1, 2. ¿Bintik ya sitintayik bayal j-abatetik yuʼun Jehová sok bin wokolil staojik yuʼun?

JNOP KAʼIYTIK oxchajp te bin kʼot ta pasel. Jtul jchʼiel ermano albot yuʼun te doktor te ay yichʼoj jun chamel te ya xlajinbot yip yuʼune. Jtul ermano te ya smulan aʼtel ta lek te kʼaxemix 50 yaʼbilale maʼyuk yaʼtel jil sok ma sta yan yaʼtel manchukme ya spas tulan ta sleel. Jtul ermana te ayix yaʼbilal te jun yoʼtan ta stojol Jehová ya yaʼiy te kʼunkʼun yak ta pejkʼajelxan te bin ya spas ta stojole.

² Teme jichnix ay jwokoltik-euke, jichniwan ya kaʼiy jbatik te maʼyuk jkʼoplaltike. Te kʼalal jich ya xkʼot ta pasele yame yakʼ xlaj te sbujtsʼ koʼtantik, maba lek ya kaʼiy jbatik sok maniwan lek ya kil jbatik sok te yantike.

3. ¿Bin-utʼil ya yil te kuxlejalil te Satanás sok te machʼatik ya xtʼunbot te stalele?

³ Te ants winiketik jaʼ jich ya yilik te kuxlejalil te bitʼil ya yil te Satanase, melel te Satanás maʼyuk jkʼoplaltik ta sit. Sok schopolil yoʼtan la yalbey te Eva te ya xjuʼ libre ya xjil manchukme snaʼoj ta lek te ya xlaj ta skaj te ya skʼaxuntaybey smantal te Jehovae. Spisil-ora jaʼ swentainoj te politika, relijion sok te niwak chonbajel sok manbajel yuʼun te balumilale. Jich yuʼun ma chajpuk ya kiltik te machʼatik ay yaʼtelik ta politika, te jwolwanejetik yuʼun relijion sok te machʼatik ya spasik negosio ya yakʼik ta ilel te maʼyuk skʼoplal ta yoʼtanik te kuxlejalil sok te bin yaʼiyel ya yaʼiy sba te yantike.

4. ¿Bin ya kilbeytik skʼoplal ta artikulo ini?

⁴ Yan stukel te Jehovae ya skʼan te lekuk ya kaʼiy jbatik sok ya skoltayotik te kʼalal ay bin ya xkʼax ta jkuxlejaltik te maʼyuk jkʼoplal ya kaʼiy jbatik yuʼune (Sal. 136:23; Rom. 12:3). Ta artikulo ini ya kiltik te bitʼil ya skoltayotik te Jehová te  kʼalal ayotik ta chamel, kʼalal ya xkʼax jwokoltik yuʼun te maʼyuk jtakʼintik sok te kʼalal ta skaj te ayix kaʼbilaltik ya jnoptik te maʼyuk bin ya xjuʼ ya jpastikix ta stojol te Jehovae. Pero ta nail ya kilbeytik skʼoplal bin yuʼun seguro ayotik te bayal jkʼoplaltik ta yoʼtan te Jehovae.

5. ¿Bin yuʼun jnaʼojtik te bayal jkʼoplaltik ta yoʼtan te Jehovae?

⁵ Manchukme pasbilotik ta stsʼubil lum bayal jkʼoplaltik ta yoʼtan te Jehovae (Gén. 2:7). Kiltik cheʼoxeb rason te bin yuʼun jnaʼojtik te bayal jkʼoplaltik ta yoʼtane. Jun ejemplo jaʼ te bitʼil la spasotike, te ya xjuʼ ya kakʼtik ta ilel te taleliletik yuʼune (Gén. 1:27). Jaʼ kʼax lekxan la spasotik-a te bitʼil yantik bintik pastiklanbile, jaʼ yuʼun la yakʼ ta jwentatik skanantayel te Balumilal sok te chambalametike (Sal. 8:4-8).

6. ¿Bin yan rason ay kuʼuntik yuʼun ya schʼuun koʼtantik te bayal jkʼoplaltik ta yoʼtan Jehová manchukme jmulawilotik?

⁶ Manchukme jmulawilotik ta skaj te la skʼaxuntay mantal te Adane, te Jehová bayalnanix jkʼoplaltik ta yoʼtan-a. Ta skaj te bayal jkʼoplaltik ta yoʼtane la yakʼ te sNichʼan swenta ya stoj te jmultike (1 Juan 4:9, 10). Ta swenta te la yichʼ tojel te jmultike, te Dios ya schaʼkuxajtes te machʼatik lajemik ta swenta smul te Adán, ya schaʼkuxajtes te machʼatik toj sok te machʼatik maba tojike (Hech. 24:15). Te Biblia ya yakʼ kiltik te mukʼ jkʼoplaltik ta yoʼtan te Jehová, melel ma jaʼuk ya yil teme ayotik ta chamel, teme maʼyuk jtakʼintik o teme bayalix kaʼbilaltike (Hech. 10:34, 35).

7. ¿Binxan rason ay kuʼuntik te j-abatotik yuʼun Jehová te bayal jkʼoplaltik ta yoʼtane?

⁷ Te j-abatotik yuʼun te Diose ayxan yan rason kuʼuntik te bin yuʼun ya schʼuun koʼtantik te ay jkʼoplaltik ta yoʼtane. Jaʼ te bitʼil yikʼojotik tal ta stojol sok jaʼ la yil te bitʼil kʼot ta koʼtantik te lek yachʼil kʼope (Juan 6:44). Kʼalal kajotik ta noptsajel ta stojol te Jehovae noptsaj ta jtojoltik-euk (Sant. 4:8). Jaʼnix jich bayal bin ya spas yuʼun ya snojptesotik. Snaʼoj ta lek te bin kileltik ta ora ini sok te bin ya xjuʼ ya jpastik ta patil soknix ya yakʼ kiltik te skʼuxul yoʼtan te kʼalal ya stojobtesotike (Prov. 3:11, 12). ¿Mabal jaʼuk ya yakʼ kiltik spisil-abi te bayal jkʼoplaltik ta yoʼtan te Jehovae?

8. ¿Bin-utʼil ya skoltayotik te bin ya yal te Salmo 18:27-29 yuʼun ma jaʼuk ya xbajt ta koʼtantik te jwokoltike?

⁸ Te ajwalil David snaʼoj-a te kʼux aʼiybil yuʼun te Jehová sok te ya xkoltayot yuʼune. Te bitʼil snaʼoj-abi jaʼ koltayot swenta maba laj smukʼul kʼinal yaʼiy te kʼalal ay machʼatik maʼyuk skʼoplal ilot yuʼune (2 Sam. 16:5-7). Kʼalal ayotik ta wokol sok ta tulan mel-oʼtan, te Jehová ya xjuʼ ya skoltayotik yuʼun ma jaʼuk ya xbajt ta koʼtantik te jwokoltik sok ya skoltayotik ta sitintayel (kʼopona Salmo 18:27-29). Ta swenta te koltayel ya yakʼbotik te Jehovae maʼyuk bin ya xjuʼ ya smakotik yuʼun ya x-abatinotik sok stseʼelil koʼtantik ta stojol (Rom. 8:31). Ta ora ini ya kiltik oxchajp wokolil banti jaʼ mukʼxan skʼoplal te ya jultes ta koʼtantik te bayal jkʼoplaltik ta yoʼtan te Jehová sok te kʼuxotik ta yoʼtane.

9. ¿Bin yaʼiyel ya kaʼiy jbatik te kʼalal ayotik ta chamele?

⁹ Te chamele ya yakʼ lajuk te sbujtsʼ koʼtantik sok ya yakʼ kaʼiytik te maʼyuk machʼa ya xtuunotikix yuʼune. Yaniwan jmel koʼtantik yuʼun te ya snaʼik stojol te yantik te ay bintik ma xjuʼix kuʼuntik spasel o te ya jkʼantikix koltayele. Manchukme ay ma snaʼ te yantik te ayotik ta chamele, yaniwan jmel koʼtantik te bitʼil ma xjuʼix kuʼuntik spasel te bin ya jpastik-ae. Te kʼalal jich ya kaʼiy jbatik te Jehová ya yakʼ smukʼul koʼtantik. ¿Bin-utʼil ya spas?

10. Jich bitʼil ya yal Proverbios 12:25, ¿bin ya skoltayotik kʼalal ayotik ta chamel?

 ¹⁰ Teme ay machʼa ya yalbotik «lequil cʼop» te kʼalal ayotik ta chamele, jaʼ ya yakʼ te lek ya kaʼiy jbatik yuʼune (kʼopona Proverbios 12:25). Te Jehová yakʼoj ta tsʼibayel ta Biblia lekil kʼopetik te ya sjultes ta koʼtantik te ay jkʼoplaltik ta yoʼtan manchukme ayotik ta chamel (Sal. 31:19; 41:3). Teme ya jkʼopontik bayal buelta te lekil kʼopetik-abi, jaʼ ya skoltayotik te kʼalal ma lek ya kaʼiy jbatik ta skaj te chamele.

11. ¿Bin-utʼil la yil jtul ermano te koltayot yuʼun te Jehovae?

¹¹ Kiltik te bin kʼax ta stojol te Jorge. Te kʼalal jchʼielto-ae tsakot ta jun chamel te oranax ya xbatsʼej te ya xlajinbot yip yuʼun sok te ma xtuun ya yaʼiy sba yuʼune. Jich ya schol: «Maba chapal la kaʼiy jba ta sitintayel te bitʼil ma lek ya kaʼiy jba yuʼun te chamele sok te kʼexlal ya kaʼiy yuʼun te ya yilonik te ants winiketike. Kʼalal yak ta batsʼejel te chamel stsakojone, la jnop te bitʼil ya xjelon bael te jkuxlejale. Mero la jmel koʼtan, jich yuʼun la jkʼanbey koltayel te Jehovae». ¿Bin-utʼil koltayot yuʼun? Jich ya yal: «Maba ya kichʼbey swentail-a te bin ya jkʼopon, jaʼ yuʼun la yalbonik te yakuk jkʼopon salmoetik te komiknax te ya yal te ay jkʼoplaltik ta yoʼtan te Jehovae. Ta jujun kʼajkʼal bayal buelta la jkʼopon te tekstoetik-abi, jich la kaʼiy te la skoltayon sok te la yakʼbon slamalil koʼtane. Ta patil, kaj yalbonik te ya stseʼejinonix sok te yalaj yakʼbey smukʼul yoʼtan yantik te stseʼelil koʼtane. Jich la jta ta ilel te la sutbon jkʼop te Jehová sok te la skoltayon yuʼun ya xjelon te bitʼil ya kaʼiy jbae. Jaʼ bajtix ta koʼtan te bin ya yal te Biblia ta swenta te bin yilel ya yilon te Jehová manchukme ayon ta chamel».

12. ¿Bin ya skʼan ya jpastik yuʼun ya kiltik te koltayel ya yakʼbotik te Jehová kʼalal ayotik ta chamele?

¹² Teme tsakbilotik ta chamele, ya xjuʼ seguro  ayotik te ya snaʼ Jehová te bin yak ta kʼaxel ta jtojoltike. Akʼa jkʼanbeytik sok spisil koʼtantik te yakuk skoltayotik yuʼun maba ya xchebaj koʼtantik yuʼun te jwokoltike. Jkʼopontik te Biblia yuʼun ya jtatik te lekil kʼopetik te ya yalbotik tey-a te Diose. Jaʼuk ya jkʼopontik te tekstoetik te banti ya yakʼ kiltik te ay jkʼoplaltik ta yoʼtan te Jehová te bitʼil j-abatotik yuʼune. Teme jich ya jpastike, yame jtatik ta ilel te lek yoʼtan ta stojol te j-abatetik yuʼun te jun yoʼtanik ta stojole (Sal. 84:11).

13. ¿Bin yaʼiyel ya yaʼiy sba jtul jolal yuʼun familia teme ya yichʼ lokʼesel ta yaʼtel?

¹³ Te jolaletik yuʼun familia jich yoʼtanik te ya yakʼbeyik te bin ya xtuun yuʼun te sfamiliaike. Jnop kaʼiytik te ay jtul ermano la yichʼ lokʼesel ta yaʼtel manchukme maʼyuk smul. Ya spas tulan yuʼun ya sle yaʼtel pero ma sta. Ayniwan jich ya yaʼiy te maʼyukix skʼoplale. ¿Bin ya xkoltayot yuʼun jaʼ ya xbajt ta yoʼtan te bintik yaloj ya spas te Jehovae?

14. ¿Bin yuʼun te ya skʼotes ta pasel te bin yaloj te Jehovae?

¹⁴ Te Jehová ya skʼotes ta pasel te bin yaloj ta jamale (Jos. 21:45; 23:14). ¿Bin yuʼun te jich ya spase? Ay bayal rason yuʼun. Jaʼ te jich ya yichʼ ichʼel ta mukʼ te sbiile. Te Jehová yaloj ta jamal te ya skanantay te j-abatetik yuʼune, ta swenta-abi jich ya yaʼiy te ay ta swenta skʼotesel ta pasel te bin yalojixe (Sal. 31:1-3). Jaʼnix jich snaʼoj te maba lek ya kaʼiy jbatik yuʼun teme maba ya skanantayotik te bitʼil sfamilia ya yilotike. Yaloj ta jamal te ya yakʼbotik jweʼeltik, jkʼuʼ jpakʼtik sok te ya smakʼlinotik ta swenta te sKʼope, maʼyuk bin ya xmakot yuʼun ya skʼotes ta pasel te bin yaloje (Mat. 6:30-33; 24:45).

15. 1) ¿Bin wokolil la staik te jchʼuunjeletik ta sbabial siglo? 2) ¿Bin smukʼul koʼtantik ya yakʼbotik te Salmo 37:18, 19?

¹⁵ Kʼalal ya jultes ta koʼtantik te bin yuʼun ya  skʼotes ta pasel te bin yaloj ta jamal te Jehovae, jich kanantaybil ya kaʼiy jbatik te kʼalal maʼyuk jtakʼintik. Jnop kaʼiytik te bin kʼot ta pasel ta stojol te jchʼuunjeletik ta sbabial siglo. Kʼalal kajik ta kontrainel te jchʼuunjeletik ta Jerusalén «spisilic puhquic bahel [...] stuquel xanix hil te jpuc-cʼopetique» (Hech. 8:1). Jich yuʼun woklajikniwan yuʼun te maʼyuk stakʼinik, melel laniwan yijkitay jilel snaik, yaʼtelik sok snegosioik. Pero maba ijkitayotik yuʼun te Jehová sok maba chʼay stseʼelil yoʼtanik (Hech. 8:4; Heb. 13:5, 6; Sant. 1:2, 3). Te Jehová la skoltay te jchʼuunjeletik-abi sok ya skoltayotik-euk (kʼopona Salmo 37:18, 19).

16. ¿Bin yuʼun te ay ma schʼuun koʼtantik te ay skʼoplal ta yoʼtan Jehová te bin ya jpastik ta stojole?

¹⁶ Kʼalal ya xkajotik ta meʼel mamalubel yaniwan xkaj jnoptik te maʼyukix bayal bin ya xjuʼ ya jpastik ta stojol te Jehovae. Jaʼniwan jich la snop te ajwalil David te kʼalal mamalix-ae (Sal. 71:9). ¿Bin-utʼil ya skoltayotik te Jehovae?

17. ¿Bin ya yakʼ jnoptik ta swenta te bin yaʼiyel la yaʼiy sba te ermana te Jheri sbiile?

¹⁷ Kilbeytik skʼoplal te ermana te Jheri sbiile. La yichʼ pasel inbitar ta kurso yuʼun mantenimiento ta sNail Tsoblej, pero ma skʼan ya xbajt-a. Jich la yal: «Meʼelonix, meʼba antsonix sok maʼyuk bin ya jnaʼ spasel te ya xtuun yuʼun te Jehovae. Ma xtuunonix ta jkʼaxel». Te kʼalal junxan ajkʼabal ya skʼan-a te ya xkʼot ta pasel te kursoe la skʼopon sok spisil yoʼtan te Jehovae. Ta yan kʼajkʼal te kʼalal kʼot ta sNail Tsobleje talxan ta yoʼtan teme yuʼun-nix snujpʼ-a te ya x-och ta kursoe. Ta yorail te programa, jtul ermano te la yakʼ te kurso bayal buelta la yalbey skʼoplal te jaʼ bayal skʼoplal te ya kakʼ jbatik ta nojptesel yuʼun te Jehovae. Jich la yalxan te Jheri: «Jich la jnop: “Jich  koʼtan-abi”. Kajon ta okʼel te kʼalal la kil te la sutbon jkʼop te Jehovae. Yak ta yakʼbelon kil te ayto bin lek ya xjuʼ ya kakʼbey sok te ya skʼan ya skoltayon ta spasele». Te Jheri la yal te bin yaʼiyel la yaʼiy sba: «Te kʼalal kʼoon ta tsoblej yakon ta xiwel-a, maʼyuk smukʼul koʼtan-a sok jmeloj koʼtan-a. Pero te kʼalal laj te kursoe ma xiwonix-a, ayix smukʼul koʼtan-a sok jich la kaʼiy te ya xtuunone».

18. ¿Bin-utʼil ya yakʼ ta ilel te Biblia te ay skʼoplal ta yoʼtan Jehová te bin ya jpastik ta stojol manchukme meʼel mamalotikix?

¹⁸ Manchukme meʼel mamalotikix, ayuk ta koʼtantik te ayto aʼtelil ya yakʼbotik jpastik te Jehová (Sal. 92:12-15). Te Jesús la yakʼ jnoptik te bayal skʼoplal ta yoʼtan Jehová te bin ya jpastik ta stojol manchukme ma bayaluk ya kiltik te joʼotike o maʼyuk bin lek ya jnaʼtik spasel ya kaʼiytike (Luc. 21:2-4). Jich yuʼun, jaʼuk ya kiltik te bin ya xjuʼ kuʼuntik spasele. Ya xjuʼ ya kalbeytik skʼoplal te Jehová ta stojol te yantik, ya xjuʼ jpastik orasion ta stojol te kermanotaktik sok ya xjuʼ ya kakʼbeytik smukʼul yoʼtanik swenta ma xyijkitayik te Jehovae. Te Jehová ya yal te joy jbatik ta aʼtel soke, pero ma jaʼuk ta swenta te bin ya xjuʼ kuʼuntik spasele, jaʼ ta swenta te ya yil te sok spisil koʼtantik ya jchʼuunbeytik te smantale (1 Cor. 3:5-9).

19. ¿Bin ya yakʼ jnaʼtik ta lek te bin ya yal Romanos 8:38, 39?

¹⁹ Ya kaltik bayal wokol yuʼun te yakotik ta yichʼel ta mukʼ te Jehová, te Dios te bayal skʼoplal ta yoʼtan te machʼatik ya x-abatinik ta stojole. La spasotik yuʼun jaʼ ya jpastik te bin ya skʼan yoʼtan sok jaʼ ya yakʼ te ay swentail jkuxlejaltik ya xkʼot te yichʼel ta mukʼ ta smelelil te Diose (Apoc. 4:11). Te ants winiketik yaniwan snopik te ma xtuunotik, pero te Jehová ma jichuk ya yilotik stukel (Heb. 11:16, 38). Kʼalal ayotik ta tulan mel-oʼtan ta skaj te chamel, te maʼyuk jtakʼintik o te meʼel mamalubel, juluk ta koʼtantik te maʼyuk bin ya spitotik lokʼel ta stojol te skʼuxul yoʼtan te jTatik ay ta chʼulchane (kʼopona Romanos 8:38, 39).