1-2. ?Wanem i hapen long dei blong Pentekos long yia 33?

TRAEM tingbaot samting we i hapen long Jerusalem, long dei blong Pentekos long yia 33. Hemia Sande moning, mo 120 disaepol oli joen long rum antap long wan haos. (Wok 1:13-15; 2:1) Sam dei bifo, Jisas i talem long olgeta se oli mas wet long Jerusalem, blong oli kasem wan spesel presen. (Wok 1:4, 5) ?Wanem i hapen long taem ya?

² “Wantaem nomo, i gat wan bigfala noes i kamaot long heven we i olsem win we i blu strong.” Noes ya i kasem olgeta ples long haos ya. Nao samting olsem “laet blong kandel” i kamaot antap long hed blong ol disaepol, mo “tabu spirit i kam fulap long olgeta.” (Wok 2:2-4) Jehova i yusum spesel fasin ya blong putum tabu spirit long grup ya. (Wok 1:8) Olgeta ya, oli ol faswan we hem i makemaot wetem tabu spirit, * nao oli gat hop blong rul wetem Jisas long heven.

3. ?From wanem i klia long olgeta long Pentekos se God i makemaot olgeta?

³ Sipos yu yu wan long ol disaepol ya, bambae yu no save fogetem samting we i hapen long dei ya. !Wan samting olsem  laet blong kandel i kam sidaon antap long hed blong yu, mo yu stat blong toktok long narafala lanwis! (Wok 2:5-12) Bambae i klia gud long tingting blong yu se tabu spirit i kamdaon long yu. ?Be God i yusum wan spesel fasin olsem blong makemaot evri tabu Kristin? ?Mo hem i makemaot evriwan long sem taem long laef blong olgeta? Nogat. ?Olsem wanem yumi save samting ya?

4. Long taem bifo, ?God i makemaot ol tabu Kristin long sem taem long laef blong olgeta? Eksplenem.

⁴ Fastaem yumi tingbaot taem we God i makemaot ol man. I no ol 120 Kristin ya nomo we oli kasem tabu spirit long Pentekos long yia 33. Long sem dei, samwe long 3,000 narafala tu oli kasem tabu spirit. God i makemaot olgeta taem oli baptaes. (Wok 2:37, 38, 41) Be afta long taem ya, God i makemaot ol tabu Kristin long defdefren taem. Hem i makemaot sam man Sameria samtaem afta we oli baptaes. (Wok 8:14-17) Be i defren olgeta long Konilias mo ol man long haos blong hem. Jehova i makemaot olgeta bifo we oli baptaes.—Wok 10:44-48.

5. Folem 2 Korin 1:21, 22, ?olsem wanem God i makemaot ol man?

⁵ Naoia bambae yumi tokbaot olsem wanem God i makemaot ol man. Fastaem maet i had blong sam tabu Kristin oli kasem save se Jehova i jusumaot olgeta. Maet oli ting se, ‘?From wanem God i jusum mi?’ Be maet samfala oli no gat tingting olsem. Nating se i olsem wanem, aposol Pol i eksplenem samting we i hapen taem God i makemaot olgeta, i se: “Afta we yufala i bilif, God i yusum tabu spirit ya we hem i promes blong givim, blong putum mak * long yufala. Hem i yusum Kraes blong mekem olsem. Mo tabu spirit ya i wan saen blong soemaot se bambae yumi kasem ol samting we God i promes long yumi.” (Efes. 1:13, 14) Taswe, Jehova i yusum tabu spirit blong soemaot klia long ol Kristin ya se hem i jusumaot olgeta. Long fasin ya, tabu spirit i olsem “wan saen [o promes]” se long fiuja  bambae oli laef olwe long heven, i no long wol.—Ridim 2 Korin 1:21, 22.

6. ?Ol tabu Kristin oli mas mekem wanem blong kasem praes long heven?

⁶ Taem God i makemaot wan Kristin, ?hemia i min se hem i sua blong go long heven? Nogat. Hem i sua nomo se God i jusumaot hem. Be hem i no mas fogetem advaes ya se: “Ol brata, yufala i mas traehad moa blong holemtaet blesing ya we God i jusumaot yufala mo i singaot yufala, from we sipos yufala i gohed blong mekem ol fasin ya, bambae yufala i no save foldaon samtaem.” (2 Pita 1:10) Taswe, nating se God i jusumaot o singaot wan Kristin blong i go long heven, be blong kasem praes ya, hem i mas holemstrong long God.—Fil. 3:12-14; Hib. 3:1; Rev. 2:10.

7. ?Olsem wanem ol tabu Kristin oli save se God i singaot olgeta?

⁷ ?Be olsem wanem man i save se God i makemaot hem blong i go long heven? Yumi faenem ansa blong kwestin ya long ol tok we Pol i raetem long ol Kristin long Rom, we God i ‘singaot olgeta blong oli kam ol tabu man.’ Hem i talem se: “Spirit blong God i no mekem yufala i kam slef nao yufala i fraet bakegen, nogat. God i givim spirit ya, blong hem i adoptem yufala, nao yufala i kam ol pikinini blong hem. Mo spirit ya i mekem we yumi singaot strong se: “!Aba, Papa!” Spirit blong God i soemaot klia long yumi, se yumi pikinini blong God.” (Rom 1:7; 8:15, 16) Taswe God i yusum tabu spirit blong mekem i klia long ol tabu Kristin, se hem i singaot olgeta blong oli go long heven.—1 Tes. 2:12.

8. ?Olsem wanem 1 Jon 2:20, 27 i soemaot se ol tabu Kristin oli no nidim narafala blong talem long olgeta se God i makemaot olgeta?

⁸ Ol Kristin we Jehova i singaot olgeta blong oli go long heven, oli no gat tu tingting long saed ya. Jehova i mekem hop ya i klia gud long tingting mo hat blong olgeta. (Ridim 1 Jon 2:20, 27.) I tru, oli mas kasem tijing blong Jehova long kongregesen, olsem ol narafala Kristin. Be oli no nidim narafala blong talem long olgeta se God i makemaot olgeta, nogat. !Jehova i yusum paoa we i strong moa i bitim ol narafala paoa long heven mo wol, hemia tabu spirit, blong mekem i klia gud long olgeta se hem i makemaot olgeta!

9. Folem Efesas 1:18, ?God i jenisim wanem, taem hem i makemaot wan man long tabu spirit?

⁹ Maet i had blong plante man we God i no makemaot olgeta, oli kasem save olsem wanem God i makemaot ol tabu Kristin. God i wokem ol man blong oli laef olwe long wol, i no long heven. (Jen. 1:28; Sam 37:29) Be hem i jusumaot samfala blong oli laef long heven. Taswe, taem hem i makemaot olgeta long tabu spirit, hem i jenisim hop mo tingting blong olgeta, nao oli wantem laef long heven.—Ridim Efesas 1:18.

10. ?I minim wanem se man i “bon bakegen”? (Yu luk futnot tu.)

¹⁰ Taem Jehova i makemaot ol tabu Kristin, oli “bon bakegen.” * Jisas i soemaot se i had blong oli eksplenem long wan man we God i no makemaot hem, se oli harem olsem wanem taem oli “bon bakegen.”—Jon 3:3-8.

11. Eksplenem olsem wanem tingting i jenis taem God i makemaot wan man long tabu spirit.

¹¹ ?Olsem wanem tingting blong ol Kristin i jenis taem God i makemaot olgeta? Bifo, ol Kristin ya oli gat hop blong laef olwe long wol. Oli wantem tumas blong luk taem ya we  Jehova bambae i finisim ol nogud fasin mo i mekem wol ya i kam paradaes. Oli tingbaot taem ya we bambae oli welkamem bak wan famle o fren we i ded. Be afta we God i makemaot olgeta long tabu spirit, tingting blong olgeta i jenis. ?From wanem? I no from we oli no moa glad long hop blong laef long wol ya. Mo i no from we oli kasem sam trabol o wari nao tingting blong olgeta i jenis. Oli no ting se bambae oli les blong laef olwe long wol. Be Jehova i yusum tabu spirit blong jenisim tingting mo hop ya we fastaem oli glad long hem.

12. Folem 1 Pita 1:3, 4, ?wanem tingting blong ol tabu Kristin long hop we oli gat?

¹² Samfala we God i makemaot olgeta oli harem se oli no naf blong kasem bigfala blesing olsem. Be hemia i no min se oli gat tu tingting se Jehova i jusumaot olgeta o nogat. Taem oli tingbaot hop we oli gat long fiuja, oli glad bitim mak mo oli talem bigfala tangkiu long Jehova.—Ridim 1 Pita 1:3, 4.

13. ?Wanem tingting blong ol tabu Kristin long laef blong olgeta long wol ya?

¹³ ?Hemia i min se ol tabu Kristin oli wantem ded nomo? Aposol Pol i ansarem kwestin ya. Hem i tokbaot bodi blong olgeta olsem wan haos tapolen, i se: “Yumi we yumi stap long haos tapolen ya, yumi stap krae mo tingting blong yumi i hevi tumas, i no from we yumi wantem tekemaot haos tapolen ya we i olsem klos blong yumi, be yumi wantem werem haos ya we i blong heven, blong mekem se laef i save tekem ples blong samting we i save ded.” (2 Kor. 5:4) Ol tabu Kristin oli no les long laef, olsem se oli wantem ded hareap. Oli harem gud long laef, mo oli wantem yusum evri dei blong wosipim Jehova wetem ol famle mo ol fren blong olgeta. Be long evri samting we oli mekem, tingting blong olgeta i stap oltaem long nambawan hop we oli gat long fiuja.—1 Kor. 15:53; 2 Pita 1:4; 1 Jon 3:2, 3; Rev. 20:6.

14. Sipos yu wok strong mo yu luk se Jehova i givhan long yu, ?hemia i min se God i makemaot yu?

¹⁴ Maet yu stap tingbaot sipos Jehova i makemaot yu. Traem ansa long ol impoten kwestin ya: ?Yu wantem tumas blong mekem wok blong Jehova? ?Yu stap wok strong long wok blong prij? ?Yu laekem blong stadi Baebol mo kasem ‘ol save blong God we man i no save faenemaot’? (1 Kor. 2:10) ?Yu harem se Jehova i givim plante blesing long yu long wok blong prij? ?Yu harem se i wok blong yu blong halpem ol narafala blong kasem save long Jehova? ?Yu luksave se Jehova i givhan long yu long laef blong yu? Sipos yu ansa ‘yes’ long ol kwestin ya, hemia i no min se God i makemaot yu blong yu go long heven. ?From wanem? From we evri man blong God i save gat ol fasin ya, mo Jehova i save yusum tabu spirit blong givim paoa long eniwan long olgeta, nating se oli gat hop blong laef long heven o long wol. Blong talem stret, sipos yu no sua se God i makemaot yu, hemia i jes soemaot nao se hem i no makemaot yu. !Ol Kristin we Jehova i singaot olgeta, oli no gat tu tingting! !Oli sua gud!

15. Taem tabu spirit i lidim wan man, ?hemia i min se God i jusumaot hem blong i go long heven?

¹⁵ Baebol i tokbaot plante man blong bilif we oli gat tabu spirit, be oli no gat hop blong go long heven. Deved i wan man we tabu spirit i lidim hem. (1 Saml. 16:13) Tabu spirit i givhan long hem blong i kasem save long ol dip trutok blong Jehova, mo i lidim hem blong i raetem sam haf blong Baebol. (Mak 12:36) Be aposol Pita i talem se Deved i “no go antap long heven.” (Wok 2:34) ‘Tabu spirit i fulap’ tu long Jon we i baptaesem ol  man. (Luk 1:13-16) Mo Jisas i talem se i no gat wan man i bon we i hae moa long Jon. Be hem i talem tu se Jon bambae i no go long Kingdom blong heven. (Mat. 11:10, 11) Jehova i yusum tabu spirit blong givim paoa long ol man ya blong oli mekem ol bigbigfala wok, be hem i no yusum spirit ya blong jusumaot olgeta blong oli go long heven. ?Hemia i min se oli no gat strong bilif, olsem ol man we God i jusumaot blong oli go rul long heven? I no minim olsem, be i minim nomo se Jehova bambae i mekem olgeta oli laef bakegen long Paradaes long wol.—Jon 5:28, 29; Wok 24:15.

16. ?Wanem blesing we bighaf blong ol man blong God tede oli wet long hem?

¹⁶ Bighaf blong ol man blong God tede, oli no gat hop blong laef long heven. Oli stap wet blong kasem laef long wol ya aninit long rul blong Kingdom blong God, olsem Ebraham, Sera, Deved, Jon we i baptaesem ol man, mo plante narafala man mo woman we Baebol i tokbaot.—Hib. 11:10.

17. ?Wanem ol kwestin we bambae yumi tokbaot long nekis stadi?

¹⁷ I gat sam tabu Kristin we oli stap yet wetem yumi long wol. (Rev. 12:17) Taswe maet yu gat sam kwestin olsem: ?Ol tabu Kristin oli mas gat wanem tingting mo fasin? Sipos wan long kongregesen i stat blong kakae bred mo dring waen long Memoriol, ?yu mas mekem olsem wanem long hem? ?Mo yu mas wari sipos namba blong olgeta we oli talem se God i makemaot olgeta i go antap? Bambae yumi tokbaot ol kwestin ya long nekis stadi.