1-2. Finshi ifyaibela ifyacitike pa bushiku bwa Pentekoste mu mwaka wa 33?

CALI ni pa Mulungu ulucelo pa bushiku bwa Pentekoste mu mwaka wa 33 ninshi Yesu alibwelelamo ku muulu. Abasambi nalimo 120 balilongene mu Yerusalemu mu muputule wa mu ng’anda uwa pa muulu. (Imil. 1:13-15; 2:1) Tapakokwele ukufuma apo Yesu abebele ukuti bakekale mu Yerusalemu ukufikila ilyo bakapokelela ica bupe icaibela. (Imil. 1:4, 5) Finshi fyacitike pali ubu bushiku?

² “Mu kupumikisha mu muulu mwaumfwikike icongo kwati cipuupu icikali ica mwela, kabili cakumene ing’anda yonse umo baikele. Kabili indimi ishapala umulilo shamoneke kuli bena kabili shalisalangene, no kwikala pali umo na umo, e lyo bonse baiswilemo umupashi wa mushilo.” (Imil. 2:2-4) Ifi fyacitike fyalangile fye ukuti Yehova alisubile balya abasambi no mupashi wa mushilo. (Imil. 1:8) E bali aba kubalilapo ukusubwa no mupashi wa mushilo * kabili e babalilepo ukupokelela isubilo lya kuteka pamo na Yesu ku muulu.

3. Mulandu nshi abasambi abasubilwe pa Pentekoste bashaletwishikila ukuti balisubilwe no mupashi wa mushilo?

³ Nga ca kuti mwali pali balya basambi abali mu muputule wa pa muulu, nalimo nga tamwalabile ifyacitike. Nga mulebukisha  ifyo cali ilyo ululimi ulwapala umulilo lwaikele pa mutwe wenu, e lyo ne fyo mwatendeke ukulanda ululimi lumbi. (Imil. 2:5-12) Nga tamwatwishike ukuti mwalisubilwe no mupashi wa mushilo. Nomba bushe lyonse Yehova nga asuba umuntu no mupashi wa mushilo kulaba ifyaibela ificitika, kabili bushe bonse basubwa pa nshita imo ine mu bumi bwabo? Awe. Twaishiba shani ukuti te fyo ciba?

4. Bushe bonse abasubilwe mu nshiku sha batumwa, balesubwa pa nshita imo ine? Londololeni.

⁴ Natulande pa nshita abantu basubwa. Balya Abena Kristu abali nalimo 120 abalongene mu muputule wa pa muulu, te basubilwe fye pali bulya bushiku bwa Pentekoste mu mwaka wa 33. Kwali na bambi nalimo 3,000 abapokelele umupashi wa mushilo uo Yesu abalaile. Aba abasambi basubilwe ilyo babatishiwe. (Imil. 2:37, 38, 41) Mu kuya kwa nshita, Abena Kristu bamo tabalesubwa pa bushiku babatishiwa. Ku ca kumwenako, abena Samaria basubilwe ninshi palipita inshita ukufuma apo babatishiwilwe. (Imil. 8:14-17) Ica kupapusha ca kuti, Korneli na ba mu ng’anda yakwe bena basubilwe ninshi no kubatishiwa tabalabatishiwa.—Imil. 10:44-48.

5. Ukulingana ne lembo lya 2 Abena Korinti 1:21, 22, finshi ficitika umuntu nga asubwa no mupashi wa mushilo?

⁵ Lekeni nomba tulande pa ficitika umuntu nga asubwa no mupashi wa mushilo. Bamo nga basubwa, pa kubala cilabakosela ukusumina ukuti Yehova na basala ukuya ku muulu. Nalimo kuti balayipusha abati, ‘Mulandu nshi Lesa ansaliile?’ Bambi nalimo te fyo bomfwa. Te mulandu ne fyo umuntu omfwa nga asubwa, umutumwa Paulo alilandile pa fyo ciba umuntu nga asubwa. Atile: “Ilyo mwatetekele Kristu, Lesa amupeele umupashi wa mushilo uo bamulaile, icishibilo * ca kulanga ukuti muli bantu ba kwa Lesa. Umupashi wa mushilo e cikatilo icilenga tushininkishe  ukuti Lesa akatupeela ico atulaya ukupyana.” (Efes. 1:13, 14) Kanshi Yehova alabomfya umupashi wakwe uwa mushilo ku kulenga aba Abena Kristu ukushininkisha ukuti alibasala. E ico, umupashi wa mushilo “cikatilo [nelyo ubulayo]” ubo Lesa abapeela ubulenga bashininkisha ukuti ku ntashi bakekala umuyayaya ku muulu, te pe sonde.—Belengeni 2 Abena Korinti 1:21, 22.

6. Finshi Umwina Kristu uwasubwa alingile ukucita pa kuti akapokelele icilambu ca kuya ku muulu?

⁶ Bushe Umwina Kristu nga asubwa ninshi calala capwa akapokelela icilambu ico Lesa alaya abasubwa? Awe. Kwena, alashininkisha ukuti Yehova alimusala ukuya ku muulu. Nalyo line, alingile ukulaibukisha ifyo Baibolo ilanda ukuti: “Mwe bamunyinane, bombesheni pa kutila mwipanya ubwite bwenu no kusalwa kwenu; pantu nga mulecita ifi fintu tamwakafilwe nakalya.” (2 Pet. 1:10) Kanshi nangu ca kutila Lesa kuti asala Umwina Kristu ukuya ku muulu, kuti apokelela fye icilambu nga ca kuti atwalilila ukuba uwa cishinka kuli Lesa.—Fil. 3:12-14; Heb. 3:1; Ukus. 2:10.

7. Bushe abasubwa beshiba shani ukuti Lesa na basala ukuya ku muulu?

⁷ Bushe umuntu eshiba shani ukuti nasalwa ukuya ku muulu? Paulo alyaswike bwino ici cipusho mu mashiwi alembeele abali mu Roma abaitilwe “ukuba aba mushilo.” Abebele ati: “Tamwapokelele umupashi wa busha uulenga umwenso, lelo mwapokelele umupashi wa kuba abana, uyu mupashi wine e utulenga ukubilikisha atuti: ‘Abba, Tata!’ Umupashi wa kwa Lesa ulashimika ubunte no mupashi wesu ukuti tuli bana ba kwa Lesa.” (Rom. 1:7; 8:15, 16) Kanshi Lesa abomfya umupashi wa mushilo ku kulenga abasubwa ukushininkisha ukuti alibasala ukuya ku muulu.—1 Tes. 2:12.

8. Bushe ilembo lya 1 Yohane 2:20, 27 lilanga shani ukuti Abena Kristu basubwa tabakabila uwa kubeba ukuti balisubwa?

⁸ Yehova alalenga abo asuba no mupashi wa mushilo ukukanatwishika nangu panono ukuti alibasala ukuya ku muulu. (Belengeni 1 Yohane 2:20, 27.) Kwena, Yehova abomfya icilonganino cakwe pa kusambilisha abasubwa, nga filya fine acita pa kusambilisha Abena Kristu bonse. Lelo abasubwa, tabakabila umuntu nangu umo ukubeba ukuti nabasubwa. Yehova abomfya amaka yakwe ayakalamba, e kutila umupashi wa mushilo, pa kulenga bashininkishe ukuti balisubwa!

9. Ukulingana ne fyaba pa Abena Efese 1:18, bushe umuntu nga asubwa finshi alukamo?

⁹ Muno nshiku, ababomfi ba kwa Lesa abengi balafilwa ukumfwikisha ificitika umuntu nga asubwa. Icilenga ni co tababala abasubwapo. Lesa apangile abantu ukuti baleikala pe sonde umuyayaya, te ku muulu. (Ukute. 1:28; Amalu. 37:29) Lelo Yehova alisala bamo ukuti bakekale ku muulu. Kanshi Lesa nga abasuba, alaalula isubilo bakwata ilya kwikala pe sonde, kabili alalenga baaluka mu fyo batontonkanyapo. Kanshi umuntu nga asubwa atendeka ukutontonkanya pa fyo akalaikala ku muulu.—Belengeni Abena Efese 1:18.

10. Bushe calola mwi ‘ukufyalwa libili’? (Moneni na futunoti.)

¹⁰ Abena Kristu nga basubwa no mupashi wa mushilo, ‘balafyalwa libili.’ * Ifyo Yesu alandile  filanga ukutila calyafya ku wasubwa ukulondolwela uushasubwa ifyo cumfwika ‘ukufyalwa libili’ nelyo ‘ukufyalwa ku mupashi.’—Yoh. 3:3-8.

11. Londololeni ifyo ciba pa kuti umuntu aaluke mu fyo atontonkanyapo nga asubwa.

¹¹ Bushe Abena Kristu abasubwa baluka shani mu fyo batontonkanyapo? Ilyo Yehova ashilabasuba, aba Abena Kristu balefwaisha sana ukwisaikala pe sonde umuyayaya. Balefwaisha ukwisamonako ilyo Yehova kufumyapo ifyabipa fyonse pe sonde no kulilenga ukuba paradaise. Nalimo baleelenganya ifyo baali no kwisasengela balupwa lwabo ne fibusa fyabo abafwa. Lelo ilyo basubilwe, balilekele ukutontonkanya pa fya pe sonde. Cinshi calengele? Bushe ni co balilekele ukutemwa isubilo lya kwikala pe sonde? Nelyo bushe ni co balesakamikwa sana nangu limbi baleba sana na mafya? Bushe ni co batendeke ukutontonkanya ukuti ukwikala pe sonde kukalatendwisha? Awe, te fyalengele. Yehova abomfeshe umupashi wakwe uwa mushilo pa kwalula isubilo batemenwe sana ilya kwikala pe sonde, na pa kwalula ifyo batontonkanyapo.

12. Ukulingana ne fyaba pali 1 Petro 1:3, 4, bushe abasubwa bomfwa shani pe subilo lya kwikala ku muulu?

¹² Umuntu nga asubwa, nalimo kuti alamona kwati tafikilepo ukuba pa bakateka na Yesu ku muulu. Lelo tatwishika nangu panono ukuti Yehova alimusala ukuya ku muulu. Alaba sana ne nsansa kabili alatasha nga atontonkanya pa fyo akalaikala ku muulu.—Belengeni 1 Petro 1:3, 4.

13. Bushe Abena Kristu basubwa bomfwa shani ukwikala pe sonde?

¹³ Bushe ifi abasubwa bakwata isubilo lya kuya ku muulu, cipilibula ukuti balafwaya ukufwa? Umutumwa Paulo alyaswike ici cipusho. Alingenye umubili wa basubwa kwi tenti. Atile: “Na kuba, ifwe fwe bali muli ili tenti tulateta, pa mulandu wa kuti twalifinininwa; te pa kuti tulefwaya ukulifuula iyo, lelo tulefwaya ukufwalako lilya limbi, pa kutila pali ili tenti ilifwa pakapyane ilya mweo.” (2 Kor. 5:4) Aba Abena Kristu tabatendwa ukwikala pe sonde kabili tabafwaya ukufwa bwangu. Lelo balatemwa ukwikala pe sonde, kabili balafwaya ukulabombela Yehova cila bushiku pamo ne ndupwa shabo ne fibusa. Na lyo line, lyonse balatontonkanya pe subilo ilisuma ilyo bakwata ilya kuya ku muulu.—1 Kor. 15:53; 2 Pet. 1:4; 1 Yoh. 3:2, 3; Ukus. 20:6.

14. Finshi fimo ifishilanga ukuti umuntu alisubwa no mupashi wa mushilo?

¹⁴ Nalimo mulatwishika nga ca kuti mwalisubwa no mupashi wa mushilo. Nga ca kuti mulatwishika, mulingile ukutontonkanya pali aya amepusho: Bushe mulafwaisha ukubombesha mu mulimo wa kwa Yehova? Bushe mumona kwati mulabombesha mu mulimo wa kubila imbila nsuma? Bushe mulatemwa ukuisambilisha Baibolo no kusambilila “ifyashika ifya kwa Lesa”? (1 Kor. 2:10) Bushe mumona ukuti Yehova alamwafwa ukusambilisha abantu abengi icine? Bushe mumona ukuti mulingile fye ukusambilisha abantu pali Yehova? Bushe kwaliba ifilanga ukuti Yehova alamwafwa mu fintu ifingi? Nga mwaasuka ukuti ee kuli aya amepusho, bushe ninshi Lesa alimusala ukuya ku muulu? Awe, nakalya. Mulandu nshi twalandile ifi? Pantu ababomfi ba kwa Lesa bonse kuti baasuka ukuti ee kuli aya mepusho, nampo nga balisubwa nelyo iyo. Na kabili, Yehova kuti abomfya umupashi wa mushilo pa kwafwa ababomfi bakwe ukucita ifi twalandapo, nampo  nga bakwata isubilo lya kuya ku muulu nelyo iyo. Na kuba, nga ca kuti mulatwishika nampo nga Lesa alimusala nelyo iyo, ninshi tamwasubwa. Abo Yehova asala tabatwishika nangu panono ukuti bakaya ku muulu! Balishininkisha!

15. Twaishiba shani ukuti te bonse abapokelela umupashi wa kwa Lesa abo asala ukuya ku muulu?

¹⁵ Baibolo yalilanda pa baume abengi abali ne citetekelo abapokelele umupashi wa mushilo, lelo abashakwete isubilo lya kuya ku muulu. Davidi aletungululwa no mupashi wa mushilo. (1 Sam. 16:13) Umupashi wa mushilo walimwafwile ukwishiba ifingi pali Yehova, kabili walimwafwile no kulembako Baibolo. (Marko 12:36) Na lyo line, umutumwa Petro alandile ukuti Davidi “taninine mu muulu.” (Imil. 2:34) Yohane Kabatisha na o aali no “mupashi wa mushilo.” (Luka 1:13-16) Yesu alandile ukuti tapaali uwacilile Yohane. Lelo alandile no kuti Yohane taali pa bakateka nankwe mu Bufumu bwa ku muulu. (Mat. 11:10, 11) Yehova alibomfeshe umupashi wakwe uwa mushilo pa kulenga aba baume ukucita ifintu ifikalamba, lelo taubomfeshe ukubasala ukuti bakateke na Yesu ku muulu. Bushe ici cilepilibula ukuti aba baume tabali ne cishinka sana nga filya abasubwa baba? Awe. Cipilibula fye ukuti Yehova akabuusha aba baume pa kuti bakekale mu Paradaise pano isonde.—Yoh. 5:28, 29; Imil. 24:15.

16. Lisubilo nshi ababomfi ba kwa Lesa abengi muno nshiku bakwata?

¹⁶ Ababomfi ba kwa Lesa abengi muno nshiku, tabakwata isubilo lya kuya ku muulu. Benekela ukwisaikala pano isonde ilyo Ubufumu bwa kwa Lesa bukalateka, nga filya fine Abrahamu, Sara, Davidi, Yohane Kabatisha, na baume na banakashi abengi abo Baibolo yalandapo baleenekela.—Heb. 11:10.

17. Mepusho nshi tukasuka mu cipande cikonkelepo?

¹⁷ Apo na muno nshiku mwine abasubwa epo baba, kuti twakwata amepusho na yambi pa basubwa. (Ukus. 12:17) Ku ca kumwenako, bushe umuntu uwasubwa afwile ukuba shani? Nga ca kuti uwaba mu cilonganino mwaba atendeka ukulya umukate no kunwa umwangashi pa Cibukisho, bushe mulingile ukulamumona shani? Inga nga ca kuti impendwa ya balanda ukuti balisubwa ilekulilako, bushe mulingile ukusakamikwa? Tukasuka aya mepusho mu cipande cikonkelepo.