1, 2. ¿Ambeksï nitamakuarhisïni uánikua Jeobaeri marhuaricha ka néna uá pʼikuastaani inde ambe?

JU JE eranhaskaani arini tanimu ejempluechani. Erachini ma enga sapichku jaka, aiangustiksï eskaksï kʼéri pʼamenchakua ma exekuntaska enga sánhani arhijka chkerpini. Ístu, erachi ma enga jukari 50 jatirikia enga kánikua ánchikuarhirika, petanhantasïndi ánchikuarhitarhu ka no exentasïndi máteru ánchikuarhita nájkiruka kánikua jánguarhintani jaka. Ka pirenchi ma enga jatirikia, ísï pʼikuarherasïndi enajki nóteru xáni újkia marhuakuni Jeobani.

² Engachi ini ambe nitamakuarhini jaka, jamberichi ísï eratsejka eskachi nóteru ambe ma marhuasïnguia. I ambe uáti úni eskachi no tsípikua jingoni irekaaka, no uékakuarhiaka ka eskachi nóteru sési pájperakia máteruecha jingoni.

3. ¿Nénaksï exesïni tsípikuani Noambakiti ka imecha engaksï májkueni újka eska ima?

³ Parhakpini anapu kʼuiripuechaksï no jukaparharasïndi tsípikuani ísï eska Noambakiti. Méntkisïjtsïni ísï kámasïndi enájkichi no sáni jukaparhakue. No sési ambe eratsiparini, arhispti Ebani eska úpiringa libreni enga no kurhajchapiringa Tata Diosïni, peru Noambakiti sési mítetixapti eska enga Eba indeni ambe úpiringa, uarhipiringa. Méntkisï, Noambakiti juramukuasti parhakpinirhu anapu kʼérati negosiuechani, politikani ka relijionichani engaksï no jurhimbitiika. Ini ambe jimbo, nójtsïni ísku pakatasïndi engachi exejka eskaksï kʼuiripuecha engaksï kʼérati negosiuechani jatsiaka, politikuecha ka relijioniri orhejtsïkuticha nóksï jukaparharajka tsípikuani niksï exeni na engaksï pʼikuarherajka kʼuiripuecha.

4. ¿Ambechi exea ini jorhenguarhikua jimbo?

⁴ Peru Jeoba uékasïndi eskachi juchajkumindu sési pʼikuarheraaka, ka jarhuatasïndijtsïni engachi imani ambe nitamakuarhini jarhajka engajtsïni ísï pʼikuastajka enajkichi no ma ambe marhuajki (Sal. 136:23; Rom. 12:3). Ini jorhenguarhikua jimbochi  exeaka nénajtsïni jarhuatasïni Jeoba engachi arini ambe nitamakuarhini jarhajka: engachi pʼamenchani jarhajka, engachi uandanhiani jarhajka tumina jimbo ka engachi ísï pʼikuarherajka enajkichi nóteru xáni uáia marhuakuni Jeobani jimbokachi jatiriskia. Peru orheta, ju je exeni andichisï uá seguru jarhani eskajtsïni Jeoba iáminduechani jukaparharasïnga.

5. ¿Andichisï újki seguru jarhani eskajtsïni Jeoba jukaparharasïnga?

⁵ Nájkirukajtsïni Jeoba tʼupuri jingoni kueraaka, kánikuachi sánderu jukaparhakueska ka eska ma kunujkurhakua echeri (Gén. 2:7). Ju je exeani máru rasonichani engachi jimbo míteka eskajtsïni Jeoba jukaparharasïnga. Por ejemplu, ísïjtsïni kueraasti parachi úni xarhatani na enga jásï Tata Diosï máeka ima (Gén. 1:27). Ísï, ústi eska kʼuiripu sánderu ambakiti ambepiringa ka eska máteru ambe enga kueraaka ixú echerirhu ka juchantsïni jurajkuchisti Echerini ka animalichani parachi kuidariuani (Sal. 8:4-8).

6. ¿Ambe máteru ambe jimbochi míteski eskajtsïni Jeoba jukaparharasïnga nájkirukachi no perfektueka?

⁶ Nájkiruka Adani pekaripkia, Jeoba seguirixapti jukaparharaani kʼuiripuechani. Xánchi jukaparhakueska para ima, enga jamberi íntspika imeri Uájpa Jesusini komu kéjtsïtakua ma juchari pekaduecha jimbo (1 Juanu 4:9, 10). Pʼímutantskua jimbo, Tata Diosï tsítantauati imechani engaksï Adaniri pekadueri kulpa jimbo uarhika, imechani engaksï ambarhatika ka ístu imechani engaksï no úka míteni Jeobani (Uku. 24:15). Imeri Karakata jimbojtsïni aiangusïndi eskajtsïni kánikua jukaparharasïnga, peru no jimbokachi no pʼamenchasïnga, tumina ambe jimbo o na engachi xáni jatirika (Uku. 10:34, 35).

7. ¿Náki máteru rasonichanchi jatsiaski Jeobaeri marhuaricha parachi jakajkuni eskajtsïni ima jukaparharasïnga?

⁷ Tata Diosïri marhuarichachi ístu jatsiaska máteru rasonichani para jakajkuni eskajtsïni ima jukaparharasïnga. Pʼímarhistijtsïni parachi imani andarherani ka exesti na engachi jiókuarhijka ambakiti aianhperakuani (Juanu 6:44). Engachi uénapka Jeobani andarherani, imajtujtsïni andarheraspti juchantsïni (Sant. 4:8). Ístu, ima xarhatasïndi eskajtsïni jukaparharasïnga jimboka úrasïnga tiempu ka jánguarhintasïndi parajtsïni jorhendani. Ima sési mítesti na engachi jásï kʼuiripu máeka ka ístu mítesti nénachi uá niárani sánderu ambakiti kʼuiripu máeni. Ka jurhimberantasïndijtsïni jimbokajtsïni uékasïnga (Prov. 3:11, 12). Iámindu i ambe xarhatasïndi eskajtsïni Jeoba jukaparharasïnga.

8. ¿Nénajtsïni uá jarhuatani Salmo 18:27-29, parachi ménderueni exeani uandanhiatechani engachi jatsiajka?

⁸ Rei Dabidi mítespti eska Jeoba xénchasïrenga ka eska jarhuatasïrenga. Indeni ambe míteni, jarhuataspti para úni tekaantani jiáni engaksï máru ísï exenga enajki no ma ambe marhuaueni (2 Sam. 16:5-7). Engachi kánikua kómu pʼikuarherani jarhajka ka uandanhiata ambechi nitamakuarhini jarhani, Jeobajtsïni jarhuatasïndi ménderueni exeni ambe ma ka ístu parachi úni orhepani uérakuni náki uéjki uandanhiatani (arhinta je Salmo 18:27-29). Engachi jatsika Jeobaeri jarhuajperata, no ma ambejtsïni ójkutaati parachi tsípikua jingoni marhuakuni (Rom. 8:31). Ju je iásï exeni tanimu ambe nani engachi no jatsika para mirikurhini eskajtsïni Jeoba jukaparharasïnga ka xénchani.

9. ¿Nénajtsïni uá pʼikuastani pʼamenchakua ma?

⁹ Pʼamenchakuechaksï kuatajkpisïndi ka úni eskachi ísï eratseaka eskachi nóteru ambe ma uákia úni. Úpiringachi kʼuratseni eskaksï máteruecha míteaka ambe engachi nóteru újkia úni o jimbokachi uétarhinchasïnga eskajtsïni jarhuataaka. Ka nájkirukaksï máteruecha no míteaka eskachi pʼamenchaxaka, jamberichi kʼuratsesïnga jimbokachi nóteru úsïnguia imani ambe  úni engachi ióntki uénga. Engachi ini ambe nitamanchani jarhajka, Jeobajtsïni uinhaperantasïndi. ¿Néna ísï úsïni?

10. Eska na arhijka Proverbios 12:25, ¿ambejtsïni uá jarhuatani engachi pʼamenchani jauaka?

¹⁰ Engachi pʼamenchani jarhajka, ambakiti uandakuechajtsïni uáti uinhaperantani (arhinta je Proverbios 12:25). Jeoba ústi eskaksï Bibliarhu uánikua ambakiti uandakuecha karakata jauaka engajtsïni miátantajka eska ima pendienti jarhaska juchantsïni jimbo nájkirukachi pʼamenchakua ma kámaaka (Sal. 31:19; 41:3). Engachi arhintaaka ka ménderu arhintaani ambe enga Tata Diosï kararkuarhika, imajtsïni jarhuataati orhepani uérani engachi niáraska kómu pʼikuarherani pʼamenchakua ambe jimbo.

11. ¿Néna exespi erachi ma eska Jeoba jarhuataspka?

¹¹ Ju je exeni ambe enga nitamakuarhipka Jorge. Enga tumbi sapichuepka, kʼéri pʼamenchakua ma pʼiraspti enga ísï pʼikuastenga enajki nóteru ambe ma marhuauenia. Ima uandantasïndi: “No erokuarhixapka eskani xáni no sési pʼikuarherapiringa pʼamenchakua jimbo ni na engani xáni kʼuratsenga jimbokajtsïni iáminduecha ísku pakarasïrenga exeni. Engani sánderuni uinhamu japkia, eratsesïrenga na enga mójtakurhipiringa iámindu ambe. Kánikua no sési pʼikuarheraxapka, ísï jimbo, kómarhispka Jeobani eskarini jarhuatapiringa”. ¿Néna jarhuataspi Tata Diosï? Erachi uandantasïndi: “Úkua jukanchasïrenga arhintani, ísï jimbo, arhisptijtsïni eskani namunitu salmueri karakatechani arhiantapiringa, jima engaksï arhijka na enga xáni uandanhiajka Jeoba imeri marhuarichani jimbo. Pauani pauani ménderuni arhiantasïrenga imani karakatechani. Jarhuatasïrendijtsïni ka sésijtsïni pʼikuastani, ísï tátsekua, máteruechaksï uénaspti exeni eskani sánderuni tsípisïrenguia. Astaksï uandasïrendi eska imechani uinhaperantaasïrenga engajtsïni exenga tsípini jarhani. Exespka eskarini Jeoba mókucheantaspka kómarhikuechani. Jarhuatasptirini nóteru ísï pʼikuarherania eska antesi.  Uénaspka sánderuni eratsentani ambe enga Biblia uandajka na engarini exejka Jeoba nájkirukani pʼamenchani jaka”.

12. ¿Ambechi uá úni para exeni eskajtsïni Jeoba jarhuatasïnga jiáni engachi pʼamenchani jarhajka?

¹² Engachi pʼamenchakua ma kámajka, uákachi seguru jarhani eska Jeoba míteska ambe engachi nitamakuarhini jaka. Ju je kómarhini eskajtsïni jarhuataaka no jukari eratseni jarhani imani ambe engachi nitamakuarhini jaka. Ju je arhintani Bibliani parachi exeantani ambakiti uandakuechani enga Jeoba kararkuarhiakia para jucha. Ju je jingontku arhiantani imani karakatechani engaksï uandajka na enga xáni jukaparharajka Jeoba imeri marhuarichani. Engachi ísï úska, exeakachi eska Jeoba sési kaasïnga iámindu imechani engaksï sési marhuakujka (Sal. 84:11).

13. ¿Néna uá pʼikuarherani familieri orhejtsïkuti ma enga ánchikuarhitarhu petanhantaska?

¹³ Iámindu familieri orhejtsïkutichaksï uékasïndi kéndaani imecheri kʼumanchikuarhu anapuechani. Ju je eranhaskani eska erachi ma ísku jatini petanhantasïnga ánchikuarhitarhu. Jánguarhintasïndi máteru ánchikuarhita jirinhani peru no exentasïndi. Ini ambe nitamakuarhiparini, jamberi ísï pʼikuarheraati eska no ma ambe marhuasïnga. ¿Néna jarhuataa eratsentani ambe enga Jeoba aiatspijka?

14. ¿Andisï kumplirijki Jeoba ambe enga aiatspijka?

¹⁴ Jeoba méntkisï kumplirisïndi ambe enga aiatspijka (Jos. 21:45; 23:14). Uánikua rasonichani jatsiasti para kumpliriuani. Ma jindesti eska no sési pakatapiringa imeri nombrini enga no ísï úpiringa. Jeobajtsïni aiachistia eska kuájchakuauaka imeri ambakiti marhuarichani, jimbosï uéjti kumplirini imeri aiatsperakuani (Sal. 31:1-3). Ístu, mítesti eskachi kánikua no sési pʼikuarherapiringa enga ima no uandanhiapiringa imechani jimbo engaksï imeri familia jingoni kuenta  úkuarhijka. Aiachesïndijtsïni eskajtsïni íntskuaka ambe engachi xáni uétarhinchajka parachi irekani jarhani ka ístu parachi sési marhuakuni jarhani, ka no ma ambe uáti ójkutani para ísï úni (Mat. 6:30-33; 24:45).

15. a) ¿Nákiksï uandanhiatechani jatsiaspi primeru siglurhu anapu kristianuecha? b) Eska na arhijka Salmo 37:18, 19, ¿amberichi uá seguru jarhani?

¹⁵ Engachi miájka andisï Jeoba kumplirijki ambe enga aiatspijka, uákachi seguru jarhani eskajtsïni jarhuataaka jiáni engachi uandanhiata ambe jatsiaka tumina jimbo. Ju je miáuani primeru siglurhu anapu kristianuechani. Engaksï Jerusaleni anapu kúnguarhikuarhu anapuecha uénapka no sési kánhani, iáminduechaksï etsandurhikuarhispti peruksï apostulicha jima pakaraspti (Uku. 8:1). Indeni ambe jimbo, jamberiksï úkua jukanchapti tumina jimbo. Jamberiksï nóteru jatsiptia kʼumanchikua ma, ánchikuarhita ka negosiuechani. Peru Jeoba no jurajkuaspti ka imechaksï méntkisï tsípikua jingoni irekaspti (Uku. 8:4; Ebr. 13:5, 6; Sant. 1:2, 3). Tata Diosï jarhuataaspti imani ambakiti kristianuechani ka májkueni uáti juchantsïni jingoni (arhinta je Salmo 37:18, 19).

16. ¿Ambe úpirini úni eskachi no seguru jauaka eska Jeoba jukaparharasïnga na engachi marhuakuni jaka?

¹⁶ Engachi sánhani arhini jarhajka jatiriini, úpiringachi uénani eratseni eskachi nóteru uákia xáni sési marhuakuni Jeobani. Enga rei Dabidi jatiripkia, jamberi imajtu niárapti kánikua uandanhiani indeni ambe jimbo (Sal. 71:9). ¿Nénajtsïni jarhuatasïni Jeoba?

17. ¿Ambejtsïni jorhendasïni ambe enga nitamakuarhipka pirenchi ma enga Joanna arhinhajka?

¹⁷ Ju je exeni ambe enga nitamakuarhipka pirenchi ma enga Joanna arhinhajka. Pʼímarhinhaspti para nirani jorhenguarhini néna kuidariuani Kʼumanchikuechani Reinueri, peru ima no uékasïrendi nirani. Uandaspti: “Kutsumiskia,  tsïndiska ka no ma ambe jorhenaska úni enga marhuauaka para i ánchkuarhita. No ma ambe marhuasïnga”. Ma chúri ante deksï arhistaminhani, mintsita jingoni kómarhispti Jeobani. Ísï pauandikua enga niárapkia salonirhu, útasï no segura jarhaspti sini jatsipirini para jima jarhani. Erachi ma enga arhijtsïkpini japka, someni uandaspti eska ambe enga sánderu jukaparhakueka, jindeska uékani eskajtsïni Jeoba jorhendaaka. Joanna miásïndi: “Eratsespka: ‘Ji uékasïnga eskarini Jeoba jorhendaaka’. Uénaspka uerani engani kuenta íntskukuarhipka eskarini Jeoba mókuchintaspka kómarhikuani. Uénaspka eratseni eskani úpiringa jukaparakua ambe íntskuni Jeobani ka eskarini ima uékasïrenga jorhendani”. Joanna miántasïndi indeni ambe ka uandasïndi: “Chéparini inchaspka tánguarhikuarhu, no sési pʼikuarheraparini ka no sáni tsípikua jingoni. Peru enga kʼamakurhipkia, nóteruni chéxapkia, sési pʼikuarherantaspka ka exespka eskani útasï úpiringa úni ambe ma”.

18. ¿Néna xarhatasïni Biblia eska Jeoba seguirixaka jukaparharani na engachi marhuakujka nájkirukachi jatirijkia?

¹⁸ Nájkirukachi sánhani arhini jauaka jatirini, uákachi seguru jarhani eskajtsïni Jeoba útasï uáka úrani (Sal. 92:12-15). Jesusijtsïni jorhendasti eska Jeoba jukaparharasïnga ambe engachi xáni újka para marhuakuni, nájkirukachi ísï exeaka eska no kánikua ambeska o eskachi no uánikua ambe jorhenaska úni (Luk. 21:2-4). Ísï jimbo, ju je exeni imani ambe engachi újka úni. Por ejemplu, úsïngachi Jeobaeri ambe aianhpini, kómarhijpikuani erachichani ka jarhuataani máteruechani paraksï sési marhuakuni jarhani Jeobani. Jeobajtsïni ísï exesïndi eska imeri jarhuajpiricha peru no imani ambe jimbo engachi újka, sino jimbokachi mintsita jingoni uékasïnga kurhajchani (1 Kor. 3:5-9).

19. Eska na arhijka Roma 8:38, 39, ¿amberichi uá seguru jarhani?

¹⁹ Xáni engachi sési pʼikuarherajka kómarhini Jeobani, Tata Diosï ma enga meru jukaparharaajka imechani engaksï marhuakujka. Imajtsïni kuerasti parachi úni ambe enga ima uéjka, ka imantku kómarhini, úsïndi eskachi meru tsípikua jingoni irekaaka (Jaŋ. 4:11). Jamberijtsïni parhakpini anapuecha ísï exejti enajkichi no ma ambe marhuajki, peru Jeoba no sáni kʼuratsesïndi juchantsïni jimbo (Ebr. 11:16, 38). Engachi kánikua no sési pʼikuarherani jauaka pʼamenchakua ambe jimbo, tumina jimbo o jimbokachi jatiriskia, ju je miáni eska no ma ambe uáka úni eskajtsïni juchari Táti uékpiti auandarhu anapu nóteru xénchaakia (arhinta je Roma 8:38, 39).