1, 2. ¿Chuqui wen utsʼatax bʌ tsaʼ ujti cheʼ tiʼ qʼuiñilel Pentecostés ti jabil 33?

JIÑɅCH jiñi i qʼuiñilel i chaʼan Pentecostés cheʼ ti jabil 33. Ti domingo cheʼ ti sʌcʼan, yaʼ ti Jerusalén tempʌbilob 120 xcʌntʼañob ti jumpʼejl otot (Hch. 1:13-15; 2:1). Cheʼ maxto cʼot jiñi qʼuin, Jesús tsiʼ wʌn subeyob chaʼan yom miʼ cʌytʌlob ti jiñi tejclum come an chuqui ñuc bʌ mi caj i yʌqʼuentelob (Hch. 1:4, 5). ¿Chuqui tsaʼ ujti?

² «Ti ora jach tsaʼ loqʼui tʼan ti panchan cheʼ bajcheʼ juʼucña bʌ icʼ. Tsaʼ ubinti tiʼ pejtelel jini otot baʼ buchulob». Cheʼ jiñi, jiñi xcʌntʼañob tsiʼ qʼueleyob «cabʌl pujquem bʌ alʌ cʼajc. Cheʼ yilal bajcheʼ la cacʼ» tiʼ pamob i jol, i «tsaʼ laj bujtʼiyob ti Chʼujul bʌ Espíritu» (Hch. 2:2-4). Wen utsʼatax tsaʼ bʌ ujti, Jehová tsiʼ yʌqʼue chʼujul bʌ i yespíritu jiñi xcʌntʼañob (Hch. 1:8). Jiñʌch tsaʼ bʌ ñaxan bojñiyob ti chʼujul bʌ espíritu * yicʼot chaʼan miʼ mejlel i tem chaʼleñob yumʌntel yicʼot Jesús yaʼ ti panchan.

3. ¿Chucoch wen yujilob jiñi xñoptʼañob ti jiñi Pentecostés chaʼan tsaʼ yajcʌntiyob ti chʼujul bʌ espíritu?

³ Mi juntiquil xñoptʼañet i chaʼan Cristo ti jimbʌ ora, maʼañic baʼ ora tsaʼ ñajʌyi a chaʼan. Tsaʼ caji a qʼuel cabʌl pujquem bʌ  alʌ cʼajc cheʼ bʌ yilal bajcheʼ la cacʼ i tsaʼ cʌyli tiʼ pam a jol yicʼot tsaʼ caji a tech a chaʼlen tʼan ti yambʌ tʼan tac (Hch. 2:5-12). Tiʼ sujm, tsaʼ cʼoti a ñaʼtan chaʼan tsaʼ yajcʌntiyet ti chʼujul bʌ espíritu. Pero tiʼ pejtelel ora mach wersa yom chaʼan wen utsʼatax bajcheʼ miʼ yajcʌntel juntiquil lac piʼʌl ti chʼujul bʌ espíritu. ¿Bajcheʼ la cujil? ¿I jalaqui miʼ yajcʌntelob? La laj qʼuel.

4. ¿Jalaqui tsaʼ yajcʌntiyob chaʼan miʼ majlelob ti panchan jiñi xñoptʼañob cheʼ ti ñaxam bʌ siglo? Tsictesan.

⁴ Laʼ lac ñaxan ñaʼtan jalaqui juntiquil miʼ yajcʌntel ti chʼujul bʌ espíritu. Jiñi 120 xñoptʼañob mach jiñob jach tsaʼ bʌ yajcʌntiyob ti chʼujul bʌ espíritu ti jiñi Pentecostés ti jabil 33. Ti jiñi jach bʌ qʼuin, 3,000 wiñicob xʼixicob tsaʼ aqʼuentiyob jiñi chʼujul bʌ espíritu cheʼ bajcheʼ tsiʼ wʌn subeyob Jesús. Tsaʼ yajcʌntiyob ti chʼujul bʌ espíritu cheʼ bʌ tsiʼ chʼʌmʌyob jaʼ (Hch. 2:37, 38, 41). Pero tsaʼ ñumi i yorajlel mach ti pejtelelobic cheʼ bʌ tsaʼ ujtiyob ti chʼʌmjaʼ tsaʼ yajcʌntiyob chaʼan miʼ majlelob ti panchan. Jiñi samaritanojob wiʼilto tsaʼ yajcʌntiyob cheʼ bʌ tsaʼix i chʼʌmʌyob jaʼ (Hch. 8:14-17). I ti junyajlel, jiñi Cornelio yicʼot jiñi añoʼ bʌ tiʼ yotot tsaʼ yajcʌntiyob ti chʼujul bʌ espíritu cheʼ bʌ maxto i chʼʌmʌyob jaʼ (Hch. 10:44-48).

5. Cheʼ bajcheʼ miʼ yʌl 2 Corintios 1:21, 22, ¿chuqui miʼ yujtel mi an majqui miʼ yajcʌntel ti chʼujul bʌ espíritu?

⁵ Wʌle laʼ la cʌl chuqui miʼ yujtel cheʼ an majqui miʼ yajcʌntel ti chʼujul bʌ espíritu. Ti ñaxan, tajol an wocol bʌ miʼ ñopob chaʼan tsiʼ yajcayob Jehová i miʼ cʼajtibeñob i bʌ chucoch. Yambʌlob tajol qʼuexel bajcheʼ miʼ ñaʼtañob. Mach yʌlʌyic bajcheʼ, jiñi apóstol Pablo miʼ tsictesan chuqui miʼ yujtel tiʼ tojlelob: «Jatetla jaʼel cheʼ bʌ tsaʼ laʼ wubi jini wen tʼan, jini isujm bʌ, chaʼan mi laʼ coltʌntel, tsaʼ laʼ ñopo Cristo. Tsaʼ otsʌbentiyetla jini Chʼujul bʌ Espíritu, jiñʌch laʼ sellojlel yilal * tsaʼ bʌ tili cheʼ bajcheʼ wʌn albil. Aqʼuebilonla jini Espíritu chaʼan mi lac ñaʼtan tsʼʌcʌl mi caj lac chʼʌm ti pejtelel chuqui wʌn albil i chaʼan  Dios» (Ef. 1:13, 14). Tiʼ sujm, Jehová miʼ cʼʌn jiñi chʼujul bʌ i yespíritu chaʼan miʼ yʌqʼuen i ñaʼtan chaʼan tsaʼʌch yajcʌntiyob. Jin chaʼan, jiñi chʼujul bʌ espíritu «i tejchibal jach i yeʼtel» muʼ bʌ i yʌqʼueñob i ñaʼtan chaʼan mucʼʌch caj i chumtʌlob tiʼ pejtelel ora yaʼ ti panchan, mach wʌʼic ti Pañimil (pejcan 2 Corintios 1:21, 22).

6. ¿Chuqui yom miʼ mel juntiquil yajcʌbil bʌ chaʼan miʼ majlel ti panchan?

⁶ Mi juntiquil xñoptʼan bombil o yajcʌbil ti chʼujul bʌ espíritu, ¿yom ba i yʌl chaʼan muqʼuix caj i ñoj majlel ti panchan? Maʼañic. Yom jach i yʌl chaʼan yajcʌbil chaʼan miʼ majlel ti panchan. Pero yom miʼ cʼajtesan ili ticʼojel: «Jini chaʼan hermanojob, chaʼlenla wersa chaʼan miʼ wen tsictiyel pʌybiletla, yajcʌbiletla. Mi cheʼʌch mi laʼ mel, maʼanic mi caj laʼ yajlel. Maʼanic mi caj laʼ cʌy laʼ ñop» (2 P. 1:10). Jin chaʼan, juntiquil yajcʌbil bʌ cojach mi caj i majlel ti panchan mi xucʼul miʼ chʌn ajñel (Fil. 3:12-14; He. 3:1; Ap. 2:10).

7. ¿Bajcheʼ miʼ ñaʼtañob jiñi yajcʌbiloʼ bʌ chaʼan mucʼʌch caj i majlelob ti panchan?

⁷ Pero ¿bajcheʼ miʼ ñaʼtan juntiquil chaʼan tsaʼ yajcʌnti chaʼan miʼ majlel ti panchan? Jiñi i jacʼbal jamʌ tsiquil mi lac taj ti jiñi tʼan tac tsaʼ bʌ i tsʼijbubeyob Pablo jiñi añoʼ bʌ ti Roma, tsaʼ bʌ ‹pʌjyiyob chaʼan miʼ yochelob ti chʼujul›. Tiʼ subeyob: «Maʼañic tsaʼ aqʼuentiyetla espíritu muʼ bʌ i yotsañetla ti mozo chaʼan mi laʼ chaʼ ajñel tiʼ bʌqʼuen; Dios tsiʼ yʌqʼueyetla i yEspíritu, chaʼan mi laʼ wochel tiʼ yalobil, jiñi chaʼañ mi la cʌl: ¡Abba, c Tat! Jiñi espíritu miʼ subeñonla ti lac pusicʼal chaʼañ i yalobilonla Dios» (Ro. 1:7; Ro. 8:15, 16, TWT). Cheʼʌchi, tiʼ chʼujul bʌ i yespíritu, Dios miʼ yʌqʼuen i ñaʼtan jiñi quixtañujob chaʼan tsaʼʌch yajcʌntiyob chaʼan miʼ majlelob ti panchan (1 Ts. 2:12).

8. Cheʼ bajcheʼ miʼ yʌl 1 Juan 2:20, 27, ¿chucoch la cujil chaʼan mach cʼʌñʌlic chaʼan an majqui miʼ subeñob jiñi yajcʌbiloʼ bʌ chaʼan mucʼʌch caj i majlelob ti panchan?

⁸ Jehová miʼ chʼʌm tiʼ wenta chaʼan miʼ yʌqʼueñob i ñaʼtan jiñi tsaʼ bʌ i yajcayob chaʼan mucʼʌch caj i majlelob ti panchan (pejcan 1 Juan 2:20, 27). Tiʼ sujm, lajal bajcheʼ yonlel xñoptʼañob, jiñi yajcʌbiloʼ bʌ yom miʼ cʌntesʌntelob ti Jehová yaʼ ti congregación. Pero mach cʼʌñʌlic chaʼan an majqui miʼ subeñob chaʼan tsaʼ yajcʌntiyob. Jehová miʼ yoque aqʼueñob i ñaʼtan tiʼ coltaya jiñi pʼʌtʌl bʌ i yespíritu.

9. Cheʼ bajcheʼ miʼ yʌl Efesios 1:18, ¿chuqui miʼ qʼuextʌyel tiʼ tojlel juntiquil cheʼ baʼ ora Dios miʼ yajcan?

⁹ Tajol yonlel i wiñicob Jehová ili ora wocol miʼ chʼʌmbeñob i sujm chuqui miʼ yujtel tiʼ tojlel juntiquil tsaʼ bʌ yajcʌnti ti Jehová. I melelʌch come maʼañic tsaʼ yajcʌntiyob. Dios tsiʼ mele (pʌtʌ) jiñi wiñicob xʼixicob (quixtañujob) chaʼan miʼ chumtʌlob ila ti Lum, mach yaʼic ti panchan (Gn. 1:28; Sal. 37:29). Pero an majqui tsiʼ yajcayob chaʼan miʼ majlelob ti panchan. Jin chaʼan, cheʼ baʼ ora Jehová miʼ yajcañob, jiñi i pijtayajob yicʼot chuqui miʼ ñaʼtañob miʼ qʼuextʌyel yicʼot muqʼuix i mulañob chaʼan miʼ majlelob ti chumtʌl ti panchan (pejcan Efesios 1:18).

10. ¿Chuqui yom i yʌl cheʼ an majqui miʼ «chaʼ ilan pañimil»?

¹⁰ Cheʼ bʌ juntiquil xñoptʼan yajcʌbil ti chʼujul espíritu, yom miʼ «chaʼ ilan pañimil» (chʼocʼan) *. Jesús tsiʼ yʌcʼʌ ti ñaʼtʌntel jaʼel chaʼan ñumen wocol chaʼan miʼ tsictesʌbentel juntiquil mach bʌ yajcʌbilic bajcheʼ miʼ yubin  i bʌ jiñi muʼ bʌ i «chaʼ ilan pañimil» o «miʼ yilan pañimil ti Espíritu» (Jn. 3:3-8).

11. ¿Chuqui miʼ qʼuextʌyel tiʼ pensar juntiquil xñoptʼan cheʼ bʌ miʼ yajcʌntel?

¹¹ ¿Chuqui miʼ qʼuextʌyel tiʼ pensar juntiquil xñoptʼan cheʼ bʌ miʼ yajcʌntel? Ti ñaxan, ti jumpʼejl i pusicʼal miʼ qʼuel ti ñuc jiñi i pijtaya chaʼan miʼ chumtʌl tiʼ pejtelel ora ila ti Pañimil. Yom i qʼuel cheʼ bʌ Jehová miʼ jisan jiñi jontolil yicʼot miʼ sujtesan ti jumpʼejl paraíso ili Lum. Tajol miʼ ñaʼtan i chaʼ qʼuel juntiquil tiʼ familia o i yamigo muʼ bʌ caj i chaʼ cuxtʌyel. Pero, cheʼ bʌ miʼ yajcʌntel, an chuqui miʼ qʼuextʌyel tiʼ pensar. ¿Chucoch? Mach chaʼañic mach yomix chumtʌl ila ti Lum. Mach tiʼ caj chaʼan cʌlʌx cʼojol o wocol tac, mi jiñicto chaʼan maʼañix chuqui utsʼatax miʼ tajben cheʼ miʼ chumtʌl tiʼ pejtelel ora ila ti Lum. Cojach Jehová tsiʼ cʼʌñʌ jiñi chʼujul bʌ i yespíritu chaʼan miʼ qʼuextʌben i pensar yicʼot miʼ yʌqʼuen tsijiʼ bʌ i pijtaya.

12. Cheʼ bajcheʼ miʼ yʌl 1 Pedro 1:3, 4, ¿bajcheʼ miʼ yubin i bʌ juntiquil xñoptʼañob yajcʌbil bʌ cheʼ miʼ ñaʼtan jiñi muʼ bʌ caj i yʌqʼuentel?

¹² Tajol juntiquil xñoptʼan cheʼ bʌ miʼ yajcʌntel miʼ yubin i bʌ chaʼan mach yomic miʼ yʌqʼuentel jiñi ñuc bʌ majtañʌl, pero yoque yujilʌch chaʼan Jehová tsaʼʌch i yajca. Miʼ ñaʼtan jiñi muʼ bʌ caj i yʌqʼuentel, miʼ yubin i tijicñʌyel yicʼot miʼ yʌqʼuen wocolix i yʌlʌ Jehová (pejcan 1 Pedro 1:3, 4).

13. ¿Chuqui miʼ ñaʼtañob jiñi yajcʌbiloʼ bʌ chaʼan i cuxtʌlelob ila ti Lum?

¹³ ¿Yom ba i yʌl iliyi chaʼan jiñi yajcʌbiloʼ bʌ yomobix chʌmel? Jiñi apóstol Pablo miʼ jacʼ ili cʼajtiya. Cheʼ bʌ tiʼ taja ti tʼan i bʌcʼtal jiñi yajcʌbiloʼ bʌ, tsiʼ yʌlʌ: «Cheʼ wʌʼto añonla ti lac bʌcʼtal ila ti pañimil mi lac chaʼlen ajcʌn yicʼot tsic pusicʼal. Mach la comic lac chilbentel, pero la comix chumtʌl ti tsijiʼ bʌ lac bʌcʼtal chaʼan miʼ pʌntʌyel jini yujil bʌ chʌmel ti jini mach bʌ yujilic chʌmel, chaʼan cuxul mi la cajñel ti pejtelel ora» (2 Co. 5:4). Jiñi yajcʌbiloʼ bʌ mach chaʼañic mach yomob chumtʌl ila ti pañimil i chaʼan ti ora yomix chʌmelob (sajtelob). Tijicña chumulob ila ti Lum ora i yom i melbeñob i yeʼtel (troñel) Jehová ti jujumpʼejl qʼuin yicʼot i familia yicʼot i yamigojob. Jin chaʼan, mach yʌlʌyic chuqui woli (choncol) i melob, ti bele ora miʼ ñaʼtañob jiñi i pijtayajob ti panchan (1 Co. 15:53; 2 P. 1:4; 1 Jn. 3:2, 3; Ap. 20:6).

14. ¿Chuqui tac maʼañic miʼ yʌcʼ ti ñaʼtʌntel chaʼan juntiquil tsaʼ yajcʌnti ti chʼujul bʌ espíritu?

¹⁴ Tajol maʼ cʼajtiben a bʌ mi Jehová tsiʼ yajcayet tiʼ chʼujul bʌ i yespíritu. Mi cheʼʌchi, ñuc i cʼʌjñibal maʼ melben (chaʼliben) a bʌ ili cʼajtiya tac: ¿A womʌch baʼ mel chuqui yom Dios maʼ wubin?, ¿muqʼuet ba ti subtʼan tiʼ pejtelel a chʼejlel?, ¿muʼ baʼ wen mulan a pejcan Biblia yicʼot a cʌn «i sujmlel Dios wocol bʌ ti cʌñol»?, ¿am baʼ qʼuele chaʼan Jehová an i wen coltayet ti a subtʼan?, ¿muʼ baʼ mulan a wen coltan yañoʼ bʌ chaʼan miʼ weñʼesañob bajcheʼ añob yicʼot Dios?, ¿am baʼ qʼuele chaʼan añʌch cabʌl bajcheʼ coltʌbil i chaʼañet Dios? (1 Co. 2:10). Mi tsaʼ jacʼʌ ili cʼajtiya tac chaʼan cheʼʌchi, ¿yom ba i yʌl chaʼan yajcʌbilet chaʼan maʼ majlel ti panchan? Maʼañic. Pejtelel i wiñicob Jehová miʼ mejlel i yubiñob i bʌ bajcheʼ jatet anquese yajcʌbilob o maʼañic. Cheʼ jaʼel, tiʼ chʼujul bʌ i yespíritu, Jehová miʼ mejlel i yʌqʼuen i pʼʌtʌlel majqui jach bʌ i wiñicob chaʼan miʼ melob pejtelel jiñi, mach yʌlʌyic baqui bʌ i pijtayajob. Tiʼ sujm, mi jatet mach a ñoj ñaʼta mi Jehová tsiʼ yajcayet tiʼ chʼujul bʌ i yespíritu, yom i yʌl chaʼan mach yajcʌbilet o bombilet. Jiñi yujiloʼ bʌ tiʼ sujm maʼañic miʼ cʼajtibeñob i bʌ miʼ yoque tsaʼʌch yajcʌntiyob: ¡Yujilob chaʼan cheʼʌchi!

15. ¿Bajcheʼ miʼ mejlel lac ñaʼtan chaʼan pejtelel jiñi muʼ bʌ i yʌqʼuentelob jiñi chʼujul bʌ espíritu mach yajcʌbilob chaʼan miʼ majlelob ti panchan?

 ¹⁵ Jiñi Biblia miʼ yʌl chaʼan cabʌl xucʼul bʌ i wiñicob Dios tsaʼ aqʼuentiyob jiñi chʼujul bʌ espíritu, pero maʼañic tsaʼ yajcʌntiyob chaʼan miʼ majlelob ti panchan. Jumpʼejl ejemplo, jiñi chʼujul bʌ espíritu i chaʼan lac Yum tsaʼ cʼoti tiʼ tojlel David (1 S. 16:13). Ili tsiʼ colta i chʼʌmben i sujm jiñi wocol bʌ ti cʌñol tiʼ tojlel Jehová yicʼot tsiʼ colta chaʼan miʼ tsʼijbun cabʌl jun tac muʼ bʌ lac taj yaʼ ti Biblia (Mr. 12:36). Pero jiñi apóstol Pedro tsiʼ yʌlʌ chaʼan «maʼanic tsaʼ letsi majlel David ti panchan» (Hch. 2:34). Jiñi Juan xʼAcʼ chʼʌmjaʼ «butʼul ti Chʼujul bʌ Espíritu» tsaʼ ajñi (Lc. 1:13-16). I jiñi Jesús tsiʼ yʌlʌ: «Ti pejtelel i yalobilob xʼixicob maʼanic yambʌ ñuc bʌ bajcheʼ Juan tsaʼ bʌ i yʌcʼʌ chʼʌmjaʼ». Pero tiʼ tsictesa chaʼan Juan maʼañic mi caj i chaʼlen yumʌntel yicʼot yaʼ ti panchan (Mt 11:10, 11). Jehová tsiʼ cʼʌñʌ jiñi chʼujul bʌ i yespíritu chaʼan miʼ melob ñuc tac bʌ eʼtel ili wiñicob, pero maʼañic tsiʼ cʼʌñʌ chaʼan miʼ yajcañob chaʼan miʼ majlelob ti panchan. ¿Yom ba i yʌl chaʼan maʼañic tsiʼ wen pʌsʌyob i xucʼtʌlel cheʼ bajcheʼ jiñi yajcʌbiloʼ bʌ chaʼan miʼ majlelob ti panchan? Maʼañic, cojach yom i yʌl chaʼan Jehová mi caj i chaʼ aqʼueñob i cuxtʌlel ila ti Lum (Jn. 5:28, 29; Hch. 24:15).

16. ¿Baqui yomob chumtʌl jiñi yonlel i wiñicob Dios ili ora?

¹⁶ Ili ora, lʌcʼʌ tiʼ pejtelel i wiñicob Dios chumuloʼ bʌ ila ti Lum maʼañic miʼ pijtañob chaʼan miʼ majlelob ti panchan. Cheʼ bajcheʼ Abrahán, Sara, David, jiñi Juan xʼAcʼ chʼʌmjaʼ yicʼot yonlel wiñicob xʼixicob ti wajali, yomob chumtʌl ila ti Lum cheʼ wolix (yʌquelix) i mel i yeʼtel i Yumʌntel Dios (He. 11:10).

17. ¿Chuqui ti cʼajtiya tac mi caj i jajqʼuel ti yambʌ estudio?

¹⁷ Cʌylemobto chaʼtiquil uxtiquil yajcʌbiloʼ bʌ ila ti Lum. Jin chaʼan, i tilelʌch cheʼ an cabʌl cʼajtiya tac (Ap. 12:17). Jumpʼejl ejemplo, ¿bajcheʼ yom miʼ qʼuelob i bʌ jiñi yajcʌbiloʼ bʌ? ¿Bajcheʼ yilal yom lac melbal tiʼ tojlelob jiñi muʼ bʌ i cʼuxob jiñi pan yicʼot miʼ japob vino tiʼ Cʼajtesʌntel i chʌmel Jesús?¿Yom ba mi laj cʼojoʼtan cheʼ ti jujumpʼejl jab miʼ bej pʼojlel jiñi muʼ bʌ i yʌlob chaʼan tsaʼ yajcʌntiyob? Ti jiñi yambʌ estudio mi caj i jajqʼuel ili cʼajtiya tac.