1-2. Ne a fakalavelave e fe‵paki mo tino o Ieova e tokouke, kae ne a pokotiaga e maua ne latou?

MAFAUFAU aka la ki fakaakoakoga konei e tolu: Se taina talavou ne pokotia i se masaki matagā. Se taina galue malosi telā ko 50 tupu ana tausaga ne galo atu tena galuega, kae faitalia ana taumafaiga, ne seki mafai o maua se suā galuega. Se tuagane fakamaoni telā ko matua kae ko sē uke ana mea e mafai o fai i te galuega a Ieova pelā mo te taimi muamua.

² Kafai e tai ‵pau ou fakalavelave mo latou konei, e mafai loa o mafaufau koe i a koe ko sē aoga. E mafai ne fakalavelave konā o ave kea‵tea tou fiafia, maua ne koe a lagonaga sē ‵lei e uiga ki a koe, kae fakalavelave atu foki ki tou fesokotakiga mo nisi tino.

3. Ne a mafaufauga o Satani mo tino kolā e ‵nofo mai lalo i tena pulega e uiga ki te olaga o tino?

³ E fakaata mai ne te lalolagi tenei a te kilokiloga a Satani ki te olaga o tino. E kilo atu faeloa a Satani ki tino e pelā me sē na loa ko tāua. Ne fai atu a ia ki a Eva mo te sē alofa me ka saoloto tou fafine māfai e se fakalogo a ia ki te Atua, e tiga loa ne iloa ‵lei ne ia me i te fakasalaga o te sē fakalogo, ko te mate. E pule atu faeloa a Satani ki mea fakapisinisi, mea fakapolitiki mo fakapotopotoga lotu i te lalolagi tenei. Tela la, e se ‵poi tatou me e tokouke a tino faipisinisi, tino kolā e ‵kau ki mea fakapolitiki, mo takitaki lotu e fakaasi mai ne latou a tena uiga sē āva ki ola mo te ‵lei o tino.

4. Ne a mea ka sau‵tala tatou ki ei i te mataupu tenei?

⁴ I te suā feitu, e manako a Ieova ke maua ne tatou a lagonaga ‵lei e uiga ki a tatou eiloa, kae e fesoasoani mai a ia ke fakafesagai  atu tatou ki tulaga kolā e fai ei ke mafau‵fau tatou i a tatou ko sē aoga. (Sala. 136:23; Loma 12:3) Ka fakamatala mai i te mataupu tenei a te auala e fesoasoani mai a Ieova ki a tatou i tulaga konei e fakaasi atu mai lalo: (1) Māfai ko ma‵saki tatou, (2) māfai ko fakafesagai mo tulaga faiga‵ta i mea tau tupe, kae ko te (3) māfai e fai ne te tulaga matua ke mafau‵fau tatou i a tatou ko sē uke ‵tou mea e fai mō te galuega a Ieova. Kae muamua la, ka tauloto tatou ki te pogai e loto tali‵tonu me i a tatou taki tokotasi e tāua eiloa ki a Ieova.

5. Ne a fakamaoniga e lavea ne koe me e fakatāua ne Ieova a tino?

⁵ E tiga loa ne faite tatou mai te ‵pefu o te laukele, e tāua fakafia atu tatou i lō te ‵pefu. (Kene. 2:7) Mafaufau aka la ki nisi pogai e iloa ei ne tatou me e tāua tatou ki a Ieova. Ne faite ne ia a tino mo te manakoga ke fakaata mai ne latou a ana uiga. (Kene. 1:27) I te faiga tenā, ne fakatāua ne ia tatou mai nisi mea aka kolā ne faite ne ia i te lalolagi, kae fai ne ia ke pule atu tatou ki te lalolagi mo manu.—Sala. 8:4-8.

6. Se a te fakatalitonuga e maua ne tatou me e fakatāua ne Ieova a tino sē ‵lei katoatoa?

⁶ Mai tua foki loa o te taimi ne agasala ei a Atamu, ne tumau eiloa i te fakatāua ne Ieova a tino. E fakatāua malosi ne ia a tino, telā ne tuku mai ei ne ia tena Tama fagasele ko Iesu, pelā me se togiola mō ‵tou agasala. (1 Ioa. 4:9, 10) Ke fakagalue aka te aoga o te togiola, ka toe faka‵tu aka ne Ieova a latou kolā ne ‵mate atu ona ko te agasala a Atamu, ko “tino amio‵tonu mo tino sē amio‵tonu.” (Galu. 24:15) E fakaasi mai i tena Muna me i a tatou e tāua ki a ia faitalia i a tatou e ma‵saki, ma‵tiva io me ko ma‵tua.—Galu. 10:34, 35.

7. Ne a nisi pogai e tali‵tonu ei a tavini a te Atua me e fakatāua ne Ieova latou?

⁷ E isi aka foki ne pogai ke tali‵tonu tatou me e fakatāua ne Ieova a tatou. Ne ‵taki atu ne ia tatou ki a ia kae ne lavea ne ia te auala ne ‵saga atu ei tatou ki te tala ‵lei. (Ioa. 6:44) I te taimi ko kamata ei o fakapili‵pili atu tatou ki a Ieova, ko fakapilipili mai ei a ia ki a tatou. (Iako. 4:8) E fakamāumāu foki ne Ieova ana taimi mo taumafaiga ke akoako tatou, fakaasi mai ei me e tāua tatou ki a ia. E iloa ne ia me ko tatou ne vaegā tino pefea i te taimi nei mo te auala e mafai o momea aka ei te ‵lei o tatou. Kae e polopoloki ne ia tatou me e alofa mai a ia ki a tatou. (Faata. 3:11, 12) Se fakamaoniga sili me e fakatāua ne Ieova tatou!

8. E aoga pefea a pati ne fakamau i te Salamo 18:27-29 ki ‵tou kilokiloga e uiga ki fakalavelave o tatou?

⁸ Ne ‵kilo atu a nisi tino ki te Tupu ko Tavita e pelā me ko sē aoga, kae ne iloa ‵lei ne tou tagata me i a Ieova ne alofa kae fesoasoani atu ki a ia. Ne fesoasoani atu te mea tenā ke maua ne Tavita se kilokiloga tonu e uiga ki a ia kae ke kufaki foki i te tulaga tenā. (2 Samu. 16:5-7) Kafai tatou e vāi‵vai io me fe‵paki mo mea faiga‵ta, e mafai o fesoasoani mai a Ieova ke maua ne tatou se kilokiloga tonu kae ke manumalo i so se fakalavelave. (Faitau te Salamo 18:27-29.) Kafai e maua ne tatou te fesoasoani o Ieova, e se mafai ne so se mea o taofi tatou mai te tavini atu ki a ia mo te fia‵fia. (Loma 8:31) Ke na sau‵tala nei tatou ki tulaga mautinoa e tolu māfai ko manakogina ke masaua ne tatou a te alofa mo te fakatāua ne Ieova o tatou.

9. E pokotia pefea ‵tou kilokiloga e uiga ki a tatou eiloa māfai ko ma‵saki?

⁹ E mafai o pokotia ‵tou lagonaga māfai ko fakafesagai tatou mo masaki. E mafai o oko mai te mafaufauga me ko sē aoga tatou. E mafai o ‵mā tatou māfai e lavea ne nisi tino me isi se fakalavelave ki a tatou, io me māfai ko fakalago‵lago  tatou ki nisi tino mō se fesoasoani. Kafai foki loa e se iloa ne nisi tino i a tatou e ma‵saki, e mafai loa o ‵mā tatou me ko sē uke a mea e mafai ne tatou o fai pelā mo taimi mua. I vaegā taimi faiga‵ta penā, e fakamalosi faeloa ne Ieova a tatou. I te auala fea?

10. E ‵tusa mo pati i te Faataoto 12:25, se a te mea e mafai o fesoasoani mai māfai tatou ko ma‵saki?

¹⁰ Kafai tatou ko ma‵saki, kae ko “pati ‵lei” e mafai o fakamalosi ne ia ‵tou agaga. (Faitau te Faataoto 12:25.) I te Tusi Tapu, ne fakamau katoa ne Ieova a pati kolā e fakamasaua mai i a tatou e tāua ki a ia faitalia me ma‵saki tatou. (Sala. 31:19; 41:3) Kafai e fai‵tau faeloa tatou ki muna fakaosofia konā, ka fesoasoani mai eiloa a Ieova ke fakafesagai atu tatou ki lagonaga sē ‵lei māfai ko ma‵saki tatou.

11. I te auala fea ne maua ei ne se taina e tokotasi a te fesoasoani mai i a Ieova?

¹¹ Mafaufau ki te tala o Jorge. E pelā me se tamataene, ne maua ne Jorge se masaki matagā telā ne gasolo loa o masei atu, kae fai ne ia ke mafaufau tou tagata i a ia ko sē aoga. “Ne seki toka eiloa o fakafesagai atu ki te auala ka pokotia ei oku lagonaga ona ko toku masaki io me ko kilokiloga a tino ki a au,” ne fai mai a Jorge. “I te taimi ko gasolo ei o masei te tulaga o oku, ne mafaufau au ki te auala ka ma‵fuli ei oku fakanofonofoga. Ne fanoanoa ‵ki au, kae ne akai atu au ki a Ieova mō se fesoasoani.” I te auala fea ne fesoasoani atu a Ieova? “Ona ko te sē toka o toku mafaufau, ne fakamalosi eiloa au ke faitau ki fuaiupu toe‵toe mai te tusi o Salamo kolā e fakamatala mai i ei a te atafai o Ieova ki ana tavini. Ne faitau faeloa ne au a nāi tusi fai‵tau i aso takitasi, kae ne fakamafanafana mai eiloa a te mea tenā ki a au. Fakamuli ifo, ne kamata o lavea ne tino i a au ko gasolo o fakamisikata malosi. Ne fai mai foki latou me ne fakamalosi atu ki a latou a toku uiga fiafia. Ne iloa aka i ei ne au me ne tali mai ne Ieova aku ‵talo! Ne fesoasoani mai a ia ke ‵fuli taku kilokiloga ki a au loa. Ne kamata eiloa  o saga tonu atu au ki ana pati i tena Muna e uiga ki tena kilokiloga ki a au faitalia toku masaki.”

12. Kafai ko fepaki mo se masaki, e mafai pefea o maua ne koe te fesoasoani o Ieova?

¹² Kafai koe masaki, ke loto talitonu me e iloa kae lavea ne Ieova tou fakalavelave. Akai atu ki a ia mō se fesoasoani ko te mea ke ati aka ne koe se kilokiloga aoga e uiga ki tou tulaga. Ko ‵sala atu ei ki pati fakamafanafana loto a Ieova i loto i te Tusi Tapu. Faitau ki fuaiupu kolā e fakaasi mai ei te lasi o te fakatāua ne Ieova ana tavini. I te taimi e fai ei koe penā, ka lavea i ei ne koe me i a Ieova e atafai ki a latou katoa kolā e tavini atu ki a ia mo te fakamaoni.—Sala. 84:11.

13. E pefea a lagonaga o se ulu o te kāiga māfai ko galo atu tena galuega?

¹³ E ma‵nako a ulu o kāiga katoa ke tausi atu ki olotou kāiga i te feitu faka-te-foitino. Kae mafaufau la māfai ko galo atu se galuega a se taina, e tiga loa e seai sena mea ‵se ne fai. E taumafai malosi a ia o salasala suā galuega kae se manuia. E mafai eiloa o mafaufau tou tagata i a ia ko sē aoga, māfai ko ‵tupu a mea konā. E mafai pefea o fesoasoani atu a te saga tonu atu o ia ki tautoga a Ieova?

14. Ne a pogai e tausi ei a Ieova ki ana tautoga?

¹⁴ A Ieova e tausi faeloa ki ana tautoga. (Iosu. 21:45; 23:14) E uke a pogai e fai ei a ia penā. Te pogai muamua, me ka pokotia i ei a tena igoa ‵lei, io me ko tena ata. Ne tauto mai a Ieova me ka tausi ne ia ana tavini fakamaoni, kae ka fakataunu eiloa ne ia tena tautoga. (Sala. 31:1-3) E se gata i ei, e iloa ne Ieova me ka fanoa‵noa malosi tatou māfai e se atafai a ia ki tino kolā e aofia i tena kaukāiga. E tauto mai a ia me ka tausi ne ia tatou i te feitu faka-te-foitino mo te feitu faka-te-agaga, kae ka seai se mea ka mafai o taofi ne ia a ia mai te fakataunuga o te tautoga tenā!—Mata. 6:30-33; 24:45.

15. (a) Se a te fakalavelave ne fe‵paki mo Kelisiano i te senitenali muamua? (e) Se a te fakatalitonuga e maua ne tatou i te Salamo 37:18, 19?

 ¹⁵ Kafai e masaua ne tatou te pogai e tausi ei a Ieova ki ana tautoga, ko mafai ei ne tatou o fakafesagai atu mo te loto tali‵tonu ki fakalavelave i mea tau tupe. Mafaufau ki te fakaakoakoga a Kelisiano i te senitenali muamua. I te taimi ne oko atu ei se fakasauaga lasi ki te fakapotopotoga i Ielusalema, “ne salalau atu a soko katoa ki kogā koga katoa o Iuta mo Samalia kae ‵toe mai fua i ei ko te kau apositolo.” (Galu. 8:1) Mafaufau la ki te mea ne mafai o tupu. Fakalavelave i mea tau tupe! E mautinoa eiloa me ne ‵galo atu a fale mo pisinisi a tino. Kae ui i ei, ne seki tuku tiaki ne Ieova latou; kae ne seki galo atu foki te lotou fia‵fia. (Galu. 8:4; Epe. 13:5, 6; Iako. 1:2, 3) Ne fesoasoani atu a Ieova ki Kelisiano fakamaoni konā, kae ka ‵lago mai foki a ia ki a tatou.—Faitau te Salamo 37:18, 19.

16. Ko te taimi fea e mafai ei o mafau‵fau tatou me e mata koi fakatāua ne Ieova a ‵tou tapuakiga io me ikai?

¹⁶ I te taimi ko ga‵solo aka ei tatou o ma‵tua, e mafai o mafau‵fau tatou me ko sē uke ‵tou mea e fai mō Ieova. Ne maua foki ne te Tupu ko Tavita a lagonaga penā i te taimi ko matua ei a ia. (Sala. 71:9) E mafai pefea o fesoasoani mai a Ieova ki a tatou?

17. Se a te mea e mafai o tauloto ne tatou mai te tala o te tuagane e igoa ki a Jheri?

¹⁷ Mafaufau ki te tala o te tuagane e igoa ki Jheri. Ne ‵kami tou fafine ke aofia i se akoakoga a te matagaluega fakatu‵tu i se Fale Tapuaki, kae ne seki manako a ia o fano. Ne fai mai a ia: “Au ko matua, ko mate taku avaga, kae seai loa soku atamai e tasi ke mafai o fakaaoga au ne Ieova. Au se aoga.” I te po mai mua o te akoga, ne ‵ligi atu katoa a mea i tena loto ki a Ieova i se ‵talo. I tena okoatuga ki te Fale Tapuaki i te suā aso, ne mafaufau eiloa a ia me ko ia e ‵tau  o kau io me ikai. I te taimi o te polokalame, ne faka‵mafa mai ne se failauga e tokotasi me i te ‵tou toe atamai tāua ko te ‵tou loto fia‵fia ke akoakogina ne Ieova. Ne toe fai mai a Jheri: “Ne mafaufau au, ‘E maua ne au te atamai tenā!’ Ne kamata ei au o tagi me ko iloa ne au me ne tali mai ne Ieova taku ‵talo. Ne fakatalitonu mai a ia me e isi loa se mea tāua e mafai o tuku atu ne au kae ne loto fiafia eiloa a Ieova o akoako au!” Kafai e toe mafaufau au ki ei, ne fai mai Jheri: “Ne sasale atu au ki loto i te akoga tenā mo te mataku, loto vāivāi kae mafaufau me seai soku aoga. Kae ne foki au ki te fale mo te loto talitonu, loto malosi kae mafaufau me i a au koi aoga eiloa!”

18. E fakaasi mai pefea i te Tusi Tapu me koi tumau eiloa i te fakatāua ne Ieova a ‵tou tapuakiga ki a ia i te taimi ko ga‵solo aka ei tatou o ma‵tua?

¹⁸ I te taimi e ga‵solo aka ei tatou o ma‵tua, e mautinoa eiloa i a tatou me koi isi eiloa ne galuega a Ieova mō tatou. (Sala. 92:12-15) Ne akoako ne Iesu tatou me faitalia te sē lasi o ‵tou ata‵mai io me mu‵tana ‵tou taumafaiga e fai, kae e fakatāua eiloa ne Ieova so se mea e mafai ne tatou o fai i tena galuega. (Luka 21:2-4) Tela la, ‵saga tonu atu ki mea e mafai ne tatou o fai. E mafai eiloa ne koe o faipati atu e uiga ki a Ieova, ‵talo mō ou taina, kae fakamalosi a nisi tino ke tumau i te fakamaoni. A Ieova e kilo atu ki a koe e pelā me se tino e ga‵lue tasi mo ia, e se ona ko mea e mafai ne koe o fai, kae ona ko tou loto fiafia o fakalogo ki a ia.—1 Koli. 3:5-9.

19. Se a te fakatalitonuga e maua ne tatou i te Loma 8:38, 39?

¹⁹ E loto fakafetai eiloa tatou ke tapuaki atu ki a Ieova, te Atua telā e fakatāua tonu ne ia a tino kolā e tavini atu ki a ia! Ne faite ne ia tatou ke fai tena loto, kae e maua eiloa ne tatou se olaga fakamalie loto ona ko te tapuakiga tonu. (Faka. 4:11) E tiga eiloa e ‵kilo mai te lalolagi me i a tatou ko sē aoga, kae e se tenā loa te kilokiloga a Ieova ki a tatou. (Epe. 11:16, 38) Kafai ko kamata o loto vāi‵vai tatou ona ko masaki, fakalavelave i mea tau tupe, io me ko te tulaga matua, ke masaua me e seai se mea e mafai o ‵vae kea‵tea ne ia tatou mai te alofa o te ‵tou Tamana faka-te-lagi.—Faitau te Loma 8:38, 39.