i, nöö kandë i ta fii kuma ja dë na wan hojo soni möön. Dee lö fuka aki sa mbei ja dë waiwai möön, de sa mbei i fii bookosaka, söseei de sa mbei i ku woto sëmbë an dë gaan mati möön.

3. Unfa Saatan ku dee sëmbë dee a ta tii, ta si di libi u wan sëmbë?

³ Dee sëmbë dee an ta dini Jehovah ta si di libi kumafa Saatan ta si ën. Gaanduwe kaa Saatan ta si di libi fuu kuma wan sösö soni. A bi piki Eva taa ee a bi pasa Gadu buka, nöö a bi o ko fii, hii fa a bi sabi taa dëdë Eva bi o dëdë te a du di soni aki. Saatan hën ta tii di bai di sëmbë ta bai soni ta sei a di goonliba aki, hën ta tii politiki soni u di goonliba aki, söseei hën ta tii hii dee poipoi keiki u di goonliba aki. Fëën mbei an ta foondo u te u ta si taa dee sëmbë dee ta bai soni ta sei a di goonliba aki, dee politikima, ku dee keiki fesima an ta si di libi u wan sëmbë kuma wan gaan soni. Söseei an ta foondo u tu te u ta si taa de an ta booko de hedi ku di fasi fa wotowan ta fii.

4. Andi woo taki a di woto aki?

 ⁴ Jehovah an dë kuma Saatan. Jehovah kë fuu sabi taa u dii nëën wojo, nöö a ta heepi u te soni ta miti u di ta mbei u fii kuma wa dë na wan hojo soni (Ps. 136:23; Lom. 12:3). A di woto aki woo taki unfa Jehovah ta heepi u te: (1) U dë ku suwaki, (2) te a ta taanga da u fuu feni wan wooko, ku (3) te u ko gaandi kaa, hën u ta fii kuma wa sa du na wan bumbuu soni da Jehovah möön. Ma boo luku fosu faandi mbei u sa dë seiki taa hiniwan fuu dii a Jehovah wojo.

5. Andi i si di mbei i sa taki taa Jehovah ta kai libisëmbë gaan soni?

⁵ Hii fa goondoti Jehovah bi tei mbei u, tökuseei u dii gaanfa möön goondoti (Ken. 2:7). Boo luku wantu soni di mbei u sa taki taa Jehovah kai u gaan soni. Jehovah mbei libisëmbë a sö wan fasi taa de sa ta djeesi ën a dee fasi dee a abi (Ken. 1:27). U di a du di soni aki, mbei u sa taki taa a kai libisëmbë gaan soni möön hii dee woto soni di a mbei buta a goonliba aki. Söseei a buta u fuu seeka di goonliba, söseei fuu ta sölugu dee mbeti.​—Ps. 8:4-8.

6. Un woto soni mbei u sa taki taa Jehovah ta kai zöndu libisëmbë gaan soni?

⁶ Baka di Adam bi du zöndu seei, libisëmbë bi dii a Jehovah wojo jeti. A lobi u sö tee taa a manda Jesosi, di Womi Mii fëën di a bi lobi, faa ko paka zöndu da u (1 Joh. 4:9, 10). U di Adam bi du zöndu, mbei hii u tuu ta dëdë. Ma u di Jesosi paka di lusupaima da u, mbei Jehovah sa weki dee sëmbë dee dëdë, ko a libi baka. Hën da „dee bi libi bunu a Masa Gadu wojo ku dee an bi libi bunu tuu” (Tjab. 24:15). Di Wöutu u Gadu ta taki taa Jehovah ta kai u gaan soni aluwasi ee u dë ku suwaki, aluwasi ee u pooti, nasö ee u ko gaandi kaa.​—Tjab. 10:34, 35.

7. Un woto soni ta lei dee dinima u Jehovah taa de dii a Jehovah wojo?

⁷ Woto soni dë di mbei u sa taki taa Jehovah kai u gaan soni. A hai u ko nëën, nöö a bi ta buta pakisei a di fasi fa u bi ta du soni di u bi jei di bunu buka (Joh. 6:44). Di u bi ta mbei möiti fuu ku Jehovah ko dë möön gaan mati, nöö hënseei bi ta ko zuntu ku u (Jak. 4:8). Jehovah ta tei ten ku kaakiti tu u lei u soni. Di soni aki ta lei u unfa u dii nëën wojo tjika. Jehovah sabi unfa u dë nöunöu, nöö a sabi tu un pei sëmbë u sa ko dë bakaten. A ta bai u a soni tu, u di a lobi u (Nöng. 3:11, 12). Dee soni aki ta lei u gbelingbelin unfa u dii a Jehovah wojo tjika!

8. Unfa Psalöm 18:27-29 sa heepi u te fuka ta miti u?

⁸ So sëmbë bi ta si Könu Dafiti kuma wan sösö sëmbë, ma tökuseei a bi sabi taa Jehovah bi lobi ën, söseei a bi sabi taa Jehovah bi ta heepi ën. U di Dafiti bi fusutan di soni aki, mbei a bi ta si soni a wan soifi fasi, nöö a bi ta hoi dou te fuka bi ta miti ën (2 Sam. 16:5-7). Te u ta fii bookosaka, nasö te fuka ta miti u, Jehovah sa heepi u fuu si soni a di soifi fasi, nöö a sa heepi u fuu pasa hiniwan fuka di ta miti u. (Lesi Psalöm 18:27-29.) Te Jehovah dë a di së fuu, nöö hii juu woo ta dini ën waiwai go dou (Lom. 8:31). Boo taki u dii soni di sa mbei a taanga da u fuu si taa Jehovah lobi u, söseei taa u dii nëën wojo.

9. Unfa u sa ta fii te u dë ku suwaki?

⁹ U sa ta fii bookosaka te u dë ku suwaki. A sa mbei u fii kuma wa dë wan hojo soni. Kandë sen sa kisi u te sëmbë si taa wan soni du u, nasö te u musu ta langi a wotowan u de heepi u ku soni. Aluwasi ee wotowan an sabi taa  u dë ku suwaki, tökuseei useei sa ta fii sen, u di wa sa du dee soni dee u bi ta du fosu möön. Te soni dë sö, nöö Jehovah ta da u taanga. Unfa a ta du di soni aki?

10. Andi Nöngö 12:25 ta taki taa sa heepi u te u dë ku suwaki?

¹⁰ A ta da u taanga „te sëmbë ta fan a wan suti fasi ku” u, te u dë ku suwaki. (Lesi Nöngö 12:25.) Jehovah mbei sëmbë sikifi sömëni soni a di Bëibel, di ta lei u taa u dii nëën wojo aluwasi ee u dë ku suwaki (Ps. 31:19; 41:3). Te u lesi dee pisi aki hiniwan daka, nöö Jehovah sa heepi u ku dee bookohedi dee u ta ko abi te u dë ku suwaki.

11. Unfa Jehovah bi heepi wan baaa?

¹¹ Boo taki u wan baaa de kai Jorge. Di Jorge bi möön njönku, a bi kisi wan siki di bi ta ko möön hogi daka fu daka, nöö di siki aki bi ta mbei Jorge fii kuma an dë wan hojo soni. Jorge bi taki taa: „Ma bi sabi taa sö di siki aki bi o ta mbei mi ta fii. Ma bi sabi taa sö mi bi o ta fii sen, u di di siki aki bi ta mbei sëmbë buta pakisei a mi. Möön di siki u mi bi nango fesi, möön mi bi ta pakisei unfa di libi u mi bi o ko dë. Mi bi ta fii bookosaka seei, nöö mi bi ta begi Jehovah faa heepi mi.” Unfa Jehovah bi heepi Jorge? Jorge taki taa: „Ma bi sa ta buta pakisei longi a soni. Fëën mbei wan sëmbë u di kemeente ka mi dë bi piki mi taa mi bi sa ta lesi wantu vers nöö u di buku Psalöm, di ta lei taa Jehovah ta booko hën hedi ku dee dinima fëën. Hiniwan daka mi bi ta toona lesi dee tëkisi aki, nöö de bi ta kötö mi hati seei. Baka wan pisiten, hën sëmbë bi si taa mi bi ko ta lafu möön gaanfa. De bi taki seei taa de ta feni taanga, te de si taa mi ta dë waiwai. Mi bi ko si taa Jehovah bi piki dee begi u mi! A bi heepi mi u mi si soni woto fasi. Mi bi bigi ta buta pakisei a di fasi fa di Wöutu fëën ta taki taa a ta si mi, hii fa mi dë ku suwaki.”

12. Unfa Jehovah sa heepi i, te i dë ku wan suwaki?

 ¹² Ee i dë ku wan suwaki, i sa dë seiki taa Jehovah sabi unfa soni dë da i. Begi Jehovah faa heepi i sö taa i sa ta si soni a di soifi fasi. Suku dee soni di Jehovah mbei sëmbë sikifi a di Bëibel, di ta da u kötöhati. Buta pakisei a dee tëkisi dee ta lei unfa Jehovah kai dee dinima fëën gaan soni tjika. Te i ta du dee soni aki, nöö joo si taa Jehovah ta libi bunu ku dee sëmbë dee ta dini ën ku hii de hati.​—Ps. 84:11.

13. Unfa wan hedima u wan wosudendu sa ta fii te a lasi wooko?

¹³ Hii hedima u wan wosudendu, ta kë taa dee sëmbë fëën musu feni dee soni di de abi fanöudu. Ma boo taa wan baaa ko lasi di wooko fëën, hii fa na soni a du di mbei a lasi ën. Di baaa aki ta mbei taanga möiti faa feni wan woto wooko, ma an ta feni möönsö. U di di soni aki miti ën, mbei a sa ta fii kuma an dë wan hojo soni. Unfa di buta di a o ta buta pakisei a dee soni di Jehovah paamusi u sa heepi ën?

14. Faandi mbei Jehovah ta du dee soni dee a ta taki?

¹⁴ Hii juu Jehovah ta du dee soni dee a ta taki (Jos. 21:45; 23:14). Sömëni soni dë di mbei Jehovah ta du dee soni dee a ta taki. Wan u dee soni mbei a ta du di soni aki, hën da u di a nama ku di në fëën. Jehovah paamusi u taa a o ta sölugu dee dinima fëën, nöö a ta si di soni aki kuma wan gaan fanöudu soni (Ps. 31:1-3). Boiti di dë, Jehovah sabi taa wa bi o fii bunu ee an bi ta luku dee sëmbë fëën. Jehovah ta paamusi u taa a o da u dee soni dee u abi fanöudu fuu dë a libi, söseei dee soni dee u abi fanöudu fuu sa ta dini ën go dou, nöö na wan soni sa tapëën fu an du dee soni aki!​—Mat. 6:30-33; 24:45.

15. (a) Andi bi miti dee fesiten Keesitu sëmbë? (b) Fuun soni Psalöm 37:18, 19 ta piki u taa u sa dë seiki fëën?

 ¹⁵ Te u ta hoi a pakisei faandi mbei Jehovah ta du dee soni dee a ta taki, nöö u sa dë seiki taa Jehovah o heepi u te a ta taanga da u a möni së. Boo luku unfa a bi dë da dee fesiten Keesitu sëmbë. Di sëmbë bi bigi du ku dee baaa ku dee sisa u di kemeente a Jelusalen, hën dee baaa ku dee sisa bi „kule paaja go a kamiankamian . . . Dee Gaan Tjabukama u Masa Jesosi nöö [bi] fika a Jelusalen” (Tjab. 8:1). Pakisei unfa soni bi dë da de. Soni bi musu u taanga da de a di së u möni soni! A sa kan taa dee Keesitu sëmbë bi lasi de wosu ku di wooko di de bi ta du. Ma tökuseei Jehovah an bi disa de, nöö de bi ta dë waiwai (Tjab. 8:4; Heb. 13:5, 6; Jak. 1:2, 3). Jehovah bi heepi dee Keesitu sëmbë a di ten dë, nöö a o heepi u a di ten aki tu.​—Lesi Psalöm 37:18, 19.

16. Andi sa pasa di sa mbei u fii kuma Jehovah an ta tei di dini di u ta dini ën u bigi?

¹⁶ Möön u ta ko gaandi, möön u sa ta fii kuma dee soni dee u ta du da Jehovah an dë wan apaiti soni. Kandë sö Könu Dafiti bi ta fii tu di a bi ko gaandi (Ps. 71:9). Unfa Jehovah sa heepi u te a dë sö?

17. Andi u sa lei a wan sisa de kai Jheri?

¹⁷ Boo luku wan woto u wan sisa de kai Jheri. De bi kai di sisa aki faa ko a wan komakandi di de bi o hoi, ka de bi o taki unfa de sa ta seeka dee zali ku dee woto kamian ka u ta dini Gadu. Ma sisa Jheri an bi kë go a di komakandi aki. A bi taki taa: „Mi ko gaandi kaa, ma abi manu möön, nöö ma sa’ u du na wan apaiti wooko. Ma a’ du.” Di ndeti ufö a go a di komakandi, a bi begi Jehovah ku hii hën hati. Di a go dou a di Könuköndë Zali di debooko fëën, hën a bi ta hakisi hënseei jeti faandi  mbei a go a di komakandi. A di komakandi dë, wan baaa bi taki taa di möön fanöudu soni, hën da u musu dë kabakaba u mbei Jehovah lei u soni. Sisa Jheri bi taki taa: „Mi pakisei a miseei taa, ’mi dë kabakaba u Jehovah lei mi soni!’ Mi bi bigi ta këë di mi ko fusutan taa Jehovah bi piki di begi u mi. A bi ta lei mi taa mi sa du soni dëën jeti, söseei taa a bi dë kabakaba u lei mi soni u mi sa du wooko dëën!” Di sisa aki bi taki tu taa: „Di mi bi go dou a di komakandi, mi bi ta fëëë, söseei mi bi ta fii bookosaka. Ma di di komakandi bi kaba, mi bi ta fii bunu seei. A bi da mi taanga, nöö ma bi ta fii kuma ma sa du wooko da Jehovah möön!”

18. Unfa di Bëibel ta lei u taa Jehovah ta tei di dini di u ta dini ën u bigi, hii fa u ko gaandi kaa?

¹⁸ Hii fa u ko gaandi kaa, tökuseei u sa dë seiki taa Jehovah sa tei u jeti fuu du wooko dëën (Ps. 92:12-15). Jesosi bi taki taa aluwasi ee u ta si kuma wa sa du hia soni möön, nasö ee u ta si kuma dee soni dee u sa ta du an dë wan apaiti soni möön, tökuseei Jehovah ta tei dee soni dë u bigi (Luk. 21:2-4). Fëën mbei a bunu fii ta buta pakisei a dee soni dee i sa ta du. Kandë i sa ta konda soni u Jehovah da wotowan, i sa ta begi da dee baaa ku dee sisa fii, söseei i sa ta da wotowan taanga u de hoi deseei a Jehovah go dou. Jehovah ta si i kuma wan sëmbë di ta „wooko makandi” ku ën, u di i dë kabakaba u piki hën buka a soni, ma na u di i ta du wan wooko dëën nömönömö.​—1 Kol. 3:5-9.

19. Fuun soni Loomë 8:38, 39 ta piki u taa u sa dë seiki fëën?

¹⁹ U ta tei ën u bigi seei taa u sa ta dini Jehovah. A dë wan Gadu di kai dee dinima fëën gaan soni! A mbei u fuu ta piki ën buka a soni. Nöö di dini di u ta dini ën, hën ta mbei u ta dë waiwai tuutuu (Ako. 4:11). Aluwasi ee dee sëmbë u di goonliba aki ta si u kuma sëmbë di an abi na wan du, Jehovah an ta si u sö (Heb. 11:16, 38). So juu woo ta fii bookosaka u di u dë ku suwaki, u di u abi möni fuka, nasö u di u ko gaandi kaa. Ma boo hoi a pakisei taa na wan kodo soni seei a hii di mundu, abi di kaakiti u sa paati u ku di lobi di di Tata fuu lobi u.​—Lesi Loomë 8:38, 39.