1-2. Étua jam avé é nga bobane Pentécôte ya mbu 33 É.J.?

BI NE Jérusalem mame tyé ya môse Sondô, mbu 33 É.J., môse Pentécôte. Bôte bebé 120 ba te sulan étune nda yôp. (Mam. 1:13-15; 2:1) Bone melu mvus, Yésus a nga jô be na be tabe Jérusalem a yange nyoñe ngum avale mvean. (Mam. 1:4, 5) Nde jé ja zu ñhe boban éyoñe ji?

² “Atemeteme na, beta éduñ a nga so yôp aval ane évuñulu ja vuñ ngu.” Éduñ éte ja mane yandane nda ése. Ane “ayem e . . .  funa’an ane nduan” é nga so yôp a zu betebe be minlô, bôte bese ve mane jaé a ‘mbamba nsisim ne lut.’ (Mam. 2:2-4) A zen éte, Yéhôva a nga ve be mbamba nsisime wé. (Mam. 1:8) Be mbe bôte b’ôsu be nga bo miñwo’an * a bi ndi nleme ya ke jôé a Yésus yôp.

3. Amu jé bôte be mbe étune nda yôp môse Pentécôte be nji be ve sôane na Yéhôva a nga tobe be na be bo miñwo’an?

³ Bi tame jô na ô mbe étune nda a beyé’é bevo’o Pentécôte ya mbu 33 É.J, éyoñ éte wo yene jôm é too ane ôyem é so’o yôp, é funa’ane nkaba’a nduan, é za’a betebe wo nlô; été été, ô taté na wo kobô minkobô mife. Ye  ô ne vuan avale jam ete nga? Bia sia ko na momo! (Mam. 2:5-12) Teke bisô biziñ bi ne ve beta zu wo nlem, wo tu’a yemelane na ô ne ñwo’an. Ve ye ba bese ba nyoñe mbamba nsisim ba bo miñwo’an avale da a éyoñe jia? Momo. Jé ja kate bia nalé?

4. Ye miñwo’ane mise ya ntete mimbu ôsu mi nga nyoñe mbamba nsisim éyoñe jia? Timi’in.

⁴ Bi tame taté zu kobô ajô ya éyoñ môt a bo ñwo’an. Sa ke ve bôte 120 étame mbe be nga nyoñe mbamba nsisim môse Pentécôte ya mbu 33 É.J. Môs ôte ôbien, éyoñe mon éyoñ a lôteya, mbamba nsisim a nga vebane be bôte befe bebé 3 000. Bôte bete be nga bo miñwo’an éyoñ be nga baptizôban. (Mam. 2:37, 38, 41) Ve mimbu mi nga tôé valé, sa ke miñwo’ane mise mmie mi nga nyoñe mbamba nsisim môse mi nga baptizôban. Besamaritain be nga nyoñe mbamba nsisim valé be dubaneya ôbe nté. (Mam. 8:14-17) Corneille ba nda bôte jé ki be be nga nyoñe mbamba nsisim ôsusua na ba duban, jam e mbe e ngenane teke tame bobane môs éziñ.​—Mam. 10:44-48.

5. Kalate 2 Becorinthien 1:21, 22 a liti na jé ja boban éyoñe Yéhôva a tobe môte na a bo ñwo’an?

⁵ Éyoñe ji, bi nto ve yene jame da boban éyoñe Yéhôva a ve môte mbamba nsisime wé na a bo ñwo’an. Miñwo’ane miziñe mi ne taté kame na Yéhôva a bele tobe zezé bôt ane be. Be wô’ô sili bebiene na: ‘Amu jé ma nnye Yéhôva a te top?’ Ve ba bevok ba sili ki bebiene nsili ôte. Kristen é ne ñwo’an é kusa sili ébiene nsili ôte nge momo, Paul a nga kôme timine miñwo’ane mise jame da kui be éyoñ a nga jô na: “Amu mi nga buni fe, ane mi nga feteban * a mbamba nsisime ya ntiñetan, nnye ate a ne mbômô ya ngabe jangan [nge ke éfase ya ngab  éli’i jangan, Mfefé Nkôñelan].” (Beép. 1:13, 14) Mejô mete ma liti na, a zene ya mbamba nsisime wé, Yéhôva a volô miñwo’ane na mi bo teke bi atañe biyebe a lat a nloone wop. Jôm ete nje Bible a jô na mbamba nsisim a ne “éfas [nge ke jôme Yéhôva a taté kalane be]” mfa’a ya yemete ngaka’a jé na, melu ma zu, a ye ve be ényiñe ya nnôm éto yôp, sa ke si va.​—Lañe’e 2 Becorinthien 1:21, 22.

6. Jé Kristen é ne ñwo’ane ja yiane bo asu na é bi ma’ane mé?

⁶ Éyoñ Kristen é nto ñwo’an, ye nalé a tinane na, be bete be sisi, a ye ke nyiñe yôbe nga? Ko ko. A yeme fo’o na a bili ndi nleme ya ke nyiñe yôp. Ve a nji yiane vuan abendé di: “A bobejañ, mi dañe’e veane ngule ya bo nloene wônan a ntobane na, bi bo été: amu na, nge mia [ke ôsu a] bo mam mete, mia ye bo teke ku.” (2 P. 1:10) Ajô te, to’o Yéhôva a te tobe wo na ô ke nyiñe yôp, wo ye bi ma’ane mete vengevenge ve wo wulu ba’aba’a a nye akekui zuk.​—Beph. 3:12-14; Beh. 3:1; Nli. 2:10.

7. Aval avé miñwo’an mia yeme na Zambe a tobeya mie?

⁷ Nde ñhe aval avé môt a yeme na a ne ñwo’an? Éyalane Paul a nga ve bôte ya Rome be mbe “mimfufup” ja volô na bi yalan nsili ôte tyi’ibi. A nga jô be na: “Mi nji nyoñe nsisime ya éto belo ane mia ye beta ko woñ; ve mi nga nyoñe nsisime ya éto bon, a ñwô ôte bia jô wô na, Abba Tate. Nsisim ôte ôbien [wo bo’olô a nsisime wongane] na, bi ne bone be Zambe.” (Bero. 1:7, Mfefé Nkôñelan; 8:15, 16) Ajô te, a zene ya mbamba nsisime wé, Yéhôva a liti miñwo’an ne sañesañe na a looneya mie na mi ke jôé a mone wé yôp.​—1 Bet. 2:12.

8. Aval avé kalate 1 Jean 2:20, 27 a liti na sa ke môte mfe nnye a yiane yemete na Kristen éziñ é ne ñwo’an?

⁸ Yéhôva a volô ba a te tobe na be bo teke bi bone biyebe biziñe nlem a lat a nloone wop. (Lañe’e 1 Jean 2:20, 27.) To’o nalé, miñwo’an mia yiane nyoñe miñye’elane Yéhôva a ve a zene ya akônda ane Bekristene bese bevok. Sa ke môte mfe nnye a yiane yemete na Kristen é ne ñwo’an. Yéhôva a belane mbamba nsisime wé, ngule jé é ne te ave’an, asu na miñwo’an mi yemelane ntet a ntete na a te tobe be.

9. Kalate Beéphesien 1:18 a liti na mintyéndane mivé mia kui Kristen ja bo ñwo’an?

⁹ Abui bebo bisaé be Yéhôva da kate wô’ô jame da boban éyoñ Yéhôva a tobe Kristen na é bo ñwo’an. Bi ne wô’ô be amu be be nji bo miñwo’an. Nde fe na, Zambe a nga té môta binam asu na a nyiñe nnôm éto si va, sa ke yôp. (Met. 1:28; Bs. 37:29) Ve Yéhôva a nga tobe bôte béziñ asu na be ke nyiñe yôp. Ajô te, éyoñ môt a bo ñwo’an, Yéhôva a tyendé ndi nleme jé a fatane mfasane jé aval é ne na nleme wé wo taté na wo dañe simesane ve mame ya yôp.​—Lañe’e Beéphésien 1:18.

10. Jé ja tinane na e “beta bialé”? (Fombô’ô ayemé.)

¹⁰ Éyoñe môt a bo ñwo’an, a “beta bialé,” nge ke na “a bialé asu ényiñe ya yôp.” * Paul a nga liti fe na be vo’o tu’a timine  môt a nji bo ñwo’an jam môt a ne ñwo’an nge ke môt a te “beta bialé” a wô’ôtan, amu a ye ke tu’a wôk.​—Jean 3:3-8.

11. Aval avé ôsimesan Kristen wo tyendé éyoñe a bo ñwo’an?

¹¹ Mintyéndane mivé mi wô’ô kui ényiñe Kristen ja bo ñwo’an? Ôsusua na Yéhôva a ve Kristene ndi nleme ya ke nyiñe yôp, Kristen éte é mbe é taté’é nyane ndi nleme jé ya nyiñe si va nnôm éto. A mbe ôjeja’a ya nyiñe môse Yéhôva a ye mane vaa mbia be bôte bese si a bo na é bo Paradis. Éko éziñ a mbe a simesa’an aval a ye nyoñe bôte bé be nga mane wu a mevak éyoñe ya ñwômane miñwuan. Ve môs a nga bo ñwo’an, a nga taté na a simesan aval afe. Amu jé? Ye amu ndi nleme ya nyiñe si va é nga taté na ja vindane nye nlem? Ye amu minju’u mi lôteya nye nkôñ, nge ke amu boo a nga fô’ôsane nye? Ye amu a kateya ényiñe ya si va? Téké’é, Yéhôva nnye a nga belane mbamba nsisime wé asu na A tyendé ôsimesan a ndi nleme Kristen éte é mbe é nye’e nya abuii.

12. Kalate 1 Pierre 1:3, 4 a liti na miñwo’an mia wô’ô ndi nleme jab aya?

¹² Môte Yéhôva a te tobe na a bo ñwo’an a ne wô’ôtane na a nji yiane mvom éte. Ve a vo’o bi biyebe ve nnute wua wua. Nleme wo jaé nye a mevak éyoñ ése a simesan ndi nleme jé ya ke nyiñe yôp.​—Lañe’e 1 Pierre 1:3, 4.

13. Aval avé miñwo’an mia yen ényiñe ya si va?

¹³ Ye bi ne ñhe jô na miñwo’an mia feb awu a ôkaé? Paul a nga yalane nsili ôte. A nga ve’e nyule jap a ébem a jô na: “Nde bia bôt bi too ébeme ji été, bia yône fo’o, amu bia wô’ô njuk, sa amu bia kômbô vaa nyôle nyô, ve na, bia kômbô jaé ntaban ôfe, nde jôm ja wu ja ye mineban ényiñ été.” (2 Bec. 5:4) Bekristene be ne miñwo’an be nji kômbô ji’a wu amu be ngbwe’eya a ényiñe ya si nyi. Ba wô’ô ényiñe mvaé a ba kômbô belane môs ôse ya ényiñe jap asu na be kañe Yéhôva fufulu a bibu’a ya menda me bôte map a bemvôé bap. Ve to’o nalé, nleme wob ô ne kom ése ve simesane beta ndi nleme woba ya melu ma zu.​—1 Bec. 15:53; 2 P. 1:4; 1 Jean 3:2, 3; Nli. 20:6.

14. Mam mevé me nji liti na Kristen é ne ñwo’an?

¹⁴ Ye wo sili womien nge ô ne ñwo’an nge momo? Nge é ne nalé, tuka’a fase mam ma: Ye wo bo nkômbane Yéhôva a ayôñ ése? Ye ô ne étua ayôñ ésaé nkañete? Ye ô ne avale Kristen da nye’e é vunu’u “bido’o bi mame ya Zambe” éyoñ ése? (1 Bec. 2:10) Ye wo yene ve ane Yéhôva a bo na ésaé nkañete jôé é wum abui bibuma? Ye wo nye’e ô volô’ô bôte bevo’o na be tu’a yeme Yéhôva? Ye wo jaé yene wo Yéhôva ényiñe jôé? Nge wo te yalane na ôwé minsili mite mise, ye nalé a tinane na ô ne ñwo’an? Ko ko. Amu jé? Amu mbo ésaé Yéhôva ase a ne wô’ôtane nalé, to’o a ne ñwo’an nge momo. Nde fe na, Yéhôva a ne belane mbamba nsisime wé na a ve mbo ésaé wé ase ngule ya bo mam mete. Nya ajôô a ne na, nge ô bili biyebe, nge ô ngenan ô sili’i womien nge ô ne ñwo’an nge momo, biyebe bite bibien bi ne ndeme ja liti na ô nji bo ñwo’an. Bôte Yéhôva a maneya top be nji beta sili bebien minsili, ba yeme ntet a ntete na be ne miñwo’an.

15. Jé ja liti na sa ke ba bese Yéhôva a nga ve mbamba nsisim mbe ba ye ke yôp?

 ¹⁵ Kalate Zambe a ne njalan a minkañete mi bôte Yéhôva a nga ve mbamba nsisim, ve bôte bete be nji be miñwo’an. David a ne wua ya été, mbamba nsisime nnye a nga wulu nye. (1 Sa. 16:13) A nga volô nye na a wô’ô bido’o bi mame ya Zambe a na a bo môte wua ya ba be nga tili Kalate Zambe. (Marc 12:36) Ve to’o nalé, nlômane Pierre ô nga jô na: “David a nji ke yôp.” (Mam. 2:34) Jean Baptiste fe a nga “jaé ne lut a [mbamba nsisim.]” (Luc 1:13-16, Mfefé Nkôñelan) Yésus émien a kôme fe jô jô na teke môt éziñ a mbe a dañe’e Jean Baptiste si va, ve a nga ke suu na Jean Baptiste a nji bo môte wua ya ba ba ye ke nyiñe yôp. (Mt. 11:10, 11) Yéhôva a nga belane mbamba nsisime wé asu na a volô bôte bete na be bo beta be mam, ve a nji tobe be na be ke jôé a Yésus yôp. Ye nalé a tinane ñhe na mbunane wop ô mbe tyôtyoé adañe wu ba Yéhôva a nga tobe na be ke nyiñe yôp? Momo. Nalé a tinane fo’o ve na Yéhôva a ye wômôlô be na be nyiñe Paradis si va.​—Jean 5:28, 29; Mam. 24:15.

16. Ma’ane mevé abui bebo bisaé be Yéhôva ba yange melu ma zu?

¹⁶ Abui bebo bisaé be Yéhôva ya den be nji bi ndi nleme ya ke nyiñe yôp. Aval ane Abraham, Sara, David, Jean Baptiste a befam a binga befe ya melu mvus, be bili ndi nleme ya nyiñe si va Éjôé Zambe si.​—Beh. 11:10.

17. Minsili mivé bia ye yalan ayé’é da zu?

¹⁷ Mbôl abim miñwo’an éziñ é ngenan é bôma’ane bia si va den, e ne kui na bi sili biabebiene minsili miziñ. (Nli. 12:17) Bi ne sili na: Aval avé Bekristen be ne miñwo’an ba yiane yene bebien? Nge môt éziñ ya akônda dôé a taté na a di fembé a nyu won môse Mesimesa’ane, wo yiane yene nye aya? Nge tañe bôte ja di fembé a nyu won Mesimesa’ane é ne ve nenenen ane mimbu mia lôt, ye jam ete da yiane tyelé wo nleme yôp? Bia ye yalan minsili mite ayé’é da zu.