1-2. Kejadin luar biasa kai si terjadi bas Pentakosta 33 Masehi?

SANGA wari Minggu erpagi-pagi tahun 33 Masehi i Jerusalem, pulung kira-kira 120 murid i bas sada rumah i datas loteng. Paksa si e wari Pentakosta. (Perb. 1:13-15; 2:1) Piga-piga wari ope si e, iperentahken Jesus kalak e gelah tetap i Jerusalem perban ialoken kalak e kari hadiah si istimewa. (Perb. 1:4, 5) Kai kin si nandangi terjadi?

² Paksa si e, “rempet terbegi sora arah langit nari bagi sora angin si meter.” Sora e ndemi rumah e. Kenca si e, lit si “tempa-tempa bagi dilah api” cinep i das takal murid-murid, jenari kalak e “dem alu kesah si badia.” (Perb. 2:2-4) Alu cara si luar biasa e, ibereken Jahwe kesah si badia man murid-murid e. (Perb. 1:8) Kalak e me si tangtangna ipilih Jahwe alu kesah si badia * janah ibereken arapen guna merentah ras Jesus i surga.

3. Engkai maka murid-murid bas wari Pentakosta e la sangsi maka kalak e nggo ipilih alu kesah si badia?

³ Bayangken ikut kam ras murid-murid e sanga pulung bas loteng. Pasti la terlupakenndu kejadin e. Lit si tempa-tempa bagi dilah api cinep i das takalndu, janah mulai kam ngerana bas bahasa si deban! (Perb. 2:5-12) Pasti la kam sangsi maka kam nggo ipilih alu kesah si badia. Tapi, seri nge lalap cara si iban Jahwe i bas milih kalak alu kesah si badia? Lang. Janari siteh?

4. Kerina nge kalak Kristen bas abad si pertama ipilih alu kesah si badia sanga kalak e iperidiken? Jelasken.

 ⁴ Gundari, mari sibahas ndigan kin sekalak jelma mungkin ipilih alu kesah si badia. Bas Pentakosta tahun 33 Masehi, si ipilih alu kesah si badia labo ngenca 120 kalak Kristen si lit i das loteng. Bas wari e, lit ka kira-kira 3.000 kalak si deban si ipilih alu kesah si badia bagi si ijanjiken Jesus. Kalak e ipilih sanga kalak e iperidiken. (Perb. 2:37, 38, 41) Tapi bas tahun-tahun si reh, labo kerina kalak Kristen ipilih sanga kalak e iperidiken. Kalak Samaria ipilih piga-piga waktu kenca kalak e iperidiken. (Perb. 8:14-17) Selain si e, Kornelius ras kerina kalak si lit bas rumahna ipilih alu kesah si badia ope lenga pe kalak e iperidiken. Enda la bagi biasana janah man kalak e ngenca terjadi.​—Perb. 10:44-48.

5. Menurut 2 Korinti 1:21, 22, kai nge si igejapken kalak si ipilih alu kesah si badia?

⁵ Gundari sibahas ka kai nge si igejapken kalak sanga ia ipilih alu kesah si badia. Piga-piga kalak si nggo ipilih e banci saja tangtangna la kapna ia cocok ipilih Dibata. Banci saja tersungkun-sungkun kalak e, ‘Engkai maka aku si ipilih Dibata?’ Si debanna banci saja la bage. La soal kai si igejapken kalak e, ijelasken Rasul Paulus uga carana kalak e kerina ipilih, nina, “Kenca kena tek, ibereken me tanda man kena erkelangken Kristus alu meterai * eme kesah si badia si nggo ijanjiken. Kesah si badia e jadi jaminen maka sialoken me warisen si nggo ijanjiken Dibata.” (Ep. 1:13, 14) Emaka, igunaken Jahwe kesah si badia guna mbuktiken man kalak Kristen e maka kalak e nggo ipilihNa. Alu bage, kesah si badia jadi “jaminen [tanda jadi ntah pe janji]” gelah kalak e tek maka kalak e nggeluh pagi rasa lalap i surga, labo i doni.​—Baca 2 Korinti 1:21, 22.

6. Kai si arus terus ilakoken kalak Kristen si nggo ipilih gelah banci ia lawes ku surga?

 ⁶ Adi lit kalak Kristen si nggo ipilih, pasti nge ia ku surga? Lenga tentu. Memang tek ia maka ia ipilih ku surga. Tapi, arus ingetna nasehat enda, “O turang senina, kena si nggo idilo ras si ipilih Dibata, usahakenlah asa ngasup kena gelah tetap setia. Adi terus ilakoken kena si enda, kena labo pernah ndabuh.” (2 Pet. 1:10) Emaka, amin gia lit kalak Kristen si nggo ipilih ntah pe idilo guna lawes ku surga, tapi adi la ia tetap setia, labo ialokenna upahna.​—Pil. 3:12-14; Heb. 3:1; Ket. 2:10.

7. Janari nge iteh kalak si nggo ipilih e ia iundang ku surga?

⁷ Tapi, janari nge iteh sekalak jelma maka ia iundang ku surga? Banci siteh jawapenna arah kata-kata Paulus man kalak i Roma “si ipilih jadi kalak si badia.” Nina man kalak e, “Kesah si badia labo erban kita jadi budak ntah pe lanai erban kita mbiar, tapi arah kesah si badia e, kita iangkat jadi Anak Dibata janah tersuruh ukurta ngataken, “Abba, Bapak!” Kesah si badia ikut ersaksi ras pusuhta maka kita anak-anak Dibata.” (Rom. 1:7; 8:15, 16) Emaka, alu kesah si badia, ibuktiken Dibata man kalak si nggo ipilihNa maka kalak e iundang ku surga.​—1 Tes. 2:12.

8. Menurut 1 Johanes 2:20, 27, ngkai maka kalak Kristen si nggo ipilih la perlu bukti arah kalak si deban maka ia nggo ipilih kesah si badia?

⁸ Ipastiken Jahwe maka kalak si ngaloken undangenNa e la sangsi maka ia lawes ku surga. (Baca 1 Johanes 2:20, 27.) Tentu saja, kalak Kristen si nggo ipilih enda pe perlu denga tetap iajar Jahwe arah runggun, bali bagi turang senina si deban. Tapi kalak e la perlu bukti arah kalak si deban maka ia nggo ipilih kesah si badia. Igunaken Jahwe kuasaNa si luar biasa bas alam semesta enda eme kesah si badia guna mbuktiken maka kalak e nggo ipilih!

9. Menurut Epesus 1:18, kai si terjadi man sekalak jelma sanga ia ipilih alu kesah si badia?

⁹ Enterem umat Dibata si gundari banci saja mesera iakapna ngangkai kai si igejapken kalak sanga ipilih Dibata. Enda wajar, perban kalak e lenga pernah ipilih Dibata alu kesah si badia. Iciptaken Dibata manusia gelah nggeluh si rasa lalap i doni, labo i surga. (Kej. 1:28; Msm. 37:29) Tapi, nggo ipilih Jahwe piga-piga kalak guna nggeluh i surga. Emaka, sanga ipilih Dibata kalak e, iubahNa arapen ras cara kalak e rukur, alu bage ngarap kel kalak e nggeluh pagi i surga.​—Baca Epesus 1:18.

10. Kai ertina “lahir mulihi”? (Nen ka cataten i teruh.)

¹⁰ Sanga lit kalak Kristen si ipilih alu kesah si badia, kalak e “lahir mulihi.” * Ijelasken Jesus ka maka kalak si lenga pernah ipilih alu kesah si badia la banci tuhu-tuhu iangkaina kai si igejapken kalak si “lahir mulihi,” ntah pe “ilahirken arah kesah si badia.”​—Joh. 3:3-8.

11. Sanga lit kalak si ipilih alu kesah si badia, perubahen kai nge si terjadi bas carana rukur?

¹¹ Sanga lit kalak Kristen ipilih alu kesah si badia, perubahen kai nge si terjadi bas carana rukur? Ope lenga kalak e ipilih Jahwe, arapen kalak e nggeluh rasa lalap i doni. Ngarap kel kalak e gelah  ikernepken Jahwe kerina kejahaten janah ibanNa doni enda jadi pardis. Banci saja ibayangkenna ka ialo-alona keluargana ntah pe temanna si nggo mate. Tapi kenca kalak e ipilih Jahwe, mulai me berubah carana rukur. Engkai? Perban mberatsa nge masalahna maka lanai ia merhat nggeluh rasa lalap i doni? Ntah perban rempet nge bosan iakapna adi nggeluh rasa lalap pagi i doni? Lang. Tapi, berubah cara kalak e rukur bage pe arapenna perban iubah Jahwe alu kesah si badia.

12. Menurut 1 Petrus 1:3, 4, uga nge perasan kalak Kristen si nggo ipilih ku surga kerna arapenna e?

¹² Kalak si nggo ipilih Dibata banci saja la kapna ia cocok ngaloken kesempaten si istimewa e. Tapi sitik pe labo ia sangsi maka ia nggo ipilih Jahwe. Meriah kel ukurna janah ngata bujur kel ia sanga iukurina arapen nggeluh i surga.​—Baca 1 Petrus 1:3, 4.

13. Uga nge perasan kalak Kristen si nggo ipilih ku surga kerna kegeluhenna i doni?

¹³ Adi bage, payo kin enda ertina kalak Kristen si nggo ipilih ndai merhat mate? Perdiateken kai si ikataken Rasul Paulus. Ibandingkenna daging kalak e ras sada kemah, janah nina, ‘Situhuna, tangis teriluh kel kita janah berat kel siakap sanga tading i bas kemah enda. Labo ateta nadingken kemah enda, tapi sialoken ateta ingan tading si lit i surga, gelah daging si banci mate igantiken alu kegeluhen si rasa lalap.’ (2 Kor. 5:4) Emaka, kalak Kristen si nggo ipilih ndai labo ia bosan nggeluh i doni janah labo kurang ter kapna mate. Tapi meriah kel iakap kalak e nggeluh i doni janah ilayanina atena Jahwe tiap wari ras keluargana bage pe teman-temanna. Amin gia bage, la soal kai pe si ilakoken kalak e gundari, lalap iukurina arapen si luar biasa si idatna pagi.​—1 Kor. 15:53; 2 Pet. 1:4; 1 Joh. 3:2, 3; Ket. 20:6.

14. Kai si la banci ijadiken bukti maka sekalak jelma nggo ipilih Dibata ku surga?

¹⁴ Banci saja tersungkun-sungkun kam, ‘Ipilih Jahwe nge aku guna nggeluh i surga?’ Adi bage, cuba ukurindu penungkunen-penungkunen si penting enda: Tuhu-tuhu nge kam semangat ngelakoken peraten Jahwe? Tuhu-tuhu nge kam semangat erberita? Meriah nge iakapndu mpelajari Pustaka bage pe “kepentaren Dibata si seh kel bagesna”? (1 Kor. 2:10) Igejapkenndu nge ibereken Jahwe hasil si luar biasa paksa kam erberita si meriah? Tuhu-tuhu nge iakapndu tanggung jawapndu nampati kalak si deban erlajar kerna Jahwe? Rusur nge igejapkenndu penampat Jahwe i bas geluhndu? Adi ue jawapndu i bas kerina penungkunen e, payo nge enda ertina kam nggo ipilih ku surga? Lang. Engkai maka lang? Perban kerina umat Dibata pe banci bage perasanna, la soal ia ipilih ku surga ntah lang. Janah arah kesah si badia, ibereken Jahwe gegeh si seri man kerina umatNa, la soal i ja arapenna. Situhuna, adi tersungkun-sungkun denga kam ntah pe sangsi kam ipilih ku surga ntah lang, enda ertina kam labo ipilih ku surga. Kerina kalak si ipilih Jahwe sitik pe la ia sangsi maka nggeluh ia pagi i surga! Tek kel kalak e!

15. Janari banci siteh maka labo kerina kalak si ngaloken kesah si badia ipilih ku surga?

¹⁵ I bas Pustaka si Badia, nterem kalak si erkiniteken ngaloken kesah si badia tapi arapenna labo ku surga. Salah sada  contohna eme Daud. Ibereken Dibata man bana kesah si badia. (1 Sam. 16:13) Isampati kesah si badia ia ngangkai terbagesen kerna Jahwe, janah isampati kesah si badia ka ia nulisken piga-piga bagin bas Pustaka. (Mrk. 12:36) Aminna pe bage, ikataken Rasul Petrus maka Daud “labo nangkih ku surga.” (Perb. 2:34) Contoh si debanna eme Johanes Peridiken. Ia “dem alu kesah si badia.” (Luk. 1:13-16) Ikataken Jesus maka la lit kalak si terbelinen asangken Johanes, tapi ikatakenna ka maka Johanes labo ikut merentah i surga. (Mat. 11:10, 11) Ibereken Jahwe kesah si badia man kalak e gelah ngasup ngelakoken perbahanen si luar biasa. Tapi, labo igunaken Jahwe kesah si badia e guna mereken arapen nggeluh i surga man kalak e. Engkai? Payo nge enda ertina kalak e kurang setia adi ibandingken ras kalak si ipilih guna merentah i surga? Lang. Tapi enda ertina ate Jahwe gelah kalak e ipekeke bas Pardis i doni. Enda me si jadi arapen kalak e.​—Joh. 5:28, 29; Perb. 24:15.

16. Kai nge arapen nterem umat Dibata si gundari?

¹⁶ Gundari, teremen umat Dibata i doni arapenna labo ku surga. Ngarap kel kalak e nggeluh i doni jadi rakyat Kerajan Dibata. E ka nge si jadi arapen Abraham, Sara, Daud, Johanes Peridiken, bage pe nterem dilaki ras diberu si debanna bas jaman Pustaka.​—Heb. 11:10.

17. Penungkunen kai saja si man bahasenta bas artikel seterusna?

¹⁷ Perban lit denga gundari kalak si ipilih e i tengah-tengahta, banci saja lit piga-piga penungkunenta. (Ket. 12:17) Misalna, uga arusna perasan kalak si nggo ipilih e kerna dirina? Adi bas runggunndu lit sekalak si mulai man roti ras minem anggur bas acara Peringeten, uga arusna perbahanenndu man bana? Janah, adi jumlah kalak si ngaku maka ia nggo ipilih ku surga terus reh tambahna, perlu nge kita kuatir? Ijawap kari penungkunen-penungkunen e bas artikel seterusna.