1-2. Lembang’o ma wang’u ijo m’utimere i ceng’ mi Pentekoste mi oro 33 R.M.?

I CENG’ mi Pentekoste mi oro 33 R.M., dhanu ma romo 120 gicokiri i Yerusalem i ot moko ma malu; ubino ceng’ yenga kugweno. (Tic. 1:13-15; 2:1) Nindo moko i wang’e, Yesu uyero igi nia gibed i Yerusalem, pilembe ebimio igi giramia moko ma segi. (Tic. 1:4, 5) Lembang’o m’utimere i ng’eye?

² “Aruca ruca nica ba gin moko ai i polo pami wavuvu m’ukoto, man epong’o ot ceke ka ma gibedo i ie.” I ng’eye, “leb m’ukaru pami lebmac” uwok iwi julub, ‘e kagi ceke tipo maleng’ uromogi.’ (Tic. 2:2-4) I ayi maeno mir udu re ma Yehova ukonjo tipo pare maleng’ iwi ungu mi dhanu maeno. (Tic. 1:8) Gibino Jukristu ma kwong’a ma tipo wiro * man ma ginwang’u genogen mi cibimo karacelo ku Yesu i polo.

3. Pirang’o Jukristu ma gicokiri i ceng’ mi Pentekoste gibino mbe ku jiji nia tipo wirogi?

³ Kepar nia in de ibino i kind Jukristu ma gicoko dhoggi i ot ma malu i Yerusalem; lembe m’utimere cing’ nica romo rwinyo ngo kud i wii. Gin moko m’unen ve lebmac ubin ucungo i wii, man icaku weco dhok mange! (Tic. 2:5-12) Iromo bedo mbe ku jiji nyanok de nia Mungu  uwiri ku tipo maleng’. Re nyo dhanu ceke ma tipo wiro ginwang’u lwong’o maeno i ayi mir udu man i saa ma rom? Ungo. Wang’eyo lembe maeno nenedi?

4. I rundi ma kwong’a, nyo tipo uwiro Jukristu zoo i saa ma rom? Kekor.

⁴ Wakenen nia tipo romo wiro ng’atini i saa ma kani. I ceng’ mi Pentekoste mi oro 33 R.M., tipo uwiro Jukristu 120 kendgi ngo. Cing’ nica, dhanu mange 3 000 de gidok ginwang’u tipo maleng’. Tipo uwirogi saa mi batizo migi. (Tic. 2:37, 38, 41) Ento i oro m’ulubo, tipo uwiro ngo Jukristu moko i saa mi batizo. Ku lapor, tipo uwiro Jukristu mi Samaria nindo moko i ng’ei batizo migi. (Tic. 8:14-17) Tung’ ku maeno, tipo uwiro Kornelio ku juruot pare lundo i ayi ma segi: ewirogi ma fodi gilimo ngo batizo.​—Tic. 10:44-48.

5. Nimakere ku 2 Jukorinto 1:21, 22, lembang’o ma timere kinde ma tipo uwiro ng’atini?

⁵ Wakenen bende lembe ma timere kinde ma tipo uwiro ng’atini. Ku kwong’a, jumoko ma tipo wiro giromo yio ngo yot yot nia Yehova ung’iogi. Giromo penjiri nia, ‘pirang’o Mungu ung’io an?’ Jumoko lundo giwinjiri ngo kumeno. Kadok nwang’u ju ma tipo wiro giwinjiri i ayi m’ukoc de, re jakwenda Paulo unyutho lembe ma timere ni Jukristu ceke ma tipo wiro. Eyero kumae: ‘I ng’ei ma wudaru yio bende, juketho ayi * i kumwu ni kum tipo maleng’ mi lembang’ola, ma en e mukwatu mi camupacu mwa.’ (Ef. 1:13, 14) Pieno, Yehova tio ku tipo pare maleng’ pi ninyutho ni Jukristu maeno kamaleng’ nia eng’iogi. I ayi maeno, tipo maleng’ utie “mukwatu” ma Mungu mio igi pi niketho ging’ei m’umbe jiji nia i nindo m’ubino gibikwo rondo ku rondo i polo, ento ungo iwi ng’om.​—Som 2 Jukorinto 1:21, 22.

6. Jukristu ma tipo wiro gicikiri nitimo ang’o kara ginwang’ sukulia migi i polo?

 ⁶ Ka Yehova uwiro Jakristu moko, nyo eno nyutho nia m’umbe piem ebicidho i polo? Ungo. Jakristune ng’eyo nia Mungu ung’ie pi nicidho i polo. Enre ukwayu epoi i kum wec ma e ma Biblia uwacu: “Umego, wutim kud amora m’usagu kara wuketh lwong’o mu ku goyo nyingwu cung tek: kum tek wutimo gin maeni, wubikier ki ngo.” (2 Pet. 1:10) Pieno, kadok jung’io Jakristu moko kara ecidh i polo de, ebinwang’u sukulia maeno kende kende kan egwoko bedoleng’ pare.​—Flp. 3:12-14; Ebr. 3:1; Nyu. 2:10.

7. Jukristu ma tipo wiro ging’eyo nenedi nia ginwang’u lwong’o mi cidho i polo?

⁷ Dong’ ng’atini ng’eyo nenedi nia enwang’u lwong’o pi nicidho i polo? Jakwenda Paulo udwoko wang’ penji maeno kamaleng’ i barua m’ekiewo ni Jukristu mi Roma ma “julwong’ogi gibed jumaleng’.” Ekiewo igi kumae: “Kum wujolo tipo mi ng’eca kendo ngo ni lworo, ento wujolo tipo mi dwok ma judwoko kowu ni nyithindho, ma walwong’o ko kumae, Abba, Vwa. Tipo gire enyutho lembe karacelo ku tipo mwa, ya wa nyithindho pa Mungu.” (Rum. 1:7; 8:15, 16) Pieno, Mungu tio ku tipo pare maleng’ pi niketho ju m’ewiro ging’ei kamaleng’ nia ginwang’u lwong’o mi cidho i polo.​—1 Tes. 2:12.

8. 1 Yohana 2:20, 27 unyutho nenedi nia Jukristu ma tipo wiro gimbe ku yeny ma junyuth ko igi nia Mungu wirogi?

⁸ Yehova weko ngo jiji moko nyanok de ubed i adunde ju m’ewiro ku tipo maleng’. (Som 1 Yohana 2:20, 27.) I andha, Jukristu ma tipo wiro gitie ku yeny mi ponji ma Yehova ubemio nikadhu kud i cokiri, calu jumange bende. Ento gimbe ku yeny ma nia ng’atu mange unyuth igi nia Yehova uwirogi. Pirang’o? Pilembe Yehova utio ku tipo pare maleng’, ma tie tego m’usagu tego moko ci pi nikonyogi ging’ei m’umbe jiji nia ewirogi!

9. Calu ma Juefeso 1:18 ukoro, alokaloka ma kani ma timere ka tipo wiro ng’atini?

⁹ Tin, jutic pa Mungu ma pol gicopo nyang’ ungo i lembe ceke ma timere i kwo pa ng’atu ma tipo wiro. Ginyang’ ungo kakare, pilembe gin tipo wirogi ngo. I andha, Mungu ucwio dhanu kara gikwo iwi ng’om, ento i polo ngo. (Tha. 1:28; Zab. 37:29) Re Yehova ung’io dhanu moko kara gicidh gikwo i polo. Pieno, kan ewirogi eloko genogen migi man paru migi, e gicaku paru kwa pi genogen migi mi polo.​—Som Juefeso 1:18.

10. ‘Ninyoliri kendo’ thelembene tie ang’o?

¹⁰ Ka tipo maleng’ uwiro Jakristu moko, eno nyutho nia ‘enyolere kendo’ niwacu ‘enyolere ku tipo.’ * Yesu de unyutho nia ecopere ngo nikoro tap tap ni ng’atu ma tipo wiro ngo nia ng’atu ma ‘junyolo kendo’ kunoke ma “junyolo ku tipo” winjere nenedi.​—Yoh. 3:3-8.

11. Saa ma tipo wiro Jukristu, alokaloka ma kani ma timere i paru migi?

¹¹ Saa ma tipo wiro Jukristu, alokaloka ma kani ma timere i paru migi? I wang’e ma fodi Yehova ung’io ngo Jukristu  maeno, gilar gimaru lee genogen migi mi kwo rondo ku rondo iwi ng’om. Gibino kuro kud ava nikwo i ng’om ma bidoko ni paradiso saa ma nwang’u dong’ Yehova ukabu lembe ma reco ceke. Saa moko nyo gibed giparu kite ma gibijolo ko wedi migi kunoke jurimbgi i saa mi cer. Ento kinde ma tipo wirogi, gicaku paru lembe i ayi m’ukoc. Pirang’o? Nyo gicaku nwang’u nia nikwo iwi ng’om utie ber ceke ceke ngo? Kunoke nyo peko moko uwok i kwo migi, uketho ava kwo mi ng’om uai i kumgi? Nyo rek kumeni ci gicaku paru nia nikwo rondo ku rondo iwi ng’om romo badhu cwiny dhanu? Ungo. Yehova re m’utio ku tipo pare maleng’ pi niloko paru migi man niloko genogen ma gimaru akeca.

12. Nimakere ku 1 Petro 1:3, 4, Jakristu ma tipo wiro winjere nenedi kinde m’ebeparu pi genogen pare?

¹² Jakristu moko ma tipo wiro copo nwang’u nia eromo ngo ku rwom ma lee maeno. Re ebedo ngo ku jiji nyanok de nia andha Yehova ung’ie. Mutoro nege lee man adundene pong’ ku foyofoc kinde m’ebeparu pi rwom mi cikwo i polo.​—Som 1 Petro 1:3, 4.

13. Jukristu ma tipo wiro giwinjiri nenedi pi kwo migi mi ng’om keni?

¹³ Nyo eno nyutho nia Jukristu ma tipo wiro gimito githo? Jakwenda Paulo udwoko wang’ penji maeno. Eporo kumgi ku hema, man eyero kumae: “Kum andha wan ma wani i hema maeni wacur acura, ma jubenurowa; ma nia wayenyo jukab ko kendi mwa ngo, ento wayenyo nia jurony kud i wie, kara mi tho nini umwonjre ku kwo.” (2 Kor. 5:4) Etie ngo nia kwo mi ng’om udaru olo Jukristu maeno, ci dong’ gimito githo nyapio pio kara gicidh i polo. Tung’ ku maeno, gimaru nikwo man gibemito gitim ni Yehova kubang’ nindo karacelo ku juruot migi man jurimbgi. Re kadok nwang’u gibetimo lembang’o de, wigi wil ungo i kum genogen migi ma yawe mbe mi nindo m’ubino.​—1 Kor. 15:53; 2 Pet. 1:4; 1 Yoh. 3:2, 3; Nyu. 20:6.

14. Lembang’o ma nyutho ngo nia tipo wiro ng’atini?

¹⁴ Saa moko nyo ibepenjiri nia nyo tipo wiri. Kan etie kumeno, kenyam i penji ma e ma pigi tek: Nyo ava mi timo ni Yehova utie lee i kumi? Nyo ibed inwang’u nia itie kud amora lee i tic mi rweyo lembanyong’a? Nyo ibed iponjo Biblia akethacwinyi man ibed isayu ning’eyo “lembe pa Mungu ma ng’eyo tek”? (1 Kor. 2:10) Nyo ibed inwang’u nia Yehova ukonyi ninwang’u adwogi ma cuu i tic mi lembanyong’a? Nyo ibed inwang’u nia etie tic peri nikonyo jumange kara ging’ei Yehova? Nyo ineno lembe moko i kwo peri m’unyutho nia Yehova ukonyi i ayi ma tung’ tung’? Kan idwoko wang’ penji maeno zoo nia eyo, nyo eno nyutho nia dong’ inwang’u lwong’o mi cidho i polo? Ungo, kumeno ngo. Pirang’o? Pilembe jutic pa Mungu ceke gicopo winjiri kumeno kadok nwang’u tipo wirogi kunoke ngo de. Bende, Yehova copo tio ku tipo pare maleng’ pi nikonyo jatic pare moko ci, kadok etie ku genogen mi cidho i polo kunoke ngo. Dong’ kan ibed ipenjiri ka nyo tipo wiri kunoke ngo, ng’ei nia jiji maeno kende ci nyutho nia tipo wiri ngo. Dhanu ma Yehova ulwong’o  gipenjiri ngo ka nyo andha Yehova ulwong’ogi! Ging’eyo nia elwong’ogi!

15. Ang’o m’unyutho nia Yehova ung’io ngo dhanu ceke m’emio igi tipo pare maleng’ pi nicidho i polo?

¹⁵ Biblia ukoro pi weg yioyic dupa ma Yehova umio igi tipo pare maleng’, re gibino mbe ku genogen mi cikwo i polo. Ku lapor, tipo maleng’ ubed utelo wi Daudi. (1 Sam. 16:13) Tipo maleng’ ukonye ninyang’ i lembe ma thuc iwi Yehova man ukonye bende nikiewo buku moko mi Biblia. (Mk. 12:36) Re kadok kumeno de, jakwenda Petro uyero nia “Daudi idho i polo ngo.” (Tic. 2:34) ‘Tipo maleng’ uromo’ Yohana ma Jababutisi bende. (Lk. 1:13-16) Yesu uyero nia ng’atu moko mbe ma dit m’usagu Yohana, ento edok eyero nia Yohana bibimo ngo i Ker mi polo. (Mat. 11:10, 11) Yehova utio ku tipo pare maleng’ pi nimio tego ni dhanu maeno kara gitim lembe ma wang’u ijo, ento etio ngo ku tipo maeno pi ning’iogi kara gicidh gikwo i polo. Nyo eno nyutho nia gigwoko ngo bedoleng’ migi cuu calu dhanu m’eng’io nicidho i polo? Ungo. Ento eno nyutho kende kende nia Yehova bicerogi pi nikwo i Paradiso iwi ng’om.​—Yoh. 5:28, 29; Tic. 24:15.

16. Tin jutic pa Mungu ma dupa gibekuro sukulia ma kani kud ava?

¹⁶ Tin, jutic pa Mungu ma dupa gimbe ku genogen mi cikwo i polo. Gibekuro kud ava nikwo iwi ng’om i the Ker pa Mungu, calu Abraham, Sara, Daudi, Yohana ma Jababutisi, man jumaco ku jumamon ma dupa ma gikwo i rundi ma con.​—Ebr. 11:10.

17. Wabidwoko wang’ penji ma kani i thiwiwec m’ulubo?

¹⁷ Calu ma fodi tin wabekwo i ng’om keni ku Jukristu moko ma tipo wiro, penji moko copo tundo i wiwa. (Nyu. 12:17) Ku lapor, Jukristu ma tipo wiro gicikiri nibedo ku nen ma nenedi i wigi gigi? Ka ng’atu moko i cokiri mwu ucaku camu mukati man emadhu divai i Poi pi tho pa Yesu, icikiri ninene nenedi? Nyo cwinywa ucikere nidieng’ ka wend dhanu m’ucamu mukati man m’umadhu divai ubemedere? Wabidwoko wang’ penji maeno i thiwiwec m’ulubo.