1-2. Yika yalingiwile ha Pentekoste ya mwaka 33 M.J.?

LILI tangwa Liayenga mu Yerusaleme chimene-mene ha Pentekoste ya mwaka 33 M.J. Tumbaji 120 kanalikungulula mu chipatulo cha kwilu cha limwe zuwo. (Yili. 1:13-15; 2:1) Yesu kaliangile kwalweza hanga achine kukatuka mu Yerusaleme, mumu te matambula chimwe chawana chalipwila. (Yili. 1:4, 5) Chawana chika?

² “Susumuku mwilu mwejile lundunjila ngwe kutangumuka cha fuji ya tachi.” Zungo yilizala mu zuwo lize apwile. Hachino, “yikusoloka kuli ayo malimi a kupula, ngwe milengi ya kahia” ha mitwe ya tumbaji, ‘eswe azalile too ni spiritu yisandu.’ (Yili. 2:2-4) Chenacho Yehova ahanyine spiritu yenyi yisandu kuli tumbaji wano. (Yili. 1:8) Ayo e atangu waze awayishile ni spiritu yisandu * ni kwasakula hanga akayule ni Yesu mu malilu.

3. Mumu liaka akwa-Kristu ha Pentekoste apwile ni shindakenyo ngwo kaawayisa ni spiritu yisandu?

³ Nyi te uli umwe wa kuli tumbaji waze apwile mu zuwo liacho, kachi uchikeza kavulama tangwa liacho. Kachi te kuuchi  kukakajana ngwo, kakuwayisa ni spirtu yisandu. Chimwe chuma ngwe malimi a milengi ya kahia, yichiza ha mutwe we, chocho yena yiuputuka kuhanjika malimi eka! (Yili. 2:5-12) Shina atu waze akuwayisa ni spiritu yisandu, kakwahayo mu mutapu umuwika hanji ha mashimbu amuwika? Ka. Kuchi tunachinyingika?

4. Shina akwa-Kristu a ku sekulu yitangu kaawayishile ha shimbu limuwika? Lumbununa.

⁴ Chitangu, tutalenu chize akuwayisa mutu ni spiritu yisandu. Ha Pentekoste ya mwaka 33 M.J., kakawayishile wika akwa-Kristu 120. Ha tangwa lizeliene “tununu atatu (3,000) a atu,” no yatambula spiritu yisandu. Ayo kaawayishile ha mashimbu waze te anaapapachisa. (Yili. 2:37, 38, 41) Alioze ha miaka yize yasulileho, akwa-Kristu amwe kakaawayishile ha mashimbu waze te anaapapachisa. A-Samaria, chitangu kaapapachishile, muze kwapalikile matangwa mba yaawayisa ni spiritu yisandu. (Yili. 8:14-17) Alioze kuwayisa chize chakukomwesa chinji, chili chize chalingiwile kuli Koneliu ni asoko jenyi, ayo kaawayishile ni spiritu yisandu muze te kanda achaapapachisa.—Yili. 10:44-48.

5. Kulita ni 2 A-Korindu 1:21, 22, yika yakulingiwa muze mutu akumuwayisa ni spiritu yisandu?

⁵ Haliapwila tutalenu yize yakulingiwa muze mutu akumuwayisa ni spiritu yisandu. Ku uputukilo, atu amwe keshi kutayiza ngwo kaasakula kuli Yehova. Ayo kakulihula ngwo: ‘Mumu liaka Zambi angusakula?’ Alioze, akwo keshi kulipikala. Postolo Paulu kanalumbununa yize yakulingiwa kuli akwa-Kristu eswe akuwayisa, ngwenyi: ‘Se nwafulielele, anujikile ni chijikilo * cha spiritu yisandu ya chilakenyo. Iye che chifungo cha chihinga chetu.’ (Efwe. 1:13, 14) Chekwamba, Yehova kakuhana spiritu yenyi yisandu kuli akwa-Kristu wano hanga apwe ni shindakenyo ngwo, kaasakula. Kashika, spiritu yisandu  yili “chifungo” chize chakwaha shindakenyo ngwo, makatwama mu malilu, hi hashiko.—Tanga 2 A-Korindu 1:21, 22.

6. Yika mukwa-Kristu wakuwayisa atamba kulinga mba akatambule chilakenyo chenyi cha kuya mu malilu?

⁶ Nyi umwe mukwa-Kristu kali wa kuwayisa, shina chinalumbunuka ngwo, makaya lume mu malilu? Ka. Iye kananyingika ngwo, makaya mu malilu. Alioze, katamba kwiwuluka chiyulo chino chinambe ngwo: “Mandumbu, lipupwisenu kukolesa chinyingi cha kwamba ngwenu, hanatutambika, hanatutongola; mumu nyi kachi munulinga yino yuma kachi kunuchi kalimbuka nilimwe tangwa.” (2 Petu. 1:10) Kashika, chipwe ngwe mukwa-Kristu hanamusakula hanga akatwame mu malilu, iye makatambula chilakenyo chacho nyi manunga ni kushishika.—Fwili. 3:12-14; Hepre. 3:1; Uso. 2:10.

7. Kuchi akwa-Kristu akuwayisa akunyingika ngwo kaasakula hanga akatwame mu malilu?

⁷ Kuchi mutu akunyingika ngwo, kamusakula hanga aye mu malilu? Kumbululo lili ha maliji ja Paulu, asonekenene akwa-Kristu akuwayisa a ku Roma, waze ‘atambikile hanga apwe asandu.’ Iye yamba ngwenyi: “Mumu yenu kunwatambwile umwe spiritu ya ndungo nwivwe nawa woma; alioze nwatambwile spiritu wa kunupwisa ana, mba muli iye twakuteta nenyi ngwetu, Ta-ta, Ta-ta. Spiritu iye mwene kakushindakenya hamwe ni spiritu jetu ngwenyi, nuli ana a Zambi.” (Roma 1:7; 8:15, 16) Hachino, Zambi kakuhana spiritu yenyi yisandu kuli mutu, hanga anyingike ngwenyi kamusakula hanga akatwame mu malilu.—1 Tesa. 2:12.

8. Kulita ni 1 Yoano 2:20, 27, mumu liaka akwa-Kristu akuwayisa katambile kwalweza kuli mutu niumwe ngwo kaawayisa?

⁸ Mutu yoze Yehova akusakula hanga akatwame mu malilu keshi kukakajana. (Tanga 1 Yoano 2:20, 27.) Akwa-Kristu akuwayisa, no katamba kwalongesa kuli Yehova mu chikungulwila ngwe chize akutulongesa yetu eswe. Alioze, katambile kwalweza kuli umwe mutu ngwo kali akuwayisa. Yehova mwe wakwaha shindakenyo kupalikila muli spiritu yisandu!

9. Kulita ni A-Efwesu 1:18, kuchi mutu yoze akuwayisa akwalumuka?

⁹ Tuvumbi anji a Yehova musono, keshi kuhasa kunyingika yize yakulingiwa kuli ndumbu yoze akuwayisa. Hi chipi ko kunyonga chocho, mumu ayo hi akuwayisa ko. Zambi katangile atu hanga atwame hano hashi miaka yeswe, hi mu malilu ko. (Uputu. 1:28; Samu 37:29) Alioze, Yehova yakwata chiyulo cha kusakula amwe atu hanga akatwame mu malilu. Kashika, muze Yehova akuwayisa mutu, kakwalumuna kutalatala chenyi ni manyonga jenyi hanga aputuke kupwa ni manyonga akutwama mu malilu.—Tanga A-Efwesu 1:18.

10. ‘Kusemuka cheka’ yika chinalumbunuka? (Tala nawa maliji mushi lia lifwo.)

¹⁰ Muze akuwayisa mukwa-Kristu, iye ‘kakusemuka cheka,’ hanji kusemuka “kwilu.” * Yesu neye kalumbunwine ngwo, hi chashi ko kulumbunwina mutu yoze hi wakuwayisa ko chize mutu akwivwa muze “akusemuka cheka,” hanji akusemuka ni spiritu yisandu.—Yoa. 3:3-8.

11. Lumbununa yize yakwalumuka mu manyonga ja mukwa-Kristu yoze akuwayisa.

 ¹¹ Yika yakwalumuka mu manyonga ja mukwa-Kristu yoze akuwayisa? Muze te kanda achimuwayisa kuli Yehova, iye kapwile ni kutalatala chakutwama ni mwono wa mutolo hano hashi. Iye te kakushimbwila tangwa lize Yehova mapwisa hashi paraisu ni kuhwisa upi weswe. Kota te kakunyonga chize matambula asoko ni masepa jenyi waze afwile. Alioze, muze mamuwayisa, manyonga jenyi kakwalumuka. Mumu liaka? Chino, kuchishi kulingiwa mumu ngwo, iye te keshi kuzanga nawa kutalatala cha hano hashi, hamukunda wa lamba lize akumona, hanji ngwo kutwama hano hashi muchikamukenya. Alioze, chakulingiwa mumu Yehova kakumwaha spiritu yenyi yisandu, hanga alumune manyonga jenyi ni kutalatala chenyi chize te akuzanga chinji.

12. Kulita ni 1 Petulu 1:3, 4, kuchi mukwa-Kristu wakuwayisa akulivwa hamukunda wa kutalatala chenyi?

¹² Mukwa-Kristu yoze awayisa hanji mahasa kunyonga ngwe katelele kutambula chiwape chino chilemu. Alioze, keshi kukakajana ngwo, Yehova kamusakula. Iye kakuwahilila ni kutalatala cha kutwama mu malilu.—Tanga 1 Petulu 1:3, 4.

13. Kuchi akwa-Kristu akuwayisa akumona mwono wo shimbu achili hano hashi?

¹³ Shina chino chinalumbunuka ngwo akwa-Kristu akuwayisa kakuzanga kufwa? Postolo Paulu kanakumbulula chihula chino. Kanatese mujimba wa akwa-Kristu akuwayisa ni mbalaka, hakwamba ngwenyi: “Chamwenemwene yetu tuli mu mbalaka yino, twakutwa mikuma, mumu tunalemewa. Kuchapwile ngwe tunazange kuzula, alioze tunazange kuzala, hanga chize cha kufwa chikajimuke mu mwono.” (2 Kori. 5:4) Akwa-Kristu akuwayisa kazangile kufwa, mumu ngwo hahonga ni mwono wa hano hashi. Ayo kakuzanga mwono, nawa kakuzanga kuwayila Yehova hamwika ni asoko ni masepa jo. Chipwe chocho, akwa-Kristu akuwayisa, mbunge yo yili ha kutalatala cho cha kuya mu malilu.—1 Kori. 15:53; 2 Petu. 1:4; 1 Yoa. 3:2, 3; Uso. 20:6.

14. Yika yize yakusolola ngwo mutu hi wakuwayisa ko?

¹⁴ Yena hanji wakulihula nyi hakuwayisa ni spiritu yisandu. Nyi chenacho, nyonga ha yihula yino: Shina wakuzanga chinji kulinga upale wa Yehova? Shina wakuzanga chinji kwambujola? Wakuzanga chinji kutanga Mbimbiliya ni kulilongesa “yuma yikalu ya Zambi”? (1 Kori. 2:10) Shina wakumona ngwo Yehova kanakukwasa chinji mu mulimo wa kwambujola? Wakuzanga chinji kukwasa akwenu hanga anyingike Yehova? Uli ni shindakenyo ngwo, Yehova kakukukwasa mu mulali walipwila? Nyi wakumbulula yihula yino yeswe ngwo, “ewa,” shina chino chinalumbunuka ngwo uli wakuwayisa? Ka, kuchalumbukine chocho. Mumu liaka? Mumu tuvumbi eswe a Yehova mahasa kwivwa chocho, chipwe ngwe akuwayisa hanji ka. Yehova mahasa kuhana tachi kupalikila mu spiritu yenyi yisandu kuli kavumbi kenyi mweswawo. Kwamba umwenemwene, nyi unalihula ngwe, shina nguli wakuwayisa nyi ka, chino chinasolola ngwo kakuwayishile. Waze akusakula kuli Yehova, keshi kukakajana nyi kali akuwayisa nyi ka. Ayo kakwete shindakenyo ngwo kali akuwayisa!

15. Kuchi tunanyingika ngwetu, hi eswe ko waze atambwile spiritu ya Zambi makaya mu malilu?

¹⁵ Mu Mbimbiliya muli yilweza ya atu ashishika waze atambwile spiritu yisandu ya  Yehova. Chipwe chocho, ayo kakapwile ni kutalatala cha kuya mu malilu. Spiritu yisandu te yakusongwela Ndawichi. (1 Samue. 16:13) Spiritu yisandu yamukwashile kunyingika yuma yilemu ya Yehova ni kumusongwela hanga asoneka jimwe sango mu Mbimbiliya. (Marku 12:36) Chipwe chocho, postolo Petulu kambile ngwenyi, Ndawichi “kazezukile mu malilu.” (Yili. 2:34) Yoano Chipapachisa kazalile “too ni spiritu yisandu.” (Luka 1:13-16) Yesu kambile ngwenyi, kukushi lunga munene kuhiana Yoano. Alioze yamba nawa ngwenyi, Yoano Chipapachisa kechi kayula mu Wanangana wa mu malilu. (Mateu 11:10, 11) Yehova kahanyine spiritu yenyi yisandu kuli malunga wano hanga apwe ni ndundo ja kulinga yuma ya ukomokeso, alioze kakahele spiritu yisandu hanga aye ni kutwama mu malilu. Shina chino chinalumbunuka ngwo ufulielo wo te ukehe, kuhiana waze makayula mu malilu? Ka. Alioze yino yinasolola ngwo, Yehova makaahindwisa hanga akatwame mu Paraisu hano hashi.—Yoa. 5:28, 29; Yili. 24:15.

16. Yiwape yika tuvumbi anji a Zambi musono anashimbwila?

¹⁶ Tuvumbi anji a Zambi musono, kali ni kutalatala cha kutwama hano hashi, hi mu malilu ko. Chizechene ngwe, Apalahama, Sara, Ndawichi, Yoano Chipapachisa ni tuvumbi akwo a malunga ni a mapwo ashishika a ku mashimbu akunyima, ni tuvumbi anji a Zambi musono, kakushimbwila kutwama hano hashi mu chiyulo cha Wanangana wa Zambi.—Hepre. 11:10.

17. Yihula yika mutukumbulula ha mutwe uze muusulaho?

¹⁷ Akwa-Kristu amwe akuwayisa ni spiritu, achili hano hashi hamuwika ni tuvumbi akwo a Zambi, kashika mutuhasa kulihulumba ha chikuma chino. (Uso. 12:17) Chakutalilaho, kuchi akwa-Kristu akuwayisa atamba kulimona? Nyi umwe ndumbu mu chikungulwila maputuka kulia mbolo ni kunwa vinyu ha Chiwanyino cha Kwiwuluka Kufwa cha Yesu, kuchi watamba kumutala? Nyi atu waze akwamba ngwo kali akuwayisa ni spiritu kanayi ni kwoka chinji, shina watamba kulihulumba? Yihula yino mutuyikumbulula ha mutwe uze muusulaho.