1-2. Ovitangi vipi afendeli valua va Yehova va kasi oku liyaka lavio kuenda ci pondola oku va kokela oku sima nye?

KŨLĨHĨSA ovidekaise evi vitatu vikuãimo: Manji umue umalẽhe, ndotolo wo sapuila okuti o kuate uvei umue. Manji umue okuti o kuete ci pitahãla 50 kanyamo wa pumba upange, ndaño lalikolisilo aye ka tẽla oku sanga vali upange ukuavo. Manji umue ukãi ukuekolelo okuti wa kuka, ongusu yaye ya tepuluka kuenda ka tẽla vali oku linga ovina a lingaile kupange wa Yehova.

² Nda o kasi oku liyaka locitangi cimue pokati kevi via tukuiwa ndeti, pamue o liyeva okuti lomue wa ku kapako. Ovitangi evi vi pondola oku tepulula esanju liove, ombili yove kuenda ukamba wove la vakuene.

3. Satana la vana va tiamẽla kokuaye va tenda ndati omuenyo womanu?

³ Oluali lulo lu setukula Satana konjila ndomo a tenda omuenyo. Eye wa siata oku tenda omanu ndu okuti ka va kuete esilivilo. Lovisimĩlo ka via sungulukile, wa sapuila Eva okuti nda wa sinĩla Suku o kuata elianjo, pole, onima yoku sinĩla Suku oku fa. Satana tunde nunde o kasi oku songuila ovisoko violomilu, viopulitika kuenda ovisoko viatavo esanda. Omo liaco, ka ci tu komõhisa okuti vakualomĩlu, vakuapulitika kumue lasongui vatavo ka va sumbilile omuenyo womanu kuenda ka va kapeleko ekalo liomanu.

4. Nye tu konomuisa vocipama cilo?

⁴ Pole, Yehova o yongola okuti tu liyeva ciwa kuenda eye o tu kuatisa eci tu liyaka lovitangi vi tu kokela oku sima okuti  ka tu kuete esilivilo. (Osa. 136:23; Va Rom. 12:3) Vocipama cilo, tu kũlĩhĩsa ndomo Yehova a pondola oku tu kuatisa kovitangi vikuãimo ndeci: (1) ceci tu liyaka luvei umue, (2) ceci tu liyaka lekambo liolombongo kuenda (3) ceci tu sima okuti omo lioku kuka ka tu pondola vali oku linga calua kupange wa Yehova. Tete, tu konomuisa esunga lieci tu kolelela okuti Yehova wa tu kapako omunu lomunu.

5. Uvangi upi u lekisa okuti omanu va kuete esilivilo ku Yehova?

⁵ Ndaño tua pangiwa leve, pole, tu kuete esilivilo lialua. (Efet. 2:7) Tu kũlĩhĩsi ovina vimue vi lekisa esunga lieci tua kolelela okuti tu kuete esilivilo ku Yehova. Eye wa lulika omanu luloño woku setukula ovituwa viaye. (Efet. 1:27) Poku ci linga, wa tu velisapo okuti oviluvo viosi vi kasi vongongo kuenda ovinyama vi sule.—Osa. 8:4-8.

6. Esunga lipi likuavo li lekisa okuti Yehova wa kapako omanu ka va lipuile?

⁶ Ndaño noke lia Adama oku linga ekandu, Yehova wamamako oku kapako omanu. Eye wa lekisa okuti wa tu kapako calua poku eca Omõlaye Yesu ndocisembi coku tu yovola kakandu etu. (1 Yoa. 4:9, 10) Poku eca asumũlũho eyilila kocisembi, Yehova o ka pindula vana va fa omo liekandu lia Adama, ci kaile “vakuesunga lava havakuesungako.” (Ovil. 24:15) Ondaka yaye yi lekisa okuti etu tu kuete esilivilo, ndaño okuti tu kasi oku liyaka loku vela, luhukũi ale loku kuka.—Ovil. 10:34, 35.

7. Esunga lipi likuavo afendeli va Yehova va tavela okuti Yehova wa va kapako?

⁷ Tu kuete asunga akuavo oku kolela okuti Yehova wa tu kapako. Eye wa tu kokela kokuaye kuenda wa kũlĩha onjila ndomo tu tenda olondaka viwa. (Yoa. 6:44) Osimbu tuamamako oku amẽla ku Yehova, eye amẽlavo kokuetu. (Tia. 4:8) Yehova eca otembo kuenda ongusu yaye oco a tu longise, ci lekisa okuti wa tu kapako. Eye wa kũlĩha ndomo tua tuwa cilo kuenda wa kũlĩhavo okuti tu pondola oku linga apongoloko. Yehova o tu pokuisa omo okuti o tu sole. (Olosap. 3:11, 12) Esumũlũho limue linene oku kũlĩha okuti Yehova wa tu kapako!

8. Olondaka vi sangiwa Kosamo 18:27-29, vi tu kuatisa ndati konjila ndomo tu tenda ovitangi?

⁸ Vamue ka va kapeleko Soma Daviti, pole, eye wa kũlĩhĩle okuti Yehova u sole kuenda o kasi laye. Eci ca kuatisa Daviti oku pandikisa kovitangi a liyaka lavio lonjila yimue ya sunguluka. (2 Sam. 16:5-7) Eci tu yeva esumuo, ale ceci tu liyaka lovitangi, Yehova o pondola oku tu kuatisa oku tenda ovina lonjila yimue ya sunguluka kuenda o tu kuatisa oku yula ovitangi viosi. (Tanga Osamo 18:27-29.) Nda tua kolela ku Yehova, lacimue ci pondola oku tu tateka oku u vumba lesanju. (Va Roma 8:31) Cilo, tu konomuisa ovina vitatu vi lekisa okuti Yehova o tu sole kuenda wa tu kapako.

9. Oku vela ku pondola oku tu kokela ovisimĩlo vipi?

⁹ Uvei u tu kokela esumuo lialua okuti pamue tu liyeva ndu okuti laumue wa tu kapako. Tu pondola oku yeva osõi eci omanu va limbuka uvei wetu, ale ceci tu sukila oku pinga ekuatiso komanu vakuavo. Ndaño okuti omanu vakuavo ka va kũlĩhĩle uvei wetu, tu pondola oku yeva osõi omo okuti ka tu kuete vali ongusu yoku linga ovina tua lingaile. Vekalo liaco, Yehova o tu lembeleka. Ndamupi?

10. Ndomo ca tangiwa kelivulu Liolosapo 12:25, nye ci pondola oku tu kuatisa eci tu vela?

 ¹⁰ Eci tu vela, “ondaka yohenda” yi pondola oku tu kolisa. (Tanga Olosapo 12:25.) Vembimbiliya, Yehova o tu sapuila ovina vialua vi tu ivaluisa okuti etu tu kuete esilivilo kokuaye. (Osamo 31:19; 41:3) Nda tua tanga Embimbiliya olonjanja viosi, Yehova o ka tu kuatisa oku yuvula ovisimĩlo ka via sungulukile omo lioku vela.

11. Manji umue wa limbuka ndati ekuatiso lia Yehova?

¹¹ Tu kũlĩhĩsi ulandu wa Jorge. Eci a kala umalẽhe wa kuatiwa luvei umue wo kokela oku sima okuti ka kuete esilivilo. Manji Jorge hati: “Uvei ñuete sia u lavokaile, momo oku livokiya kuvei wange kua kokela omanu oku ndi vanja lohenda. Eci uvei wange wa livokiya, nda sokolola ndomo omuenyo wange wa laikele oku kala. Nda yeva esumuo lialua kuenda nda pinga ekuatiso ku Yehova.” Yehova wo kuatisa ndati? Eye wamisako hati: “Omo okuti nda kuata ocitangi coku patekela, nda vetiyiwa oku tanga ovipama vitito Viosamo vi lekisa okuti Yehova wa kapako afendeli vaye vakuekolelo. Ame ndaenda oku pitolola ovipama viaco eteke leteke kuenda ovio via ndembeleka loku ndikolisa. Noke, omanu veya oku limbuka okuti esanju liange lia livokiya. Ovo va ndi sapuila okuti esanju liange lia va kolisa. Nda limbuka okuti Yehova wa tambulula olohutililo viange! Eye wa ñuatisa oku pongolola onjila ndomo ndaenda oku litenda. Ame nda fetika oku tiamisila utima kueci Ondaka yaye yi popia catiamẽla konjila ndomo a ndi tenda ndaño luvei wange.”

12. Eci tu liyaka loku vela tu sanga ndati ekuatiso lia Yehova?

¹² Nda ove o kasi oku liyaka luvei umue, kolela okuti Yehova wa kũlĩha ovitangi o  kasi oku liyaka lavio. Pinga ekuatiso kokuaye oco ove o tende ekalo liove lonjila yimue ya sunguluka. Noke tanga Embimbiliya oco o sange olondaka vielembeleko Yehova a ku pongiyila. Tiamisila utima kolondaka viaco vina vi lekisa ndomo Yehova a kapako afendeli vaye. Osimbu ove amamako oku ci linga, o ka limbuka okuti Yehova uwa la vosi vo vumba lekolelo.—Osamo 84:11.

13. Usongui wepata o liyeva ndati eci a tundisiwa kupange?

¹³ Usongui wosi wepata, o kuete onjongole yoku eca ovina epata liaye li sukila. Ndeci, sokolola okuti manji umue o tundisiwa kupange, ndaño okuti ka kuete eko. Eye o likolisilako oku sanda upange ukuavo, pole, ka u sangi. Omo liekalo liaco, eye o litenda ndu okuti ka kuete esilivilo. Oku tiamisila utima kolohuminyo via Yehova ci pondola oku u kuatisa ndati?

14. Asunga api Yehova a tẽlisila ohuminyo yaye?

¹⁴ Yehova olonjanja viosi o tẽlisa olohuminyo viaye. (Yeh. 21:45; 23:14) Eye o ci linga omo liasunga alua. Esunga limue lieli okuti olohuminyo viaye vi kuete elitokeko londuko yaye, ale lekalo liaye. Yehova Vondaka yaye wa likuminya okuti eye wa laikele oku kuatisa afendeli vaye vakuekolelo kuenda o kuete onjongole yoku ci tẽlisa. (Osa. 31:1-3) Handi vali, Yehova wa kũlĩha okuti tu pondola oku sumua calua nda ka tu tati epata lietu. Eye o likuminya oku tu ĩha ovina viosi tu sukila, cikale ketimba, ale kespiritu kuenje lacimue cu tateka oku ci tẽlisa!—Mat. 6:30-33; 24:45.

15. (a) Ocitangi cipi Akristão vo kocita catete va liyaka laco? (b) Osamo 37:18, 19 yi tu kuatisa oku kolela ku lie?

¹⁵ Eci tu ivaluka esunga lieci Yehova a tẽlisila olohuminyo viaye, tu pondola oku  kolela okuti eye o ka tu kuatisa eci tu liyaka lekambo liolombongo. Kũlĩhĩsa ulandu Wakristão vo kocita catete. Eci kua katuka elambalalo lialua kekongelo lia kala vo Yerusalãi, “ovapostolo ovo lika va sialele.” (Ovil. 8:1) Sokolola ovitangi vie yililako. Ndeci, ekambo liolombongo! Akristão citava okuti va pumba olonjo viavo kuenda olomilu viavo. Ndaño lovitangi evi, Yehova ka va yandulukile kuenda ovo vamamako lesanju. (Ovil. 8:4; Va Hev. 13:5, 6; Tia. 1:2, 3) Nda Yehova wa kuatisa Akristão ava vakuekolelo, eye o tu kuatisavo.—Tanga Osamo 37:18, 19.

16. Nye ci pondola oku tu kokela oku sima okuti Yehova ka kapeleko efendelo lietu?

¹⁶ Osimbu tu kuka, tu pondola oku kuata ovisimĩlo viokuti ka tu kuete vali ongusu yoku linga ovina vialua kupange wa Yehova. Soma Daviti wa liyakavo lovisimĩlo viaco osimbu a panda koku kuka. (Osa. 71:9) Yehova o tu kuatisa ndati?

17. Nye tu lilongisila kulandu wa manji Jheri?

¹⁷ Kũlĩhĩsa ulandu wa manji umue ukãi o tukuiwa Jheri. Eye wa lalekiwa oku enda kohongele yatiamẽla kepindiso lioku semulula Onjango Yusoma, pole, eye ka tavele oku enda. Eye hati: “Ame nda kuka kuenda ndicimbumba, si kuete vali ongusu yoku linga upange waco. Si kuete vali esilivilo.” Osimbu eteke liohongele yaco ka lia pitilile, kuteke waco eye wa situlula ovisimĩlo viaye ku Yehova vohutililo. Eci a pitĩla Konjango Yusoma keteke lia kuamamo, eye wa lipula nda wa ponduile muẽle oku kalapo. Vokuenda kohongele yaco, hundi umue wa lombolola okuti ca velapo, onjongole yetu yoku longisiwa la Yehova okuti uloño tu kuete ci sule.  Manji Jheri wa popia hati: “Nda sokolola ndoco, ‘Ame ñuete onjongole yaco!’ Kuenje nda fetika oku lila poku limbuka okuti Yehova wa tambulula ohutililo yange. Yehova wa ndi lekisa okuti ame ndi kuete cimue ci kuete esilivilo ndi pondola oku eca kokuaye kuenda eye o yongola oku ndi longisa!” Poku sokolola kovina via lipita laye, Manji Jheri wa popia hati: “Eci nda kala kohongele yaco nda kuata usumba, nda sumuile kuenda nda nyumãlele. Pole, eci nda tunda kohongele yaco, nda liyeva okuti nda kolapo, nda pamisiwa kuenda nda kapiwako!”

18. Embimbiliya li lekisa ndati okuti Yehova wa kapako efendelo lietu osimbu tu panda koku kuka?

¹⁸ Osimbu tu panda koku kuka, tu koleli okuti Yehova handi o kuete upange walua a yongola okuti tu u linga. (Osa. 92:12-15) Yesu o tu longisa okuti ndaño epondolo tu kuete litito, ale ongusu yetu yitito, Yehova o kapako alikolisilo etu kupange tu u lingila. (Luka 21:2-4) Omo liaco, tiamisila utima kovina o pondola oku linga. Ndeci, ove o pondola oku vangula eci catiamẽla ku Yehova, oku likutililako vamanji kuenda oku pamisa ekolelo lia vamanjii. Yehova oku tenda okuti ove undingupange kumue laye, hamekondako liuloño wove, pole, momo lionjongole yove yoku u pokola.—1 Va Kor. 3:5-9.

19. Ukanda wa Va Roma 8:38, 39, u tu kuatisa oku ivaluka nye?

¹⁹ Esumũlũho limue linene oku kala ufendeli wa Yehova, Suku una wa kapako vana vo fendela! Eye wa tu lulika oco tu linge ocipango caye kuenje oku ci linga, ci tu nenela esanju. (Esit. 4:11) Ndaño okuti oluali lu tu tenda okuti ka tu kuete esilivilo, pole, Yehova o tu tenda lonjila yimue ya litepa. (Va Hev. 11:16, 38) Eci tu liyaka luvei umue, ekambo liolombongo ale oku kuka, tu ivaluki okuti lacimue ci pondola oku tu tepa kocisola Isietu wo kilu a tu kuetele.—Tanga Va Roma 8:38, 39.