1-2. Aha do na masa bani ari Pentakosta tahun 33 M?

BANI ari Pentakosta tahun 33 M, martumpu ma 120 susian ni Jesus i ruang pardatas ni sada rumah i Jerusalem. Ari Minggu do sanggah ai. (Lah. 1:13-15; 2:1) Piga-piga ari paima ai domma ipatugah Jesus ase ulang laho sidea hun Jerusalem, halani dong sibere-bere na laho ibere bani sidea. (Lah. 1:4, 5) Aha do na masa sanggah ai?

² “Jadi roh ma sompong sora hun langit songon parombus ni logou.” Gabe ganup ma sidea na i rumah ai boi mambogei ai. Dobkonsi ai taridah ma dong songon “dilah ni apuy” sogop bani sidea, anjaha “gabe gok tonduy na pansing” ma sidea halani ai. (Lah. 2:2-4) Marhitei halongangan ai ma Jahowa mambere tonduy na pansing bani sidea. (Lah. 1:8) Sidea ma kalompok na parlobei na iminaki tonduy na pansing * na mandapot pangarapan mamarentah i surga.

3. Bani ari Pentakosta, mase pos tumang uhurni sidea anggo sidea domma iminaki?

³ Bayangkon ma ham dihut bani tumpuan ai, tontu lang tarlupahon ham ari ai. Ididah ham dong songon dilah ni apuy na sogop bamu, lanjar boi ma ham marbahasa na legan. (Lah. 2:5-12) Tontu, pos tumang ma uhurmu na dob iminaki do ham marhitei tonduy na pansing. Tapi, lang ganup halak sapari sonai carani iminaki. Anjaha  legan-legan do homa panorang ni sidea iminaki. Hunja ibotoh hita ai?

4. Bani abad na parlobei, ai sarupa do panorangni sidea iminaki? Patorang ma.

⁴ Ulas hita ma sadihari do sasada halak iminaki. Sasintongni sedo pitah na 120 halak ai dassa na iminaki marhitei tonduy na pansing, halani patarni dong hira-hira 3.000 halak na manjalo tonduy na pansing. Sanggah ididi sidea, bani ari ai do homa sidea iminaki marhitei tonduy na pansing. (Lah. 2:37, 38, 41) Tapi, piga-piga tahun dobkonsi ai lang ganup halak iminaki sanggah sidea ididi. Umpamani, halak Samaria iminaki dob piga-piga dokah sidea ididi. (Lah 8:14-17) Janah jarang do homa tarjadi songon si Kornelius pakon sarumahni na iminaki paima ididi.​—Lah. 10:44-48.

5. Domu bani 2 Korint 1:21, 22, aha do artini anggo sasada halak domma iminaki marhitei tonduy na pansing?

⁵ Ulas hita ma sonaha pangahap ni halak na iminaki marhitei tonduy na pansing. Ra do mungkahni lang porsaya sidea domma ipilih Naibata. Ra do nini uhurni, ‘Mase ahu ipilih?’ Ra do homa lang sonai pangahap ni halak na legan. Lang soal sonaha pangahap ni sidea, apostel Paulus mangkatahon, “Dob porsaya nasiam Bani, ilak * nasiam marhitei tonduy na pansing na pinarbagah-bagah in, ai ma sikoram [atap jaminan] ni siteanonta in.” (Ep. 1:13, 14) Jadi, marhitei tonduy na pansing ibahen Jahowa do ase sidea mambotoh anggo sidea domma ipilih Naibata. Songon “jaminan” do tonduy ai, na boi mambahen pos uhur ni sidea anggo sidea manggoluh sadokahni dokahni i surga sedo i tanoh on.​—Basa 2 Korint 1:21, 22.

6. Aha do na maningon ibahen halak na iminaki ase mandapot upahni?

⁶ Sanggah sasada halak iminaki ai domma pasti dapotsi upahni laho hu  surga? Lang. Tongon, porsaya do ia domma ipilih hu surga. Tapi, maningon idingat ia do podah on, “Nasiam sanina, lambin ringgasni ma nasiam patotapkon pandiloon-Ni ampa pamilihon-Ni bani nasiam, ai anggo ihorjahon nasiam in, seng ra be nasiam tompas.” (2 Ptr. 1:10) Jadi hassi pe ia domma ipilih laho hu surga, tapi maningon totap do ia setia ase boi mandapot upah ai.​—Pil. 3:12-14; Heb. 3:1; Pangk. 2:10.

7. Hunja do ibotoh sasada halak anggo ia domma tarpilih laho manggoluh hu surga?

⁷ Tapi hunja do ibotoh sasada halak anggo ia domma tarpilih laho hu surga? Balosni ai boi ibotoh hita humbani surat ni si Paulus hubani halak i kuria Rom. Nini do, “Ai seng ijalo nasiam tonduy jabolon ase mangulaki biar, tapi tonduy anak do ijalo nasiam; marhitei in do hita mardilo: ‘Abba, Ham Bapa!’ Tonduy in do manaksihon rap pakon tonduyta, paboa anak ni Naibata do hita.” (Rom 1:7; 8:15, 16) Jadi, tangkas ma marhitei tonduy na pansing do ibahen Jahowa ase pos uhurni anggo ia domma tarpilih laho manggoluh i surga.​—1 Tes. 2:12.

8. Domu bani 1 Johannes 2:20, 27, mase halak Kristen na iminaki lang porlu iakui halak na legan anggo ia domma iminaki?

⁸ Tangkas do ibahen Jahowa ibagas uhur ampa pingkiran ni sidea, anggo sidea domma tarpilih laho hu surga. (Basa 1 Johannes 2:20, 27.) Hassi pe sonai, tong do halak na iminaki ai porlu iajari Jahowa i kuria songon sanina na legan. Tapi lang porlu ia iakui sanina botou na legan anggo ia halak na iminaki. Domma igunahon Jahowa tonduy na pansing, ai ma gogoh-Ni na sibanggalan laho paposkon uhurni anggo ia domma tarpilih hu surga.

9. Domu bani Epesus 1:18, dobkonsi sasada halak iminaki parubahan aha ma na iahapkon ia?

⁹ Bahat do sanina botou lang mangarusi sonaha pangahapni sasada halak na iminaki, halani sidea sedo halak na iminaki. Mungkahni i tanoh on do itompa Naibata jolma manggoluh sadokah ni dokahni, sedo i surga. (1 Mus. 1:28; Ps. 37:29) Tapi, dong do piga-piga halak na ipilih Jahowa laho manggoluh hu surga. Jadi sanggah iminaki Naibata halak ai, mintor iubah Ia ma pangarapan ampa cara marpingkirni. Halani ai marpangarapan hu surga ma ia.​—Basa Epesus 1:18.

10. Aha do artini ‘tubuh paduahalihon’? (Tonggor ma surat partoruh.)

¹⁰ Sanggah sasada halak iminaki, ihatahon ma ia ‘tubuh paduahalihon’. * Jesus mangajarhon sasada halak na lang ongga iminaki, lang mungkin mangarusi pangahap ni sasada halak na ‘itubuhkon use’ atap na “tubuh humbani tonduy”.​—Joh. 3:3-8.

11. Sonaha do cara marpingkir ni sasada halak gabe mubah dobkonsi ia iminaki?

¹¹ Sonaha do cara marpingkir ni sasada halak gabe mubah dobkonsi ia iminaki? Paima iminaki, mungkahni mangarap do ia ase manggoluh sadokah ni dokahni i tanoh on. Ipaima-ima ia do ganup parjahat iripaskon anjaha ibahen Jahowa tanoh on gabe paradeiso. Domma ibayangkon  ia laho mangalo-alo kaluarga atap hasomanni na dob ipapuho. Tapi dobkonsi iminaki, lang be sonai pangarapanni. Mase sonai? Ai lang be marosuh ia manggoluh i tanoh on? Sedo halani dong parsualan i tanoh on gabe mubah pangarapanni. Anjaha sedo iahap ia lang be martuah hagoluhan i tanoh on. Tapi, igunahon Jahowa do tonduy-Ni laho mangubah carani marpingkir ampa pangarapanni.

12. Domu bani 1 Petrus 1:3, 4, sonaha do pangahap ni halak na iminaki pasal pangarapanni?

¹² Dob sasada halak iminaki, ra do mungkahni lang sosok pangahapni ia mandapot ai. Tapi, pos do uhurni na ipilih Jahowa do ia laho hu surga. Malas do uhurni janah martarima kasih do ia halani pangarapanni ai.​—Basa 1 Petrus 1:3, 4.

13. Sonaha do pangahap ni halak na iminaki pasal hagoluhan i tanoh on?

¹³ Tapi halani pangarapan ai, ai gabe sihol do sidea ase podas matei? Balosni ai boi ibotoh hita humbani na ihatahon si Paulus. Isarupahon ia do angkula ni jolma pakon parlampolampoan atap kemah. Nini do, “Ai sanggah i parlampolampoan on hanami, marhoih do hanami anjaha boratan, halani sihol uhurnami, ase ulang itanggali, tapi isolukkon ma lah, ase ibondut hagoluhan ai na ra matei on.” (2 Kor. 5:4) Jadi, sedo artini sihol sidea ase podas matei. Tapi malas do uhur ni sidea boi mangidangi Naibata rap pakon hasoman ampa kaluargani i tanoh on. Lang soal aha pe na ihorjahon sidea i tanoh on, tongtong do idingat sidea pangarapan ni sidea ai.​—1 Kor. 15:53; 2 Ptr. 1:4; 1 Joh. 3:2, 3; Pangk. 20:6.

14. Anggo sasada halak ringgas mangidangi janah orot pakon Jahowa, ai do tanda anggo ia halak na iminaki?

¹⁴ Ra do sungkun-sungkun ibagas uhurmu ai halak na iminaki do ham atap lang. Anggo sonai, rimangi ma sungkun-sungkun on: Ai marosuh do ham mangkorjahon harosuh ni Naibata? Ai ringgas do ham marbarita? Ai marosuh do ham marlajar lambin bahat pasal Naibata? (1 Kor. 2:10) Ai bahat do hasil na madear na dapotmu ibagas pangidangion? Ai ponting tumang do iahap ham mangurupi halak na legan laho marlajar pasal Jahowa? Ai iahapkon ham do bahat tumang pangurupion-Ni hu bamu? Anggo eak balosmu bani ganup sungkun-sungkun ai, ai halak na iminaki do ham? Lang. Mase sonai? Halani ganupan do juakjuak ni Naibata ongga mangahapkon aha na isungkun bani sungkun-sungkun nongkan ai. Anjaha Jahowa pe boi do mambere tonduy-Ni hubani ganup juakjuak-Ni laho mangurupi sidea lang soal aha pe pangarapanni. Jadi, anggo bungbang ope ham pasal halak na iminaki do ham atap lang, on patuduhkon anggo ham lang halak na iminaki. Sasintongni anggo halak na iminaki Jahowa, pos do uhurni anggo ia domma ipilih. Lang dong otik pe bungbang ibagas uhurni.

15. Hunja do ibotoh hita lang ganup sidea na mandapot tonduy na pansing ai laho hu surga?

¹⁵ Ibagas Bibel bahat do contoh-contoh na patuduhkon pasal dalahi na mandapot tonduy na pansing, hassi pe lang marpangarapan hu surga sidea. Umpamani, si Daud ihatahon do anggo ia itogu-togu tonduy na pansing.  (1 Sam. 16:13) Halani iurupi tonduy na pansing boi ma ia mangarusi paruhuran ni Naibata, anjaha boi homa gabe panurat ni Bibel. (Mrk. 12:36) Tapi, apostel Petrus mangkatahon anggo si Daud ‘lang naik hu nagori atas’. (Lah. 2:34) Sonai homa si Johannes pandidi ihatahon “gokan ni tonduy na pansing” do ia. (Luk. 1:13-16) Anjaha ihatahon Jesus do homa lang dong na sibanggalan marimbangkon si Johannes. Hassi pe sonai ihatahon Jesus use anggo si Johannes ai lang hu surga. (Mat. 11:10, 11) Tongon, ibere Jahowa do tonduy-Ni bani piga-piga dalahi ai ase boi mangkorjahon harosuh-Ni. Tapi lang igunahon Jahowa tonduy ai laho mamilih sidea hu surga. Ai na hurang do haporsayaon ni sidea ase lang ipilih hu surga? Lang sonai. Sasintongni, laho ipapuho Jahowa do sidea ase manggoluh i Paradeiso i tanoh on.​—Joh. 5:28, 29; Lah. 24:15.

16. Pangarapan aha do na ipaima-ima bahatan juakjuak ni Naibata?

¹⁶ Bahatan do juakjuak ni Naibata na marpangarapan manggoluh i tanoh on, sedo i surga. Umpamani, dong si Abraham, si Sarah, si Daud, si Johannes pandidi, ampa na leganni. Mangarap do sidea manggoluh i tanoh on sanggah mamarentah holi Harajaon ni Naibata.​—Heb. 11:10.

17. Bani artikel na mangihut, sungkun-sungkun aha ma na laho iulas hita?

¹⁷ Halani dong ope halak na iminaki manggoluh i tanoh on, ra do adong ope sungkun-sungkunta. (Pangk. 12:17) Umpamani, sonaha ma pangahap ni sidea halani iminaki ai sidea? Anggo dong halak i kurianta na mangankon ruti ampa minum anggur sanggah acara Pardingatan, sonaha ma pangahapta bani sidea? Halani lambin tambah bilanganni na mangankon ruti ampa minum anggur, ai porlu do haru uhurta? Ulas hita ma balosni ai bani artikel na mangihut.