1-2. Ngu txihi tximahakalo txo xamalisa atxi txi nga maheka ngu ditshiku da Pentekoste ya 33 E.C.?

I TI MIXO ya Sonto khe Jerusalema. Ngu dilembe da 33 E.C., vagondiswa vo dingana 120 va ti sengeletanile nyumbani. (Mith. 1:13-15; 2:1) Masikunyana msana, Jesu a ti va gete ti to ve simama ve zumba Jerusalema nguko va ndi na amukela ningo yo sawuleka. (Mith. 1:4, 5) Kugwitile kumaheka txani?

² “Ngu txidhukisa, ku to pfala txiwuta, txi txi ta ngu nzumani, txo fana ni kufuteta ka diphuho da txihuhuri.” Txi ti pfala ka yotshe nyumba yi va nga ti ka yona. Konaho va to wona so nga “tidimi ta mndilo” si ya khandama txitimwi ka mmweyo ni mmyeyo wawe, votshe va to “tala ngu Moya wo Sawuleka.” (Mith. 2:2-4) Ngu nzila yo xamalisa, Jehovha a thete moya wakwe wo sawuleka ka mtxawa wonewo. (Mith. 1:8) Ngu vona vo khata kusawulwa ngu moya wo sawuleka * ni ku va ningilwe themba yo ya fuma kumweko ni Jesu nzumani.

3. Ngu kutxani ava va nga sawulwa ngu Pentekoste va nga mbi kanakana to va sawutwe ngu moya wo sawuleka?

³ I ti ku wo va mmweyo wa va va nga ti tshanganile ka nyumba yile, ngu ditshuri u si na kudivala ati ti nga humelela.  Somaha so fana ni tidimi ta mndilo si ta kukhandama ha msungo, u khata kuwomba-womba tindimi to hambana-hambana! (Mith. 2:5-12) U si na ku kanakana to u sawutwe ngu moya wo sawuleka. Se txiwotiso ngu txiya: Ina votshe va va sawulwako va sawulwa ngu nzila yo fana ni ngu mbimo yimweyo? Nadha. Hi ti zivisa kutxani?

4. Ina votshe va va nga sawulwa ngu dilembe dizana do khata va sawutwe ngu mbimo yimweyo? Txhamusela.

⁴ He bhuleni ngu ti to i ngu mbimo muni hi nga wombako to m’thu a sawutwe. Mtxawa wule wa 120 wa Makristu hi nga wona basi wu nga sawulwa ngu Pentekoste ya 33 E.C. Msana ka ditshiku dile, konamu ka 3.000 wa vathu va amukete moya wo sawuleka awu wu nga ti thembisilwe. Vona va sawutwe mbimo yi va nga ti bhabhatiswa. (Mith. 2:37, 38, 41) Kambe msana ka dilembe dileya, hi nga votshe va nga sawulwa ka bhabhatiso yawe. Vasamariya va sawutwe msana ka masikunyana msana ka kuva va di bhabhatisilwe. (Mith. 8:14-17) Kambe vamwani ti ve ngu nzila yo hambana ni votshe, Korneliyo ni va mtini kwakwe va sawutwe va si se bhabhatiswa.—Mith. 10:44-48.

5. Ngu kuya ngu 2 Vakorinto 1:21, 22, nji txani txi mahekako mbimo yi m’thu a sawulwako ngu moya wo sawuleka?

⁵ Konku he bhuleni ngu ti ti mahekako mbimo yi m’thu a sawulwako ngu moya wo sawuleka. Vamwani k ava va nga sawulwa ta va karatela kukholwa to va sawutwe ngu Jehovha. Mwani a nga karateka atxi: ‘Ngu kutxani Txizimu txi di sawute ani?’ Vamwani va nga angula ngu nzila yo hambana. Ku si nga ni mhaka ni ti va ti pfisako tona, mpostoli Paulo a txhamusete ati ti mahekako ngu votshe ngako va txi sawulwa: “Ngako mi nga kholwa ka dona dipswi dile, mi bhatwe * ngu txixambanyo txa Moya wo Sawuleka, wu nga ti thembisilwe, awu i ku txitsaniso txa thomba yathu.” (Vaef. 1:13, 14) Se Jehovha a thumisa moya wo sawuleka ka Makristu ti to e  ti veka ha kubasani ti to a ma sawute. Se ngu nzila yiya, moya wo sawuleka ‘njitsaniso’ atxi txi tsanisekisako to wumangwana wa vasawuleki ngu hanya nzumani ngu ha ku si gwitiko i si nga ha mafuni.—Lera 2 Vakorinto 1:21, 22.

6. Nji txani atxi Mkristu wu a nga sawulwa a fanelako kumaha kasiku e mana hakelo yakwe?

⁶ Ina m’thu a txi sawulwa ti la kuwomba to se ti tsani to aya nzumani? Nadha. O tsaniseka to a sawutwe kuya nzumani. Kambe a fanete kukhumbula txialakanyiso txiya: “Va ka kwathu, khutalani mi txi ya masoni, kasiku mi txi sikota kutsanisa kudhanwa kwanu ni kusawulwa kwanu. Nguko, mi txi mahisa eto, kha mi nambi thuka mi txi khuvekiswa.” (2 Pedro 1:10) Se hambi Mkristu a di sawutwe ti to eya nzumani, a no mana hakelo yakwe loko atxi simama a di thembekile.—Vaf. 3:12-14; Vaheb. 3:1; Mtu. 2:10.

7. Ava va nga sawulwa, va ti zivisa kutxani ti to va dhanwi kuya nzumani?

⁷ Se m’thu a ti zivisa kutxani to a sawutwe ti to eya nzumani? Xamulo yi ha kubasani ka mapswi ya Paulo a nga bhalela ava va nga ‘dhanwa ngu moya wo sawuleka.’ Ava gete tiya: “Anu kha ma amukela moya wa wukhumbi ti to mi txi telwa ngu kuthava; aniko mi amukete moya wa ku mi maha vanana va mafuyiwa va Txizimu, moya wu wu hi ningako kutsana hi m’dhana ku: ‘Abba! Tata!’ Nguko ngu wona Moya wa Txizimu wupune wu hi fakazelako kumweko ni mimoya yathu, ti taku hi vanana va Txizimu.” (Var. 1:7; 8:15, 16) Se ngu kuthumisa moya wo sawuleka, Txizimu txi ti veka ha kubasani ka vale va nga sawulwa to va dhanwi kuya nzumani.—1 Vat. 2:12.

8. Dibhuku da 1 Johani 2:20, 27, di ti vekisa kutxani hakubasani to awu a nga sawulwa kha ti zi ti lava e tsanisekiswa ngu m’thu mmwani?

⁸ Jehovha kha siyi kukanakana ka mialakanyo mwendo ka mbilu ya va va nga sawulwa kuya nzumani. (Lera 1 Johani 2:20, 27.) Kufana ni vanathu vamwani, Makristu ya ma nga sawulwa ti lava me gondiswa ngu Jehovha ngu kuthumisa dibanza. Kambe kha ti zi ti lava m’thu mmwani ti to e va tsanisekisa to va sawutwe. Jehovha a thumisile mtamo wakwe wa hombe ka wuako wotshe, i ku moya wo sawuleka ti to wu tsanisekisa ava va nga sawulwa!

9. Mbimo yi m’thu a sawulwako, ngu kuhi kutxitxa aku kumahekako kwakwe nga ha ti nga kombiswa ka Vaefesu 1:18?

⁹ Ka malanda a Txizimu nyamsi ta karata kupfisisa to kumaheka txani ka m’thu mbimo yi Txizimu txi msawulako. Eto kha ti xamalisi nguko kha va khali kuva ka txiemo txi txi fanako. Txizimu txi mahile vathu ti to ve hanya ngu ha ku si gwitiko ha mafuni, i si nga nzumani. (Gen. 1:28; Mas. 37:29) Kambe Jehovha a sawute vo kari ti to veya hanya nzumani. Se mbimo yi ava sawulako, wa txitxa themba ni mapimiselo awe ti to ve lava kuhanya nzumani.—Lera Vaefesu 1:18.

10. Ti la kuwomba txani kuvelekwa da wumbidi? (Wona ni txhamuselo ya hahatshi.)

¹⁰ Mbimo yi Makristu ma sawulwako ngu moya wo sawuleka, ona mo ‘velekwa da wumbidi.’ * Jesu nene a ti vekile hakubasani to ta karata kutxhamusela m’thu wu a nga mbi sawulwa mayelano ni matipfelo aya vasawuleki  va ma pfako ngu ‘kuvelekwa da wumbidi’ mwendo “kuvelekwa ngu moya.”—Joh. 3:3-8.

11. Txhamusela kutxitxa a ku kumahekako ngako m’thu a txi sawulwa.

¹¹ Makristu ma khata kupimisa ngu nzila yihi msana kova ma di sawutwe? Na Jehovha a si se sawula Makristu awa, themba ya ona i ti yo hanya ha mafuni ngu ha ku si gwitiko. Ona ma ti yi emete ngu maso o bhilivila mbimo yi Jehovha a no gumisa wotshe wubihi e maha mafu me va paradhise. Kutilava ma txi tialakanya ma txi amukela dixaka mwendo mngana wu a nga fa. Kambe msana kova va di sawutwe, va khata kupimisa ngu nzila yo hambana. Ngu nzila yihi? Kha va alakanyi ti to kuhanya ha mafuni ta swira. Kha va txitxi mawonelo awe ngu mhaka ya sikarato si va nga ti wonisana naso. Hi nga ti to va so thuka ve wona kuhanya ha mafuni i si nga ta txilo. Kuhambana ni to, Jehovha a thumisa moya wakwe wo sawuleka ti to e txitxa mapimiselo awe mayelano ni themba yi va nga ti nayo ngu wumangwana.

12. Ngu kuya ngu 1 Pedro 1:3, 4, vasawuleki va ti pfisa kutxani ngu themba yawe?

¹² M’thu wu a nga sawulwa a nga tipfa a si faneleki ka lungelo yi a nga yi mana. Kambe kha thuki e kanakana to Jehovha a mu sawute. Mbilu yakwe yi tate ngu litsako ni kubonga ngu lungelo yo ya hanya nzumani.—Lera 1 Pedro 1:3, 4.

13. Vasawuleki va wu wonisa kutxani wutomi wawe ha mafuni?

¹³ Ina eto ti la kuwomba to vasawuleki va ti lava kufa? Mpostoli Paulo wa xamula txiwotiso etxo. Ene a fananisile mmidi wa m’thu ni m’dhuti atxi: “Nguko hi di ngadi mdhuteni muwa, i ku mmidi wathu, ha vilela ngu kunemelwa, na i singa ti to ho lava kuhuma ka mmidi wathu wa ha mafuni: Aniko hi lava ti to hi txi ambekwa mmidi wathu wa nzumani, kasiku asi si fako si na mitwa ngu kuhanya.” (2 Vak. 5:4) Makristu awa kha ma leka kuwona wutomi i ti wa lisima aha koza me navela ni kufa ngu txikuluveta. Kuhambana ni to, vona va lava ku tidila ngu wutomi ni kuthumela Jehovha kumweko ni maxaka awe. Ku si nga ni mhaka ni ti to va maha txani, mbimo yotshe va khumbula themba yawe yo tsakisa ya wumangwana.—1 Vak. 15:53; 2 Pedro 1:4; 1 Joh. 3:2, 3; Mtu. 20:6.

14. Ngu tihi ti ti si kombisiko to m’thu a sawutwe ngu moya wo sawuleka?

¹⁴ Ti nga maha u txi ti wotisa to ina u sawutwe ngu moya wo sawuleka kani. I di eto, tiwotisi tiya: Ina wa hiseka ngu kulava kutsakisa Jehovha? Ina wa hisekela ngutu kutxhumayela? Ina wa gonda ngutu Dipswi da Txizimu ni ku ti karatela kupfisisa timhaka to ‘eta ta Txizimu’? (1 Vak. 2:10) Ina Jehovha wa katekisa ngutu mthumo wako wa thembwe? Ina wa tipfa u di ni wutixamuleli wo vhuna vamwani ti to ve gonda ngu Jehovha? Ina u ni wufakazi wa silo si Jehovha a nga kuvhuna ngu kukongoma ka wutomi wako? I di ti to u xamute ngu dipswi do guleka u txi inna ka sotshe siwotiso siya, ti la kuwomba to u sawutwe kuya nzumani? Nadha, kha ti wombi tona. Ngu kutxani? Nguko otshe malanda a Txizimu ma nga tipfa ngu nzila yoneyo, ti si nga ni mhaka ni ti to ma sawutwe mwendo ahim-him. Ni ku, ngu kuthumisa wona moya wuwa wo sawuleka, Jehovha wa ninga otshe malanda akwe mtamo wo maha totshe tiya. Ngu ku tiwotisa basi to mwendo u sawutwe, se u ti vekile ha kubasani to khwa sawulwa. Ava va nga  sawulwa ngu Jehovha kha va ti wotisi to va sawutwe mwendo ahim-him! Vona va tiziva!

15. Hi ti zivisa kutxani ti to hi nga votshe va va nga va ni moya wo sawuleka va nga sawulwa ti to veya nzumani?

¹⁵ Ka Bhiblia, ku ni sikombiso sa vathu vo thembeka ava va nga amukela moya wo sawuleka; kambe kha va nga ni themba yo ya nzumani. Dhavhidha a ti kongomiswa ngu moya wo sawuleka. (1 Sam. 16:13) Moya wo sawuleka wu mu vhunile ti to e pfisisa timhaka to eta mayelano ni Jehovha ni kutshumela e bhala sienge sa Bhiblia. (Marku 12:36) Hambi keto Pedro a wombile to “Dhavhidha kha kwela nzumani.” (Mith. 2:34) Johani Mubhabhatisi ati ‘tate ngu moya wo sawuleka.’ (Luka 1:13-16) Jesu a wombile to ku si nga ni m’thu wa hombe kupinda Johani, kambe a tshumete atxi ene kha pateki ka Mfumo wa nzumani. (Mat. 11:10, 11) Jehovha a thumisile moya wakwe wo sawuleka ti to e ninga mtamo vathu vava wo maha timhaka to xamatisa, kambe kha thumisa moya wuwa ti to e va sawula kasi ku veya hanya nzumani. Ina eto ti la kuwomba to vona va si nga ni likholo lo fana ni la va va nga sawulwa kuya nzumani? Nadha. Eto ti la kuwomba to Jehovha a na tshumela e va wusa ti to ve ta hanya ha mafuni ka paradhise.—Joh. 5:28, 29; Mith. 24:15.

16. Ngu yihi themba ayi malanda o tala a Txizimu ma ku nayo nyamsi?

¹⁶ Malanda o tala a Txizimu nyamsi a ha mafuni, kha ma nga ni themba yo ya hanya nzumani. Kufana ni Abrahamu, Sara, Dhavhidha ni Johani Mubhabhatisi, ona ma ni themba yo ta hanya ha mafuni ma txi fumwa ngu Mfumo wa Txizimu.—Vaheb. 11:10.

17. Ngu sihi siwotiso asi hi no ta xamula ka gondo yi yi londiselako?

¹⁷ Aku vamwani va va va nga sawulwa va hanyako kona ha mafuni hawa, ti nga maha hi ti wotisa siwotiso so kari. (Mtu. 12:17) Ngu txikombiso, ngako m’thu a di sawutwe, a fanete ku ti wona ngu nzila yihi? Ngako m’thu a txi khata kudya sifanekiselo ngu ditshiku da Txialakanyiso, hi fanete ku mu ñola ngu nzila yihi? Se ngako mtengo wa va va wombako to va sawutwe wu txi engeteleka ko? Ina u fanete kukarateka ngu mhaka yoneyo? Hi na ta xamula siwotiso soneso ka gondo yi yi londiselako.