1-2. Gin me aura ango ma otimme i nino me Pentekote i mwaka 33 K.M.?

I CENG CABIT odiko mo, gurup pa lukwena 120 gugure kacel i kicika ma malo i ot mo i Jerucalem. Man onongo nino me Pentekote i mwaka 33 K.M. (Tic 1:13-15; 2:1) Nino mogo manok angec, Yecu onongo ocikogi ni gubed i Jerucalem pien onongo gibinongo mot mo ma kite dok pat ki kunnu. (Tic 1:4, 5) Ngo mutimme i nge meno?

² “Oyotoyot woo owinnye kun oa ki i polo macalo yamo ma kodo mager.” Woo man opongo i ot ducu. “Ci gin mo onen botgi macalo leb mac” ma opye i wi lupwonnye ducu, ka dong gin ducu “gupong ki cwiny maleng.” (Tic 2:2-4) I yo me aura man, Jehovah oonyo cwiny mere maleng i kom gurup meno. (Tic 1:8) Gudoko jo mukwongo ma kiwirogi ki cwiny maleng * dok kiminigi gen me loc kacel ki Yecu i polo.

3. Pingo jo ma kiwirogi i Pentekote pe gubedo ki akalakala mo ka kiwirogi ki cwiny maleng?

³ Ka onongo in itye i kin lupwonnye ma gugure i kicika ma malo-ni i nino meno, onongo wi pe biwil iye matwal. Gin mo ma nen calo leb mac opye i wi, ci icako loko leb  mapatpat! (Tic 2:5-12) Onongo pe ibibedo ki akalakala mo ni kiwiri ki cwiny maleng. Ento tika dano ducu ma kiwirogi ki cwiny maleng kiwirogi i yo me aura meno dok i kare marom i kwogi? Pe. Watwero ngeyone nining?

4. Tika Lukricitayo ducu ma kiwirogi i cencwari me acel gunongo lwongogi i kare marom? Tit kong.

⁴ Wabicako ki nyamo awene ma kitwero wiro iye ngat moni. Pe gurup pa Lukricitayo 120 meno keken aye kiwirogi ki cwiny maleng i nino me Pentekote, mwaka 33 K.M. Lacen i nino meno, jo ma romo 3,000 bene gunongo cwiny maleng. Kiwirogi ki cwiny maleng i kare ma gunongo batija. (Tic 2:37, 38, 41) Ento i mwaki ma lubo meno, pe Lukricitayo ducu ma kiwirogi gunongo cwiny maleng i kare me batijagi. Lucamaria gunongo cwiny maleng ma kare mo okato i nge batijagi. (Tic 8:14-17) Ento ma dong obedo pat loyo aye gin mutimme i kom Kornelio ki jo me ode, kiwirogi ki cwiny maleng ma onongo peya gunongo batija.​—Tic 10:44-48.

5. Ma lubbe ki 2 Jo Korint 1:21, 22, ngo ma timme ka ngat moni kiwiro ki cwiny maleng?

⁵ Kong dok wanyamu bene ngo ma timme ka kiwiro ngat moni ki cwiny maleng. Jo mogo ma kiwirogi gitwero nongo ni i acakkine tek adada me ye ni Jehovah oyerogi. Gitwero pennye kekengi ni, ‘Pingo Lubanga oyera?’ Jo mukene pe giwinyo kit meno. Labongo paro pi kit ma jo mukene giwinyo kwede, lakwena Paulo otito gin ma timme i kom jo ducu ma kiwirogi: “Wun wuye en, en mumiyo gimiyowu cwiny maleng ma con Lubanga ociko pire-ni, wek obed macalo lanen * ma mere ma dong giketo i komwu. En aye gin ma gijengo ma nyuto ni wabinongo gin ducu ma Lubanga oyubbe me miyo botwa.” (Ep. 1:13, 14) Dong Jehovah tiyo ki cwiny mere maleng me wek Lukricitayo magi gubed  labongo akalakala mo keken ni eyerogi. I yo ma kit man, cwiny maleng bedo calo gin ma “moko” [nyo gicikke] ma kimiyo botgi ma weko gibedo ki gen ni i kare me anyim gibibedo i polo ento pe i lobo.​—Kwan 2 Jo Korint 1:21, 22.

6. Lakricitayo ma kiwiro myero otim ngo wek onong motte me cito i polo?

⁶ Ka Lakricitayo moni kiwiro, tika meno nyuto ni kadi ningo en binongo motte me cito i polo? Pe. Nongo en pe kalo akala ni kiyere me cito i polo. Ento, wiye myero opo i kom lok man: ‘Utmegina, myero wutemme me medde wek wumok i lwongowu matek, ki i yer ma Lubanga oyerowu kwede; pien ka wutimo kit meno, pe wubipoto kadi ki acel.’ (2 Pet. 1:10) Dong kadi bed kilwongo nyo kiyero Lakricitayo ma kiwiro-ni me cito i polo, en binongo mot meno keken ka omedde ki bedo lagen.​—Pil. 3:12-14; Ibru 3:1; Yabo 2:10.

7. Jo ma kiwirogi gingeyo nining ni kilwongogi me cito i polo?

⁷ Ngat moni twero ngeyo nining ni kilwonge me cito i polo? Lagam me lapeny meno nen ka maleng i lok pa lakwena Paulo bot jo ma i Roma ma Lubanga ‘olwongogi me bedo jone kikome.’ En owaco botgi ni: ‘Yam pe onongo wugamo cwiny me bedo opii, wek wudok cen i lworo; ento wugamo cwiny me bedo litino me paco. Mumiyo wakok ni, “Abba! Wora!” Cwiny maleng kikome ribbe ki cwinywa kun tuco ni, wan litino pa Lubanga.’ (Rom. 1:7; 8:15, 16) Dong Lubanga tiyo ki cwiny mere maleng wek jo ma kilwongogi me cito i polo gubed labongo akalakala mo.​—1 Tec. 2:12.

8. I yo ma nining ma 1 Jon 2:20, 27 nyuto ni pe mitte ni dano mukene gumok ka kiwiro ngat moni?

⁸ Jehovah weko jo ma kiwirogi gibedo labongo akalakala mo i tamgi nyo i cwinygi. (Kwan 1 Jon 2:20, 27, NW.) * Ngene kene ni jo ma kiwirogi bene omyero Jehovah opwonygi kun wok ki i kacokke, kit ma en pwonyo kwede jo mukene-ni. Ento pe mitte ni ngat mo mukene omok botgi ni kiwirogi. Jehovah otiyo ki cwiny maleng, ma en aye teko ma pud dong tek loyo ducu i polo ki lobo wek jo ma kiwirogi gubed labongo akalakala mo keken!

9. Ka ngat moni kiwiro, alokaloka ango ma en kato ki iye, kit ma kitito kwede i Jo Epeco 1:18?

⁹ Pol pa lutic pa Lubanga ginongo ni tek me niang gin ma timme i kom ngat moni ka Lubanga owiro ki cwiny maleng. Man tye kit meno pien gin kikomgi pe kiwirogi. Lubanga ocweyo dano me kwo pi naka i lobo, ento pe i polo. (Acak. 1:28; Jab. 37:29) Ento Jehovah oyero jo mogo me kwo i polo. Pi meno, ka en owirogi, en loko gengi ki kit ma gitamo kwede i yo me aura, weko gicako bedo ki miti me kwo i polo.​—Kwan Jo Epeco 1:18.

10. Tyen lokke ngo me bedo ngat ma ‘ginywalo tyen me aryo?’ (Nen bene lok ma tye i tere piny.)

¹⁰ Ka kiwiro Lukricitayo ki cwiny maleng, nongo ‘ginywalogi tyen me aryo’ nyo ‘kinywalogi ki malo.’ * Yecu bene  otito ni tek adada me tito bot ngat ma pe kiwiro kit ma iwinyo kwede ka ‘kinywali tyen me aryo,’ nyo ‘kinywali ki cwiny.’​—Jon 3:3-8; coc ma i tere piny.

11. Tit kong alokaloka ma timme i tam pa ngat moni ka kiwire.

¹¹ Lakricitayo moni cako tam i yo mapat nining ka kiwire? Ma peya Jehovah owiro Lukricitayo magi, gin onongo gitamo me kwo i lobo pi naka. Onongo gitye ka kuro ki miti madit kare ma Jehovah bikwanyo tim maraco ducu kun loko lobo-ni doko paradic. Gwok nyo onongo gigoyo kit ma gibijolo kwede wadigi nyo luremgi ma guto. Ento i kare ma kiwirogi, gucako tam i yo mapat. Pingo man tye kit meno? Pe gucako tamo ni kwo i lobo pe bibedo ber pigi. Pe guloko tamgi pien cwinygi otur dok gukato ki i pekki mapol. Pe gucako winyo ni kwo i lobo-ni pi naka biwaco komgi. Me ka meno, Jehovah otiyo ki cwiny mere maleng me loko kit ma gitamo kwede ki gengi.

12. Ma lubbe ki 1 Petero 1:3, 4, Lukricitayo ma kiwirogi giwinyo nining i kom gengi?

¹² Ngat ma kiwiro twero winyo ni pe epore pi mot meno. Ento en pe bedo ki akalakala mo keken ni Jehovah owire. Cwinye bedo yom adada dok en bedo ki pwoc madit ka en otamo i kom genne me anyim.​—Kwan 1 Petero 1:3, 4.

13. Lukricitayo ma kiwirogi giwinyo nining i kom kwogi i lobo kany?

¹³ Dong man tika tyen lokke ni jo ma kiwirogi gimito to? Lakwena Paulo ogamo lapeny meno. En oporo komgi macalo dano ki kema dok owaco ni: ‘Pien ka pud watye i kema man, wacur acura pi cwercwiny ma onurowa; pe ni meno wamito ni wabed ma pe warukke, ento wamito ni waruk kom manyen i wi man, wek kwo omwony gin ma to woko.’ (2 Kor. 5:4) Lukricitayo magi pe gurwenyo mitigi me kwo i lobo, ma weko gimito ni gito woko oyotoyot. Ki tungcel, ginongo mit pa kwo dok gimito ni giti pi Jehovah nino ducu kacel ki wadigi ki luremgi. Ento kadi bed gitye ka timo gin mo keken, wigi pe wil i kom gen mamwonya ma gitye kwede pi anyim.​—1 Kor. 15:53; 2 Pet. 1:4; 1 Jon 3:2, 3; Yabo 20:6.

14. Gin ango ma pe nyuto ni kiwiro ngat moni ki cwiny maleng?

¹⁴ Gwok itye ka pennye kekeni ka kiwiri ki cwiny maleng. Ka tye kit meno, ci tam kong i kom lapeny ma pigi tego magi: Tika itye ki arima me timo miti pa Jehovah? Tika iwinyo ni itye ki mit kom pi tic me tito kwena? Tika in imaro kwano Lok pa Lubanga ki pwonyo “tam ma Lubanga okano i iye ka matut”? (1 Kor. 2:10) Mono iwinyo ni Jehovah ogoyo lanne i kom ticci me tito kwena? Tika iwinyo ni itye ki tic me konyo jo mukene wek gupwony lok i kom Jehovah? Tika dong ineno lanyut ni Jehovah okonyi i yo mapatpat i kwoni? Ka igamo lapeny magi ducu ki mit kom ni eyo, tika man nyuto ni kilwongi me cito i polo? Pe tye kit meno. Pingo? Pien lutic pa Lubanga ducu gitwero winyo kit meno, kadi bed kiwirogi nyo pe. Dok Jehovah twero miyo cwiny mere maleng bot laticce mo keken, kadi bed en tye ki gen me kwo i lobo nyo i polo. Ki lok ada, ka itye ka pennye kekeni ka kiwiri ki cwiny maleng, ci gung cwiny meno nyuto ni pe kiwiri. Jo ma Jehovah olwongogi pe gikalo  akala ka ce kiwirogi nyo pe! Gingeyo maber!

15. Wangeyo nining ni pe jo ducu ma gunongo cwiny pa Lubanga gibicito i polo?

¹⁵ I Baibul, tye labol mapol pa co ma gunyuto niye ma Lubanga ominigi cwiny maleng kun onongo pe gitye ki gen me cito i polo. Cwiny maleng aye otelo Daudi. (1 Cam. 16:13) Cwiny maleng okonye me niang jami matut i kom Jehovah dok otele me coyo but buk me Baibul. (Mar. 12:36) Kadi bed kit meno, lakwena Petero owaco ni Daudi “yam pe ocito i polo.” (Tic 2:34) Jon Labatija onongo ‘opong ki cwiny maleng.’ (Luka 1:13-16) Yecu owaco ni pe tye dano mo ma onongo dit kato Jon Labatija, ento en bene owaco ni Jon pe bibedo i Ker me polo. (Mat. 11:10, 11) Jehovah otiyo ki cwiny mere maleng me miyo co magi teko me timo jami me aura, ento en pe otiyo ki cwiny meno me yerogi me kwo i polo. Tika man tyen lokke ni gin pe gubedo lugen calo jo ma kiyerogi me loc i polo? Pe. Tyen lokke tye ni Jehovah bidwokogi cen me kwo i Paradic i lobo kany.—Jon 5:28, 29; Tic 24:15.

16. Gen ango ma pol pa lutic pa Lubanga gitye kwede i kare-ni?

¹⁶ Pol pa lutic pa Lubanga ma gitye ka kwo i lobo i kare-ni pe gitye ki gen me kwo i polo. Calo Abraim, Cara, Daudi, Jon Labatija, kacel ki co ki mon mukene ma gukwo i kare me Baibul, gin bene gitye ki gen me kwo i lobo i kare ma Ker pa Lubanga biloyo lobo.​—Ibru 11:10.

17. Lapeny mene ma wabigamogi i pwony ma lubo man?

¹⁷ Pien jo mogo ma kiwirogi pud gitye ka kwo i kinwa i kare-ni, watwero bedo ki lapeny mogo. (Yabo 12:17) Me labolle, jo ma kiwirogi omyero gunene kekengi nining? Ka ngat mo i kacokkewu ocako camo mugati ki mato vino i nino me Nipo, ci omyero iter dano meno nining? Dok ka wel jo ma giwaco ni kiwirogi tye ka medde ameda kono? Tika man omyero owek ibed ki par? Wabigamo lapeny magi i pwony ma lubo man.