1-2. Kasi ŵanthu ŵanandi ŵa Yehova ŵakusangana na masuzgo wuli, ndipo ghakuŵapangiska kuti ŵajiwonenge wuli?

GHANAGHANIRANI viyelezgero vitatu ivi: Mubali wachinyamata waphalirika na dokotala kuti wali na nthenda yakofya. Mubali wakulimbikira ntchito uyo wali na vyaka vyakujumpha 50, ntchito yamumalira, nangauli wayezgayezga kuti wasange yinyake kweni wakuyisanga yayi. Mudumbu wakugomezgeka uyo ni muchekuru wakutondeka kuchita vinandi pakuteŵetera Yehova nga umo wakachitiranga kale.

² Usange namwe muli na masuzgo ghakuyana waka, mungajiwona nga kuti ndimweso ŵakuzirwa yayi. Masuzgo agha ghangamupangiskani kuti muŵe ŵambura kukondwa, mujiwonenge kuti ndimwe ŵawakawaka, ndipo ivi vingananga ubwezi winu na ŵanji.

3. Kasi Satana na awo ŵakumulondezga ŵakuwona wuli umoyo wa munthu?

³ Charu ichi chili na maghanoghano gha Satana pa nkhani ya umoyo. Nyengo zose Satana wakuwona ŵanthu nga kuti mbambura kuzirwa. Wakachita chitima yayi kupusika Eva kuti waŵenge na wanangwa usange wangaleka kupulikira Chiuta, nangauli wakamanyanga kuti chilango chake ni nyifwa. Kwamba kale Satana ndiyo wakulongozga ŵamalonda, ŵandyali na ŵavisopa. Lekani ntchakuzizika yayi kuwona kuti ŵamalonda, ŵandyali na ŵalongozgi ŵavisopa ŵakuchindika yayi umoyo wa munthu.

4. Kasi tisambirenge vichi mu nkhani iyi?

⁴ Mwakupambana na Satana, Yehova wakukhumba kuti tijiwonenge kuti ndise ŵakuzirwa, ndipo wakutovwira para tasangana na masuzgo agho ghangatipangiska kujiwona kuti ndise ŵawakawaka. (Sal. 136:23; Rom. 12:3) Nkhani iyi yilongosorenge  umo Yehova wakutovwilira pa vyakuchitika ivi: (1) Para talwara, (2) para tasangana na suzgo la ndalama, na (3) para tikujiwona kuti palije chamahara icho tingachitira Yehova chifukwa cha uchekuru. Kweni chakwamba, tiyeni tiwone chifukwa icho tikugomezgera kuti waliyose wa ise ngwakuzirwa kwa Yehova.

5. Kasi ntchivichi chikumukhorweskani kuti ŵanthu mbakuzirwa chomene kwa Yehova?

⁵ Nangauli tili kupangika kufuma ku dongo, kweni ndise ŵakuzirwa chomene kuluska dongo. (Gen. 2:7) Tiyeni tiwone vifukwa ivyo tikuyowoyera kuti ndise ŵakuzirwa kwa Yehova. Yehova wali kulenga ŵanthu munthowa yakuti ŵangayezga mikhaliro yake. (Gen. 1:27) Pa chifukwa ichi, tili kulengeka mwapadera chomene kuluska chilengiwa chilichose pa charu chapasi. Yehova wali kutipa mazaza pa charu kweniso pa vinyama.—Sal. 8:4-8.

6. Kasi ntchivichi chinyake icho chikulongora kuti Yehova wakuzirwiska ŵanthu ŵambura kufikapo?

⁶ Nanga mphamanyuma pakuti Adamu wananga, Yehova wakalutilira kuzirwiska ŵanthu. Pakuti wakutizirwiska chomene lekani wakatipa Mwana wake wakutemweka Yesu, kuŵa sembe yakutiwombora ku zakwananga zithu. (1 Yoh. 4:9, 10) Chifukwa cha sembe iyi, Yehova wazamuwuska “ŵarunji na ŵambura urunji” awo ŵali kufwa chifukwa cha kwananga kwa Adamu. (Mil. 24:15) Mazgu ghake ghakulongora kuti ndise ŵakuzirwa chomene kwa iyo nanga tingaŵa ŵalwari, ŵakavu panji ŵachekuru.—Mil. 10:34, 35.

7. Kasi ŵateŵeti ŵa Chiuta ŵaliso na vifukwa wuli vyakugomezgera kuti wakuŵazirwiska?

⁷ Tiliso na vifukwa vinyake vyakugomezgera kuti Yehova wakuwona kuti ndise ŵakuzirwa. Wali kutiguzira kwa iyo wati wawona umo tikachitira na makani ghawemi. (Yoh. 6:44) Apo tikamba kusendelera kwa iyo, nayo wakasendelera kwa ise. (Yak. 4:8) Yehova wakupelekaso nyengo na nkhongono kuti watisambizge, kulongora kuti ndise ŵakuzirwa kwa iyo. Wakumanya umo wunthu withu uliri pasono kweniso wakumanya kuti tingasintha. Wakutilanga chifukwa chakuti wakutitemwa. (Zinth. 3:11, 12) Uwu mbukaboni wakukwana wakuti Yehova wakutitemwa.

8. Kasi mazgu agho ghali pa Salimo 18:27-29 ghangatipangiska kuti tighawonenge wuli masuzgo?

⁸ Ŵanyake ŵakawonanga kuti Davide uyo wakaŵa themba kuti ngwawakawaka. Kweni iyo wakamanyanga kuti Yehova wakumutemwa ndiposo wakumovwira. Kumanya fundo iyi kukamovwira Davide kuwona mwakwenelera masuzgo na kughazizipizga. (2 Sam. 16:5-7) Para tagongowa panji tasangana na masuzgo, Yehova wangatovwira kuti tiwonenge vinthu mwakwenelera kweniso kuti titonde suzgo lililose. (Ŵazgani Salimo 18:27-29.) Usange Yehova wakutovwira, palije icho chingatitondeska kumuteŵetera na chimwemwe. (Rom. 8:31) Sono tiyeni tiwone masuzgo ghatatu agho tikukhumbikwira chomene kukumbuka kuti Yehova wakutitemwa kweniso wakutizirwiska.

9. Kasi ulwari ungatipangiska kuti tijiwonenge wuli?

⁹ Ulwari ungatipangiska kughanaghana kuti ndiseso ŵakuzirwa yayi kwa munthu waliyose. Nyengo zinyake soni zingatikora para ŵanji ŵamanya kuti tikutondeka kuchita vinyake, panji tikuthemba wovwiri wa ŵanyithu. Nanga vingaŵa kuti ŵanyithu ŵakumanya yayi kuti tikulwara, soni zingatikora chifukwa chakuti tingafiska yayi kuchita ivyo tikachitanga. Panyengo za nthena izi, Yehova wakutikhozga. Kasi wakutikhozga wuli?

10. Kuyana na ivyo vili pa Zintharika 12:25, kasi ntchivichi chingatovwira para talwara?

 ¹⁰ Usange talwara, “mazgu ghawemi” ghangatikhozga. (Ŵazgani Zintharika 12:25.) Mu Baibolo, Yehova wakutiphalira vinthu viwemi vinandi ivyo vikutikumbuska kuti ndise ŵakuzirwa chomene kwa iyo nanga ni para tingalwara. (Salimo 31:19; 41:3) Para tikuŵazga Mazgu ghake, Yehova wazamutovwira kuti tileke kwenjerwa chifukwa chakuti ndise ŵalwari.

11. Kasi Yehova wakamovwira wuli mubali munyake?

¹¹ Wonani ivyo vikachitikira Jorge. Apo wakaŵa munyamata, ŵakamusanga na nthenda yakofya chomene ndipo yikamupangiskanga kujiwona kuti ngwawakawaka. Iyo wakuti: “Chifukwa chakuti nthenda yane yikapangiskanga kuti ŵanthu ŵanilaŵiskenge, soni zikanikoranga. Ndipo apo matenda ghakakoleskanga nkhawona kuti kawemi palije. Nkhaŵa wachitima chomene, ndipo nkhalomba Yehova kuti wanovwire.” Kasi Yehova wakamovwira wuli? Iyo wakuti: “Pakuti vikanisuzganga kupulikiska vinthu, nkhaŵazganga mavesi ghachoko waka gha mu buku la Masalimo agho ghakulongora kuti Yehova wakupwelelera ŵateŵeti ŵake. Zuŵa lililose nkhaŵazganga mwakuwerezgawerezga mavesi ghachoko waka agha, ndipo nkhawona kuti ghakunipembuzga chomene. Pati pajumpha nyengo yichoko waka, ŵanthu ŵakamba kuwona kuti ndine wakukondwa. Ŵakamba kuyowoya kuti ŵakukhozgeka chomene chifukwa ndine munthu wakukondwa. Nkhamanya kuti Yehova wazgora malurombo ghane. Wakanovwira kuti nisinthe umo nkhajiwoneranga. Nkhamba kughanaghanira chomene ivyo Mazgu ghake ghakuyowoya pa nkhani ya umo Yehova wakuniwonera nangauli nili mulwari.”

12. Kasi mungachita wuli kuti Yehova wamovwirani para mukusuzgika na ulwari?

 ¹² Para mukusuzgika na ulwari, mungaŵa na chigomezgo chose kuti Yehova wakumanya suzgo linu. Mulombani kuti wamovwirani kuti muwonenge mwakwenelera suzgo linu. Pamanyuma ŵazgani fundo zakupembuzga mu Baibolo izo Yehova wali kumulemberani. Ŵikani mtima pa mavesi agho ghakulongora kuti Yehova wakuzirwiska chomene ŵateŵeti ŵake. Para muchitenge nthena, muwonenge kuti Yehova ni muwemi ku wose awo ŵakumuteŵetera mwakugomezgeka.—Sal. 84:11.

13. Kasi mutu wambumba ungajipulika wuli para ntchito yamara?

¹³ Mutu uliwose wambumba ukukhumba kuti usangirenge vyakukhumbikwa mbumba yake. Kweni tiyelezgere kuti mubali ŵamulekeska ntchito nangauli palije icho wabuda. Wakuyezgayezga kuti wasange ntchito yinyake kweni wakuyisanga yayi. Suzgo ili lingamupangiska kujipulika kuti ngwambura kuzirwa. Kasi kughanaghanira ivyo Yehova walayizga kungamovwira wuli?

14. Chifukwa wuli Yehova wakufiska malayizgo ghake?

¹⁴ Nyengo zose Yehova wakufiska malayizgo ghake. (Josh. 21:45; 23:14) Wakuchita nthena pa vifukwa vyakupambanapambana. Chakwamba, wakuchita nthena chifukwa cha zina lake. Yehova wali kulayizga kuti wapwelelerenge ŵateŵeti ŵake ŵakugomezgeka, ndipo ngwakukhumbisiska kufiska layizgo ili. (Sal. 31:1-3) Nakuti Yehova wakumanya kuti tingakondwa yayi usange wangaleka kupwelelera ŵanthu awo ŵali mu mbumba yake. Wakutilayizga kuti watipwelelerenge mwauzimu na kuthupi wuwo kuti tilutilire kumuteŵetera mwakugomezgeka,  ndipo palije icho chingamutondeska kufiska layizgo lake.—Mat. 6:30-33; 24:45

15. (a) Kasi Ŵakhristu ŵakwambilira ŵakasangana na suzgo wuli? (b) Kasi lemba la Salimo 37:18, 19 likutisimikizgira vichi?

¹⁵ Para tikukumbuka chifukwa icho Yehova wakufiskira malayizgo ghake, tiŵenge na chigomezgo chose kuti watovwirenge usange tasangana na suzgo la ndalama. Wonani ivyo vikachitikira Ŵakhristu ŵakwambilira. Mipingo ya ku Yerusalemu yati yamba kutambuzgika chomene, ‘wose ŵakambininika, ŵapositole pera ndiwo ŵakakhala.’ (Mil. 8:1) Ivi vikapangiska kuti Ŵakhristu ŵanandi ŵasoŵe pakukora. Ŵanandi ŵakwenera kuti ŵakataya nyumba zawo na mabizinesi ghawo. Ndipouli, Yehova wakaŵataya yayi. Ndipo ŵakalutilira kuŵa ŵachimwemwe. (Mil. 8:4; Heb. 13:5, 6; Yak. 1:2, 3) Yehova wakaŵawovwira Ŵakhristu ŵakugomezgeka aŵa, ndipo nase watovwirenge.—Ŵazgani Salimo 37:18, 19.

16. Kasi ntchivichi chingatipangiska kughanaghana kuti kusopa kwithu nkhwambura kuzirwa kwa Yehova?

¹⁶ Para tamba kuchekura tingamba kughanaghana kuti tingachita vinandi yayi pakuteŵetera Yehova. Themba Davide nalo likajipulikanga nthena apo likachekuranga. (Sal. 71:9) Kasi Yehova wangatovwira wuli?

17. Kasi tingasambirako vichi ku ivyo vikachitikira mudumbu munyake zina lake Jheri?

¹⁷ Wonani ivyo vikachitikira mudumbu munyake zina lake Jheri. Wakachemeka kuti nayo wakaŵepo pa ungano wa awo ŵakunozga Nyumba za Ufumu, kweni mudumbu uyu wakakhumbanga yayi kuluta. Iyo wakati: “Ndine muchekuru, chokoro, nakuti palije icho nkhumanyapo chakukhwaskana na vyakuzenga. Ndine wambura ntchito.” Mu usiku wakuti machero ghake kuŵenge ungano uwu, wakalomba  Yehova kufumira pasi pamtima. Zuŵa lakulondezgapo wati wafika pa Nyumba ya Ufumu, wakakayikiranga nipera usange waŵengepo pa ungano uwu. Pa ungano uwu, yumoza mwa ŵabali awo ŵakadangiliranga wakadidimizgapo fundo yakuti luso lwapadera chomene ulo tingamupa Yehova ni khumbo lithu lakuti tisambizgike na iyo. Jheri wakuti: “Nkhawona kuti, ‘luso ulu nili nalo.’ Nkhamba kulira nati namanya kuti Yehova wazgora lurombo lwane. Mubali uyu wakanovwira kumanya kuti Yehova wanganisambizga kuchita milimo yakuzirwa.” Para wakulaŵiska kumanyuma, iyo wakuti: “Apo nkhizanga ku ungano uwu nkhaŵa wakwenjerwa kweniso nkhajiwonanga wawakawaka. Kweni apo nkhafumanga pa ungano uwu nkhongono zikakwera ndipo nkhajiwonanga kuti nane ndine wakuzirwa chomene.”

18. Kasi Baibolo likulongora wuli kuti Yehova wakulutilira kuzirwiska kusopa kwithu nanga tingaŵa kuti tachekura?

¹⁸ Apo tikuchekura, tingaŵa na chigomezgo chose kuti Yehova wachali na ntchito iyo wangatipa. (Sal. 92:12-15) Yesu wakasambizga kuti nanga ivyo tingachitira Yehova tingaviwona kuti ni vyambura kuzirwa, kweni Yehova wakuzirwiska chomene chilichose icho tingachita pakumuteŵetera. (Luka 21:2-4) Ntheura ŵikani mtima pa ivyo mungafiska kuchita. Mwachiyelezgero, mungapharazga vya Yehova, kulombera ŵabali ŵinu, na kuchiska ŵanji kuti ŵalutilire kugomezgeka. Yehova wakumuwonani kuti muli ŵantchito ŵanyake, chifukwa cha ivyo mukuchita yayi, kweni chifukwa chakuti ndimwe ŵakugomezgeka kwa iyo.—1 Kor. 3:5-9.

19. Kasi lemba la Ŵaroma 8:38, 39 likutisimikizgira vichi?

¹⁹ Tili na mwaŵi ukuru kusopa Yehova, Chiuta uyo wakuzirwiska chomene awo ŵakumuteŵetera. Wali kutilenga kuti tichitenge khumbo lake, nakuti kusopa kwaunenesko ndiko kukutipangiska kuti tikondwenge na umoyo. (Chivu. 4:11) Nangauli charu chingatiwona nga kuti ndise ŵawakawaka, kweni Yehova wakutiwona nthena yayi. (Heb. 11:16, 38) Para tagongowa chifukwa cha ulwari, kusoŵa kwa ndalama, panji uchekuru, tiyeni tikumbukenge kuti palije icho chingatipatuska ku chitemwa cha Adada ŵithu ŵakuchanya.—Ŵazgani Ŵaroma 8:38, 39.