1-2. Hi swihi swiyimo leswi malandza yo tala ya Yehovha ma langutanaka na swona naswona hi byihi vuyelo lebyi nga vaka kona?

 EHLEKETA hi swiyimo leswi landzelaka: Makwerhu loyi a ha riki muntshwa u byeriwa leswaku u ni vuvabyi lebyi nga ni khombo lebyi tsanisaka miri. Makwerhu la nga ni malembe yo tlula 50, u heleriwe hi ntirho naswona hambiloko a lava wun’wana a nga ha wu kumi. Makwerhu wa xisati loyi a kuleke, a nga ha swi koti ku tirhela Yehovha hilaha a endla hakona loko a ha tiyile.

² Loko u langutane ni xiyimo xo fana ni leswi boxiweke laha, u nga tivona u nga ha pfuni nchumu. Swiyimo swo fana ni leswi, swi nga ku hetela ntsako, swi ku endla u titwa u ri xikangalafula ni ku onha vuxaka bya wena ni vanhu van’wana.

3. Sathana ni vanhu lava n’wi tekelelaka va va teka njhani vanhu?

³ Vanhu vo tala va hanya hi ndlela leyi tsakisaka Sathana. Sathana u teka vanhu va nga ri va nkoka. Hikwalaho ka mona, u byele Evha leswaku u ta kuma ntshunxeko loko o tlula nawu wa Xikwembu kasi a a swi tiva leswaku loko Evha o endla tano hakelo ya kona ku ta va rifu. Phela Sathana hi yena loyi a lawulaka swa mabindzu, tipolitiki ni vukhongeri. A swi hlamarisi leswi van’wamabindzu, van’watipolitiki ni vafundhisi va nga riki na mhaka ni ndlela leyi vanhu van’wana va titwaka ha yona.

4. Hi ta bula hi yini eka nhlokomhaka leyi?

⁴ Yehovha u lava hi titwa hi ri va nkoka naswona wa hi seketela loko hi langutana ni swiyimo leswi hi hetaka matimba. (Ps. 136:23; Rhom. 12:3) Nhlokomhaka leyi, yi ta hi pfuna hi vona ndlela leyi Yehovha a hi pfunaka ha yona loko hi langutana ni swiyimo leswi landzelaka: (1) Loko hi vabya, (2) loko hi ri ni swiphiqo swa timali, (3) loko hi tivona hi nga ha pfuni nchumu eka Yehovha hikwalaho ka leswi hi dyuhaleke. A  hi sunguleni hi vona lexi endlaka hi tiyiseka leswaku Yehovha u hi teka hi ri va nkoka.

5. I yini leswi ku khorwisaka leswaku Yehovha u va teka va ri va nkoka vanhu?

⁵ Hambileswi hi vumbiweke hi ntshuri wa misava, Yehovha u hi teka hi ri va nkoka swinene. (Gen. 2:7) Xiya swivangelo swin’wana leswi endlaka hi tiyiseka hi mhaka leyi. Yehovha u vumbe vanhu va ri ni vuswikoti byo tekelela timfanelo takwe. (Gen. 1:27) Hi ku endla tano, u kombise leswaku u hi teka hi ri va nkoka ku tlula swilo hinkwaswo leswi a swi vumbeke, u tlhele a hi nyika vutihlamuleri byo khathalela misava ni swiharhi.—Ps. 8:4-8.

6. Hi xihi xivangelo xin’wana lexi hi tiyisekisaka leswaku Yehovha u va teka va ri va nkoka vanhu lava nga hetisekangiki?

⁶ Ni loko Adamu a ta va a dyohile, Yehovha a nga tshikanga ku teka vanhu va ri va nkoka. U kombise leswaku u hi teka hi ri va nkoka hi ku rhumela N’wana wakwe loyi a tswariweke a ri swakwe Yesu leswaku a ta hi kutsula eka swidyoho swa hina. (1 Yoh. 4:9, 10) Hi ku tirhisa nkutsulo, Yehovha u ta pfuxa vanhu “lava lulameke ni . . . lava nga lulamangiki,” lava feke hikwalaho ka xidyoho xa Adamu. (Mint. 24:15) Bibele yi kombisa leswaku Yehovha u hi teka hi ri va nkoka, swi nga ri na mhaka leswaku ha vabya, hi swisiwana kumbe hi dyuharile.—Mint. 10:34, 35.

7. Hi swihi swivangelo swin’wana leswi endlaka hi tiyiseka leswaku Yehovha u hi teka hi ri va nkoka?

⁷ Hi ni swivangelo swin’wana leswi endlaka hi tiyiseka leswaku Yehovha u hi teka hi ri va nkoka. U hi kokele eka yena naswona u xiye ndlela leyi hi anguleke ha yona eka mahungu lamanene. (Yoh. 6:44) Loko hi tshinela eka Yehovha, na yena u ta tshinela eka hina. (Yak. 4:8) U tlhela a tinyika nkarhi wo hi dyondzisa, ku kombisa leswaku hi va nkoka eka yena. Wa swi tiva leswaku hi vanhu va njhani ni leswaku hi nga swi kota ku antswisa vumunhu bya hina. Nakambe, wa hi tshinya hikwalaho ka leswi a hi rhandzaka. (Swiv. 3:11, 12) Mayana vumbhoni byonghasi lebyi kombisaka leswaku Yehovha u hi teka hi ri va nkoka!

8. Pisalema 18:27-29, yi endla leswaku hi va ni langutelo rihi hi swiphiqo leswi hi langutanaka na swona?

⁸ Van’wana a va teka Hosi Davhida a ri xikangalafula kambe Davhida a a swi tiva leswaku Yehovha wa n’wi rhandza naswona wa n’wi seketela. Ku tiva sweswo swi n’wi tiyisile. (2 Sam. 16:5-7) Loko hi titwa hi tshikilelekile kumbe hi langutana ni swiphiqo, Yehovha u ta hi pfuna hi kota ku tiyisela. (Hlaya Pisalema 18:27-29.) Loko Yehovha a hi seketela, a xi kona ni xin’we lexi nga hi sivelaka ku n’wi tirhela hi tsakile. (Rhom. 8:31) Sweswi a hi buleni hi swiyimo swinharhu leswi hi tiyisekisaka leswaku Yehovha wa hi rhandza naswona u hi teka hi ri va nkoka.

9. Vuvabyi byi nga endla hi titwa njhani?

⁹ Vuvabyi byi nga hi tekela ntsako, byi endla hi titwa hi nga ha pfuni nchumu. Hi nga hela matimba loko van’wana va sungula ku xiya leswaku ha vabya kumbe loko se hi boheka ku titshega hi van’wana loko hi lava mpfuno. Hambiloko van’wana va nga swi tivi, hi nga khomiwa hi tingana hikwalaho ka leswi hi nga ha swi kotiki ku endla swilo leswi a hi swi endla khale. Loko hi langutana ni xiyimo xo fana ni lexi, Yehovha wa hi seketela. Njhani?

10. Hi ku ya hi Swivuriso 12:25, i yini leswi nga ta hi pfuna loko hi vabya?

¹⁰ Loko hi vabya, “rito lerinene” ri ta hi tiyisa. (Hlaya Swivuriso 12:25.) EBibeleni, Yehovha u hi byela marito yo tala lamanene lama kombisaka leswaku u hi teka hi ri va  nkoka hambiloko hi vabya. (Ps. 31:19; 41:3) Loko hi hlaya Bibele, Yehovha u ta hi pfuna leswaku hi hlula ku titwa hi nga pfuni nchumu loku vangiwaka hi vuvabyi.

11. Yehovha u pfune makwerhu un’wana hi ndlela yihi?

¹¹ Xiya ntokoto wa Jorge. U hlaseriwe hi vuvabyi lebyi nga ni khombo lebyi tsanisaka miri, vuvabyi byebyo byi endle leswaku a titwa a nga ha pfuni nchumu. U ri: “A ndzi nga yi lunghekelanga ndlela leyi vuvabyi bya mina a byi endla ndzi titwa ha yona ni leswi a byi ndzi kokela mahlo ya vanhu. Loko byi ya byi nyanya, a ndzi ehleketa hi ndlela leyi vutomi bya mina byi nga ta cinca ha yona. A ndzi nga ha tivi ta mina kutani ndzi kombele ku pfuniwa eka Yehovha.” Yehovha u n’wi pfune njhani? U ri: “Leswi a swi ndzi tikela ku hlaya rungula ro tala, a ndzi hlaya matsalwa ma nga ri mangani eka buku ya Tipisalema, lawa ma kombisaka leswaku Yehovha wa khathala hi malandza yakwe. A ndzi ma hlaya siku ni siku naswona ma ndzi chavelerile ni ku ndzi tiyisa. Hi ku famba ka nkarhi, vanhu va sungule ku xiya leswaku ndzi tshama ndzi tsakile. Va kale va vula leswaku ndza va khutaza. Ndzi swi vonile leswaku Yehovha u hlamule xikhongelo xa mina! U ndzi pfunile leswaku ndzi cinca ndlela leyi a ndzi titeka ha yona. Ndzi sungule ku ehleketisisa hi leswi Rito rakwe ri swi vulaka mayelana ni ndlela leyi a ndzi tekaka ha yona hambileswi ndzi vabyaka.”

12. Loko u vabya, i yini leswi nga ta ku pfuna u vona leswaku Yehovha wa ku seketela?

¹² Loko u vabya, tiyiseka leswaku Yehovha wa ma vona maxangu lawa u langutanaka na wona. N’wi kombele a ku pfuna u kota ku langutana ni xiyimo hi ndlela leyinene. Hlaya Bibele u twa marito lamanene lawa Yehovha a ku tsaleleke wona. Hlaya tindzimana leti vulavulaka hi ndlela leyi Yehovha a ma tekaka  ma ri ya nkoka ha yona malandza yakwe. Loko u endla tano, u ta swi vona leswaku Yehovha wa khathala hi vanhu lava n’wi tirhelaka hi ku tshembeka.—Ps. 84:11.

13. Ku heleriwa hi ntirho swi nga endla nhloko ya ndyangu yi titwa njhani?

¹³ Tinhloko ta mindyangu ti lava ku wundla mindyangu ya tona. A hi nge makwerhu loyi a nga nhloko ya ndyangu, u heleriwa hi ntirho a nga dyohanga nchumu. Hambiloko a endla matshalatshala yo lava ntirho wun’wana, a nga wu kumi. Leswi hinkwaswo, swi nga endla a tivona a nga pfuni nchumu. Switshembiso leswi Yehovha a hi tshembisaka swona swi nga n’wi pfuna njhani?

14. Hikwalaho ka yini Yehovha a hetisisa switshembiso swakwe?

¹⁴ Yehovha wa swi hetisisa switshembiso swakwe. (Yox. 21:45; 23:14) Ku ni swivangelo swo tala leswi endlaka a endla tano. Xivangelo xin’wana hileswaku vito kumbe ndhuma yakwe ya khumbeka. Yehovha u tshembise leswaku u ta khathalela malandza yakwe naswona u vona swi fanerile ku hetisisa xitshembiso xexo. (Ps. 31:1-3) Ku engetela kwalaho, wa swi tiva leswaku a hi ta hela matimba loko a a nga ma khathaleli malandza yakwe. U hi tshembisa leswaku u ta hi khathalela hi tlhelo ra nyama ni ra moya naswona a xi kona lexi nga n’wi sivelaka ku hetisisa xitshembiso lexi.—Mat. 6:30-33; 24:45.

15. (a) Hi xihi xiphiqo lexi Vakreste va le nkarhini wa vaapostola a va langutane na xona? (b) Hi xihi xitiyisekiso lexi hi xi kumaka eka Pisalema 37:18, 19?

¹⁵ Ku tiva leswaku Yehovha wa swi hetisisa switshembiso swakwe, swi endla hi tiyiseka leswaku u ta hi pfuna loko hi langutana ni swiphiqo swa timali. Xiya leswi endlekeke eka Vakreste va le nkarhini wa vaapostola. Loko vandlha ra le Yerusalema ri weriwe hi nxaniso  lowukulu, ‘hinkwavo handle ka vaapostola va hangalakile.’ (Mint. 8:1) Hikwalaho ka yini? Hikwalaho ka swiphiqo swa timali! Vakreste va lahlekeriwe hi makaya ni mabindzu ya vona. Hambiswiritano, Yehovha a nga va tshikanga naswona a va heleriwanga hi ntsako. (Mint. 8:4; Hev. 13:5, 6; Yak. 1:2, 3) U va seketerile Vakreste volavo vo tshembeka, na hina u ta hi seketela.—Hlaya Pisalema 37:18, 19.

16. Loko hi ya hi dyuhala hi nga titwa njhani?

¹⁶ Loko hi ya hi dyuhala, hi nga sungula ku titwa onge ntirho lowu hi wu endlelaka Yehovha a wa ha ri wa nkoka. Hosi Davhida na yena a titwa hi ndlela leyi fanaka loko a ya a dyuhala. (Ps. 71:9) Yehovha a nga hi pfuna njhani?

17. Hi dyondza yini eka ntokoto wa Jheri?

¹⁷ Xiya leswi endlekeleke makwerhu wa xisati loyi a vuriwaka Jheri. A rhambiwe leswaku a ya leteriwa ku khathalela Holo ya Mfumo kambe a nga swi lavi ku ya. U te: “Ndzi dyuharile, ndzi noni naswona a ndzi na vutshila byo endla nchumu lexi nga pfunaka entirhweni lowu wa Yehovha. A ndzi pfuni nchumu.” Nivusiku u khongele eka Yehovha hi mbilu hinkwayo. Loko a fika eHolweni hi siku leri landzelaka, a ha kanakana loko a ta swi kota. Eka ndzetelo wolowo, xivulavuri xin’wana xi vule leswaku vutshila bya nkoka lebyi hi nga na byona, i ku tiyimisela ka hina ku dyondzisiwa hi Yehovha. Jheri u ri: “Ndzi swi xiyile leswaku ‘a ndzi ri na byona vutshila byebyo!’ Ndzi sungule ku rila loko ndzi xiya leswaku Yehovha a a hlamula xikhongelo xa mina. A a ndzi tiyisekisa leswaku ka ha ri ni swilo swa nkoka leswi ndzi nga swi endlaka naswona u tiyimisele ku ndzi dyondzisa!” Loko Jheri a ya emahlweni, u ri: “Loko ndzi fika eHolweni, a ndzi chuhile  naswona a ndzi titwa ndzi nga pfuni nchumu. Kambe loko ndzi muka, ndzi titwe ndzi khutazekile ni ku xiya leswaku ndzi wa nkoka!”

18. Bibele yi swi kombisa njhani leswaku Yehovha wa swi tlangela leswi hi n’wi endlelaka swona hambiloko se hi dyuharile?

¹⁸ Loko hi ya hi dyuhala, hi nga tiyiseka leswaku ka ha ri na swo tala leswi hi nga swi endlaka entirhweni wa Yehovha. (Ps. 92:12-15) Yesu u hi dyondzise leswaku ku nga khathariseki vuswikoti ni matimba lawa hi nga na wona, Yehovha wa swi tlangela hinkwaswo leswi hi swi endlaka entirhweni wakwe. (Luka 21:2-4) Hikwalaho, endla leswi nga ematimbeni ya wena. U nga swi kota, hi xikombiso, vulavula hi Yehovha, khongelela vamakwerhu naswona khutaza van’wana leswaku va tshama va tshembekile. Yehovha u ku teka tanihi mutirhikuloni, ku nga ri hikwalaho ka leswi u kotaka ku swi fikelela kambe hikwalaho ka leswi u n’wi yingisaka hi ku tirhandzela.—1 Kor. 3:5-9.

19. I yini leswi Varhoma 8:38, 39, yi hi tiyisekisaka ha swona?

¹⁹ Mayana ku gandzela Yehovha, Xikwembu lexi tekaka malandza ya xona ma ri ya nkoka! U hi vumbe hi xikongomelo xa leswaku hi endla ku rhandza ka yena naswona vugandzeri bya ntiyiso hi byona lebyi endlaka hi tsaka. (Nhlav. 4:11) Hambiloko vanhu van’wana va hi teka hi nga pfuni nchumu kambe Yehovha a nga khomiwi hi tingana hi hina. (Hev. 11:16, 38) Loko vuvabyi, swiphiqo swa timali ni ku dyuhala swi hi endla hi titwa hi nga pfuni nchumu, a hi tsundzukeni leswaku a xi kona ni xin’we lexi nga hi hambanisaka ni rirhandzu ra Tata wa hina wa le tilweni.—Hlaya Varhoma 8:38, 39.