1-2. Cosa el ya sucede na dia de Pentecostes, 33 C.E.?

DOMINGO aga quel na Jerusalem. Este el dia de Pentecostes, año 33 C.E. Un grupo de maga 120 dicipulo el yan junto-junto arriba del un casa. (Act. 1:13-15; 2:1) Cuanto dia antes de ese, si Jesus ya manda esta kanila na Jerusalem cay ricibi sila un especial regalo. (Act. 1:4, 5) Cosa sunod ya sucede?

² “Derepente, ya oi sila un sonido [o sonor], como un viento bien fuerte, que ya sale na cielo.” Ta puede oi con el sonor na entero casa. Despues, ya abuya na cabeza del maga dicipulo el “ta semeja como maga lengua de fuego” y todo sila ya queda ‘lleno de sagrao espiritu’. (Act. 2:2-4) Na este manera, ya vacia si Jehova con el de suyu sagrao espiritu con aquel grupo. (Act. 1:8) Sila el primer grupo que ya iscuji por medio de sagrao espiritu * y tiene esperanza rula junto con Jesus na cielo.

3. Porque aquellos na Pentecostes nuay duda que ya iscuji kanila por medio de sagrao espiritu?

³ Si uno tu de aquellos maga dicipulo quien yan junto-junto arriba na casa de aquel dia, gendeh gayot tu ulvida con aquel.  Tiene cosa que ta semeja na un lenggua de fuego el ya abuya na de tuyu cabeza y ya principia tu converza otro lengguaje! (Act. 2:5-12) Asigurao gayot tu que ya iscuji contigo por medio de sagrao espiritu. Pero, todo ba de aquellos con quien ya iscuji por medio de sagrao espiritu ya ricibi con ese na igual manera? Gendeh. Porque se kita sabe?

4. Todo ba del maga iscujido del primer siglo ya queda iscujido na igual tiempo na diila vida? Explica.

⁴ Discuti kita si cuando el un persona queda iscujido. Gendeh lang aquellos maga 120 Cristiano el ya queda iscujido del Pentecostes, 33 C.E. Na aquel mismo dia, maga 3,000 persona pa el ya ricibi con el sagrao espiritu. Ya queda sila iscujido cuando ya bautiza sila. (Act. 2:37, 38, 41) Pero na siguiente maga año, gendeh todo del maga iscujido el ya ricibi con el sagrao espiritu na tiempo del diila bautismo. Ya queda iscujido el maga Samaritano despues del diila bautismo. (Act. 8:14-17) Y bien diferente gayot el cosa ya sucede con Cornelio y de suyu familia cay ya queda sila iscujido antes pa sila ya bautiza.​—Act. 10:44-48.

5. Asegun na 2 Corinto 1:21, 22, cosa ta sucede con el persona si ya iscuji con ele por medio de sagrao espiritu?

⁵ Discuti tambien kita si cosa ta sucede si el un persona ya queda iscujido. Na primero, el cuanto posible tan dificil creé que ya iscuji kanila si Jehova. Ta pensa sila, ‘Porque conmigo ya iscuji el Dios?’ El otro posible nuay sinti ansina. Maskin cosa pa man, ya explica si apostol Pablo si cosa ta sucede con el todo iscujido: “Despues Dios ya marca con ustedes para señala * que ustedes maga gente di suyo, como ya promete le, y ese marca amo el Espiritu Santo [“sagrao espiritu,” NWT].” (Ef. 1:13, 14, El Nuevo Testamento) Entonces, ta usa si Jehova con el de suyu sagrao espiritu para hace bien claro con aquellos maga Cristiano que ya iscuji le kanila. Na este manera, el sagrao espiritu que ta dale kanila amo “un garantia [o un promesa]” que na futuro hay vivi sila hasta para cuando na cielo y gendeh na tierra.​—Le con el 2 Corinto 1:21, 22.

6. Cosa debe hace el un iscujido Cristiano para ricibi con el de suyu premio na cielo?

 ⁶ Si iscujido el un Cristiano, automatico ba le puede ricibi con el de suyu premio na cielo? Gendeh. Sino, asigurao le que ya iscuji con ele para anda na cielo. Pero, debe le acorda con este: “Mi maga hermano y hermana, ustedes llamao y escujido. Trabaja para gendeh ustedes ay perde ese de ustedes llamada y escujida. Si ustedes ay hace ansina, gendeh ustedes ay perde el fe.” (2 Ped. 1:10) Poreso, maskin pa ya iscuji con el un Cristiano por medio de sagrao espiritu para anda na cielo, ricibi lang le con el de suyu premio si esta le fiel.​—Fil. 3:12-14; Heb. 3:1; Rev. 2:10.

7. Paquemodo puede sabe el un persona que ya invita con ele para anda na cielo?

⁷ Pero, paquemodo puede sabe el un persona que ya invita con ele para anda na cielo? El contestacion claro puede mira na maga palabra de Pablo para con aquellos maga iscujido na Roma. Ele ya habla kanila: “Cay ustedes noay recivi el espiritu del maga muchacho que ta hace con ustedes vivi [otravez] con miedo. El ya recivi ustedes amo el espiritu del maga anak adoptao que ta manda canaton grita: ‘Abba,’ Tata. El Espiritu mismo del Dios ta man junto con el diaton espiritu para man testigo cay kita maga anak del Dios.” (Roma 1:7; 8:15, 16) Poreso, por medio na sagrao espiritu del Dios, ta hace le claro con el maga iscujido que tiene sila privilegio que anda na cielo.​—1 Tes. 2:12.

8. Paquemodo el 1 San Juan 2:20, 27 ta dale mira que gendeh necesita confirma el otro que iscujido el un Cristiano?

⁸ Aquellos quien ya ricibi el invitacion para anda na cielo gendeh tan duda na diila pensamiento y corazon que ya iscuji kanila si Jehova. (Le con el 1 San Juan 2:20, 27.) Siempre, necesita enseña si Jehova con el maga iscujido Cristiano por medio na congregacion igual con otro. Pero, gendeh necesita confirma el otro que iscujido sila. Si Jehova ya usa con el de con todo poderoso fuerza na universo, el de suyu sagrao espiritu, para hace bien claro kanila que iscujido sila.

9. Si ya queda iscujido el un persona, cosa cambio le experiencia que ya menciona na Efeso 1:18?

⁹ Posible, mayoria del maga siervo del Dios ahora el tan dificil entende si cosa ta sucede con el un persona si ya queda le iscujido. Normal lang este cay gendeh sila iscujido. Ya crea el Dios con el maga gente para vivi na tierra hasta para cuando y gendeh na cielo. (Gen. 1:28; Sal. 37:29) Pero, ya iscuji si Jehova cuanto persona para vivi na cielo. Poreso si ya queda sila iscujido, el Dios ta cambia con el diila esperanza y manera si paquemodo ta pensa. Como resulta, alegre y con ansias sila vivi na cielo.​—Le con el Efeso 1:18.

10. Cosa quierre decir que “nace otra vez”? (Mira tambien con el footnote.)

¹⁰ Cuando el maga Cristiano ya queda iscujido por medio de sagrao espiritu, sila ya “nace otra vez.” * Si Jesus ya habla que imposible explica con aquellos gendeh iscujido si cosa gayot ta sinti el un persona quien ya “nace otra vez” o ya “nace del Espiritu.”​—Juan 3:3-8.

11. Explica si paquemodo principia cambia el pensamiento del un persona si ya queda le iscujido.

¹¹ Na cosa manera el maga Cristiano ta principia pensa na diferente manera si ya queda sila iscujido? Antes kanila iscuji si Jehova por medio de sagrao espiritu, ta esperanza sila  vivi na tierra hasta para cuando. Con ansias sila ta espera con el tiempo cuando si Jehova hay quita con el todo maldad y hace paraiso con el tierra. Posible, ta imagina sila que mira sila otravez con el miembro del diila familia o un amigo quien ya muri. Pero despues sila queda iscujido, ya principia sila pensa na diferente manera. Na cosa manera? Nuay sila pensa que gendeh ya bueno vivi hasta para cuando na tierra. Nuay sila cambia diila pensamiento cay ya queda sila depress o grabe ya sufri. Nuay sila sinti que gendeh sila queda alegre vivi na tierra hasta para cuando. Sino, si Jehova ya usa con el de suyu sagrao espiritu para cambia con el diila esperanza y si paquemodo sila ta pensa.

12. Asegun na 1 Pedro 1:3, 4, cosa ta sinti el maga iscujido acerca na diila esperanza?

¹² Posible, el un persona quien ya queda iscujido ta sinti que gendeh le cualificao con este precioso privilegio. Pero, nunca le man duda que ya iscuji con ele si Jehova. Bien alegre le y lleno de apreciacion si ta pensa le con el de suyu esperanza que vivi na cielo.​—Le con el 1 Pedro 1:3, 4.

13. Cosa ta sinti el maga iscujido acerca na diila vida aqui na tierra?

¹³ Quierre decir ba que quierre muri el maga iscujido? Si apostol Pablo ya contesta con ese pregunta. Ele ya habla: “Mientras kita maga creyente tiene pa cuerpo de gente, pirmi kita ta suspira, cay [destorbao] el di aton pensamiento. Hende kita ta desea muri para no tene mas problema, sino ta desea kita aquel cuerpo que ay tene kita despues del muerte.” (2 Cor. 5:4, El Nuevo Testamento) Este maga Cristiano nuay perde el interes aqui na tierra y quierre muri temprano. Sino, alegre y quierre sila usa con el diila vida cada dia para sirvi con Jehova junto con el diila familia y maga amigo. Pero maskin cosa sila ta hace, pirmi sila ta acorda con el bonito esperanza que tiene sila na futuro.​—1 Cor. 15:53; 2 Ped. 1:4; 1 Juan 3:2, 3; Rev. 20:6.

14. Cosa el maga situacion que gendeh ta dale prueba que iscujido el un persona?

¹⁴ Baka ta pensa tu si ya iscuji ba tambien contigo por medio de sagrao espiritu. Pensa con este maga importante pregunta: Tiene ba tu grande deseo para hace con el voluntad de Jehova? Ta sinti ba tu que bien activo tu na trabajo predicacion? Quierre-quierre ba tu estudia con el Biblia y aprende acerca na maga hondo cosas del Dios? (1 Cor. 2:10) Ta sinti ba tu que ya bendici si Jehova con el de tuyu trabajo predicacion? Ta sinti ba tu que tiene tu grande responsibilidad para ayuda con otro aprende acerca con Jehova? Ta puede ba tu mira maga prueba que ta ayuda contigo si Jehova na manada manera? Si positivo el de tuyu contestacion na este maga pregunta, prueba ba se que un iscujido Cristiano tu? Gendeh. Porque? Cay todo siervo del Dios puede sinti con ese, iscujido man sila o gendeh. Y por medio na sagrao espiritu, si Jehova puede ayuda maskin quien siervo de suyu para hace con este maga cosas, maskin cosa pa el diila esperanza. Gane, si tan duda tu si iscujido ba tu por medio de sagrao espiritu, quierre decir lang de este que gendeh tu iscujido. Aquellos con quien ya iscuji si Jehova gendeh tan duda si iscujido ba sila. Asigurao sila!

15. Porque kita sabe que gendeh todo quien ya ricibi sagrao espiritu el ya iscuji para anda na cielo?

¹⁵ Manada ejemplo na Biblia del maga fiel siervo del Dios el quien ya puede ricibi con el sagrao espiritu, pero nuay sila el esperanza  que vivi na cielo. El sagrao espiritu ya guia con David. (1 Sam. 16:13) Ya ayuda con ele el sagrao espiritu para entende el maga hondo cosas acerca con Jehova y para puede le escribi con el cuanto parte del Biblia. (Mar. 12:36) Maskin pa ansina, si apostol Pedro ya habla que “noay ganeh subi na cielo” si David. (Act. 2:34) Si Juan Bautista ‘lleno de sagrao espiritu.’ (Luc. 1:13-16) Si Jesus ya habla que nuay quien mas importante pa que con Juan, pero ele ya habla que si Juan gendeh queda parte del Reino na cielo. (Mat. 11:10, 11) Si Jehova ya usa con el de suyu sagrao espiritu para dale con ese maga hombre el poder para hace maga maka-bilib cosas, pero nuay le usa con ese espiritu para iscuji kanila vivi na cielo. Este ba quierre decir que gendeh sila igual de fiel compara con aquellos quien rula na cielo? Gendeh. Quierre decir lang de este que hay resucita kanila si Jehova na Paraiso tierra.​—Juan 5:28, 29; Act. 24:15.

16. Cosa el esperanza del mayoria del maga siervo del Dios ahora?

¹⁶ Ahora, mayoria del maga siervo del Dios na tierra el nuay esperanza que vivi na cielo. Igual con Abraham, Sara, David, Juan Bautista y manada pa otro maga hombre y mujer na tiempo del Biblia, con ansias sila ta espera que vivi na tierra bajo na rulanza del Reino del Dios.​—Heb. 11:10.

17. Cosa maga pregunta kita considera na siguiente articulo?

¹⁷ Ahora, tiene siempre maga iscujido Cristiano que junto kanaton, poreso posible tiene kita cuanto maga pregunta. (Rev. 12:17) Por ejemplo, cosa debe el mirada del maga iscujido na diila mismo cuerpo? Si tiene na de ustedes congregacion el ya principia come y toma con el maga emblema na Comemoracion, paquemodo tu debe trata con ese persona? Y paquemodo si ta queda manada el quien ta habla que iscujido sila? Debe ba tu man lingasa acerca con ese? Hay contesta kita con este maga pregunta na siguiente articulo.