1-2. Ana ŵandu ŵajinji ŵa Yehofa akusasimana ni yindu yapi, soni yeleyi yikusakola yakuyichisya yamtuli kwa jemanjaji?

AGANICHISYE yisyasyo yitatu yakuyichisyayi. M’bale jwachinyamata amsimene ni ulwele wekulungwa mnope wawukumtendekasya kuti chilu chigambeje kufowoka. M’bale jwine jwa yaka ya m’ma 50, masengo gammalile atamose kuti jwaliji jwakulimbichila mwamti akulepela kupata masengo gane. Mlongo jwachikulile jwele alisoni jwakulupichika akulepela kutenda yejinji pakumtumichila Yehofa mpela mwaŵatendelaga pandanda.

² Naga akusimana ni yindu mpela yatuyikolasileyi, mwine mpaka alipikaneje kuti ali ŵangasosekwa. Yakutendekwa mpela yeleyi mpaka yatendekasye kuti akasangalalaga soni mpaka yisokonasye unasi wawo ni ŵane.

3. Ana Satana nambosoni ŵandu ŵakusamsyasya jwalakwe akusawuwona chamtuli umi wa mundu?

³ Yakutenda ŵandu kuchilamboku yikusalosya mwakusawuwonela Satana umi wa ŵandu. Jwalakwe akusiŵatendela ŵandu yindu mpela kuti ali ŵangasosekwa. Satana jwamsalile Hawa kuti chaŵe pa ufulu naga ngakumpikanila Mlungu, syasyaliji ngasa syekulungwa. Jwalakwe jwatesile yeleyi atamose kuti jwamanyililaga kuti yakuyichisya yakwe chaliji chiwa. Satana aŵele mkwalongolela ŵandu kuchilamboku pa yindu yakwayana ni mabisinesi, ndale soni yadini. Mwamti ngayikusasimonjesya kuti ŵabisinesi, ŵandale soni achimlongola ŵadini ngakusakuwona kusosekwa kwa umi wa mundu soni ŵangasamala ya mwakusapikanila ŵandu.

4. Ana chitulijiganye chichi munganiji?

⁴ Mwakulekangana ni mwakusatendela Satana, Yehofa akusasaka tumanyilileje kuti tuli ŵakusosekwa soni akusatukamuchisya patusimene ni yampaka yitutendekasye kuliwona kuti tuli ŵangasosekwa. (Sal. 136:23; Alo. 12:3) Nganiji chijisale yakusati Yehofa pakutukamuchisya (1) patukulaga ni ulwele, (2) patukusoŵa mbiya, soni (3) patukulipikana kuti ngatukutenda yejinji pakumtumichila Yehofa ligongo lya uchekulu. Chandanda, chitulijiganye  chindu champaka chitusimichisye kuti ŵanduwe tuli ŵakusosekwa kwa Yehofa.

5. Ana chichi chachikusasimichisya wawojo kuti ŵandu ali ŵakusosekwa kwa Yehofa?

⁵ Atamose kuti twapanganyidwe kutyochela ku luwundu nambope tuli ŵakusosekwa mnope kupunda luwundu lwagumbala m’miyala. (Gen. 2:7) Aganichisye magongo gane gagakusatutendekasya kumanyilila kuti tuli ŵakusosekwa kwa Yehofa. Jwalakwe ŵatupanganyisye m’litala lyakuti tukomboleje kusyasya ndamo syakwe. (Gen. 1:27) Jwalakwe ŵatesile yeleyi kuti tuwonecheje kuŵa ŵapenani kupunda chakupanganyikwa chilichose cha pachilambo chapasi. Jwalakwe jwapelechesoni ufulu wakuchisamalila chilambo ni kuyilamulilasoni yinyama.—Sal. 8:4-8.

6. Ana tukwete umboni wine wapi wakulosya kuti Yehofa akusiŵawona ŵandu ŵangali umlama kuŵa ŵakusosekwa?

⁶ Atamose Adamu paŵalemwisye, Yehofa jwapitilisyepe kwawona ŵandu kuti ali ŵakusosekwa. Jwalakwe akusatuwona kuti tuli ŵakusosekwa mnope mwamti jwapeleche Mwanache jwakwe Yesu pakusaka kutuwombola ku ulemwa wetu. (1 Yoh. 4:9, 10) Pakukamulichisya masengo mbopesi jaŵapeleche Yesuji, Yehofa chachajimusya ŵandu wosope ŵaŵawile ligongo lya ulemwa wa Adamu. Yeleyi yikugopolela kwimuka kwa “ŵakulungama ni ŵangalungama ŵakwe.” (Mase. 24:15) Maloŵe ga Yehofa gakusalosya kuti tuli ŵakusosekwa mnope kwa jwalakwe atamose kuti tukusalaga ni ulwele, kusoŵa kwa mbiya soni uchekulu.—Mase. 10:34, 35.

7. Ana ni magongo gane gapi gakwatendekasya ŵakutumichila ŵa Yehofa kulupilila kuti jwalakwe akusiŵawona kuti ali ŵakusosekwa?

⁷ Tukwete magongo gejinji gakututendekasya kukulupilila kuti tuli ŵakusosekwa kwa Yehofa. Yehofa ŵatuwutile kwa jwalakwe soni akusamanyilila yatwatite pakusijitichisya ngani syambone. (Yoh. 6:44) Patwagambile kutanda kuŵa paunasi ni Yehofa, jwalakwesoni jwatuŵandichile. (Yak. 4:8) Yehofa akusamalila ndaŵi jejinji alimkutujiganya pakulosya kuti tuli ŵakusosekwa kwa jwalakwe. Akusamanyilila mwatuŵelele apano, soni mwampaka tujawulile pasogolo mkupita kwandaŵi. Yehofa akusatujamuka ligongo lyakuti akusatunonyela. (Mis. 3:11, 12) Welewutu uli umboni wamachili wakulosya kuti Yehofa akusatuwona kuti tuli ŵakusosekwa.

8. Ana maloŵe gagali pa Salimo 18:27-29, mpaka gakwaye chamtuli kaganisye ketu patusimene ni yakusawusya?

⁸ Ŵane ŵamwonaga Mwenye Daudi kuti ali mundu jwangali mate, nambope jwalakwe jwamanyililaga kuti Yehofa akusamnonyela soni kumkamuchisya. Kumanyilila yeleyi kwamkamuchisye Daudi kuti ayiwoneje mwakuŵajilwa yakusawusya yaŵasimanaga nayo. (2 Sam. 16:5-7) Patukulagasika nganisyo kapena kusimana ni yakusawusya, Yehofa mpaka atukamuchisye kuti tuyiwoneje yindu mwakuŵajilwa. Yeleyi yikupwatikapo kutukamuchisya kuti tulimbane ni chakusawusya chilichose. (Aŵalanje Salimo 18:27-29.) Patupochele chikamuchisyo cha Yehofa, pangali champaka chitulepelekasye kusangalala patukumtumichila. (Alo. 8:31) Kwende sambano tulole yakutendekwa yitatu yakulosya ndaŵi jampaka tusosekwe kukumbuchila kuti Yehofa akusatuwona kuti tuli ŵakusosekwa.

9. Ana kulwala mpaka kukwaye chamtuli mwatukusaliwonela?

⁹ Kulwala mpaka kusokonasye nganisyo soni mpaka kututendekasye kulipikana kuti tuli ŵangasosekwa kwa jwalijose. Mpaka tutande kutenda sooni patumanyilile kuti ŵane akuyiwona kuti yindu ngayikwenda paumi wetu soni patukuyiwona kuti tukusosechela chikamuchisyo cha mundu jwine. Atamose ŵandu ŵane ali ngakumanyilila kuti tukulwala, mpaka tulajeje ni sooni ligongo lyakuyiwona kuti ngatukukombola  kutenda yatwatendega pandanda. Pandaŵi mpela jeleji Yehofa akusatulimbikasyaga. Ana akusatenda yeleyi mwamtuli?

10. Mwakamulana ni Misyungu 12:25, ana chichi champaka chitukamuchisye patukulwala?

¹⁰ “Maloŵe gambone” mpaka gatulimbikasye pandaŵi jatulwasile. (Aŵalanje Misyungu 12:25.) M’Baibulo, Yehofa akusatusalila maloŵe gambone gagakusatukumbusya kuti tuli ŵakusosekwa kwa jwalakwe atamose patukulwala. (Sal. 31:19; 41:3) Naga tukusaŵalanga Maloŵe gakusalilidwaga mwakuwilisyawilisya, Yehofa chachitukamuchisya kuti tumalane ni nganisyo syakulemwecheka syasikusayika pandaŵi jatukulwala.

11. Ana Yehofa ŵamkamuchisye chamtuli m’bale jwine?

¹¹ Kwende tulole yaŵasimene nayo M’bale Jorge. Jwalakwe paŵaliji mnyamata wamsimene ni ulwele wawakusile mnope soni wawamtendekasyaga kulipikana kuti ali jwangali mate. Jwalakwe jwatite, “Nganinjembecheyaga kuti ulwelewu chiwundendekasyeje kulipikana chamti myiyi soni kuti mpaka undendesyeje sooni. Pawakusile mnope ulwelewu, natandite ganichisya mwampaka uchenjele umi wangu. Nadandawulaga mnope mwamti namŵendile Yehofa kuti angamuchisye.” Ana Yehofa ŵamkamuchisye wuli? Jorge jwatite, “Ligongo lyakuti naganichisyaga mnope yangusimana nayo, naŵalangaga ndime syamnono m’buku ja Masalimo, syasikusalosya yakusati Yehofa pakwakamuchisya ŵakutumichila ŵakwe. Naŵalangaga malemba gamnonoga lisiku lililyose, soni nagaweni kuti gali gakulimbikasya. Pajangambile kupita ndaŵi jamnono, ŵandu ŵatandite kumbona kuti ndandite kusangalala. Ŵanduŵa ŵatiga une pangusangalala yikwalimbikasyasoni jemanjajo. Pelepa nayiweni kuti Yehofa ajanjile mapopelo gangu. Jwalakwe ŵangamuchisye kuchenga mwanaliwonelaga soni natandite ganichisya mnope ya Maloŵe gakwe pakwamba ya mwakusambonela jwalakwe atamose ngulwala.”

12. Ana mpaka achipate chikamuchisyo cha Yehofa mwamtuli pandaŵi jakulaga ni ulwele?

 ¹² Naga akulaga ni ulwele, akakayichilaga kuti Yehofa akumanyilila yakusimana nayo. Amŵendeje jwalakwe kuti ŵakamuchisye kuyiwona mwakuŵajilwa yakusawusya yakusimana nayo. Kaneko akusosekwa kukamulichisya masengo Baibulo kuti apate maloŵe gambone gaŵasunjile Yehofa kuti galimbikasye wawojo. Pakuŵalanga Baibulo aganichisyeje mnope ndime syasikulosya mwakusiŵawonela Yehofa ŵakutumichila ŵakwe kuŵa ŵakusosekwa. Mwakutenda yeleyi, chachiyiwona kuti Yehofa ali jwambone kwa ŵandu wosope ŵakusamtumichila jwalakwe mwakulupichika.—Sal. 84:11.

13. Ana kumala kwa masengo kukusakwaya chamtuli mitwe ja maŵasa?

¹³ Mitwe ja maŵasa jikusasakaga kuti jipateje yakusosechela ya liŵasa lyawo. Nambo kwende tugambe kuwanichisya kuti m’bale jwine masengo gammalile pali pangali ligongo lililyose. Jwalakwe akulinjilila kuti apate masengo gane nambo ngakugapata. Ligongo lyakusimana ni yindu mpela yeleyi, jwalakwe mpaka atande kulipikana kuti ali jwangali mate. Ana kuganichisya yaŵasasile Yehofa mpaka kumkamuchisye chamtuli?

14. Ligongo chichi Yehofa akusakwanilisya yaŵasasile?

¹⁴ Ndaŵi syosope Yehofa akusakwanilisya yaŵasasile. (Yos. 21:45; 23:14) Jwalakwe akusatenda yeleyi pamagongo gejinji. Chandanda, akusatenda yeleyi pakumanyilila kuti mpaka yikwaye mwakusaliwonela ŵandu lina lyakwe soni mwakusatendela yindu jwalakwejo. Yehofa ŵasasile kuti chachakamuchisya ŵakusamtumichila mwakulupichika, soni jwalakwe akusayiwona kuti akusosekwa kuyikwanilisya. (Sal. 31:1-3) Konjechesya pelepa, Yehofa akumanyilila kuti nganituŵa tusangalele naga jwalakwe akulepela kwasamalila ŵandu ŵakwe. Jwalakwe  jwasasile kuti chachitusamalila mwakuchilu soni mwausimu, soni pangali champaka chimlepelekasye kukwanilisya yeleyi.—Mat. 6:30-33; 24:45.

15. (a) Ana Aklistu ŵa m’yaka 100 yandanda ŵasimene ni chakusawusya chamtuli? (b) Ana lilemba lya Salimo 37:18, 19, likusatusimichisya ya chichi?

¹⁵ Patukukumbuchila chachikusamtendekasya Yehofa kuti akwanilisye yasasile, mpaka tuŵe ŵakusimichisya kuti chachitukamuchisya patukulaga kupata mbiya. Aganichisye chisyasyo cha Aklistu ŵa m’yaka 100 yandanda. Mpingo wa ku Yelusalemu pawatandite kulagasidwa, ŵandu ‘wosope kutyosya ŵandumetume pewo, ŵapwilingene.’ (Mase. 8:1) Yeleyi yatendekasisye kuti ŵandu atande kulaga pangani jakapate ka mbiya. Aklistuŵa ŵalesile malo gawo gakutama, masengo nambosoni bisinesi syawo. Nambope atamose yaliji myoyo, Yehofa nganiŵaleka soni ŵapitilisye kuŵa ŵakusangalala. (Mase. 8:4; Aheb. 13:5, 6; Yak. 1:2, 3) Yehofa ŵakamuchisye Aklistu ŵakulupichikaŵa soni mwangakayichila chachitukamuchisya m’weji.—Aŵalanje Salimo 37:18, 19.

16. Ana chichi champaka chitutendekasye kuganisya kuti Yehofa ngakusangalala ni undumetume wetu?

¹⁶ Patukuchekulupa, mpaka tutande kulipikana kuti ngatukutenda yejinji pakumtumichila Yehofa. Komboleka kuti nombe Mwenye Daudi pajwachekulupaga jwalipikanaga kuti ngakutenda yejinji pakumtumichila Yehofa. (Sal. 71:9) Ana Yehofa mpaka atukamuchisye chamtuli?

17. Ana tukulijiganya chichi pa chisyasyo cha mlongo jwine lina lyakwe Jheri?

¹⁷ Kwende tulole chisyasyo cha Mlongo Jheri. Jwalakwe jwaŵilanjidwe kuti jukasimanikwe nawo pamsongano wakulijiganya mwampaka akamulile masengo gakulinganya yindu yayijonasiche pa Nyumba ja Uchimwene. Nambope mlongoju nganasakaga kwawula nawo. Jwalakwe jwatite, “Mundune ngalambele soni ndili jwamasije, nambosoni pangali changumanyilila  pamasengo gelega. Une ndili jwangali mate.” Chilo chakuti malaŵi gakwe akakamule masengoga, ŵapopesile kwa Yehofa mwakumsalila yosope yayikumsawusya. Pajwayiche ku Nyumba ja Uchimwene, mlongoju ŵalipikanagape kuti nganaŵa akamwile masengogo. Pologalamu jakulijiganya jila jili mkati, m’bale jwine jwasasile kuti chachikusosekwa mnope pamasengoga chili kusachilila kwetu kwiganyidwa ni Yehofa. Jheri jwatite, “Nayiweni kuti ‘basi chingombole.’ Nasangalele mnope panayimanyi kuti Yehofa ajanjile lipopelo lyangu. Jwalakwe jwasimichisye kuti ngwete chindu chine chakwe chakusosekwa mnope champaka mbeleche soni jwaliji jwakusachilila kuti anjiganye.” Pajwakumbuchilaga yamunyuma, Jheri jwatite, “Msonganowu paŵatandaga nakwete woga soni naliji jwakudandawula mnope. Nambo panatyokaga pamsonganowo nalimbikasidwe mnope soni natandite kuliwona kuti ndili jwakusosekwa.”

18. Ana Baibulo jikusalosya chamtuli kuti Yehofa asapitilisyape kukuwona kulambila kwetu kuŵa kwakusosekwa atamose patukusile?

¹⁸ Yehofa mpaka atupe masengo gakuti tukamuleje atamose kuti tukusile. (Sal. 92:12-15) Yesu jwasasile kuti atamose yili mkuwoneka kuti yatukusatendaga yili yangasosekwa mnope, nambo Yehofa akusayiwona kuti yili yakusosekwa. (Luk. 21:2-4) Myoyo aganichisyeje yindu yampaka akombole kutenda. Mwachisyasyo mpaka aŵecheteje yakwamba Yehofa, kwapopelela abale ŵawo soni kwalimbikasya ŵane kuti aŵepe ŵakulupichika. Yehofa akusiŵawona wawojo kuti ali jwamasengo mjakwe ngaŵa ligongo lyakuti akukwanisya kutenda yine yakwe, nambo ligongo lyakusachilila kwawo kumpikanila.—1 Akoli. 3:5-9.

19. Ana lilemba lya Aloma 8:38, 39 likutusimichisya ya chichi?

¹⁹ Tukuyamichila mnope ligongo lyakumlambila Yehofa jwali Mlungu jwakusiŵawona ŵandu ŵakusamtumichila kuŵa ŵakusosekwa. Jwalakwe ŵatupanganyisye kuti tutendeje yakusasaka. Kulambila kwakuwona ni kwakukusatutendekasya kuŵa ŵakusangalala. (Chiw. 4:11) Atamose kuti ŵandu kuchilamboku akutuwona mpela ŵangali mate, nambope Yehofa ngakusatuwona myoyo. (Aheb. 11:16, 38) Patukulagasika nganisyo ligongo lya ulwele, kusoŵa mbiya kapena uchekulu, tukumbuchileje kuti pangali champaka chitulekanganye ni Atati ŵetu ŵakwinani.—Aŵalanje Aloma 8:38, 39.