1-2. Yihoowa asaappe dariya baggaa aybi gakkii, qassi hegee eta bolli ay kaalettana danddayii?

KAALLIDI odettiya heezzu hanotata qoppa: Issi yelaga ishawu A wolqqay ixxi ixxi baanaadan oottiya wolqqaama harggee A oyqqidoogaa dottoree odiis. Oosuwawu gooba gidida, layttay 50⁠ppe dariyo ishay ba oosuwaappe yedetettiis; qassi I ooso demmanawu keehi baaxetikkonne, hara ooso demmibeenna. Ammanettada oottiya issi cima michchiyaa A kase Yihoowawu oottiyoogaa keenaa oottana danddayukku.

² Qommoora odettidaagaa mala issibay nena gakkiyaakko, taani pattikke gaada neeni qoppana danddayaasa. He hanotati neeni ufayttennaadan, neeni nena karanaadaaninne haratuura deˈiya ne dabbotay moorettanaadan oottana danddayoosona.

3. Seexaanaynne asaa deˈuwaa xeelliyaagan A qofaa kaalliyaageeti ay oottiyoonaa?

³ Ha alamee deˈuwaa Seexaanaagaadan xeellees. Asay bana pattennabadan xeellanaadan Seexaanay ubbatoo koyees. Xoossaayyo azazettennan ixxiyoogee hayqqanaadan oottiyoogaa Seexaanay erikkonne, Hewaana Xoossawu azazettennan ixxikko, laˈa gidana giidi I Hewaaniyyo iitabaa odiis. Seexaanay ha alamiyaa zalˈˈiyaa, polotikaanne haymaanootiyaa ubbatoo kaalettees. Yaatiyo gishshawu, daro zalˈˈanchchati, polotikaa asatinne haymaanootiyaa kaalettiyaageeti Seexaanaagaadan asaa deˈuwaa bonchchennaagaa bessiyaabaa oottiyoogee garamissenna.

4. Ha huuphe yohuwan nuuni ay tamaaranee?

 ⁴ Qassi, Yihooway nuuni nubaa loˈˈobaa qoppanaadan koyees; nuuni nuna pattennabadan xeellanaadan oottiya hanotay merettiyo wode, I nuna maaddees. (Maz. 136:23; Roo. 12:3) Kaallidi deˈiya hanotatun Yihooway nuna waati maaddiyaakko ha huuphe yohoy qonccissana: (1) Nuuni harggidi waayettiyo wode, (2) gidiya miishshaa demmanawu metootiyo wode, qassi (3) cimatettaa gaasuwan nuuni kaseegaadan Yihoowawu pattiyaaba aybanne oottokko giidi qoppiyo wode. SHin, koyro, nuna ubbaa Yihooway xoqqu ootti xeelliyoogaa nuuni ammanettana danddayiyoy aybissakko tamaarana.

5. Yihooway asaa xoqqu ootti xeelliyoogaa bessiyaabay aybee?

⁵ Nuuni biittaa baanaappe merettikkonne, baanaappe keehi alˈˈo. (Doo. 2:7) Yihooway nuna xoqqu ootti xeelliyoy aybissakko amaridabaa ane beˈoos. I baagaa mala eeshshati deˈanaadan oottidi asaa medhdhiis. (Doo. 1:27) Yaatiyoogan, I saˈan medhdhido aybippenne asay aadhdhanaadan oottiis; qassi nuuni saˈaanne mehiyaa doˈaa haaranaadankka oottiis.—Maz. 8:4-8.

6. Yihooway nagaranchcha asaa xoqqu ootti xeelliyoogaa bessiya harabay aybee?

⁶ Addaame nagaraa ootti simminkka, Yihooway asaa xoqqu ootti xeelliyoogaa aggibeenna. I nuna keehi xoqqu oottidi xeelliyo gishshawu ba siiqiyo Naˈaa Yesuusa nu nagarawu wozo oottidi immiis. (1 Yoh. 4:9, 10) Addaame nagaraa gaasuwan hayqqida ‘worddotakka xillotakka hayquwaappe’ denttanawu Yihooway wozuwaa yarshshuwaa goˈettana. (Oos. 24:15) Nuuni hargganchcha, hiyyeesa, woy layttan cima gidikkonne, Yihoowayyo alˈˈo gidiyoogaa A Qaalay qonccissees.—Oos. 10:34, 35.

7. Xoossaa ashkkarata Yihooway xoqqu ootti xeelliyoogaa eti ammananaadan oottiya hara gaasoy aybee?

⁷ Yihooway nuna xoqqu ootti xeelliyoogaa nuuni ammananaadan oottiya hara gaasoykka deˈees. I nuna baakko ehees; qassi nuuni mishiraachchuwawu immiyo zaaruwaa akeekees. (Yoh. 6:44) Nuuni Yihoowakko shiiqiyo wode, I nuukko shiiqees. (Yaaq. 4:8) Yihooway nuuni ayyo alˈˈo gidiyoogaa bessanawu, nuna tamaarissanawu wodiyaa bazzeesinne baaxetees. I nuuni haˈˈi ay mala asakko, qassi sinttappe ay mala asa gidanaakko erees. I nuna siiqiyo gishshawu seerees. (Lee. 3:11, 12) Hagee Yihooway nuna xoqqu ootti xeelliyoogaa loyttidi bessiyaaba!

8. Mazamure 18:27-29n deˈiya qofay nu metuwaabaa nuuni qoppiyo ogiyaara gayttidaagan waati maaddii?

⁸ Amarida asati Kawuwaa Daawita pattenna asadan xeellidosona; shin I Yihooway bana siiqiyoogaanne maaddiyoogaa erees. Daawiti hegaa eridoogee, I ba hanotaa maara qoppidi genccanaadan A maaddiis. (2 Sam. 16:5-7) Nuuni unˈˈettiyo wode woy nuna metoy gakkiyo wode, Yihooway nuuni issibaa dumma ginan xeellanaadan maaddana danddayees; qassi nuuni ayba metonne xoonanaadan I maaddan danddayees. (Mazamure 18:27-29 nabbaba.) Yihooway nuna maaddiyo gishshawu, nuuni ayyo ufayssan haggaazennaadan nuna aybinne teqqana danddayenna. (Roo. 8:31) Yihooway nuna siiqiyoogaanne xoqqu ootti xeelliyoogaa nuuni hassayana koshshiyo heezzu hanotata ane haˈˈi beˈoos.

9. Nuuni nu hanotaa xeelliyo ogiyaa harggee waati laammana danddayii?

⁹ Harggee nuuni qofan qohettanaadaaninne aynne maaddennabadan qoppanaadan oottana danddayees. Nuuni harggiyo wode woy harata maaduwaa oychchiyo wode darotoo azzanoos. Nuuni harggiyoogaa harati erenna wodekka,  kase oottiyoobaa oottana danddayenna gishshawu yeellatana danddayoos. Unˈˈettanaadan oottiya hegaa mala wodiyan, Yihooway nuna minttettees. Waatidi?

10. Leemiso 12:25y yootiyoogaadan, nuuni harggiyo wode nuna aybi maaddana danddayii?

¹⁰ Nuuni harggiyo wode, “shonggaara de7iya haasayai” nuna minttettana danddayees. (Leemiso 12:25 nabbaba.) Nuuni harggiyo wodekka, Yihoowayyo alˈˈo gidiyoogaa hassayanaadan oottiya daro loˈˈobaa Geeshsha Maxaafan I nuussi yootiis. (Maz. 31:19; 41:3) Ayyaanay denttettin xaafettida he qaalata nuuni zaaretti zaarettidi nabbabikko, nu harggiyaa gaasuwan nuna unˈˈissiyaabaa nuuni genccanaadan Yihooway nuna maaddana.

11. Issi ishay Yihoowa maaduwaa waati demmidee?

¹¹ Jorjja gakkidabaa qoppa. Jorjji yelagatettan deˈiyo wode eesuwan goobi goobi biya harggee A oyqqiis, hegee I bana pattennabadan qoppanaadan oottiis. Jorjji hagaadan giis: “Ta harggee kaalettidobaa gaasuwan asay tana xeelliyo hanotawu asatettaaninne qofan taayyo siyettiyaabawu woy tana yeellayiyaabawu taani giigettabeykke. Ta harggee yaa iitiyo wode, ta deˈoy keehi laamettanaagaa qoppaas. Taani keehi azzanada Yihooway tana maaddanaadan mintta woossaas.” Yihooway tana waati maaddidee? “Taani nabbabiyooban xeelaa wottanawu metootiyo gishshawu, Yihooway ba ashkkaratuyyo qoppiyoogaa bessiya Mazamure maxaafaappe amarida xiqiseta nabbabayiis. Taani he amarida xiqiseta ubba galla zaaretta zaarettada nabbabayiis, qassi etan taani minettaas. Guyyeppe, taani kaseegaappe aaruwan moocu giyoogaa hara asay akeekiis. Qassi taani ufayttiyoogee eta minttettidoogaa eti yootidosona. Yihooway ta woosaa zaaridoogaa taani akeekaas! I taani tana xeelliyo hanotaa laammanaadan maaddiis. Taani harggiyo wodekka, I tana waati xeelliyaakko yootiya A Qaalan xeelaa wottiyoogaa taani doommaas.”

12. Neeni harggiyo wode, Yihooway nena maaddanaadan ay oottana danddayay?

 ¹² Neeni harggiyo wode, nena gakkiyaabaa Yihooway eriyoogaa ammanetta. Nena aybi gakkiiddi deˈiyaakko neeni maara akeekanaadan I maaddana mala woossa. Yaatada Yihooway neeyyo yootiyo minttettiyaabaa Geeshsha Maxaafaappe koya. Yihooway ba ashkkarata keehi xoqqu oottidi xeelliyoogaa bessiya paydota pilgga. Neeni yaatiyo wode, Yihooway ammanettidi baayyo oottiya ubbawu keha gidiyoogaa akeekana.—Maz. 84:11.

13. So asawu huuphe gidiya uri ooso xayikko, awu aybi siyettana danddayii?

¹³ So asawu huuphe gidiya ubbay ba soo asawu koshshiyaabaa kunttanawu koyees. SHin, issi ishay ayba balanne oottana xayikkonne, ba oosuwaappe yedetettana danddayees. I hara ooso demmanawu loytti baaxetees, shin demmibeenna. Hegaa malabay A gakkido gishshawu, I pattennabadan bana xeellana danddayees. Yihooway qaalaa gelidoban xeelaa wottiyoogee A waati maaddana danddayii?

14. Yihooway ba gelido qaalaa naagiyoy aybissee?

¹⁴ Ba gelido qaalaa Yihooway ubbatoo naagees. (Yaas. 21:45; 23:14) I hegaa oottanaadan oottiya daro gaasoy deˈees. Issi gaasoy hegee A sunttaa woy A bonchchuwaa bochchiyo gishshataassa. Yihooway ammanettida ba ashkkarata naaganawu qaalaa geliis, qassi he qaalaa polana bessiyaagee A. (Maz. 31:1-3) Hegaa bollikka, Yihooway ba soo asaa yame gididaageetuyyo koshshiyaabaa kunttana xayikko, nuuni azzananaagaanne hidootaa qanxxanaagaa I erees. Nuussi asatettaaninne ayyaanaaban koshshiyaabaa immanawu I qaalaa geliis, qassi he qaalaa polennaadan aybinne A diggenna!—Maa. 6:30-33; 24:45.

15. (a) Koyro xeetu layttan deˈiya Kiristtaaneta gakkida metoy aybee? (b) Mazamure 37:18, 19y nu ay ammanettanaadan oottii?

 ¹⁵ Yihooway ba gelido qaalaa poliyoy aybissakko nuuni hassayikko, nuussi gidiya miishshaa demmanawu metootiyo wodekka, I nuna maaddanaagaa ammanettana danddayoos. Koyro xeetu layttan deˈiya Kiristtaaneta gakkidabaa qoppa. Yerusalaamen deˈiya gubaaˈiyaa wolqqaamaa yedetay gakkido wode, “Yesuusi kiittidoogeetuppe attin, ammaniyaageeti ubbati . . . laalettidosona.” (Oos. 8:1) Hegee woygiyoogaakko qoppa. Gidiya miishshaa demmanawu metootiyoogaa! Kiristtaaneti bantta keettaanne oosuwaa woy bantta zalˈˈiyaa xayennan waayi aggana. Yaatikkonne, Yihooway eta aggibeenna; eti bantta ufayssaa xayibookkona. (Oos. 8:4; Ibr. 13:5, 6; Yaaq. 1:2, 3) Yihooway ammanettida he Kiristtaaneta maaddiis; qassi I nunakka maaddana.—Mazamure 37:18, 19 nabbaba.

16. Yihooway nu goynuwaa xoqqu oottidi xeelliishsha giidi nuuni qoppanaadan oottana danddayiya hanotay aybee?

¹⁶ Nuuni cimiyo wode, Yihoowayyo immana danddayiyoobay guutta giidi qoppiyoogaa doommana danddayoos. Kawuwaa Daawiti cimido wode hegaadan qoppidi hirggennan waayi aggana. (Maz. 71:9) Yihooway nuna waati maaddana danddayii?

17. Jeero giyo michchee hanotaappe nuuni ay tamaarana danddayiyoo?

¹⁷ Jeero giyo michchee hanotaa qoppa. Yihoowa oosuwawu goˈettiyo keettata waatidi loytti giigissanaakko SHiiquwaa Addaraashan tamaaranaadan A shoobettaasu; shin A baanawu koyabeykku. A hagaadan gaasu: “Taani cima, amˈˈe, qassi ha giigissiyo oosuwaa waati maaddanaakko aybanne erikke. Taani pattenna  asa.” A loohanawu baanaappe kase qammi, ba wozanan deˈiyaabaa woosan Yihoowau yootaasu. A wonttetta gallassi SHiiquwaa Addaraashaa gakkido wode, taani hagawu yaana bessii gaada qoppaasu. Loohiyo wode, tamaarissiyaageetuppe issoy intteyyo deˈiya era ubbaappe aadhdhiyaabay Yihoowappe tamaaranawu eeno giyoogaa gidiyoogaa yootiis. Jeera hagaadan gaasu: “Taassi ‘he eray deˈees gaada taani qoppaas!’ Yihooway ta woosaa zaaridoogaa taani akeekada yeekkiyoogaa doommaas. I taani oottana bessiya gitabay deˈiyoogaa ammanettanaadan oottiis; qassi maaddiya oosuwaa taani oottanaadan tana tamaarissanawu I eeno giis!” Kasebaa hassayada Jeera hagaadan gaasu: “Taani tamaaranawu biyo wode, hirggaas, hidootaa qanxxaasinne tana pattennabadan xeellaas. Gidoppe attin, taani yaappe kiyiyo wode, tanan ammanettaas, minettaasinne, taani maaddiyaabadan tawu siyettiis!”

18. Nuuni cimiyo wodekka Yihooway nu goynuwaa xoqqu ootti xeelliyoogaa aggennaagaa Geeshsha Maxaafay waati bessii?

¹⁸ Nuuni cimiyo wodekka Yihoowawu oottana danddayiyo oosoy deˈiyoogaa ammanettana danddayoos. (Maz. 92:12-15) Nuuni oottiyoobay pattennaba nuussi milatiyo wodekka, Yihoowa haggaazuwan oottiyo aybakka I xoqqu ootti xeelliyoogaa Yesuusi tamaarissiis. (Luq. 21:2-4) Hegaa gishshawu, neeni oottana danddayiyooban xeelaa wotta. Leemisuwawu, Yihoowabaa yootana, ne ishanttussi woossana, qassi ammanettidi deˈanaadan harata minttettana danddayaasa. Yihooway neeni aara issippe oottanaadan koyiyoy, neeni oottiyoobaa danddayiyo gishshataassa gidennan, neeni eeno gaada ayyo azazettiyo gishshataassa.—1 Qor. 3:5-9.

19. Roome 8:38, 39y nu ay ammanettanaadan oottii?

¹⁹ Baayyo oottiyaageeta wozanappe nashshiya Xoossaa Yihoowawu nuuni goynniyoogee keehi bessiyaaba! Nuuni A sheniyaa polanaadan I nuna medhdhiis; qassi tumu goynoy nuuni nu deˈuwan ufayttanaadan oottees. (Ajj. 4:11) Ha alamee nuna pattennabadan xeellikkonne, Yihooway nuna hegaadan xeellenna. (Ibr. 11:16, 38) Harggee, gidiya miishshaa demmanawu metootiyoogee woy cimatettay nuuni hidootaa qanxxanaadan oottiyo wode, saluwan deˈiya nu Aawaa siiquwaappe nuna aybinne shaakkana danddayennaagaa hassayoos.—Roome 8:38, 39 nabbaba.