1-2. Sigaradzo muni esi sithumi nya singi sa Jehovha si emisanago naso nigu si nga resa mihandro muni?

NGA dundrugeya khu siyeyedzo sesi nya siraru: Muphya nyo khaguri a gu ndriyathu modwe madwali ma na gu mu girago a khaleya gu vbeya tshivba. Ndriyathu nyo khaguri a gu ni 50 myaga ni guvbindra vbeledwe khu thumo nigu ambari olu a zamago khu dzindziya dzatshavbo gu mana wumbe, kha si kodzegi. Ndriyathu nya nyamayi a dandridego khu tanga kha ngo si kodza gu thumeya Jehovha nga edzi a nga ba a si vbweta khidzo.

² Wa gu ba u emisana ni gimwegyo nya sigaradzo sesi, si nga gira u dzipwa na wu si phasi gilo. Siemo nya nga esi si nga gu beya gutsaka, si gu gira u si dzi tsakeyi ni gu bwe u si pwanani gwadi ni vambe vathu.

3. Ginani egi Sathane ni vathu va mu pimedzeyago va pimisago khu lisima nya vathu?

³ Litigo leli la gu yeyedza mawonelo ya Sathane khu womi nya vathu. Sathane tepo yatshavbo a gu wona vathu na va siri va gilo. Khu litsoro a gu nalo, tiyide a embeya Evha gu khuye a na mana gutshulega a gu mba engisa Nungungulu ambari olu a nga ba a dziti gu khuye isoso si di hadzi mu reseya gufa. Sathane tepo yatshavbo khuye a woneleyago dzinogosi, politika, ni wukhongeyi nya litigo leli. Khu kharato kha si hi samadzise tepo hi wonago vathangeyi nya dzinogosi, nya dzipolitika ni vathangeyi nya wukhongeyi na va si ningi githawo womi nya vathu mwendro gu khathala khedzi va dzipwago khidzo.

4. Ginani hi na ganeyago khigyo avba nya ndrima yeyi?

⁴ Ambari ulolo, Jehovha a gu vbweta gu khuye hi dziti gu khethu hi na ni lisima nigu uye a ngu hi phasedzeya tepo hi emisanago ni sigaradzo si nga hi girago hi dzipwa na hi si phasi gilo. (Ndzi.  136:23; Rom. 12:3) Ndrima yeyi yi na ganeya khedzi Jehovha a hi phasago khidzo ga siemo sesi: 1) Tepo hi emisanago ni madwali, 2) Tepo hi emisanago ni wusiwana ni 3) Tepo gu dandra khu tanga gu hi girago hi dzipwa khatshi gimwalo gilo nya lisima hi gi kodzago gu gireya Jehovha. Gupheya, hongoleni hi wona gu khethu khu ginani hi nga tiyisegago gu khethu Jehovha a ngu hi ninga lisima hatshavbo.

5. Ginani gi gu girago u khodwa gu khuwe vathu va na ni lisima ga Jehovha?

⁵ Ambari olu hi giridwego khu kudzudzwane nya mafu, Jehovha kha hi woni nga gyandzanyana nya mafu basi, hi na ni lisima ngudzu gwaye. (Gen. 2:7) Hongoleni hi wona sighelo nyo khaguri si yeyedzago gu khiso hi na ni lisima ga Jehovha. Uye giride vathu va vari ni makodzelo nya gu pimedzeye makhalelo yaye. (Gen. 1:27) Khu kharato, uye a giride vathu na vari va lisima guvbindra satshavbo a si giridego mafuni.— Ndzi. 8:4-8.

6. Khu gevbini gimbe gighelo gi hi girago hi khodwa gu khethu Jehovha a ngu hi ninga lisima ambari olu hi gu vathu nya mba vbeleya?

⁶ Ambari hwane nya gu ba Adhamu na ghohide, Jehovha simamide gu ninga lisima vathu. Uye a ngu hi ninga ngudzu lisima nyo bwe a hi ninga ni Gyanana gyaye nya gigodwa, Jesu, gasi gi ta hi dzegisa sighohoni sathu. (1 Joh. 4:9, 10) Khu kotani nya gu dzegiswa, Jehovha a na wusa khu gufani vale va fudego khu kotani nya gighoho gya Adhamu, “va nya gululama ni va nya sighoho.” (Mith. 24:15) Lito laye lo yeyedza gu khilo hi na ni lisima gwaye ambari ha gu ba hi dwala, ha gu ba hiri sisiwana, mwendro ha gu ba hi gumbide. — Mith. 10:34, 35.

7. Khu sevbi simbe sighelo esi sithumi sa Nungungulu si gu naso nyo khodwe gu khiso Jehovha a ngu si ninga lisima?

⁷ Hi na ni simbe sighelo nyo khodwe gu khethu Jehovha a ngu hi ninga lisima. A ngu hi dzumeleya gu mu hidzimeleya nigu a si wonide edzi hi ma godego khidzo mahungu nya yadi. (Joh. 6:44) Tepo hi nga pheya gu haguleya wupari ni Jehovha uye a di hi hidzimeleya. (Jak. 4:8) Jehovha a ngu thumisa tshivba ni tepo yaye gasi gu hi hevbudza, si yeyedzago gu khiso hi na ni lisima gwaye. Uye a ngu dziti gu khuye hi vathu muni olu nigu a ngu dziti edzi hi nga tshukwadzisago khidzo. Nigu uye a gu hi kawuka kholu a ngu hi haladza. (Mav. 3:11, 12) Khandri siyeyedzo nya sadi isoso nyo khiso Jehovha a ngu hi ninga lisima?

8. Malito ma lovidwego omu ga Ndzimo 18:27-29, ma gu khuha kharini ndziya hi si wonago khiyo sigaradzo sathu?

⁸ Vambe va wonide Pfhumu Dhavhidhe na si phasi gilo, ganiolu uye a di gu dziti gu khuye Jehovha a di gu mu haladza ni gu mu seketeya. Guti isoso si phaside Dhavhidhe gu timiseya gigaradzo gyaye khu ndziya nya yadi. (2 Sam. 16:5-7) Ha gu ba hi vbede tshivba mwendro ha gu ba hi emisana ni sigaradzo, Jehovha a ngu kodza gu hi phasa gu wona sigaradzo sathu khu yimbe ndziya a bwe a hi phasa gu si pala. (Leri Ndzimo 18:27-29.) Ha gu ba hi phasedzedwa khu Jehovha, gimwalo gi na kodzago gu hi digisa gu mu khozeya khu gutsaka. (Rom. 8:31) Olu hongoleni hi ganeya khu siemo siraru esi gu vbwetegago gu hi dundruga gu khethu Jehovha a ngu hi haladza nigu a ngu hi ninga lisima.

9. Madwali ma nga hi gira hi dzi wona khu ndziya muni?

⁹ Madwali ma nga khuha gudzipwa gwathu, ma hi gira hi dzi wona na hi si phasi gilo. Si nga hi gira hi garadzega tepo vathu va tugulago gu khavo hi na ni gigaradzo nyo khaguri mwendro ha gu tumba gu phaswa khu vambe. Ambari vambe va gu mba dziti gu khavo hi ngu dwala, si nga gira hipwa dzitshoni khu gu ba hi si kodzi gu gira esi hi nga ba hi si kodza gu gira gale. Ga dzitepo nya nga dzodzo Jehovha a ngu hi tiyisa. Khu ndziya muni?

10. Guya khu Mavingu 12:25, ginani gi nga hi phasago ha gu ba hi dwala?

 ¹⁰ Ha gu ba hi dwala, “magana nya yadi” ma nga hi tiyisa. (Leri Mavingu 12:25.) Omu nya Bhibhiliya, Jehovha a ngu hi embeya silo nya singi nya sadi si hi dundrugisago gu khiso hi na ni lisima gwaye ambari ha gu ba hi dwala. (Ndzi. 31:19; 41:3) Ha gu leri ngudzu Lito li lovidwego khu tshivba ya Nungungulu, Jehovha a na hi phasa gu emisana ni gugaradzega hi emisanago nago khu kotani nya madwali.

11. Moyo nya ndriyathu a phasidwe kharini khu Jehovha?

¹¹ Nga wona esi si dugeledego Jorge. Na ngari muphya, Jorge a di thaphedwa khu madwali ma nga vbiredzeya gu dandra ma mu gira a dzipwa na a si phasi gilo. Uye a di khuye: “Kha nya nga ba nyi dzi dongisede gasi gu emisana ni edzi madwali yangu ma nga nyi gira nyi dzipwa khidzo mwendro dzitshoni nyi nga dzipwa khu kotani nya edzi vathu va nga ba va nyi khedza khidzo. Tepo madwali yangu ma ngaya ma dandra nyi di pimisa khedzi womi wangu wu nga hadzi vbindrugedza khidzo. Nyi di vbeya ngudzu tshivba, nyi lomba Jehovha gasi gu a nyi phasa.” Jehovha a mu phaside kharini? “Kha nga olu si nga ba si nyi garadzeya gu vega gupima avba nya gilo gimwegyo khu tepo nyo laphe, va di nyi kutsa gu leri khu tepo nyo role mavhesi madugwana nya libhuku nya Dzindzimo ma ganeyago khedzi Jehovha a khathalago khidzo khu vathu vaye. Nyi di gu wuyedzeya gu leri mavhesi yoyo nya madugwana tshigu ni tshigu nigu ayo ma di gu nyi thaveleya. Khu gu gimbiya nya tepo vathu va di pheya gu wona gu khavo nyi di gu hega ngudzu guvbindra gale. Va bwe khavo gutsaka gwangu gu di gu va tiyisa. Nyi di tugula gu kheni Jehovha a hlamude milombelo yangu. Uye a nyi phaside gu vbindrugedza edzi nyi nga ba nyi dzi wona khidzo nyabune. Nyi di pheya gu vega gupima avba nya esi Lito laye li ganeyago maningano ni edzi a nyi wonago khidzo ambari olu nyi dwalago.”

12. Wa gu ba u emisana ni madwali, ginani u nga girago gasi u phaswa khu Jehovha?

 ¹² Wa gu ba u emisana ni madwali nyo khaguri, tiyisega gu khuwe Jehovha a ngu siti esi si gu dugeleyago. Lomba giphaso gwaye gasi a gu phasa gu manega ni mawonelo nya yadi khu gigaradzo gyago. Khavbovbo, thumisa Bhibhiliya gasi gu mana malito nya guthaveleye aya Jehovha a gu lovedego gasi gu gu phasa. Vega gupima omu nya sipandre si yeyedzago edzi Jehovha a ningago khidzo lisima sithumi saye. Tepo u girago isoso u na wona gu khuwe Jehovha khwadi ga vatshavbo vale va mu thumeyago khu gutumbega.— Ndzi. 84:11.

13. Guvbeledwa khu thumo gu nga gira hungo nya ndranga a dzipwa kharini?

¹³ Yatshavbo mihungo nya dzindranga yo vbweta gu mana silo nyo eneye gasi gu sayisa dzindranga dzawe. Ganiolu, nga dundrugeya khu ndriyathu nyo khaguri a nga vbeledwa khu thumo nya mba ghoha gilo. A zama khu dzindziya dzatshavbo gu mana wumbe ganiolu a si wu mani. Giemo nya nga gyogyo gi nga mu gira a dzipwa na si phasi gilo. Gu vega gupima avba nya situmbiso sa Jehovha gu nga mu phasa kharini?

14. Khu ginani Jehovha a tadzisago situmbiso saye?

¹⁴ Jehovha tepo yatshavbo a ngu tadzisa situmbiso saye. (Jos. 21:45; 23:14) Uye a gu gira isoso khu sighelo nya singi. Nyo pheye, khu gu isoso si ngu khuha lina laye ni edzi a na wonwago khidzo. Jehovha tumbiside gu khuye a na khathaleya sithumi saye nyo tumbege, khu kharato a gu dzipwa na a gurumedzega gu tadzisa gitumbiso gyaye. (Ndzi. 31:1-3) Gimbe gambe khu gu Jehovha a ngu dziti gu khuye hi di hadzi vbeya tshivba a gu mba khathaleya vale va girago gipandre nya ndranga yaye. Uye a gu tumbisa gu hi khathaleya khu nyamani ni liphuvboni nigu gimwalo gi nga kodzago gu mu himbedzeya gu tadzisa gitumbiso gyaye! — Mat. 6:30-33; 24:45.

15. a) Gigaradzo muni ma emisanidego nagyo maKristo ya lizana myaga nyo pheye? b) Gutumba muni hi gu manago omu ga Ndzimo 37:18, 19?

 ¹⁵ Ha gu ba hi emisana ni gu hamuga dzitsapawu hi nga tiyisega gu khethu Jehovha a na hi phasa. Nga dundrugeya khu giyeyedzo gya maKristo ya lizana myaga nyo pheye. Tepo libandla la Jerusalema li nga pheya gu tshaniswa, “vatshavbo va di thava va phalalega . . . va tshala Vapostoli basi.” (Mith. 8:1) Nga dundrugeya khedzi giemo gi nga hadzi khala khidzo. Guhamugega nya dzitsapawu! Si nga gira gu maKristo na ma luzide dzindranga dzawo ni dzinogosi dzawo. Ambari ulolo, Jehovha kha va diga nigu kha va vbeledwa khu gutsaka gwawe. (Mith. 8:4; Hebh. 13:5, 6; Jak. 1:2, 3) Jehovha phaside maKristo yoyo nyo tumbege nigu anethu a na hi phasa. — Leri Ndzimo 37:18, 19.

16. Giemo muni gi nga hi girago hi dzi wudzisa gukhethu ina Jehovha a ngu ninga lisima wukhozeyi wathu?

¹⁶ Tepo hi yago hi gumba, si nga gira hi dzipwa na hi si kodzi gambe gu gireya nya singi Jehovha. Adzina Pfhumu Dhavhidhe nuye manegide ni gugaradzega gogo tepo a nga ba a gumba. (Ndzi. 71:9) Jehovha a nga hi phasa kharini?

17. Ginani hi gi hevbulago ga esi si dugeledego moyo nya ndriyathu nyo pwani khu Jheri?

¹⁷ Nga wona esi si dugeledego ndriyathu nya nyamayi nya gu pwani khu Jheri. Uye a di ranedwa guya patega avba nya tshangano nya gu hevbule masayiselelo (manutenção) nya dzinyumba dzi thumisedwago gu gira thumo wa Jehovha wu nga giredwa Salawuni nya Mufumo, ganiolu uye kha nga ba a dzina gu hongola. Uye a di khuye: “Eni nyi gumbide, nyi fedwe khu mwama nigu gimwalo nyi kodzago gu gira gi na phasago avba nya thumo wowo. Kha nyi phasi gilo.” Ga wutshigu wu nga hadzi landredwa khu litshigu va nga hadzi pheya gu hevbula, uye a di gombeya ga Jehovha a mu embeya esi si nga ba siri  monyoni gwaye. Tepo a nga vboha Salawuni nya Mufumo ga litshigu li nga landreya, a di nga gu dzi wudzisa gu khuye ina a di yede gu hongola gani. Ndrani nya longoloko wule, moyo nya ndriyathu a nga ba a vega ganelo a di ganeya khuye makodzelo yathu nya lisima ga yatshavbo, khu gu dzi ningedzeya gwathu gasi gu hi hevbudzwa khu Jehovha. Jheri a gu dundruga esi: “Nyi di kheni ‘eni nyi nawo makodzelo yoyo!’ Nyi di pheya gu liya tepo nyi nga wona gu kheni Jehovha a di gu hlamula nombelo wangu. Uye a di gu nyi gira nyi tiyisega gu kheni nyi nagyo gilo nya lisima gasi gu mu ninga nigu uye a di gu dzi emisede gu nyi hevbudza.” A gu khedza hwane, Jheri wari khuye: “Nyi phede gu hevbula na nyi gu garadzega, na nyi vbede tshivba. Ganiolu tepo nyi nga vbedza nyi di gu dzipwa na nyi tiyide, na nyi gu phasa!”

18. Bhibhiliya ya gu yeyedza kharini gu khiyo Jehovha a ngu simama gu ninga lisima wukhozeyi wathu ambari tepo hi yago hi gumba?

¹⁸ Tepo hi yago hi gumba, hi nga tiyisega gu khethu Jehovha a ngari ni thumo nya gu hi ninge. (Ndzi. 92:12-15) Jesu hevbudzide gu khuye ambari abari gu silo hi si kodzago gu gira sa gu wonega khatshi khandri sa lisima ngudzu gwathu, Jehovha a ngu ninga lisima ni gevbini hi girago thumoni waye. (Luka 21:2-4) Khu kharato, vega gupima avba nya esi u si kodzago gu gira. Khu giyeyedzo, u nga ganeya khu Jehovha ni vambe, u gombeleya vandriyathu u bwe u kutsa vambe gasi va simama na va tumbegide. Jehovha a gu gu wona na wu thuma naye nasiri khesi u si kodzago gu gira ganiolu khu kotani nya gudziemiseya gwago gu mu engisa. — 1 Kor. 3:5-9.

19. Gutumba muni hi gu manago omu ga Varoma 8:38, 39?

¹⁹ Hi ngu tsaka ngudzu khu gu khozeya Jehovha, Nungungulu a khathalago ngudzu khu vale va mu thumeyago. Uye a hi vangide gasi hi gira gugola gwaye, nigu wukhozeyi nya lisine khuwo basi wu na hi girago hi tsaka guvbanyani gwathu. (Gutu. 4:11) Ambari litigo la gu hi wona na hi si phasi gilo, Jehovha kha hi woni khu ndziya yoyo. (Hebh. 11:16, 38) Ha gu dzipwa na hi vbede tshivba khu madwali, wusiwana mwendro gu gumba hongoleni hi dundruga gu khethu gimwalo gi nga hi hambanisago ni lihaladzo la Papayi wathu wa ndzadzini. — Leri Varoma 8:38, 39.