1-2. Limbe jam li hélha li bi bôña i kel Pentékôt i nwii 33 N.Y.?

DI YÉ i Yérusalem, hala a yé bikegla bi kel sonde, hilo hi Pentékôt 33 N.Y. Banigil 120, ba nkodba i tuñ i ngii. (Minson mi baôma 1:13-15; 2:1) Hala a yé ndék dilo nano le, Yésu a bi kal bo le ba yégle i Yérusalem inyule ba nlama kôhna likébla li tôbôtôbô. (Minson mi baôma 1:4, 5) Kii i ntagbe i mbus ha?

² Bibel i nkal le: “Kunda yada, mbimba i lôl i ngii, kiki mbimba i mbuk mbebi nunkeñi.” Mbimba i bé nôga ni ndap yosôna. I mbus, “yom i yé wengoñle lindômbôô li hié”, i nene i ngii miño mi banigil, bobasôna ba “yon ni mbuu mpubi.” (Minson mi baôma 2:2-4) Hala nyen Yéhôva a bi ti bo mbuu mpubi i nya i yé hélha. (Minson mi baôma 1:8) Ba bé bôt ba bisu i ba nhook ni mbuu mpubi, * ni i kôhna botñem i ke ane ni Yésu i ngii.

3. Inyuki i bôt ba bé i Pentékôt ba bé badba bé too ba yé nhook ni mbuu mpubi?

³ Ibale u bé ha yokela ni banigil i ndap ngii, ki w’a hôya bé jam li. Hoñol ki! Yom i i mpôna lindômbôô li hié i nlo i bedep we i ngii ño, u bôdôl pot ngandak dilémb! (Minson mi baôma 2:5-12) U mbadba bé too u  yé nhook ni mbuu mpubi. Baa i bôt bobasôna ba yé nhook, ba nkôhna mbuu mpubi nya i yé hélha? Baa bobasôna ba nkôhna wo nlélém ngéda mu i niñ yap? To. Kii i nyis bés hala?

4. Baa bikristen bi hiai bisu gwobisôna bi bi yila minhook i nlélém ngéda i niñ yap? Toñol.

⁴ Di pôdôl le i jam lini: Imbe ngéda mut a yé le a yila nhook. I 120 bikristen ini yotama bé yon i bi kôhna mbuu mpubi i kel Pentékôt i nwii 33 N.Y. Hilo hi, jam kiki bo 3 000 di bôt dipe di bi kôhna mbuu mpubi Yésu a bi bôn. Ba bi ba nhook ni mbuu mpubi i ngéda ba bi kôs sôble. (Minson mi baôma 2:37, 38, 41) Ndi i mbus ngéda, minhook mi bikristen nwominsôna bé nwon mi bi kôhna mbuu mpubi i nlélém ngéda ba bi kôs sôble. Bôt ba Samaria ba bi yila minhook ndék ngéda i mbus sôble yap. (Minson mi baôma 8:14-17) I jam li bi pémél Kornéliô ni ndap yé li yé tôbôtôbô, inyule ba bi yila minhook ilole ba nkôs sôble.​—Minson mi baôma 10:44-48.

5. Inoñnaga ni 2 Korintô 1:21, 22, kii i ntagbe i ngéda kristen i nyila nhook?

⁵ Di pôdôl kii i ntagbe i ngéda mut a nyila nhook. Inyu ngim bikristen, hala a yé a ba bo ndutu i neebe le Yéhôva a mpohol bo. Ba yé ba badba le: ‘Inyuki men Nyambe a mpohol?’ Bape ba mbadba bé hala. To i ba yaga lelaa, ñôma Paul a ntoñol kii i ntagbe i ngéda kristen i nyila nhook. A nkal le: “Ngéda ni bi hémle, Nyambe a bi band * bé ni njel mbuu mpubi a bi bôn, won u yé bibep bi bi bôk tiba inyu bum yés.” (Éfésô 1:13, 14; buk isi lipep.) Yéhôva a ngwélél mbuu mpubi wé inyu yis bikristen bini le ibabé pééna a mpohol bo. Jon mbuu mpubi u yé “bibep [tole  mbônga]” a nti bo inyu kwés bo nkaa le ba ga niñ i boga ni boga i ngii, he hana ’isi bé.​—Añ 2 Korintô 1:21, 22.

6. Kii nhook kristen u nlama boñ inyu kôhna bom yé i ngii?

⁶ Ibale kristen i nyila nhook, baa hala a nsômbôl kal le a mal kôhna nsébla i ke i ngii? To. A yé nkwook nkaa le a bi pohlana inyu ke i ngii. Ndi a nlama bigda bibañga bini le: “A lôk kéé, boña biliya binan gwobisôna le nsébla nan ni nteba nan bi ba yaga ntiik inyu bébomede, inyule ibale ni ntéñbe i boñ ma mana, n’a kwo yaga bé kekikel.” (2 Pétrô 1:10) Jon to ibale nhook kristen u mpohlana inyu ke i ngii, u ga kôhna ndigi bom yé ibale u ntéñbe ipam lisuk.​—Filipi 3:12-14; Lôk Héber 3:1; Masoola 2:10.

7. Kii i nyis minhook le mi nsébla inyu ke i ngii?

⁷ Lelaa kristen i munlôm tole i muda i nla yi le i nkôhna nsébla i ke i ngii? Ndimbhe i yé munu bibañga Paul a bi tilna bikristen bi Rôma bi bi bé “nséblaga i ba bapubhaga.” A bi kal bo le: “Ni bi kôhna bé mbuu inyu ba minkol, mbuu u u ntinde bé i kônde kon woñi; ndi Nyambe a bi ti bé mbuu inyu yilha bé bon bé ngwalakbel, ni njel mbuu unu nyen di nlond le: ‘Abba, a Ta!’ Mbuu womede u mbok mbôgi ni mbuu wés le di yé bon ba Nyambe.” (Rôma 1:7; 8:15, 16) Ni njel mbuu mpubi, Nyambe a nyis minhook le mi nsébla toi inyu ke niñ i ngii.​—1 Tésalônika 2:12.

8. Lelaa kaat 1 Yôhanes 2:20, 27 i ñunda le minhook mi bikristen mi gwé bé le mut nyen a kal bo le ba yé minhook?

⁸ Yéhôva a nyoñ bitelbene le minhook mi bana bañ pééna yo ki yo mahoñol map to miñem nwap le mi nkôhna nsébla i ke i niñ i ngii. (Añ 1 Yôhanes 2:20, 27.) Maliga ma yé le minhook mi bikristen mi nlama ke makoda kiki bôt bobasôna inyu kôhna biniigana bi Yéhôva. Ndi mut bé nyen a nkal bo le ba yé minhook. Yéhôva a ngwélél mbuu mpubi wé, u u nloo ngui yosôna, inyu kwés bo nkaa le ba yé minhook!   

9. Inoñnaga ni Éfésô 1:18 mambe mahéñha ma mbôña i ngéda kristen i nyila nhook?

⁹ Libim li bagwélél ba Djob i len ini li ntibil bé nok kii i ntagbe i ngéda Nyambe a nhoo mut ni mbuu mpubi wé. Inyuki? Inyule bomede ba ta bé minhook. Nyambe a bi hek bôt ba binam inyu niñ i boga ni boga hana ’isi, he i ngii bé. (Bibôdle 1:28; Tjémbi 37:29) Ndi Yéhôva a bi pohol ngim bôt inyu ke niñ i ngii. Jon i ngéda a nhoo bo ni mbuu mpubi, a nhéñha botñem yap, yak mahoñol map ma héñha héñha yosôna, kayéle niñ i ngii yon i kahal kon bo ngôñ.​—Añ Éfésô 1:18.

10. “Ligwéé li yondo” li nkobla le kii? (Béñge yak buk isi lipep.)

¹⁰ I ngéda kristen i nyila nhook ni mbuu mpubi, i ngwéé “ligwéé li yondo” tole “ligwéé li nlôl i ngii.” * Yésu a bi unda ki le mut nu a ngwéé “ligwéé  li yondo” tole “ligwéé ni njel mbuu mpubi” a nla bé tibil toñle mut nu a ta bé nhook lelaa a nôgda.​—Yôhanes 3:3-8; buk isi lipep.

11. Toñol mahéñha ma mbôña ngéda mut a nyila nhook.

¹¹ I ngéda bikristen bi nyila minhook, mambe mahoñol ba mbôdôl bana? Ilole Yéhôva a nhoo bikristen bini ni mbuu mpubi, ba bééna botñem i niñ i boga ni boga hana ’isi. Ba bé bem ni ñem wonsôna i ngéda Yéhôva a mélés mam mabe momasôna, a yilha hisi paradis. Bebek yak le ba bé hégda lelaa ba ga leege mut wap lihaa tole liwanda jap li li bi wo. Ndi ngéda ba bi yila minhook, ba kahal hoñol nya ipe. Ba bi kahal hoñol kii? Ba bi bôdôl bé hoñol le niñ boga hana ’isi i ta bé ilam kiki niñ i ngii. Ba bi héñha bé mahoñol inyule ba nok ndutu ngandak tole inyule kon mahoñol u ngwel bo. Ba bi bôdôl bé to tehe kunda yada le niñ boga hana ’isi i ga lémél bé bo. Ndi Yéhôva a bi gwélél mbuu wé mpubi inyu héñha mahoñol map ni botñem yap.

12. Inoñnaga ni 1 Pétrô 1:3, 4, lelaa minhook mi bikristen mi nôgda ngéda mi nhoñol botñem yap?

¹² Mut nu a nyila nhook a nla hoñol le a kôli bé ni bisai bi. Ndi kekikel, a mpééna bé le Yéhôva a mpohol nye. A nkon yaga maséé, a tinak mayéga i ngéda a nhoñol le a ga ke i ngii.​—Añ 1 Pétrô 1:3, 4.

13. Lelaa minhook mi ntehe niñ yap hana ’isi?

¹³ Baa hala a nkobla le minhook mi nyéñ wo? Ñôma Paul a bi timbhe i mbadga i. A bi hégha nyuu minsôn i minhook ni lap, a kal le: “Ni maliga, bés ba di yé munu lap ini, di ntjelel ni ndutu ñem, di ban-ga ngandak nduña, inyule di ngwés bé héya ini, ndi di ngwés haba ii ipe, kayéle niñ boga i mil nyuu i i nwo.” (2 Korintô 5:4) Bikristen bini, bi niñ bé hana ’isi wengoñle bi yé i mok, bi ngwés bé ki to pala wo. Ndi ba ngwés niñ, ba ban-ga ki ngôñ i gwélél Yéhôva hiki kel lôñni mahaa map ni mawanda map. Ndi ikété mam momasôna ba mboñ, ba nhôya bé bisai bikeñi bi mbem bo dilo di nlo.​—1 Korintô 15:53; 2 Pétrô 1:4; 1 Yôhanes 3:2, 3; Masoola 20:6.

14. Mambe mam ma ta bé yimbne le mut a yé nhook ni mbuu mpubi?

¹⁴ Bebek le u mbadba too Yéhôva a bi hoo we ni mbuu mpubi wé. Ibale hala, ôt pék munu mambadga mana: Baa u gwé ngôñ ikeñi i boñ sômbôl i Yéhôva? Baa u nôgda le u ntéé likalô ngandak? Baa u ngwés u nigil Bañga i Djob ngandak, u gwéhék ki u nigil “ndip mam i Nyambe”? (1 Korintô 2:10) Baa u nôgda le Yéhôva a nsayap nson woñ u likalô ngandak? Baa u nôgda le u gwé mbegee ikeñi i hôla bôt bape i yi Yéhôva? Baa u gwé mam ma ñunda le Yéhôva a nhôla we ni ngandak manjel ikété niñ yoñ? Ibale u ntimbhe le ñ munu mambadga mana momasôna, baa hala a nkobla le u bi kôhna nsébla i ke i ngii? To. Inyuki di nkal hala? Inyule bagwélél ba Nyambe bobasôna ba nla nôgda nlélém jam, to ba yé minhook, to ba ta bé minhook. Ni njel mbuu mpubi wé, Yéhôva a nla ti to numbe ngwélél wé ngui i boñ mam mana, too botñem yé  i yé i ngii, tole hana ’isi. Jon, ibale u mbadba too u yé nhook ni mbuu mpubi, hala a nkobla le u ta bé nhook. I bôt Yéhôva a bi pohol, ba mbadba bé too ba yé minhook, too ba ta bé! Ba nyi hala ntiik!

15. Kii i ñunda le i bôt ba nkôhna mbuu mpubi, bobasôna bé bon ba yé mpohlak inyu ke i ngii?

¹⁵ Bibel i mpôdôl ngandak bagwélél ba Djob ba ba bi kôhna mbuu mpubi; ndi ba bééna bé botñem i niñ i ngii. Mbuu mpubi won u bé éga David. (1 Samuel 16:13) Mbuu mpubi u bi hôla nye i nok ndip mam i Yéhôva ni i tila ngim bipes bi Bibel. (Markô 12:36) Ndi nôma Pétrô a bi kal le David “a bi bet bé i ngii.” (Minson mi baôma 2:34) Yôhanes Nsôble a bé “nyonok ni mbuu mpubi.” (Lukas 1:13-16) Yésu a bi kal le mut to wada a bé loo bé Yôhanes, ndi a bi kal ki le Yôhanes a ta bé ikété bôt ba nke ane i ngii. (Matéô 11:10, 11) Yéhôva a bi gwélél mbuu mpubi wé inyu ti bôt bana ngui i boñ bihélha bi mam, ndi a bi gwélél bé i mbuu u inyu pohol bo. Baa hala a nkobla le hémle yap i bé titigi iloo hémle i bôt ba nke i ngii? To. Hala a nkobla le Yéhôva a ga tugul bo inyu niñ i Paradis hana ’isi.​—Yôhanes 5:28, 29; Minson mi baôma 24:15.

16. Imbe botñem libim li bagwélél ba Djob li gwé i len ini?

¹⁶ I len ini, libim li bagwélél ba Djob li gwé bé botñem i ke i ngii. Kiki Abraham, Sara, David, Yôhanes Nsôble ni ngandak bôlôm ni bôda ba kôba; ba gwé botñem i niñ hana ’isi ngéda Ane i Djob i ga lo.​—Lôk Héber 11:10.

17. Mambe mambadga di ga timbhe i yigil i noñ?

¹⁷ I len ini, ngim minhook mi bikristen mi ngi yii ipôla yés, jon ngim mambadga i mbéda. (Masoola 12:17) Kiki hihéga, lelaa minhook mi nlama tehe nsima ba nkôs? Ibale kristen ikété likoda i mbôdôl je bret ni nyo wai, lelaa u nlama tehe nye? Ibale nsoñgi u bôt ba nkal le ba yé minhook u mbet ndigi bet ni bet, baa hala a nlama tééñga bés? I yigil i noñ, i ga timbhe mambadga ma.