1-2. Bantu bengi bakue Yehova bali mukusaanga maavia ki, ni azo maavia kunti alengia kiki kuli beene?

TONTONKANIA palua eezi mifuano itatu: Lupua mulumendo wapiimua ni kukwatua buluele bubiipile saana buli bwalengia muntu akilesie kwaluka mutope. Lupua ali ni miaka ikilile pa makumi asaano (50) wazeezia miilo yakue. Anzia kine wakita maka akue onse, waandua kupata miilo inge. Nkazi umo wa kisinka asyakotele waisaanga nangue buviinde bwakue bwa kubomba miilo yakue Yehova buli mukuya bwakila kukeepa.

² Kine uli mukusaakaana ni aali nga eezi itwalondolola, kunti waimona nangue uli wabule-bule. Eezi aali kunti yakulengia ubulue nsaansa, wimone tekuba wapalile, ni kwinoona bukibuza bobe pamo ni bantu bange.

3. Sataana ni bantu bamupalile bamwene siani bukose bwa bantu?

³ Keeno kyalo kilangiliile Sataana vyamwene bukose bwa bantu. Musita onse, Sataana ali wabakitila bantu kusia basili ba mana. Kabili, atasie kine Sataana waali wamanine nangue kyakafuminamo mu kwandua kumukindika Leeza ni kufua, waamulandile Eva nangue kine waandua kumukindika Leeza wakaba kwaluka ni buntungua. Sataana atwaliliile lyonse kuya watungulula bintu bya busulu, politike ni mpangilo ya bilonghaano bya bufi bya mu keeno kyalo. Kansi, te kyakupapia kumona nangue bantu bengi bali basuluzia, ba politike ni bantunguluzi ba ma diini bapalile mibeele yakue Sataana ya kwandua kukindika bukose bwa bantu ni kwandua kwemena vili vyaiunvua bantu.

4. Tuli kulondoluela ki mu leeli lyasi?

⁴ Inzi, Yehova weene akebele twiunvue buino kabili ali watukwasia  musita utuli twasaakaana ni aali ili kutulengia twimone nangue te tupalile. (Malum. 136:23; Bar. 12:3) Leeli lyasi lili kulondoluela Yehova vyali watukwasia mu eezi aali: (1) Musita utwaemiiwa na maluele, (2) musita utwasaakaana na buavia bwa kupata nfalanga, ni ya (3) musita bukote lubuli bwatulengia kutontonkania nangue te tuli na kintu kya mana kya kumupeela Yehova mu miilo yakue. Inzi, tutendekenke kumona juu ya ki tuli kuya twali ni kisinka nangue kila umo pakati keetu ni wa mana kuli Yehova.

5. Ni kiki kikusininkiziizie nangue bantu ni ba mana kuli Yehova?

⁵ Anzia kine twabumbilue kufuma ku lufunko lwa kyalo, tuli ba mana kukila lufunko luniini mu minue. (Kut. 2:7) Mona bintu paleepale bilengele tumane nangue tuli ba mana pa menso akue Yehova. Waabumbile bantu bali ni buviinde bwa kupala mibeele yakue. (Kut. 1:27) Paantu waatubumbile evio, waatubiikile pa muulu pa bibumbua byonse bya kimubili ni kutupeela nsaambu ya kusuunga kyalo ni banama.​—Malum. 8:4-8.

6. Ni kiki kinge kilangiliile nangue Yehova amwene bantu basipuililikile kuya bali ba mana?

⁶ Atasie kisia Adamu kukita lizaambi, Yehova waatwaliliile kumona bantu kuya bali ba mana. Atumwene kuya twali ba mana saana paantu waafumiizie ni Muana wakue watonene saana, Yesu, kuya wali kilubula mulandu kya mazaambi etu. (1 Yoane 4:9, 10) Kupitila mpaalo ya kilubula mulandu, Yehova wakaba kutuntumuna baalia baafuile juu ya lizaambi lyakue Adamu, ‘balungheeme ni basilungheeme.’ (Miilo 24:15) Mulandu wakue ulangiliile nangue tuli ba mana anzia maluele, bupabi, ao bukote.​—Miilo 10:34, 35.

7. Ni bintu ki binge bilengiizie babombi bakue Leeza baye baketekeele nangue Yehova abamwene kuya baali ba mana?

⁷ Tuli ni nsaambu inge ya kuzumina nangue Yehova atumwene kuya twali bantu ba mana. Waatukuutile ao kutukula ni kumona vitwaitabiile mpunda iweeme. (Yoane 6:44) Musita utwatendekele kumupalama Yehova, ni weene waatupaleeme. (Yak. 4:8) Kabili Yehova ali wabombia musita ni buviinde bwakue eevi atusambilizie, keekio kilangiliile nangue kakiine tuli bantu ba mana pa menso akue. Amanine bu muntu bwetu leenu kabili nangue kunti twakita buyantanzi musita waiza. Kabili ali watulapizia paantu atutonene. (Tus Maf. 3:11, 12) Bebio ni bintu bikata bilangiliile nangue Yehova atumwene kuya twali bantu ba mana!

8. Milandu ili mu Malumbo 18:27-29 kunti yatukwasia tumone siani maavia etu?

⁸ Bantu bange baamumwene Likolo Daudi kuya waali muntu asipalile, inzi muine waali wamanine nangue Yehova waali wamutonene kabili waali wamukwasia. Kumana kaako kwamukwasiizie Daudi asipikizie aali yakue wateekameene. (2 Sam. 16:5-7) Kine twatioka mutima ao twasaanga maavia, Yehova kunti watukwasia tumone bintu mu nzila ibeleele, kabili kunti watukwasia kuviinda kila buavia. (Soma Malumbo 18:27-29.) Kine twakwasiiwa na Yehova, te kuli kintu kili kutwanzia kumubombela twali ni nsaansa. (Bar. 8:31) Kansi, tulondoluele aali ezio itatu ibeleele mutupalile kulanguluka saana nangue Yehova atutonene kabili atumwene kuya twali bantu ba mana.

9. Maluele kunti atulengia twiunvue siani?

⁹ Maluele kunti atukisia saana mu namuna ituli twaiunvua, kutulengia twisaange nga  fwefue basili ba mana ku muntu ata umo. Kunti twaunvua busoni musita bantu lubali bamona buviinde bwetu buniini ao nangue tuswapiilesie bange batukwasie. Anzia kine bange te bamanine nangue tuluele, kunti twaunvua busoni paantu twabamba kwandua kukita bintu beelia bitwakiba twaizibiile. Mu ozo musita wa bulanda, Yehova ali watukoselezia. Ali watukoselezia siani?

10. Nga vilandile Tuswalo ni Mafunde 12:25, ni kiki kili kutukwasia musita utuluele?

¹⁰ Musita utuluele, “mulandu uweeme” kunti watukoselezia. (Soma Tuswalo ni Mafunde 12:25.) Mu Bibilia, Yehova abiikilemo milandu iweeme ili yatulangulusia nangue tuli ba mana anzia kine tuluele. (Malum. 31:19; 41:3) Kine twasoma ni kusomonona milandu ezio itungulwilue na mupasi, Yehova wakaba kutukwasia kusipikizia aali ibiipile ili yaleetua na buluele.

11. Lupua umo wakwasiiziwe siani kuli Yehova?

¹¹ Mona byamusaangile Jorge. Musita lwaali mulumendo, Jorge waaluele buluele bukolele bwaali bwakila kubiipa lubilo-lubilo ni kumulengia emone nangue ni wabule-bule. Jorge walanda eevi: “Nsyali namanine nangue buluele bwane kunti bwandengia ngunvue ovio ao kundetela busoni bunaali naunvua paantu naali napapua na bantu. Paantu buluele bwane bwaali bwakilasie kubiipa, naali natontonkania kine buikazi bwane bwakaaluka siani. Naatiokele mutima, kabili namuloombele Yehova ankwasie.” Yehova waamukwasiizie siani? Watwalilila kulanda eevi: “Paantu naali ni buavia bwa kupooza maano ku kantu, naakwasiiziwe kuya nasoma bipitu biniini mu kitabu kya Malumbo bilangiliile Yehova vyali wakwasia babombi bakue. Naali nasoma lingi azo maleembo aniini kila busiku, ni kumona nangue ali akoselezia  kabili ni kuteekia mutima. Kisia musita uniini, bantu bange baatendekele kumona nangue naalukile muntu wa nseko. Kabili baalandile nangue nsaansa yane yaali yabakoselezia. Nainikile nangue Yehova waasukile mapepo ane! Wankwasiizie kwalulula vinaali naimona. Naatendekele kupooza maano ku beelia bili byalanda Mulandu wakue palua vindi namonua na Leeza anzia buluele bwane.”

12. Kine uli mukuluisia buluele, kunti wakita ki eevi Yehova akukwasie?

¹² Kine uli mukuluisia buluele kampanda, mana nangue Yehova amanine maavia auli mukusaakaana nao. Muloombe akukwasie eevi ukile kwaluka ni maano aweeme palua aali yobe. Kisia bombia Bibilia eevi upate milandu iweeme iubikiilue na Yehova. Pooza saana maano ku milongo ilangiliile Yehova vyamwene babombi bakue kuya bali ba mana saana. Kine wakita evio, uli kumona nangue Yehova aweeme ku bantu bonse bali bamubombela mu kisinka.​—Malum. 84:11.

13. Mutue wa nsesi kunti waimona siani kine wazeezia miilo yakue?

¹³ Kila mutue wa nsesi atonene kuya waali ni buviinde bwa kufikilizia bintu bikabiilue mu buikazi bwa mu lupua lwakue. Inzi tulande nangue lupua wazeezia miilo yakue, anzia kine taakikita kilubo. Waezia kukeba miilo inge kwa mute, inzi waandua kupata. Paantu wasaakaana ni ezio aali, kunti waimona nangue tapalile ao ni wabule-bule. Kupooza maano ku bulayo bwakue Yehova kunti kwamukwasia siani?

14. Juu ya ki Yehova ali wafikilizia bulayo bwakue?

¹⁴ Lyonse, Yehova ali wafikilizia bulayo bwakue. (Yosh. 21:45; 23:14) Kuli nsaambu ingi imulengiizie akite evio. Imo pa nsaambu  ezio, ni paantu kwandua kukita evio kunti kwalengia liina ao lulumbi lwakue bifisiiwe. Yehova alaile nangue wakaba kubasuunga babombi bakue, ali waimona nangue apalile kufikilizia bulayo bwakue. (Malum. 31:1-3) Kukila pakaako, Yehova amanine nangue kunti twatioka mutima kine tasuungile baalia bali mu seemu ya lupua lwakue. Alaile nangue wakaba kufikilizia bintu bitukabiile, bya kimubili ni bya kimupasi. Kabili te kuli kintu kyakaba kumwanzia kufikilizia bulayo bwakue!​—Mat. 6:30-33; 24:45.

15. (a) Bakristu ba mu miaka mia (100) ya ku ntendeko baasaakeene ni buavia ki? (b) Malumbo 37:18, 19 atusininkiziizia ki?

¹⁵ Kine twalanguluka nsaambu ili yalenga Yehova afikilizie bulayo bwakue, kunti twasipikizia buavia bwa kupata nfalanga twali ni kisinka. Tontonkania mufuano wa Bakristu ba mu miaka mia (100) ya ku ntendeko. Musita waaizile lyemo likata mu libumba lya ku Yerusalemu, ‘bonse kufumiakosie batumua, baasalanghaniiziwe.’ (Miilo 8:1) Kunti watontonkania paange vikyaalukile. Baalukile mu buavia bwa kupata nfalanga! Paange Bakristu baazeziizie masesi ni busulu bwabo. Inzi, Yehova taabasiile ata kaniini; kabili te baazeziizie nsaansa yabo. (Miilo 8:4; Baeb. 13:5, 6; Yak. 1:2, 3) Yehova waabakwasiizie babo Bakristu ba kisinka, ni fwefue wakaba kutukwasia.​—Soma Malumbo 37:18, 19.

16. Ni aali ki ili kulengia tutendeke kutwisika nangue Yehova tamwene lupupo lwetu kuya lwali lwa mana?

¹⁶ Paantu tuli mukuya twakota, kunti twatendeka kwimona nangue tulisie na kantu kaniini ka kumupeela Yehova. Paange Likolo Daudi ni weene waaimwene evio vyenka musita lwaalukile mukote. (Malum. 71:9) Yehova kunti watukwasia siani?

17. Kunti twasambilila ki ku keelia kyamusaangile nkazi wakuutua Jheri?

 ¹⁷ Mona byamusaangile nkanzi umo ali wakuutua Jheri. Waakupilue kuya kutuilizia lyasi lya kubeleziiwa kukita busaaka ku Nsesi ya Bukolo, inzi taali watonene kuyako. Waalandile eevi: “Neene nkotele, ndi mukanfuilua, kabili nsili na bufundi atasie kaniini buli kubombiiwa na Yehova. Ndi wabule-bule.” Mu busiku bwa kukiila kuya kutuilizia lyasi leelio, waamubuilile Yehova byonse bili ku mutima mu lipepo. Musita lwaafikile ku Nsesi ya Bukolo lukeele lwakue, waatwaliliile kuya waiipuzia kine waali wapalile kakiine kusanguamo. Musita wa kulonghaana kooko, mulanzi umo pakati ka balanzi, walangiliile paswetele nangue mutima weetu wa kutona kusambiliziiwa na Yehova i bufundi bwetu bwa mana saana. Jheri walanguluka eevi: “Natontonkaniizie nangue, ‘bobo bufundi ndi nabo!’ Naatendekele kulila paantu naainikile nangue Yehova waasukile lipepo lyane. Waali wansininkiziizia nangue ndi ni kintu kya mana kya kumupeela kabili waali watonene kunsambilizia!” Musita lwalanguluka byakitikile mu buikazi bwakue, Jheri walanda eevi: “Lunaingiile mu kulonghaana naali ni muenzo, natiokele mutima kabili naimwene naali wa bule-bule. Inzi lunafumine naunvuile nsaansa, nateekiiziwe mutima, kabili naimwene naali wa mana!”

18. Bibilia yalangilila siani nangue Yehova atwaliliile kumona lupupo lwetu kuya lwali lwa mana anzia kine twakota?

¹⁸ Ata kine twakota, kunti twaya twali ni kisininkizio nangue Yehova akilisie ni miilo itupalile kukita. (Malum. 92:12-15) Yesu waatusambiliziizie nangue anzia buviinde bwetu ni buniini ao maka ni aniini saana, te kantu. Inzi, byonse bituli kukita mu miilo yakue, Yehova amwene kuya byali bya mana. (Luka 21:2-4) Kansi pooza maano ku beelia biuli kuviinda kukita. Kwa mufuano, kunti walandila palwakue Yehova, kupepa palua balupua, ni kukoselezia bange batwalilile kuya baali ba kisinka. Yehova akumweme kuya waali mubombi nakue, apanasie juu ya beelia biuli waviinda kukita, inzi paantu utonene kumukindika.​—1 Bakor. 3:5-9.

19. Lileembo lya Baroma 8:38, 39 lyatupeela kisininkizio ki?

¹⁹ Tuli mukutasia kakiine kumupupa Yehova, Leeza amwene kisinka bantu bali bamupupa kuya bali ba mana! Waatubumbile eevi tukite kutona kwakue kabili lupupo lwa kisinka i luli lwalengia twaluke ni nsaansa mu buikazi bwetu. (Nfy. 4:11) Anzia kine kyalo kunti kyatumona nangue tuli ba bule-bule, Yehova teezi kutumona evio. (Baeb. 11:16, 38) Kine twaisaanga nangue twaemiwa na buluele, buavia bwa kupata nfalanga ao bukote, tulanguluke nangue te kuli kintu kyaakatufumia ku ntono yakue Baba weetu wa ku muulu.​—Soma Baroma 8:38, 39.