1-2. Itini saka 33 miheca Kocinsic a romiˈad mifekaday ko maanan kafahkaan a demak?

ITINI saka 33 miheca Kocinsic papacem, itini Yirusalim maedeng 120 ko nisawawaan masaˈopoay i tingloh a lomaˈ. (Dmak 1:13-15; 2:1) ˈAyaw no pina romiˈad, palimoˈotan ni Yis ko nisawawaan materek i Yirusalim, samanen wa malifok nangra ko cecay mikiriwiˈay a sapatelong. (Dmak 1:4, 5) Dotocto mifekaday ko maanan a demak hani?

² Itini i lalomaˈ cangra i, ‘fahal sanay ira ko honi nai kakarayan, malecad o honi no taˈangayay a fali, matomesay i lalomaˈ.’ Dotoc, maˈaraway nangra ‘sano semaay a namal,’ matefad i fongoh nangra, orato ‘matomesay no fangcalay saocor’ cangra. (Dmak 2:2-4) Tano kafahkaan a pakayraan ci Yihofa patefad to fangcalay saocor i tireng no nisawawaan. (Dmak 1:8) Malo saka cecay liyad tano fangcalay saocor a nilnilen no Kawas * cangra, ira ko tokel tayra i kakarayan malacafay ci Yisan a mikowanan.

3. Itini saka 33 miheca Kocinsic masaˈopoay a Krisciyang, hano pakasoˈlin to minilnilan no Kawas ko niyah hani?

³ Ano itiraay kiso i saka 33 miheca Kocinsic a romiˈad, maedeng cowa ko mamapawan kiso to mifekaday a demak toya romiˈad.  Maˈaraway iso ko sano semaay a namal i fongoh iso, dotoc misatapang kiso somowal to roma kitakit a sowal! (Dmak 2:5-12) Mifekad ko hatiniay a demak, o papakasoˈlin kiso to minilnilan no fangcalay saocor no Kawas ko niyah. Kawra, ano minilnil ko Kawas to cecay tamdaw i, sahtoay tano mahecaday a pakayraan han? Cowa. Hano mafanaˈ kita hani?

4. Itini saka 1 hahekalan, polong a Krisciyang sahtoay i malecaday a pakayraan a manilnil han? Tadtaden.

⁴ Pakayni hacowa tatokian a nilnilen no Kawas ko tamdaw. Itini saka 33 miheca Kocinsic a romiˈad, cowa koya 120 aca a Krisciyang ko minilnilan no Kawas, iraayho ko maedeng 3000 a tamdaw tiya micada to paputisem a tatokian a manilnil. (Dmak 2:37, 38, 41) Kawra ikorto i, cowa ka sahtosa i picadaan to paputisem a tatokian manilnil. Tinakoen o Samariya tamdaw ikor no micada to paputisem cecay liyad ngaˈ minilnilan. (Dmak 8:14-17) Ci Kornilius ato paro no lomaˈ ningra, cowaho picada to paputisem minilnilanto cangra.—Dmak 10:44-48.

5. Mikitini 2 Korinto 1:21, 22, manilnil no Kawas ko tamdaw i, wa mifekad ko maanan a demak hani?

⁵ Dotoc wa milengo, tano fangcalay saocor a nilnilen no Kawas ko tamdaw i, wa mifekad ko maanan a demak. Satapang pasangaray ko roma tamdaw cipinang, saan miharateng cangra alatek: “Hano kako ko piliˈen no Kawas hani?” Kawra cowa pihaen ko harateng no roma tamdaw. Ano samanayto ko harateng no mipiliˈan a tamdaw, milengoay ci Pawlo to mamifekad a demak, sanay: ‘Ikor no pakasoˈlin kamo, tadiˈecenho cingraanan milifok to mikiˈokan no Kawas a fangcalay saocor, malo salinaˈ * malo wacayho no ˈayaw picada ita to hafay.’ (Ifiso 1:13, 14 ato roma pihongyak.) Tano fangcalay saocor ko sapadama ni Yihofa to Krisciyang pakasoˈlin to mipiliˈan no Kawas ko niyah. Mihaenay o fangcalay saocor o ‘wacay’ ato ‘tahapinangan,’ padama cangraanan pakasoˈlin to tatahadaˈoc cangra i kakarayan eca ko aitini fafekang no sera a maˈorip.—ˈOsien ko 2 Korinto 1:21, 22.

6. O manilnilay a Krisciyang wa midemakho to maanan ngaˈ malifok ko i kakarayan a sapalifon hani?

 ⁶ O Krisciyang ikor no manilnil no fangcalay saocor no Kawas i, wa pakalifok to i kakarayan a sapalifon han? Cowa ka hatira. Soˈlin pakasoˈlin cingra to manilnilay ko niyah, kawra haratengenho ningra ko sapatalipaˈelal no Fangcalay Cudad: ‘Salikakaaw, tongalen ko pisaˈicel, ngaˈ caka malahdaw ko kalikoan a matahidang. Ano padadotoc kamo palahad toniya capeling, cowato ko papasokiyaw.’ (2 Pitiro 1:10) Mihaenay, soˈlin manilnil ko cecay Krisciyang, oha padadotoc cingra a madimadi ngaˈ malifok ko sapalifon.—Filipi 3:12-14; Hipray 3:1; Paˈarawan 2:10.

7. Cecay tamdaw samaan mafanaˈ to minilnilan no Kawas cingra hani?

⁷ Cecay tamdaw samaan mafanaˈ to manilnilay no fangcalay saocor no Kawas cingra hani? Patikamian ni Pawlo ko Loma a Krisciyang, pasowal toya ‘micadaay to satahidang a fangcalay sikawdan’ sanay cingra: ‘Milifok kamo to fangcalay saocor, cowa ka malo koli, cowa pakatalaw tamowanan, ya milifokan namo a fangcalay saocor, pala wawaayto no Kawas tamowanan. O fangcalay saocor papiowaw kitaanan to: “Amaaw, Wamaaw!” O fangcalay saocor ato falocoˈ ita malacafay a misawacay, pahapinangto o wawa no Kawas kita.’ (Loma 1:7; 8:15, 16) Mansa pakaynian no Kawas i fangcalay saocor padama toya micadaay to satahidang a Krisciyang pakasoˈlin, iraay ko hatokel nangra tayra i kakarayan.—1 Tisalonika 2:12.

8. 1 Yohani 2:20, 27 samaanay mitadtad, o manilnilay a Krisciyang, cowa ka misaali to pihayda no tao cangraanan hani?

⁸ Padamaan ni Yihofa koya minilnilan Ningra a tamdaw pakasoˈlin to iraay ko tokel no niyah tayra i kakarayan. (ˈOsien ko 1 Yohani 2:20, 27.) Oniya tamdaw malecaday to roma tamdaw, wa micada to sapasifanaˈ i kasakopang, kawra cowa ko mamisaali cangra to pihayda no tao to minilnilan no Kawas cangra. O mihadakan ni Yihofa a fangcalay saocor o sataˈangayay a ˈicel i dohaw, oniya ˈicel padamaay toniya Krisciyang a pakasoˈlin, o mipiliˈan no Kawas a tamdaw ko niyah.

9. Mikitini Ifiso 1:18, manilnil no Kawas ko cecay tamdaw i tahalifaay to maanan a kafalic?

⁹ Anini, ˈalomanay Krisciyang pasangaray cipinang to samaanay ko minilnilan no Kawas a demak. Matatodongay ko mahaenay harateng, samanen cowa ka piliˈen no Kawas ko ˈalomanay a Krisciyang. Misangaˈ ko Kawas to tamdaw, nao aitini fafekang no sera a maˈorip. (Satapangan 1:28; ˈOlic 37:29) Kawra ikor mipiliˈan Ningra ko roma tamdaw tayra i kakarayan. Tiya pakaynien Ningra i fangcalay saocor a minilnil toniya tamdaw i, taˈangayay ko kafalic no hatokel ato harateng nangra, mihalamhamayto cangra tayra i kakarayan a maˈorip.—ˈOsien ko Ifiso 1:18.

10. ‘Miliyaw hofocen’ o maanan ko tatodong hani? (Nengnengen ko ilaenoay safanaˈ.)

¹⁰ O Krisciyang ikor no nilnilen no Kawas tano fangcalay saocor, o ‘miliyaw hofocen’ anca ‘mikitini fafekang a hofocen.’ * Mitoroˈay ci Yis, cowa ka piliˈen no Kawas a tamdaw, cowa ko cacipinang to samanay ko ‘miliyaw hofocen’ anca ‘hofocen no fangcalay saocor.’—Yohani 3:3-8 ato roma pihongyak.

11. Ikor no nilnilen ko tamdaw, o harateng nangra iraay ko maanan kafalic hani?

¹¹ Ano nilnilen no fangcalay saocor no Kawas ko Krisciyang i, o harateng nangra iraay ko maanan kafalic hani? ˈAyaw no manilnil cangra  i, tada misalimlaay cangra to tahadaˈoc maˈorip i fafekang no sera a hatokel. Hinatalaay cangra maˈaraw ko pipalaˈafo ni Yihofa to tatiihay tamdaw ato demak, patatikol a malo Lakoing ko cikiw. Miharatengay cangra militemoh to patikolay maˈorip a salawina ato widang i Lakoing. Kawra, ikor no manilnil cangra i, mafalicay ko harateng. Samanen cowa ka ngaˈay ko hatokel midaˈoc maˈorip i fafekang no sera sanay han? Samanen adihayay ko macadaay nangra a roray, cowa ka sapadadotocaw maˈorip i fafekang no sera han? Anca awaay ko lipahak midaˈoc maˈorip i fafekang no sera sanay cangra han? Cowa! O sakafalic no harateng nangra, samanen pakaynian ni Yihofa i fangcalay saocor a mifalic to hatokel nangra.

12. Pakayni 1 Pitiro 1:3, 4, o manilnilay a tamdaw samaanay ko pinengneng to hatokel no niyah hani?

¹² O roma minilnilan no fangcalay saocor no Kawas a tamdaw, cowa ka citatodong milifok to mahaenay a sakaliko sanay ko piharateng alatek. Soˈlin mahaen, cowa ka cisasa to minilnilan ko niyah hokira. Ano maharateng ningra maˈorip i kakarayan noikor i, wa matomes ko lipahak ato piakoˈid no falocoˈ.—ˈOsien ko 1 Pitiro 1:3, 4.

13. O manilnilay a tamdaw samanay ko pinengneng to ˈorip no niyah i fafekang no sera hani?

¹³ Ano hatiraay i, o minilnilan no fangcalay saocor no Kawas a tamdaw makalimay sakahenayaw a mahererek ko ˈorip i fafekang no sera han? Patinakoan ni Pawlo ko tireng no manilnilay a tamdaw to pakopangan, sanay: ‘Itiniay kita i pakopangan a cedaah, micada to saroero, cowa ko pakayniay sapihepolaw tonini, o sapicaˈdongaw toriraan, tano sakaˈorip mikotay to mamapatay a tireng.’ (2 Korinto 5:4) Mihaenay, cowa ko mapiliˈay cangra to ˈorip i fafekang no sera a makalim kahenay a mapatay. Soˈlinay i, limlaay cangra to ˈorip no niyah, misongilaˈ misakadademak to cecacecay romiˈad malacafay to salawina a matayal saki Yihofaan. Mankora, halamhamay cangra to sakaliko matayal i kakarayan no ikor.—1 Korinto 15:53; 2 Pitiro 1:4; 1 Yohani 3:2, 3; Paˈarawan 20:6.

14. O tokel no tamdaw ano tatayra anca cowa ko tatayra i kakarayan, alatek wa ira ko masamaanay a harateng hani?

¹⁴ Miharateng ko roma tamdaw: “Manilnilay no fangcalay saocor ni Yihofa kako han?” Ano mahaenay ko harateng iso i, haratengen ko laenoay kalimlaan a salicay: Tada makalimay kiso sapidofdofaw to araaw ni Yihofa han? Mikiriwiˈay ko fanekfek no niyah i mitosilay a demak sanay kiso miharateng han? Misongilaˈay kiso a micekiw to Fangcalay Cudad, maolahay a minanam to ‘tangongolay a demak no Kawas’ han? (1 Korinto 2:10) Palaˈosian ni Yihofa ko mitosilay a demak iso sanay kiso miharateng han? Padama to tao mafanaˈ ci Yihofaan o dademaken a ˈinorong sanay kiso miharateng han? Itini adihayay a pakayraan nokaˈorip mahapinangay iso ko sapadama ni Yihofa tisowanan han? Ano masaˈosiay ko caˈof iso i, mitaypiyaway to mipiliˈan no Kawas kiso tayra i kakarayan han? Cowa, samanen ano tatayra i kakarayan ko hatokel hokira, o polong a sikawdan no Kawas iraay ko hatiniay a harateng, ngaˈayay milifok to sapadama no fangcalay saocor no Kawas. Soˈlinay i, ano cowa ka songilaˈ ko kafanaˈ iso to manilnilay ko niyah, paihkalay konini to cowa ko tatayra kiso i kakarayan. Samanen iraay ko tokel tayra i kakarayan a tamdaw cowa ko cacisasa to hatokel no niyah.

15. Samaan mafanaˈ kita to cowa ko polong no milifokay to fangcalay saocor a tamdaw, wa piliˈen maemin tayra i kakarayan hani?

¹⁵ Nolitengan ˈalomanay madimadiay a sikawdan  na milifokay to fangcalay saocor no Kawas, kawra cowa ka piliˈen no Kawas cangra tayra i kakarayan. Tinakoen ci Tafiti, o makayatay no fangcalay saocor a tamdaw cingra. (1 Samuil 16:13) Itini sapadama no fangcalay saocor, cipinangay ci Tafiti to tangongolay a demak ni Yihofa, mitilidayho to lalakaw no Fangcalay Cudad. (Marko 12:36) Soˈlin mahaen, sowal no tarokos ci Pitiro ‘cowa ka tayra i kakarayan’ ci Tafiti sanay. (Dmak 2:34) Roma i, o paputisemay a Yohani o ‘matomesay no fangcalay saocor’ a tamdaw. (Luka 1:13-16) Sowal ni Yis ilalomaˈ no hekal a tamdaw, awaay ko mikikakaay ko taˈangay to paputisemay a Yohanian, kawra cowa ko tatayra ci Yohani i kakarayan a Hongti Kitakit. (Matay 11:10, 11) Pakaynian ni Yihofa i fangcalay saocor a padama ko nolitengan madimadiay sikawdan palaˈosi to adihayay taˈangayay demak, kawra cowa ka tano fangcalay saocor a minilnil cangraanan. Samanen cowa ka lecad cangra to manilnilay a tamdaw a madimadi han? Cowa ka hatira. Soˈlin cowa ka piliˈen ni Yihofa cangra tayra i kakarayan, kawra wa patikolen cangra a paˈorip i fafekang no sera a Lakoing.—Yohani 5:28, 29; Dmak 24:15.

16. ˈAlomanay Misawacayay Tamdaw ni Yihofa anini halamhamay to maanan hani?

¹⁶ Anini, ˈalomanay Misawacayay Tamdaw ni Yihofa cowa ko tatayra i kakarayan. Mahecad ci Apraham, Sara, Tafiti, paputisemay Yohani ato ˈalomanay madimadiay a sikawdan, halamhamay cangra itini pikowan no Hongti Kitakit no Kawas, tahadaˈoc a maˈorip i fafekang no sera.—Hipray 11:10.

17. Dotoc a lalakaw wa milengo to maanan salicay hani?

¹⁷ Anini, o roma manilnilay no fangcalay saocor no Kawas a tamdaw kamayan maˈorip toni hekal. (Paˈarawan 12:17) Mansa mihaen ko harateng no roma tamdaw: “Sasamaan ko pinengneng no manilnilay a tamdaw to niyah hani? Ano ira ko tamdaw i kasakopang misatapang a komaen to epang ato epah i, sasamaan ko pinengneng ita cingraanan hani? Ano matongal ko komaenay to epang ato epah a tamdaw, oha pakidem ko calemcem ita han?” Dotoc a lalakaw wa milengo toniya salicay.